Jamita Minggu 24 November 2024 Minggu Akhir Tahun Gerejawi tarsurat di buku Daniel 7 ayat 9 - 14. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Harajaon ni Debata Manongtong Ro di Salelenglelengna." Rap ma hita mangihuthon hatoranganna.
Pendahuluan
Ia Panurirang Daniel mangolu di zaman ni pemerintahan Raja Nebukadnesar (Raja ni Bangso Babel) sekitar tahun 536-530 SM. Panurirang Daniel i ma halak Israel Selatan (Jehuda) na diboan tu Babel laho dijadihon pegawai istana (juru minum ni Raja). Jala di Babel goar ni si Daniel diganti raja i do gabe Beltsasar (Daniel 1:7). Dibasabasaon Debata do tu si Daniel sada karunia manang talenta, i ma: marbinoto alatan (penglihatan) dohot angka nipi (Daniel 1:17), i do umbahen di buku Daniel on mulai sian bindu 2 sahat tu bindu 12 manariashon taringot tu penglihatan dohot nipi, jala holan si Danel sandiri do na boi mangantusi lapatan ni angka nipi i. Suang songon i do tong di turpuk ni Jamita on, manaringoti angka penglihatan dohot nipi ni si Daniel i ma "binatang na opat i dohot pangungkapon taringot tu panggomgomion ni Anak ni Jolma i."
Di Minggunta sadari on, apala di Minggu Ujung Taon Parhuriaon, di na tapatupa parningotan di angka donganta sahaporseaon naung parjolo marujung ngolu di bagasan sataon parhuriaon on, di na taingot jala tahatindanghon tongtong na mangolu do na porsea di Jesus Kristus Sipalua i atik pe naung jala naeng marujung ngoluna di portibi on, dipanghulingi Debata hita marhite HataNa na mansai uli sadari on. Impola ni Hata ni Debata mangondolhon "la angka harajaon di portibi on, ndang marimbar angka harajaon na gogo situtu ndang manongtong. Holan Harajaon ni Debata do na manongtong. la angka raja na adong di portibi on. ndang marimbar angka raja manang uluan ni angka bangso na tung gogo situtu, angka raja na so demokratis dohot angka raja na demokratis pe ndang manongtong. Holan Debata na mangarajai saluhut i do na manongtong.
Pembahasan
Di bindu 7 ayat 1 sahat tu ayat 8, tangkas do disi disurathon taringot tu ujung ni angka harajaon na balga na naung manusai ngolu ni bangsoNa, i ma harajaon Babel, harajaon Persia, harajaon Gorik na pinungka ni Raja Alexander na bolon, sahat tu angka raja na manguduti harajaonna niuluhon ni angka jenderalna (i ma dinasti Seleucid dohot di Ptolomeus), sahat tu raja na ro sian dinasti Seleucid i ma Antiochus IV Epiphanes na di ayat 8 digoari sada binatang na paopathon na martanduk sampulu jala tubu sada tanduk sian angka i (ayat 7-8). Dung dipatorang hinajorbut ni na opat songon binatang i (ayat 8), dipatolhas ma di ayat 9-14 taringot tu na mangihut on:
Hagogoon ni Debata sihobason ni marribu dohot marloksaloksa jolma (ayat 9-10). Ia ayat 9 on adong hasarupaonna tu buku Pangungkapon 1:14, 20:4, jala na tarsurat di ayat 10 sarombang tu Pangungkapon 5:11, 20:12. Turpuk on na naeng patoranghon taringot tu "Harajon ni Tuhan Jesus Kristus" i ma harajaon na niuluhon ni Tuhan Jesus Kristus sandiri sebagai raja na gok hamuliaon, burju jala na lambok jala ndang memimpin marhitehon tangan bosi (otoriter) dohot ndang marhiteon pertumpahan darah. Nasa penguasa / raja na ditompaNa dohot angka surusuruanNa do sasudena i, unduk do tu Tuhan Jesus jala setia nasida melayani Ibana selaku Raja dohot Sitompa saluhut (ida Daniel 2:47). Di pangungkapon na tu si Daniel on digombarhon ibana, ia Debata na marhagogoon situtu na harajaonna manongtong i dohot dua hadirion.
Hadirion na parjolo, i ma "Ibana na so suda arina" na tongon hundul di atas ni angka habangsa na marjillamjillam api na marroda na marnalanala, na marpahean na saksak songon itak jala marobuk songon hapas na binusur (ayat 9). Hagogon dohot habadiaon ni Debata digombarhon mathite i. Di Padan na Robi dipangke do api patoranghon hadirion ni Debata Jahowa na mandok na gogo situtu do Ibana (ida 1 Musa 15:17, 2 Musa 3:2, 19:18, 13:21). Di jolona ruar sada sunge api, jala mabaor sian adopanNa na manghobasi Ibana, jala marloksaloksa jongjong di adopanNa (ayat 10). Disi ma ari panguhuman ditontuhon jala angka buku dibungka. Tona ni si Daniel maralohon raja Antiochus IV Epiphanes i ma mansai tangkas: Atik pe bahat dibunu ibana, jala dipalea ibana Debata Jahowa, alai ndang tarotapisa panombaon tu Debata na gogo situtu i. Jala tu angka na satia tu Debata alai manaon dibahen raja i, tangkas do ujung na denggan di nasida, i ma tuk do nasida manghobasi Debata atik pe ro sunge api na mansai mohop situtu binahen ni raja i maradophon nasida. Gariada tahe di na dibungka angka buku, ndang diuhum nasida.
Hadirion na paduahon, i ma "sahalak na songon anak ni jolma" na diida ibana di bagasan pangungkapon borngin na ro marhite ombun di langit. Ala diida si Daniel tong na tarboan ibana tu jolo ni "Ibana na so suda arina" i (ayat 13), gariada tahe dibasabasahon tu ibana pamarentaon na manontong na so tupa munsat sian ibana dohot hamuliaon nang harajaon sinomba ni saluhut bangso na marpanghuling marragam. Anak ni Jolma: Lapatanna disi, i ma mengarah tu "Mesias/Juruselamat" (sada Raja na mansai gogo jala boi paluahon bangso Israel kaluar sian habuangan ni Babel), jala molo di Padan na Imbaru martudutudu tu Tuhan Jesus Kristus do na gabe Mesias manang Sipalua. Jala sahat tu Ibana na so suda ariNa, na marlapatan ma i "na manontong manang kekal." Harajaon ni Debata na manongtong jala Debata na gabe Raja dohot nampunasa harajaon i, jala Ibana gombaron huaso banua ginjang na manguluhon uhum dohot hasintongan. Ndang masa di haroroNa i mambaen ganggu jala marsak angka na marnidasa. Alai gabe patubuhon panghirimon, hamenahon dohot hadameon do harajaon ni Debata jala bersifat manongtong, ndang songon harajaon na adong di portibi on na so manongtong, na boi do masa ganti angka raja nang harajaonna i pe na mansohot do.
Ayat 11-12: Binatang na nidokna dison i ma sada simbol ni harajaon manang penguasa na adong di portibi na menguasai harajaon ni bangso Israel, sala satuna i ma Harajaon Babel na gabe sombong, dohot harajaon ni bangso na asing na gabe musu ni bangso Israel. Adong penafsir na mencoba patoranghon lapatan ni binatang na opat i tudos ma i tu opat bangso na berkuasa hatiha i, i ma bangso Babel, Media, Persia dohot Junani. Na marlapatan do i sude bangso manang harajaon na gabe musu ni bangso Israel na ingkon diuhum jala dibinasahon di akhir zaman (Daniel 2:44 "Alai di tingki ni harajaon ni angka raja i, padirion ni Debata na di surgo i, sada harajaon na so tarpapatu ro di saleleng ni lelengna, gomgomanna pe ndang pasahatonna tu bangso na asing; ropuhonna do tahe sogot saluhut angka harajaon i, jala pangsinghononna, alai hot do anggo nasida i ro di saleleng ni lelengna").
Ndang manongtong raja nang harajaonna, marujung do, alai ro ma na manongtong na songon Anak ni Jolma. I ma panghirimon mesianis na pinatubu ni Debata tu bangsoNa. Jala taboto tangkas, leleng do dipaima bangso Jahudi haroro ni na songon Anak ni Jolma i (Heber: bar'enas). Taboto tangkas na di Evangelium Markus na patoranghon Jesus Anak ni Debata na ingkon manaon, dua ratus taon hurang lobi dung panurirangon pangungkapon ni si Daniel on, Jesus sandiri na dihatindanghon Apostel Petrus, Mesias, Anak ni Debata i do na mandok Ibana do "na songon anak ni jolma na ro marhite angka ombun i" (Markus 2:10, 28, 8:31, 38, 9:9, 12, 31, 10:33, 45, 13:26, 14:21, 41, 62). Na asing na mamangke hata i (Johannes 12:34, Ulaon ni Apostel 7:56, Pangungkapon 1:13, 14:14) mamangkesa manudu tu Jesus Kristus. Ala ni i, atik pe ndang apala diboto si Daniel tangkas ise na songon anak ni jolma i, jala ala anak ni Debata do Jesus Kristus i, jala dung hehe Ibana sian hamatean nunga dipatimbo Ibana satimbotimbona jala disomba angka na porsea di Ibana rap dohot Debata Ama nang Tondina. Dohot jempek hata, sada do Ibana dohot Debata na tumimbul gogo i, na digombarhon songon "ibana na so suda arina i," ndang pajolohu hita mandok na manudu tu Debata na marharajaon na manongtong i do tangkas di ujungna, na sinuriranghon ni panurirang Daniel on uju mangadopi parungkilon bolon bangso ni Debata i. Tu raja Antiochus IV Epiphanes nunga barita na mansai karas barita pinatolhas ni si Daniel on tu ibana: Ro ma ujungna hatop, na marharajaon na manongtong i. Alai nunga tongon ro na songon anak ni jolma i marhite ombun na manongtong harajaonna, sisombaon ni sandok bangso.
Sai hot ma tatiop i. Laos ringkot tongtong hita satia tu lbana di harajaonNa na manongtong i. Na so jadi hita marsigantung tu angka raja na ro sian hajolmaon na so manongtong, tarlumobi angka na jahat. Ndang jadi hita umbiaran mida nasida sian mida Debata na marhagogoon na tumimbul i, na badia i. Bahen ma Ibana Rajanta na manongtong i. Ai Debata Raja na satia do Ibana nang di na taadopi pe partingkian na maol di portibi on. Ai disarihon Ibana do hita di portibi on nang sahat ro di na ro ajal ni hasiangan on.
Laos boi do tapangke tingki mangarimangrimangi songon dia hita mamereng dirinta sandiri. Molo dipasahat Debata tu hita sada tanggung jawab na balga manguluhon donganta jolma di portibi on nang manguluhon parsaoran, misi nang ulaon holong ni angka na porsea i di tongatonga ni dohot marhite sian Huria ni Kristus i, jamot hita: Unang tarajumi dirinta raja na marharajaon na manongtong i. Unang. Sotung songon raja Antiochus IV Epiphanes hita na dietong jom ariari ni harajaonna ala dileai ibana Debata, jala dipasingkorsingkor ibana ngolu ni angka na porsea i.
Molo adong sian hita na tongon marungkil ala ni haporseaonna, tatap ma tu jolo: Pasti do ujung na uli ni angka na porsea na martahan di na marungkil i: I ma masuk bilangan ni angka na manghobasi Debata ibana, atik pe ro sunge api di antara ni ibana dohot habangsa ni Debata na marjillamjillam i, tarbahensa do manghobasi Ibana, jala di ari panguhuman i, tarsurat do goarna di buku hangoluan i. Mangihuthon hata ni Debata na adong di Daniel 7:9-14 i, dihamonanghon Debata do ngolu ni na manaon ala ni goarNa, ala ni na martahan manomba Ibana nuaeng nang di ari panguhuman sogot atik pe marungkil. Ganup naung jumolo borhat sian tongatonganta rap dohot Kristus na manongtong i, manongtong do ngoluNa di harajaonNa na manongtong i.
Kesimpulan dan Refleksi
1. Di Minggu Ujung Taon Parhuriaon on, paingothon hita asa manongtong mangasahon Tuhan Jesus Kristus di nasa parngoluonta, ndang na gabe mangasahon gogo nang pingkiranta sandiri tarsongon bangso Babel na sai mangasahon hagogoon ni nasida dohot dewa ni nasida. Jala di Minggu on laos didok do Minggu Parningotan ni Angka na Monding. Alai sasintongna ndang na holan marningot angka na monding, alai paingothon hita jolma do, na adong do ujung ni ngolunta di portibi on. Dipaingot Hata ni Debata hita, sogot haduan ingkon do mangadopi hamatean. Nunga dipatorang si Daniel tu Raja Nebukadnesar, porlu tarimangi, ndang adong na manongtong di portibi on. Ingkon do marujung sude, bahkan musnah, digantihon tu pambaenan ni Debata na manongtong. Hita sebagai halak na porsea, ingkon do mameakhon panghirimonta tu harajaon ni Debata na manongtong i. Sebelum masa angka panguhuman, dilehon dope di hita kesempatan laho paubahon dirinta mangulahon angka na dihalomohon ni Debata. Ala ni i dungo ma hita, tatangkasi ma ngolunta saonari nang sogot pe, asa nasa ariarinta di portibi on tabahen mangulahon na dihalomohon ni Debata.
2. Mansai ringkot do tarimangrimangi hagogoon ni Debata dohot hatongtongon ni harajaonNa. Penglihatan Daniel menegaskan bagi kita bahwa Allah adalah penguasa dunia ini. Kuasa dan kerajaanNya tidak tergoyahkan oleh kuasa apapun. Orang percaya diingatkan untuk tidak tunduk dan menyerahkan diri pada kuasa dunia, yang seakan-akan tampil sebagai raja dan penguasa dunia. Sebagai orang percaya kita diutus untuk memberitakan kabar sukacita, kedaulatan Allah Sang Penguasa segalanya.
3. Ala naung gabe ruas ni harajaon ni Debata na manongtong i hita, binahen ni ulaon ni Jesus Kristus na hundul di siamun ni habangsa ni Raja ni sandok raja i, margogo ma hita manghatindanghon harajaonNa na manongtong i. Ndang jadi mabiar maradophon angka raja na so manongtong i. Raja ni harajaon ni Debata na manongtong i do sihabiaranta. Ibana do si sombaonta.
4. Ingot ma ari hamamatem/ ingatlah hari kematianmu (memento mori). Pandohan "memento mori" on paingothon hita, ia ngolu na di portibi on marujung jala parsatongkinan do. Asa sadar hita, ndang adong na hot jala manongtong di hasiangan on. Memento mori ndada hata na pabiarbiarhon hita i, alai dalan paingothon hita do asa mangarade diri di na paimahon tingki na ingkon tadinghononta portibi on. Ala ni i eahanta ma ngolu na manontong i, na pinarade ni Debata di harajaonNa na hot jala manongtong ro di salelenglelengna. Marhite na rade paimbaru ngolu, paubahon parange nang pangalaho, mangulahon holong ni roha. Ai hamatean i ndang taboto sadihari tingkina, arina, jomna, alai molo naung rade do hita, ndang adong be na gabe sihabiaran, baliksa gabe sihalashononta do i. Amen.
Posting Komentar