Jamita Partangiangan Epistel Minggu 10 November 2024 Minggu Paduapuluopathon Dung Trinitatis tarsurat di buku Lukas 21 ayat 1 - 4. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Mamelehon Diri Sian Nasa Roha." Rap ma hita mangihuthon hatoranganna.
Pendahuluan
Evangelium Lukas i ma buku na sinurathon ni sahalak na margoar si Lukas na ditujuhon tu sahalak na margoar Teopilus. Mangihuthon angka pande bisuk, si Teopilus on i ma sahalak sian bangso Italia naung manjalo jala porsea tu Tuhan Jesus hinorhon ni panghobasion ni si Lukas dohot si Paulus hirahira taon 56 Dung Kristus. Lukas marharoroan sian halak Gorik, naung porsea jala na digohi Tondi Porbadia laho manurat buku on sipangkeon di tongatonga ni halak Kristen na so halak Jahudi. Sahalak pandaoni hian do ibana jala halak na berpendidikan (ida Kolosse 4:14) jala laos dongan ni Apostel Paulus do ibana manghobasi papatarhon Barita na Uli (ida 2 Timoteus 4:11). Disurathon si Lukas do Barita na Uli on tu halak Kristen na so halak Jahudi dalan laho pasahathon barita na singkop jala na sintong taringot tu sude na niula dohot angka pangajarion ni Tuhan Jesus sahat ro di na tarhinsat Ibana tu banua ginjang. Huhut patolhashon tu halak na so Jahudi, Jesus do Sipalua jala alus ni Debata tu angka jolma na mangalului dalan haluaon.
Pembahasan
Di ngolu ni na marhaporseaon, pasahathon pelean i ma sada ulaon na so tarsirang sian parsombaon (kebaktian atau ibadah) na tapatupa di bagas joro, partangiangan rumah tangga dohot angka ulaon kebaktian na marragam na tapatupa. Praktek manang ulaon na pasahathon pelean on sasintongna ndang praktek na imbaru be on, nunga tung mansai leleng ulaon na pasahat pelean on mardalan. Di Padan na Imbaru godang do catatan taringot tu na pasahat pelean. Sada sian angka catatan i, i ma napasahat pelean sahalak na mora dohot sahalak ina na mabalu, na pogos, na gabe turpuk Epistel nuaeng. Di Padan na Robi gumodang dope jumpang angka barita taringot tu na pasahat pelean. Di mula ni angka jolma na parjolo i pe nunga adong praktek na pasahat pelean tu Debata, i ma mamungka sian si Kain dohot si Abel. Molo pe ndang tarsurat, alai na pasti, ala ni pangajarion ni si Adam dohot si Hawa do tu anakna si Kain dohot si Abel laho pasahat pelean i. Ala ni i boi dohonon nunga tung leleng situtu (lobi sian 6000 taon mamungka sian tingki ni si Adam sahat tu partingkian si nuaeng on) praktek na pasahathon pelean on. Alai nang pe songon i godang dope di tongatonga ni halak Kristen na hurang mangantusi songon dia do na pasahat pelean na sintong tu Debata marhite HuriaNa. Parsiajaronta ma i marhite turpuk on, i ma pelean ni na mora dohot pelean ni ina na mabalu, na pogos.
1. Pelean na Mangolu, i ma Sian Roha na Ias.
Dibahen si Lukas do barita taringot tu pelean ni ina na mabalu di holang ni barita taringot angka sibotosurat dohot angka na torop di bagas joro (bindu 20 dohot 22). Di bindu andorang turpuk on dibaritahon do angka sibotosurat na mangalului hasangapon di diri marhite ulaon parugamoon. Sai lomo rohana hundul di jolo ni parpunguan dohot inganan na sangap jala na sai ingkon jumolo dihobasi (dilayani). Na mangihut muse, dung salpu barita taringot pelean ni ina na mabalu, disurathon si Lukas do angka jolma na torop di tongatonga ni bagas joro i na sai manaringoti hinauli ni bagas joro i. Mangihuthon pandapot ni angka pande bisuk, angka na torop i, i ma halak Levi manang malim na mangula di bagas joro i. Malim do nasida alai nunga impolan di hepeng jala mambahen ugamo manang pelayanan laho manggohi hagiot ni rohana (memanfaatkan agama bagi kenikmatan dan kepuasan diri).
Marasing do angka sibotosurat dohot malim i tu ina na mabalu i. Ugamo dipangke nasida bahen hamuliaon dohot pamora diri. Alai anggo di tangan ni ina na pogos i, dibahen do ugamo dalan mamelehon dirina. Holong ni rohana tu jolma dohot tu Debata do dipatuduhon ina na mabalu i. Ndada holong tu dirina. Ndang sian roha na paksa ibana pasahathon peleanna, alai sian las ni rohana do. Dipelehon do ndada holan hepengna, alai tung saluhut bohal ni ngoluna di bagasan ias ni roha, na soada be tading di ibana. Dihaholongi Debata do angka na mamelehon peleanna sian ias dohot las ni roha. Apostel Paulus mandok: "Ganup ma nionjar ni rohana, unang ma sian muruk manang sian na so tarjua; ai dihaholongi Debata do na las roha mangalehon" (2 Korint 9:7).
2. Mamelehon Ala Holong ni Roha di Tuhan.
Pangantusion taringot tu pelean na sintong marsirainan do i boha sikapta tu arta manang hepeng. Dengan kata lain, persembahan adalah ekspresi sikap orang Kristen terhadap uang. Tuhan Jesus mandok: "Ai ia disi artam, disi do roham" (Mateus 6:21). Marlapatan do i, molo disi artanta, disi ma nang rohanta. Molo hepeng manang sinamot do na taanggap gabe artanta, disi ma rohanta. Molo hepeng do arta di hita, gabe pangkeonta ma Tuhan i mangharingkothon hepeng di ngolunta. Alai moloTuhan i do arta na ummarga di hita, pangkeonta ma hepeng i, pelehononta tu Tuhan mangharingkothon ulaon lomo ni roha ni Tuhan i. Halak na holong roha di hepeng, bangkol do rohana marpelean tu Tuhan i, alai halak na holong roha di Tuhan i, las do rohana pasahathon pelean na ummuli di Tuhan i. Ina na mabalu, na pogos, na dibaritahon si Lukas on patuduhon na humolong do rohana di Tuhan i sian na adong di ibana. Gabe dipelehon do nasa na adong di ibana dohot na gabe bohal ni ngoluna.
3. Pelean na Sintong i ma Bagabaga Haporseaon (Janji Iman).
Di ayat 4 on tangkas do dipaboa si Lukas, pelean ni ina na mabalu i sian pogosna i do dipasahat sasude na pineopna. Di angka jolma na holongna di hepeng haotoon do na niula ni ina na mabalu i. Alai di angka na mananda huaso dohot asi ni roha ni Debata, parbue ni haporseaon do na binahenna i. Tutu molo sian bilanganna, otik do na nilehon ni na mabalu i, holan 2 rimis do, martimbanghon pelean ni angka na mora i. Alai si Lukas manurathon holan na 2 rimis nama na adong dipeop na mabalu jala ido bohal ni ngoluna. Alai anggo angka na mora i, godang dope tading di ibana sian hamoraonna, hinorhon ni i ndang adong sihabiaranna taringot tu ngolu siaparina tu marsogotna i. Alai ndang songon i anggo di na mabalu i, tung so ada be na tading di ibana ala naung nilehonna i bahen peleanna. Tontu dipelehon na mabalu i songon i ala ni haporseaonna do i di asi ni roha ni Debata na marmuduhon ibana.
Mangihuthon Heber 11:4, dijalo Debata do pelean ni si Abel ala dipelehon di bagasan haporseaon, gabe dumenggan peleanna di adopan ni Debata sian pelean ni si Kain. Boasa pelean ni si Abel dijalo Debata alai pelean ni si Kain ndang dijalo? Ala dipelehon si Abel do na dumenggan sian birubiruna, i ma buhabaju ni birubiruna dohot sian tabotabona. Boasa barani si Abel mamelehon na dumenggan? Ala ndang paretongan (perhitungan) ibana pasahathon peleanna tu Debata. Songon i do nang ina na mabalu i, na dumenggan i do dilehon ibana peleanna tu Debata, i ma saluhutna na di ibana jala ngoluna i do dilehon bahen peleanna. I ma panghorhon ni haporseaonna tu Tuhan Debata na mangalehon ngolu dohot na mangudut ngoluna di bagasan pangaramotion ni Debata.
4. Mamelehon na Denggan Rade Manaon na Porsuk.
Uju dipelehon Tuhan Jesus dirina humophop jolma pardosa asa malua, rade do Ibana manaon na porsuk pola mate tarsilang di dolok Golgata. Na mora hian Ibana alai gabe marpogos, na marsangap hian Ibana alai gabe marlea, na hipas hian do pamatangna alai gabe mabugang. Saluhut na targoar na uli jala na arga, na di Ibana i rade do Ibana gabe magoan asa marhasonangan jolma i. Songon i do nang na pasahathon pelean na dumenggan tu Debata, rade manaon na porsuk. Rade gabe "agoan" na arga jala na uli. Mamelehon na dumenggan sian nasa roha jotjot do gabe manghilalahon na hansit, alai i do holong na mamolin. "Cinta sejati memerlukan pengorbanan." Laho pasahathon pelean na dumenggan jotjot marungkil hita hinorhon ni angka kebutuhan si ganup ari. Alai angka na marhaporseaon dohot na marrholong ni roha na polin tu Debata hamonanghonon ni i do pelean na dumenggan. Jala taingot ma Hata ni Debata na mandok: "Martuaan do na mangalehon sian na manjalo" (Ulaon ni Apostel 20:35).
Kesimpulan dan Refleksi
Tuhan Debata do na manompa ngolunta, jala sai dipatupa do hasonanganta, pola do dipelehon dirina humophop hita jolma pardosa, manaon na porsuk jala mate tarsilang di dolok Golgata. Ibana do pelean na dumenggan sian saluhut na targoar pelean. Patut marolopolop jala mandok mauliate ma hita di pamelehononNa di hita. Jala tiruan do na binahenNa i asa rade nang hita mamelehon dirinta sian nasa roha bahen hasangapon dohot hamuliaon ni goarNa. Ala ni i songon pambahenan ni ina na mabalu i. Pasahathon peleanna sian tulus dohot las ni rohana, ala holong ni rohana di Tuhan i dohot hinorhon ni haporseaonna nang rade manaon na porsuk, rade ma nang hita mamelehon peleanta na dumenggan sian nasa rohanta. Amen.
1 komentar