Jamita Partangiangan Epistel Minggu 27 April 2025 Minggu Quasimodogeniti tarsurat di buku Pangungkapon 1 ayat 4 - 8. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Tangihon ma Debata Asa Mangolu Hamu." Rap ma hita mangihuthon hatoranganna.
Pendahuluan
Somalna molo adong barang antik jala na arga, tontu simpanon ma on di sada inganan asa unang mago, jala buni sian parbinotoan ni halak. Isarana songon mas, simpanon ma i di lamari manang di brankas, jala olo do di inganan na tahan api nang cuaca ekstrim dohot na asing. Songon i ma sasintongna halak na porsea di Anak ni Jolma i, i ma Tuhan Jesus Kristus. Halak na porsea angka anak arga, na hinaholongan ni Tuhan i. Ala arga ni jolma na porsea i, Jesus nampuna hagogoon di saluhut na adong mangiringiring dohot mamparmahani jolma na porsea jala na tongtong satia di bagasan haporseaonna. Di bagasan Pangungkapon 2:10 didok do, "Unang habiarhon haporsuhon na naeng ro! Dabuon ni sibolis ma deba sian hamu tu bagas hurungan, asa tarunjun hamu, gabe tarsosak ma hamu sampulu ari lelengna. Sai burju ma ho rasirasa mate; dung i lehononHu ma tu ho tumpal hangoluan i" (patudos Mateus 10:22; 1 Korint 9:25).
Pembahasan
Sangkap ni Debata na Manongtong (ayat 4).
Di bagas turpuk on, pangungkapon ditujuhon tu pitu Huria na di benua Asia, molo saonari digoari ma i luat Turki bagian Barat. Nang pe didok tu na pitu Huria, alai mencakup do tu sude Huria pangungkapon on, jala pitu tondi i ma hasisingkop ni panghobasion ni Tondi Parbadia i.
Buku Pangungkapon on digurithon si Johannes uju di pulo Patmos ibana (marhira 60 mil sian barat daya Epesus), jala hatiha i masa do pangaleleon dohot haporsuhon tu halak Kristen, jala godang angka panurirang pargapgap na mamaritahon barita na so sintong na naeng manegai haporseaon ni halak Kristen. I do umbahen na dibahen si Johanes hata patujolo laho pasahathon Pangungkapon i, "Asi ni roha ni Tuhan dohot dameNa i manongtong do i mandongani Huria i." Jumolo do dipatuduhon ibana marhite hatana na tongtong dipasahat Tuhan i asi ni roha dohot dameNa tu angka na porsea nang pe di bagasan hasusaan nasida.
Jesus Panindangi na Satia (ayat 5-6).
Johannes paingothon tu Huria i, songon dia pardalanan ni Jesus naung gabe Panindangi na satia di sude hatigoran ni Debata. Na parjolo, hehe sian na mate, jala marhuaso di ginjang ni angka raja. Marhitehon i dapot ni halak na porse ma:
1. Jesus paluahon hita sian dosa marhite mudarNa.
2. Mamboan hita tu harajaon, i ma Harajaon ni Debata.
3. Mambahen hamuliaon tu Debata saleleng ni lelengna.
Hagogok dohot Hamonangan ni Harajaon ni Debata (ayat 7-8).
Hagogok ni Harajaon ni Debata masa ma i uju ro Jesus na paduahalihon tu portibi on (parousia/ akhir zaman). Na ro do Ibana di tonga ni ombun paboahon ia haroroNa i di bagas hamuliaon, jala sude portibi on (naung jumolo mate jala na mangolu dope) manatap tu Ibana (1 Tessalonik 4 : 13 - 18). Hagogok dohot hamonangon i di ari na parpudi (eskatologi) dipanghilalahon halak na satia, dohot marujung ma sejarah ni portibi on marhite panguhuman songon panguhuman ni sibolis di portibi on. Hamonangon ni Harajaon ni Debata i ditotophon Jesus ma marhite HataNa na mandok, "Ahu do Bonana jala Ujungna" (Alpa dohot Omega). Manongtong do Debata sian mula ni panompaon sahat ro di hasusuda ni hasiangan on. Ibana do Debata di ginjang ni saluhut na adong. Na monang do Ibana manaluhon dosa, hajahaton jala Ibana ma na manguluhon saluhutna.
Kesimpulan dan Refleksi
Adong do pandohan di hata Indonesia na mandok, "Jika hidup sembarang hidup, kerbau di sawah pun juga hidup." Lapatanna, kualitas ngolu ni sasahalak, ndada dibereng sian lelengna mangolu di portibi on. I do umbahen na didok, banyak orang yang hidup tapi sesungguhnya sudah mati. Hamatean ndada holan hasusuda ni hosa ni na tinompa jala hamamate ni dagingna, alai gok do na marhosa mate haporseaonna, ndang di bagasan Jesus nasida. Molo tapahusorhusor di bagasan rohanta, marhite panjahaon sian Johannes 1 : 1 + 14, nian antusanta ma Jesus i ma Debata na padamehon diriNa asa mandapot haluaon hita sian hadosaonta. Debata na patuduhon diriNa di bagasan Jesus Kristus gabe dalan mandapothon haluaon i (Johannes 14 : 6). Ndang jumpang ngolu molo ndang di bagasan Jesus Kristus. Jala molo adong pigapiga na mandok dirina sonang manang mamora alai sian dalan na so niajarhon ni Tuhan Jesus, sasintongna sifatna holan temporary (parsatongkinan) do i jala ndang marimpola. Asi ni roha dohot dame na so hatudosan i do dipaboa Debata di bagas Kristus, jala manongtong do i sahat ro ro di ujungna.
On do kebanggaan ni haporseaonta di Jesus Kristus, naung manaluhon dosa, manaluhon hajahaton ni portibi, asa jumpangta ngolu na manongtong di harajaonNa. Jesus Kristus bersifat omnipresent (na tongtong adong), jala onmiscience (na umboto saluhut). Ibana do bonana jala ujungna. Antong taharingkoti ma asa tongtong tumangi hita di panjouon ni Tuhan i laho mamuji Ibana marhite ulaon dohot parange na ture asa marlaba hita na mangolu di portibi on, ndada asal mangolu. Aha pe ulaonta, isarana PNS, tukang/pande, guru, pegawai swasta, partigatiga, pangula, dohot na asing, ingkon taulahon ma i di bagasan ruhutruhut na sintong mangihuthon Hata ni Tuhan, asa tarida anak ni Jesus Kristus do hita. Tahaporseai do ndada adong na manongtong di portibi on, adong do tingkina ingkon marujung sude. Alai di angka na porsea, molo tung dapot tingkina di hasusuda ni ngoluna pe ndang mabiar be nasida ala tongtong di bagasan Kristus haporseaonna. Amen.
Posting Komentar