Jamita Partangiangan Epistel Minggu 3 November 2024 Minggu Paduapulutoluhon Dung Trinitatis tarsurat di buku 5 Musa 6 ayat 1 - 9. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Manghaholongi Debata dohot Manghaholongi dongan Jolma." Rap ma hita mangihuthon hatoranganna.
Pendahuluan
Buku 5 Musa on i ma songon barita "jujur ni pardalanan" (kilas balik) ngolu ni bangso Israel tarlumobi ma padan ni Debata tu bangso i na niihot ni uhum manang patik. Kilas balik on dipasahat si Musa tu sundut paduahon (angkatan kedua dan mungkin juga ke angkatan yang ketiga) bangso Israel naung jonok tu tano Kanaan na naeng si bongotannasida. Molo sundut na parjolo na ruar sian tano Misir nunga marujung be ngolunasida di angka pardalanan jala godang do na mate hinorhon ni panguhumion na sian Debata ala ni angka dosanasida. Deba sian sundut na mangihut on ndang be marningot di Paska na parjolo, mamolus Laut Merah dohot tingki pangalehon ni Debata di patikNa na 10 i di Dolok Sinai. Ala ni i ringkot do ditonahon tu nasida asa ingot jala hiras maniop padan, patik ni Debata lumobi ma asa unduk jala satia huhut di bagasan biar mida Jahowa asa dijalo nasida pasupasu ni Debata. Molo ndang songon i, bura do tagamon na ro tu nasida molo tung dihalupahon jala tois nasida di patik ni Debata nang pe mian nasida di Tano Kanaan. Panurirang Musa do na manurat Buku 5 Musa on jala dipasahat do tu bangso Israel sijahahononhon di adopan ni bangso i ganup 7 taon di ari raya Parlapelapean dalan paingothon bangso i asa tongtong marhabiaran tu Jahowa.
Pembahasan
Adong 3 parenta manang tona sian turpuk on na ringkot, na dipasahat tu bangso Israel nang di ngolunta nuaeng pe:
1. Biar Mida Jahowa (ayat 1-3).
Laho pasahathon parenta i tu bangso Israel dipangke si Musa do marhite 3 pandohan, i ma tona, aturan dohot uhum. Tona marhadomuan do i tu syarat-syarat padan ni Debata dohot Bangso Israel sipatupaonnasida. Aturan i ma parenta naung diuhir di batu, disurathon tu panuratan (isarana Patik na 10 i na disurat di 2 loh batu, 2 Musa 31:18). Uhum, martudutudu do itu pambahenan ni Debata na sintong jala na tigor tu ganup jolma na mangulahon dohot na so mangulahon Hata ni Debata. Diajarhon si Musa do parentaon tu bangso Israel asa diulahon nasida, molo dung mian nasida di tano na pinarbagabagahon i. Ndang adong lapatanna diboto nasida angka tona dohot aturan i alai ndang diulahon. "Na umboto mambahen na denggan, gabe ndang diulahon, na mardosa ma ibana disi" (ida Jakobus 4:17). Ndang adong lapatanna taantusi songon dia do na martangiang, alai ndang hea olo hita martangiang. Ndang adong lapatanna di hita angka parbinotoan taringot Jesus, alai ndang olo hita marsomba tu Ibana, manghaporseai jala manghatindanghonsa. Alai molo unduk jala diulahon bangso Israel do tona dohot angka aturan i di ngolunasida, gabe taruli pasupasu ma nasida di tano Kanaan i.
Diajarhon si Musa angka aturan i tu bangso Israel asa marhabiaran bangso i tu Jahowa, Debata. Marhabiaran lapatanna hormat, unduk, satia, marholong ni roha tu Debata dohot aturanNa. Biar mida Jahowa i ma marhaunduhon jala satia di sude tona dohot aturan naung nilehon ni Debata tu bangso i. Jesus mandok: "Molo holong rohamuna di Ahu, radotanmuna do angka patikHu" (ida Johannes 14:5). Na mangaringkoti mangaradoti angka patik manang aturan ni Debata taruli do ganjang ni umur, marhasonangan, torop pinomparna di tano na binabagabagahon ni Debata Jahowa, jala hot maringan di tano na gok susu dohot situak ni loba. Marhabiaran ma nang hita di angka tona dohot aturan naung nilehon ni Debata, asa dilehon di hita uhumNa na sintong na tigor i, i ma pasupasu na manghorhon hangoluan dohot hasonangan.
2. Manghaholongi Jahowa Debata (ayat 4-5).
Digoari do bagian on "Shema Yisrael" (hata Heber: Shema lapatanna mendengar) i ma Panindangion Haporseaon ni bangso Israel na maghatindanghon Jahowa Debata, Jahowa Sasadasa do. Panindangion on patuduhon pulik ni bangso Israel maradophon angka bangso na asing na humaliangna na manomba angka debata ganaganaan. Diajarhon si Musa do panindangion di nasida asa tung tangkas ditanda jala diboto angka pinompar ni Israel, sada do Debata na tutu. Patik ni Debata na parjolo mandok: "Ndang jadi marangkup Ahu adong Debatam" (ida 2 Musa 20:3). "Sada do Debata, Ama ni sasude, Sigomgomi saluhut, Sitorusi saluhut jala Siingani saluhut" (ida Epesus 4:6). "Ai sada do Debata, jala sada do nang Pangulu ni Debata dohot jolma, i ma jolma Kristus Jesus i" (ida 1 Timoteus 2:5).
Ala sada do Jahowa Debata, dibahen i haholongan do Ibana Sasadasa. "Ingkon haholonganmu Jahowa, Debatam sian nasa roham dohot sian nasa ateatem dohot sian nasa gogom" (ayat 5). Sandok sian nasa hadirionnasida ingkon haholonganna do Tuhan Debata. Ndang marhite holong na sipaula manang holong na marlaok, manang holong na tarpaksa lumobi ma holong na marpambuat. Alai holong sian nasa ias ni roha, ateate dohot gogo. Roha, ateate dohot gogo patuduhon hagogok ni ngolu i, jala marhite i do haholongan Tuhan Debata. Parenta manghaholongi Tuhan Debata sian nasa roha, ateate dohot gogo marlapatan do i, Ibana ma na parjolo jala na ummangat ummarga di ngolunta. Tuhan Debata gabe arta na ummarga di ngolunta. Molo Ibana arta na ummarga, di Ibana ma nang rohanta. "Ai ia disi artam, disi do roham" (ida Mateus 6:21). Di jamita di dolok didok Jesus do: "Ndang haoloan sada halak dua induk" (ida Mateus 6:24). Lapatanna, ndang tarbahen hita mardua holong ni roha dohot hasatiaon. Holong ni roha dohot hasatiaon tu Tuhan Debata pe dang jadi marlaok, ai sai na jaloonta do uhum ni Debata hinorhon ni na si songon i.
3. Mangajarhon jala Mamodahon tu Angka Ianakhon (ayat 6-7).
Pandohan ni si Musa na pinasahatna tu bangso Israel ingkon maringan di bagasan rohanasida ("Hati" di sini berarti pikiran, kemampuan berpikir manusia). Patik ni Debata (baca: Firman Tuhan) ingkon mian jala manggohi roha ni bangso Israel huhut gabe ngolu ni bangso i. Ndada holan Israel, alai nang hita pe ingkon mian di Hata ni Debata i di bagasan ngolunta jala marojahan di hataNa i sandok gulmit ni ngolunta. "Gugun ma hata ni Kristus maringanan di tongatongamuna" (ida Kolosse 3:16). I do umbahen na didok si Musa: "Ingkon parateatehononmu luhut hata on, angka na hutonahon tu ho sadari on" (ayat 6). Parbinotoan dohot pangantusion taringot tu tona, aturan dohot uhum ni Debata ndang boi holan di sada partingkian manang sada sundut ni bangso Israel, alai ingkon tangkas do nang sahat tu angka sundut na mangihut. Ala ni i do si Musa mangondolhon ingkon gogoon ni bangso Israel do mangajarhon Hata ni Debata tu angka ianakhonnasida. Hata ni Debata ingkon gabe warisan na turun temurun do di sandok bangso Israel. Suang songon i do nang di hita angka na porsea, mangajarhon Hata ni Debata tu angka ianakhonta sihangoluhonna. Pandohan "gogoonmu," patuduhon ulaon na torus, ringgas diulahon, ulaon na so boi marujung saleleng mangolu. Di sude kesempatan dohot partingkian ingkon pangkeon do i laho mangajarhon dohot manaringoti Hata ni Tuhan i. Uju hundulhundul di bagasan jabu, manang mardalani, manang laho modom pe nang hehe muse ingkon taringotan jala podahonon do Hata ni Debata tu angka ianakhon.
Sungkunsungkun sipahusorhusoronta nuaeng di ngolunta: "Hea dope tapamasa ulaon na rap martangiang dohot manjaha Hata ni Debata huhut rap marende mamuji Tuhan di tongatonga ni keluarganta?" Turpuk on paingothon hita asa gogoonta ma mangajarhon dohot manaringooti Hata ni Debata tu angka ianakhonta. Ringkot ni Hata ni Debata na ingkon peopon ni bangso Israel di ngoluna, ingkon do sahat tu na rahuthonon i di tangan bahen tanda jala siingoton. Marlapatan do i, dipangido Debata ingkon boanon do HataNa jala baritahononhon tu saluhut jolma di ganup partingkian na nilehonNa. Jala manang aha pe na laho siulaon, ingkon hombar do i tu Hata ni Debata. Ingkon pasidingon do tangan laho mangula angka na maralo tu Patik ni Debata. Udut ni i muse, ingkon surathonon do Hata ni Debata di tohang ni jabu dohot pangumbangan (ayat 9). Hata ni Debata ndang boi tarhurung holan di bagas ni bangsoNa. Hata ni Debata ndang sae holan di bagas joro ni Debata, alai ingkon haruar do sian i berengon jala parsaulihonon ni bangso na asing.
Kesimpulan dan Refleksi
Na ummangat jala na ummarga na manongtong di Tuhan Debata i ma haporseaon na mangolu tu Tuhan Debata di bagasan Jesus Kristus naung paluahon hita jolma sian dosa. Haporseaon na mangolu i ma marhabiaran tu Debata Jahowa, Debata na Sasadasa. Marhabiaran i ma na mambahen sangap jala hormat huhut manghaholongi Ibana dohot tonaNa sian nasa roha, ateate dohot gogo. Biar mida Jahowa i ma mangharingkothon mangaradoti tona dohot aturanNa jala mambahen hataNa gabe ojahan ni ngolu si ganup ari. Di bagasan roha biar dohot manghaholongi Ibana do tumpahon ni Tuhan Debata ngolu mangalehon hasonangan, hangoluan dohot ragam ni pasupasuNa jala hot manongtong asi ni rohaNa di hita.
Haporseaon na mangolu i laos ajarhonon jala podahonon ma i tu angka ianakhon di angka sundut na umposo. Ulaon pangajarion dohot pamodaion taringot Hata ni Debata ingkon gabe arta na umarga do i siteanon tu ganup ianakhon. Jala ulaon i gabe sada hasomalan (tradisi) na uli do i na ingkon torus masa di ngolu ni angka na porsea. Amen.
1 komentar
Mambantu situtu lao parade jamita
Tuhan ma mangaramoti amang dht sude keluarga 😇😇😇🙏🙏🙏🙏