Jamita Minggu 27 April 2025 Minggu Quasimodogeniti tarsurat di Jesaya 55 ayat 1 - 5. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Tangihon ma Debata Asa Mangolu Hamu." Rap ma hita mangihuthon hatoranganna.
Pendahuluan
Buku Jesaya, turpuk ni Jamita ta sadari on masuk ma tu pengelompokan Deutro Jesaya (Jesaya bagian na paduahon), i ma na ditujuhon tu halak Jehuda uju di habuangan Babel. Di tano habuangan, torop do bangso i ndang manahan ala ni ragam ni angka parungkilon, torop do na mandele jala sumurut haporseaonna ala dihilala rohanasida, ndang diida Debata sitaononnasida. Alai asing do na piningkiran ni bangso i dohot Debata. Nang pe diuhum Debata nasida, alai mulak do muse rohaNa, marhite na dipalua Debata bangso i sian tano habuangan.
Di Jesaya 55 on dipapatar do taringot haluaon na sian Debata, na so pola situhoron jala sigararon. Debata sandiri do sang inisiator na mangalehon i songon tanda ni holong ni rohaNa tu bangso Israel. Haluaon na sian Debata i dilehon ndang ala denggan ni parange ni bangso i, alai asa adong do hasadaron di nasida "Debata ndada holan manguhum, alai mangalehon haluaon ala asi ni roha" (Allah itu adil dan penyayang). Umbahen i do ro Debata manjou angka na torop i marhite panurirang na pinabangkitNa asa mulak tu dalan na sintong, hombar tu HataNa. Jala mansai gomos diondolhon di buku Jesaya on asa satia nasida sahat ro di ujungna.
Pembahasan
Ontangan Asa Rap Marsipanganon di Angka BangsoNa (ayat 1-2).
Konteks na masa di tano habuangan uju i, masa do na ginoaranna haleon, ala ni musim kemarau (kekeringan air). Musim kemarau tontu sahali ndang masalah sepele, siala tangkas do taboto menurut ilmu kesehatan, "makanan dan minuman adalah kebutuhan dasar manusia." Lapatanna, ingkon na adong do sipanganon dohot siinumon asa boi mangolu jolma i. Bahkan adong do pandohan na mandok, sipanganon dohot siinumon i "aek mual ni hangoluan." Haleon on gabe sada ungutungut na mansai balga do sian bangso Israel tu si Musa uju di pardalanan, ruar sian tano Misir. Di na mauas bangso i di halongonan, pintor memberontak do nasida tu si Musa, nang tu Debata. Dibahen i ala ditangihon Debata ungutungut ni angka na torop i, marhite panurirang Jesaya, Debata pasahathon HataNa laho mangontang nasida angka "na mauas" jala "na so marhepeng" asa ro tu Debata asa taruli di anggur dohot susu, so pola martuhor. Panurirang Jesaya pasahathon joujou ni Debata tu saluhut jolma na male jala mauas di aek hangoluan, aek hangoluan na tutu i ma Tuhan Debata. Dipabotohon si Jesaya ma Padan ni Jahowa tu bangso Israel na ingkon paluaonNa do bangso i sian hamaleon dohot sian hauasonna. Jala ndang holan bosur di pardagingon nasida, alai ingkon do lehononNa las ni roha nang di partondion. Jala lehonon ni Tuhan i do i secara gratis (sola gratia/ anugrah).
Di ayat 2, "boasa ingkon mandasing hepeng hamu ... " on ma Hata ni Debata di angka jolma na mancoba mangusahaon angka kebutuhanna sian gogona sandiri, mangasahon haportibion. Umbahen i didok Debata di ayat 1 "di hamu angka na so marhepeng, ro ma hamu manuhor, mamonggoli dohot manganhon! Sai ro ma hamu manuhor anggur dohot susu, unang pola marhepeng dohot marpanuhor." Susu dohot anggur i ma sipanganon na berkhasiat, tabo daion jala denggan tu pamatang ni jolma. Na sintong jala na denggan i do ditawarhon Debata sian Ibana, i ma haluaon na mangalehon hasonangan dohot hadameon. Jotjot do halak marhoihoi mangalului i di portibi on. Ra, dapot nasida do i, alai holan satongkin. Gari godang do halak na menghalalkan angka cara na so suman asa monang, marhuaso dohot mamora di ngoluna, angka parange dohot ulaon na so manghabiari Debata.
Manangihon jala Manggohi Panjouon ni Debata (ayat 3).
Asa dapotan haluaon dohot hangoluon ro di saleleng ni lelengna jolma i, dipabotohon panurirang Jesaya ma tu sandok bangso i asa ditarehon ma pinggolna laho manangihon Hata ni Debata. Alai ndada holan dibege alai diparateatehon, dipahusorhusor jala dihaporseai hasintongan ni HataNa. Angka ise na so ro tu Debata huhut manangihon HataNa, ndang dapotan hangoluan (ayat 3a). Ala ni i aha do umbahen ingkon tangihononta Hata ni Debata? Di 2 Timoteus 3:16-17 didok, "Ai nasa Surat i, sinihathon ni Debata do: Jala hasea mamodai, maminsang, pauliulihon, manogunogu di bagasan hatigoran, asa rimpas halak ni Debata, hobas tu nasa ulaon na denggan." Holan Hata ni Debata do na patuduhon tu hita jolma dalan na ture jala tiur. Hata ni Debata ndang olo salpu nang pe salpu portibi on. Uhum dohot angka aturan manang adat na niaturhon ni panggomgomi dohot angka na pistar boi do i muba di tingkina, hombar tu kebutuhan dohot konteksna. Alai Hata ni Debata boi do pangkeon di sude situasi jala manghorhon tu hadengganon dohot haulion, "Antong tangihon ma i, ale Israel, jala ringkoti mangulahon angka i, asa marhasonangan ho, jala asa lam torop situtu hamu, songon naung pinarbagabaga ni Jahowa Debata ni angka ompum tu ho di tano habaoran ni susu dohot situak ni loba" (5 Musa 6 : 3).
Halak Kristen Gabe Parbarita na Uli di Liat ni Portibi on (ayat 4 - 5).
Di ayat 4 adong pandohan "ida ma, sitindangi tu angka bangso ibana Hulehon, bahen partogi dohot silehon patik tu angka bangso." Lapatanna, Jesus i ma sitindangi padan ni Debata tu jolma na tinompaNa. Jesus gabe dalan laho mangurupi jumpa ni padan ni Debata tu jolma i. Jesus Kristus i ma gabe "panindangi" jala "sipalua." Sipalua i tongon gabe Raja na manguluhon saluhut halak dohot bangso na di portibi on marhite hadaulaton na tigor i. Ala ni i ma angka ise naung dipalua Debata mananda dalan hatigoran i, gabe sitindangi ma ibana di jolma na asing, tung pe naso tinandana. Unang ma nian holan hita na mandai susu dohot anggur na tabo i, alai dohot ma angka donganta jolma tarlumobi na di bagasan hagaleon. Ndada holan ulaon ni Pandita i manang Parhalado, alai dohot nang sude ruas ni Huria. Unang ma nian bangkol rohanta "mambetabeta" angka donganta asa ro tu Debata. Ulaon ni huria do marpanindangi taringot tu huaso dohot holong ni roha ni Debata, asa dungo sude jolma jala diida nasa ulaon ni Debata di ngoluna. Angka Hata naung tatangihon i, unang ma holan tading di hita i, alai dohot ma nian angka jolma na asing pe umbotosa.
Kesimpulan dan Refleksi
Sahalak na pistar sian Junani Kuno na margoar Epictetus, mandok "Kita memiliki dua telinga dan satu mulut, karena itu kita bisa mendengarkan dua kali lebih banyak dari pada berbicara." Molo dihilala sasahalak jolma maol nasida manangihon soara ni halak na manghatai manang mesin dohot na asing, somalna do nasida laho marubat manang konsultasi tu dokter THT (Telinga, Hidung, Tenggorokan), baik tu praktek dokter manang Rumah Sakit. Olo do rumang ni sahit i, i ma gangguan saraf pendengaran manang gangguan sensorineural, alai olo do muse sifatna gangguan pendengaran konduktif (penyumbatan, infeksi). Alai manang aha pe diagnosa taringot tu sahit on, pasti do sangat mengganggu i tu na manghilala, ala mansai balga pengaruhna tu komunikasi dohot parsaoran na denggan. Na naeng dohonon, hadomuanna taringot tu "maol ni jolma laho manangihon Hata ni Debata."
Di partingkian saonari on, i ma na nigoaranna era digitalisasi, godang do angka panghorhonna tu parange ni angka jolma, tarlumobi ma i na berhubungan tu na "manangihon" dohot "manghatahon." Godang do halak mambahen postingan dohot komentar na bersifat negatif, barita na so tutu (hoax), na tubu ndang sian parbinotoan na denggan, manang di zaman si saonari on didok demi konten. Suang songon i do nang na manonton dohot na manangihon angka barita sian halak, jotjot do muramura mambuat sada kesimpulan hape ndang apala denggan ditangihon dohot diparsiajari. Ujungna, gabe dohot ma nasida penyebar hoax/ barita na so tutu, na boi gabe paotootohon donganna jolma.
Aut sura disungkun angka jolma, dia do ummura mandok hata sian na manangihon? Ra hampir sude do mangalusi mandok hata. Leslie H. Farber, sahalak Psikolog sian Amerika Serikat di sada bukuna na marjudul "The Ways of The Will" mandok: "Mendengar itu tidak hanya berarti mengunci mulut, lantaran menyimak obyek yang didengarkan. Mendengar menuntut sesuatu yang lebih, yakni kemampuan untuk mengikuti secara imajinatif sekaligus mengenal adanya "bahasa" lain." Na marlapatan ma i, bangkol manangihon alana dituntut do disi adong kesabaran/kontrol diri, jala sikap menghargai. Ndang sude halak boi mangulahon i. Godangan halak sai naeng pasahathon pangidoanna do manang aha na di pingkiranna. Gari godang do halak na mangido asa ditangihon nasida manghatai, alai dungkon manghatai donganna, tundal do nasida.
Boha do tutu parsaoranta dohot Debata? Molo laho hita tu parmingguon, partangiangan dohot parsaoran na asing, denggan do hita manangihon Hata ni Tuhan i? Didok di Rom 10:17, "Asa sian na tumangihon do ro haporseaon; ia panangihon i, sian hata ni Kristus do." Sian dia do botoonta laho mangulahon angka na sintong di ngolunta on ianggo so tutu hita manangihon Hata ni Debata? Hape ganup tingki do nian hita dipanghulingi Tuhan i marhite Tondi Parbadia asa tapillit angka dalan na ture songon tanda ni haporseaonta tu Ibana. Tangkas do didok di Jesaya 55:3a i, "Tarehon hamu ma pinggolmuna, jala ro ma hamu tu Ahu! Tangihon hamu ma, asa mangolu tondimuna i!" Dipangido Debata do asa talului hangoluan marhite na manangihon HataNa. Holan Hata ni Debata do na so olo muba jala na tutu mangajarhon hasintongan. Unang ma nian tumangian hita di angka hata ni jolma di portibi on, ai mura do muba i, jala ndang sude i boi gabe haposan. Gok do halak gabe kecewa ala ni angka ekspektasina di angka hata ni halak. Ndang sarupa na dihatahon dohot na diulahon. Alai molo Debata, sai diingot do padanNa. Na dihatahononNa i ndang hea muba. Angka na mauas dohot male di hadengganon, hatiuron ni pingkiran, hadameon ni roha, ro ma tu Tuhan i. Di Ibana do dapotta i. Amen.
Posting Komentar