Jamita Borngin Ujung Taon 31 Desember 2024 tarsurat di Psalmen 37 ayat 1 - 11. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Pasahat ma Dalanmu tu Jahowa Debatam." Rap ma hita mangihuthon hatoranganna.
Pendahuluan
Borngin parpudi di ujung ni taon 2024, marpungu hita di bagas joro on marparsaoran dohot Tuhan i marhite hataNa sian Psalmen 37 on. Somalna molo di ujung ni taon songon on, bahenonta ma rujiruji laho marnida angka aha ma naung niula di bagasan sataon na bagas on. Hombar tu hasomalan i, naeng sigatanta hata ni parpsalmen on asa di bagasan hatiuron sondang ni hasintongan ni Hata ni Tuhan i bahenonta rujiruji i. Psalmen on targoar unik, manang asing sian Psalmen na somal, ala somalna Psalmen marisihon ende pujipujian manang tangiang. Alai turpuk on marisihon pangajarion beha do hita marpangalaho di tongatonga ni parngoluon na gok hagedukon, halumlamon, godang sipaotooto jala songon hal na somal nama mangulahon dosa.
Memang molo adong taboto pangalaho ni jolma na jungkat, mangotootoi donganna jala mamora ibana sian ulaon si songon i, olo do mangapian, gondok roha marnidasa. Sipata tubu di bagasan roha laho manguhumi angka jolma na jungkat i. Hape sai godang dope jolma na olo mangulahon angka on, na so parduli panghorhon ni ulaonna i boi manusai donganna jolma, istilah nuaeng "menghalalkan segala cara" asal ma dapot na pinarsinta ni rohana. Adong muse molo pinarateatehon ngolu ni jolma na tulustulus i, na tobok, na so manimbil sian hasintongan i gabe mangae ala ni ketidakadilan na masa. Angka na gale na ingkon niondingan sasintongna, hape ndang dapot asiasi.
Marnida angka na masa i, diarahon parpsalmen on do hita asa unang olo tarrimas, manang gabe mangiburu rohanta maradophon jolma na jungkat i. Mangihuthon Psalmen on ndang marlapatan pangalaho si songon i. Dipaingot Psalmen do sai na dapot do upana be, hombar tu na niulana. Ingkon boi lambas rohanta marnida angka na masa i, molo so olo pe paingoton, pinasahat ma tu Tuhan i na laho pasingothon. Ala Tuhan i do na marhak laho pajongjong uhum tu saluhut jolma.
Pembahasan
Mangihuthon parpsalmen on, ndang adong na hot di portibi on, nang di parngoluon on. Sai na mubauba do saluhutna. Boi do sadarion marbungaran, hape sogot nunga maheu. Digombarhon do ngolu ni angka parjahat i, songon duhutduhut, na sai si sabion do jambarna laos melos. Aha na dihaginjanghon sadari on, sogot boi do mago sangkidop mata. I do umbahen pola dipaingot hita sotung olo mohop ateate marnida angka siula na jahat jala unang mangiburu marnida angka siula hajungkingon. Boasa? Ala parngoluon nasida hagigian do i, hamatean do jambar nasida molo so olo marhamubaon.
Hajahaton na niula nasida i palumlamhon pingkiranna, gabe so diboto lapatan ni ngolu na sasintongna. Sai dietong nasida manongtong ngolu nasida. Gabe dipatunduk tahi ni na jahat nama ngolu nasida. I ma hataridaan ni hagaleon ni daging songon pomparan ni si Adam na parjolo i, ngolu naung tarrante di huaso ni sibolis i. Bangko siula hajahaton, hajungkingon, dohot na asing, pataridahon ringkot ni jolma di Sipalua i. Ala ndang margogo jolma i paluahon dirina sian rante ni sibolis i. Dipaingot Psalmen on hita, jolma na jahat manang na burju tong do ingkon bolusonta hamatean i. Alai di angka jolma na burju hangoluan na manongtong nama teaonna dung dibolus hamatean i.
Hatiha dijou Tuhan i hita gabe ianakhonNa, asa olo hita marhamubaon, molo mate pe, mate di bagasan Tuhan i, jala mangolu pe mangolu di bagasan Tuhan i. On ma holong satia na niula ni Debata di bagasan Jesus Kristus naung manghamonanghon hita marhite pamelehonon ni diriNa tarsilang di Golgata. Molo najolo hita masuk tu horong na jahat jala mangolu di halumlamon, alai dung olo hita manjanghon Sipalua i, marhaimbaruon ma ngolunta. Marhite haporseaon tu Ibana. Jesus naung manobus hita sian dosa dohot hamatean i, taruli ma hita di haimbaruon i.
Di angka naung manjalo Kristus gabe Sipalua di ngoluna, naung marhaimbaruon i, i do na talup na laho mangulahon parsuruon ni Tuhan i jala asa sai marhaposan tu Jahowa huhut mangulahon angka na denggan i. Molo satia hita mangulahon parsuruNa i, marhasonangan ma mangingani tano na nilehon ni Tuhan i. Saleleng taingani tano i manongtong ma mangaradoti haburjuon. Molo angka na jahat i, tung godang pe sinamot dapotna uju di ngoluna gabe marisuang do i saluhutna. Alai di angka na satia maradophon Tuhan i uju di ngoluna, manang sadia godang pe sinamot na didapotna uju di ngoluna sai na marguna do i. Ala mardonganhon Debata ibana saleleng ngoluna. Teanon nasida ma hangoluan na manongtong, inganan naung pinarade ni Tuhan i.
Lapatan ni "tano" di ayat 3 (Inggris: "land," negeri, tano) adong do partalianna tu "tano parpadananan" (Inggris: 'promised land,' tanah perjanjian). Mangihuthon Martin Luther, asa unang manadinghon tano i, sai hot ma mangingani tano i. Lapatanna asa mangolu ma jolma i hombar tu parpadanan naung niihot ni Debata tu ompunasida, Abraham-Isak-Jakob, gabe bangso na satia mangulahon parsuruon ni Tuhan i. Parngoluonnasida di tano parpadanan i patuduhon identitas (hadiron na tandi) songon bangso ni Debata, gabe pasupasu tu bangso na asing. Saleleng mangolu di tano i, sai marsigantung tu huaso ni Debata, na so boi manimbil mardebatahon debata sileban. Asa daion nasida ma denggan basa ni Jahowa saleleng ni ngoluna.
Di angka jolma na sai nunut mulaulaon hombar tu na hinalomohon ni Tuhan i, jala satia marhaporseaon sai na taruli do di las ni roha na sian Tuhan i (Inggris: "delight yourself in the LORD," ayat 4). Jala jolma na marlas ni roha di bagasan Tuhan i, sai na lehonon ni Tuhan i do na pinangido ni rohana. Diarahon parpsalmen do hita asa satia mardalan di dalan hasintongan ni Debata; tudos songon nidok ayat 8 "otapi rimas jala tadinghon mohopmohop ..., ai laho tu na jat do i." Sipata olo do hita tarrimas molo mangida jolma siulahon na jat, alai dipaingot hita sotung olo be madabu tu pangalaho si songon i. Molo so olo muba angka na jahat i, nunga rade jambar nasida, "sai na siap do sogot angka parjahat i (ayat 9a).
Alai di angka na manghaposi Jahowa, sai na teanon nasida ma tano silehonlehon ni Tuhan i, di tingki ngoluna di portibi on lumobi nang di ari sogot (ayat 9b). Sadalan do songon Jamita ni Tuhan Jesus, na ginoaran Jamita di dolok, "Martua ma na pogos tondi, ai di nasida do harajaon banua ginjang i." "Martua ma na lambok roha, ai teanon nasida do tano on." Jolma na lambok roha i ma jolma na so digohi mohop ni roha nang pangiburuon. Hataridaan ni jolma na lambok roha i ma haradeon laho paimahon mardongan lambas ni roha. Angka jolma si songon on do na patut mangingani tano i.
Taruli ma di hasonangan na sasintongna, sonang so hariboriboan di tano siteanon i, jala hahilashononna hinadeak ni hadameon (ayat 11). Ayat 11 on martudutudu tu harajaon banua ginjang, sambulo ni tondi ni angka na porsea i. Inganan na manongtong di angka jolma na satia pasahathon ngoluna tu adopan ni Tuhan i, na sai unduk tu hagogoon huaso ni Tuhan i, na tuk paluahon jolma i sian ragam ni ihotihot ni sibolis i. Sai na martua ma hita na olo mangasahon Tuhan i di ngolunta.
Kesimpulan dan Refleksi
Sai hot ma hita manghaposi Tuhan i saleleng di ngolu on. Taruli ma hita di halongangan sipatupaon ni Tuhan i di ngolunta. Taarahon ma dompak pandang ni ngolunta on tu adopan ni Tuhan i. Unang olo hita tartait laho manguhumi angka jolma na sai mangolu dope di hajahaton nang halumlamon ni ngolu. Adong Debata na marhak gabe panguhum na sintong. Sandok tapasahat ma sude aha na gabe sipingkiran nang na pinarsinta ni rohanta i tu tangan ni Debata na gok huaso i. Asa nasa ulaonta na humurang di bagasan na sataon bolon i tadinghononta, jala ndang taulahi muse tu taon na mangihut. Isionta ma taon na naeng sibasabasaon ni Tuhan i marhite angka ulaon na marguna, na marlapatan di humaliangta.
Mardonganhon Tuhan i, sai na margogo do hita laho mandalani ariari ni ngolunta. Nang pe gok galumbang ni ngolu na taadopi, na sipata mambahen hita madabu tu pangiburuon nang panaritaon, alai sotung taloas i mangarajai roha nang pingkiranta. Alai sai mian ma lambas ni roha nang lambok ni roha di hadirionta. Di angka pangalaho si songon i do na hinalomohon ni Tuhan i, jala na talup taruli di ragam ni pasupasu na sian Tuhan i. Teanonta ma tano habaoran ni pasupasu na gok situak ni loba saleleng mangolu, jala sai mangolu ma panghirimon di tano parpadanan, inganan na manongtong rap marhasonangan dohot Tuhan i di banua ginjang, surgo sambulo ni tondita i. Amen.
Posting Komentar