Jamita Minggu 4 Mei 2025 Minggu Misericordias Domini tarsurat di Psalmen 47 ayat 1 - 10. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Ai Naung Gabe Mamora do Hita di Bagasan Ibana di Saluhutna i." Rap ma hita mangihuthon hatoranganna.
Pendahuluan
Di ari na uli jala na denggan on, marolopolop jala marlas ni roha ma hita ala na tongtong do Debata manggomgom dohot mangaramoti dohot manumpahi hita di saluhut angka ulaon na denggan, songon i nang basabasa na nilehonNa di ngolunta. Ibana do Debata na hamuliaonNa mangatasi saluhut hamuliaon na adong di portibi on. Patut do marlas ni roha dohot marolopolop hita saluhutna marningot di saluhut pambahenan dohot silehonlehon ni Debata tu hita. Ndang tarpajojor jala ndang tarhabilangan saluhut angka basabasa ni Debata di ngolunta. Turpuk Jamita di Minggu Misericordias Domini manjou hita asa tongtong manghalashon dohot mangolophon sude angka pambahenan ni Jahowa di ngolunta. Asa lam tu antusna hita mangantusi turpuk on, masuk ma hita tu hatorangan ni turpuk.
Pembahasan
Psalmen 47 on i ma ende na marharoroan sian anak ni si Kora (ayat 1). Ise do si Kora dohot anakna? Jala aha do ulaonna di perihadahan ni halak Israel? Di Buku Psalmen, adong 7 ende na marharoroan sian anak ni si Kora, i ma Psalmen 42, 45, 46, 47, 48, 87 dohot 88. Di Padan na Robi adong do 4 horong na margoar Kora. Na parjolo, i ma na manguluhon halak Edom pinompar ni si Esau (1 Musa 36: 5, 14, 18; 1 Kronika 1: 35). Na paduahon, ina uluan ni bangso Edom anak ni si Elipas (1 Mua 36 : 16). Na patoluhon, Korah i ma anak ni si Hebron (1 Kronika 2 : 43). Na paopathon, i ma Kora anak ni si Jisar, sahalak malim sian pomparan ni Kehat, horong ni si Jisar (2 Musa 6 : 21 ; 4 Musa 26 : 9 - 11). Di partingkian ni si Musa dohot si Aron manguluhon Israel ruar sian parhatobanon Misir marpungu ma angka malim sian horong ni si Kora jongjong mangalo si Musa. Marpanghorhon do na binahennasida i patubuhon rimas ni Debata (boi do idaonta rimas ni Debata tu horong ni si Kora di 4 Musa 26 : 9 ; 5 Musa 11 : 6). Alai ndada sude horong ni si Kora na gabe mate hinorhon ni rimas ni Debata. Deba sian anak ni si Kora malua do sian rimas ni Debata na marulaon gabe parende di bagas joro. Nasida ma na mambahen, manguluhon ende pujipujian dohot hasangapon ni Debata di undungundung na badia dohot di bagas joro, i ma anak ni si Kora sian horong Kehat (2 Kronika 20 : 19); adong ma anak ni si Kora na martugas gabe sijaga harbangan Israel (1 Kronika 9 : 19; 26 : 1). Ianggo turpuk Jamita on i ma marharoroan sian anak ni si Kora, na sian pomparan ni Kehat.
Turpuk jamita on, i ma ende na jotjot dipangke di ulaon parsombaon (peribadahan) ni halak Israel. Somalna do andorang masuk tu undungundung na badia manang andorang dipungka ulaon parsombaon, adong do diendehon sada ende pamujion, ende parolopolopon, ende hamuliaon ni Debata. Marsuraksurak. martopaptopap, jala marsaringar ma soara ende olopolop, ende pamujion tu Debata. Ende i digoari do predillum dung pe diendehon ende predilium, mulaannasida ma parsombaon ni Israel tu Jahowa.
Turpuk jamita on mangondolhon taringot hahomion harajaon, huaso dohot hamuliaon ni Debata, Raja di saluhut angka raja di tano on, Debata ni saluhut angka debata na disomba angka bangso, na so boi dipatudos manang aha hamoraon, hasangapon, hamuliaon dohot hadebataon ni Jahowa nang di sude luat, di sude partingkian dohot di saluhut na adong di tano on. Ingkon marsomba do nasa ulu ni tot jala sude angka dila marhatopothon habalgaon dohot hatimbulon ni Debata na mangatasi saluhutna na adong di tano on. Ibana do na patut sipujion dohot sisombaon. Jahowa do Debata na marhuaso sian hatongtongon sahat tu hatongtongon. Guru di Ibana do saluhutna nasa na masa di portibi on, jala ampunaNa do saluhutna. Nang pe jongjong angka pangalo na mangalo maradophon Jahowa Debata, alai tarpatupa Debata do nasida gabe sidegedegeon ni patNa (patudos ayat 2-6). Tung na songkal do Jahowa. Ndang tardodo jala ndang hasuhatan sude angka ulaonNa. Martua ma Israel dohot bangso na mardebatahon Jahowa. Martopaptopap tangan ma sude bangso, jolma mangendehon hamuliaon dohot hasangapon ni Debata, marsoraksorak ma angka bangso mangendehon ende pujipujian dohot pangiarhon soara olopolop mangolophon Jahowa. Fokus ni parsombaonta tu Jahowa Debata, i ma hasangapon, hamuliaon dohot hatimbulon ni Debata na mangatasi saluhut harajaon dohot hadebataon di portibi on (patudos ayat 7 -10).
Marhite asi ni roha dohot basabasa ni Jahowa do na mambahen Israel taruli di pasupasu dohot hamoraon sian harajaon dohot bangso di humaliangna. Hasangapon dohot hamuliaon ni Jahowa songgop ma tu bangso Israel, asa sude bangso longang marnida hamoraon ni Israel, na so boi dipatudos hamoraon ni Israel martimbanghon sude hamoraon ni sude harajaon. Marroan ma angka bangso laho marsiajar tu Israel asa parsidohot taruli di hamoraon songon na adong di Israel. Ndada marharoroan sian hadirion ni Israel hamoraonnasida, alai holan asi ni roha dohot basabasa ni Jahowa do tu nasida.
Kesimpulan dan Refleksi
Misericordias Domini, i ma minggu na manjouo hita mangendehon asi ni roha dohot hatimbulon ni Debata. Boi dope hita parsidohot mangendehon asi ni roha dohot hatimbulon ni Debata molo masa angka parsorion dohot sitaonon di ngolunta? Boi dope hita parsidohot mangendehon asi ni roha dohot hatimbulon ni Jahowa di partingkian si nuaeng? Parsorion dohot ragam na masa di hangoluan on unang ma nian mangambati hita parsidohot laho mangendehon hatimbulon dohot habalgaon ni harajaon, hasangapon dohot hamuliaon ni Jahowa. Guru di Ibana do saluhut nasa na masa di tano on. Marhite asi ni roha dohot hatimbulonNa do, tarpatupa Ibana do laho mangaramoti, paluahon dohot manarihon hita di angka na ringkot di parngoluan on. Ndang pasombuonNa hita punjung di ragam sitaonon na masa, Ibana do na mangurupi, mangaramoti, na tongtong manarihon ngolunta asa boi hita manalpuhon sitaonon manang parsorion i. Umbahen i ma unang tading hita parsidohot laho mangendehon dohot mangolophon asi ni roha dohot hatimbulon ni Jahowa Debata.
Beta ma hita ruas dohot parhalado ni HKI mangendehon dohot mangolophon Jahowa, Raja dohot Debatanta. Marhasangapon ma hita molo boi hita rap mangendehon asi ni roha dohot hatimbulon ni Debata, songon na niula ni angka anak ni si Kora (2 Kronika 20 : 19). Nunga 98 taon HKI di tingki on, di ragam ni angka siboluson naung dibolus, Debata do na tongtong mangaramoti huriaNa HKI. Tahatahon ma hita sama hita angka ende Psalmen, angka ende pujipujian dohot ende partondion; taendehon jala tapuji ma Tuhan i di bagasan rohanta. Manongtong ma hita mandok mauliate siala saluhutna tu Debata Ama, di bagasan Goar ni Tuhanta Jesus Kristus (Galatia 5 : 19 - 20). Taolophon ma tongtong Debata marhite soara ende dohot olopolopta, marmulia ma goarNa marhite angka endenta, sangap ma di Ibana saleleng ni lelengna. Amen.
Posting Komentar