Jamita Minggu 1 Juni 2025 Minggu Exaudi tarsurat di Psalmen 97 ayat 1 - 12. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Jahowa do Raja." Rap ma hita mangihuthon hatoranganna.
Pendahuluan
Buku Psalmen na 150 bindu disagihon do tu manang na piga horong hombar tu isina, isarana Pujipujian, Ratapan (andung), Debata Raja na Marhuaso dohot na asing. Ia Psalmen 97 on tarmasuk ma tu Psalmen na papatarhon "Pemerintahan Allah / Debata Raja na Marhuaso". Jala Psalmen 93, Psalmen 95, 96, 98 dohot 99 pe tong do masuk tu kelompok na manghajongjonghon Debata na gabe Raja na marhuaso jala na manongtong.
Molo tapamanat isi ni turpuk Psalmen 97 : 1 - 12 on, na parjolo, Pengakuan Jahowa do Raja ni saluhut, nang angka pulopulo, na paduahon, ia halak na so mangasahon Jahowa gabe Raja, manang na mambahen patung manang na asing gabe debatana, sai na hona uhuman ni Jahowa do. Na patoluhon, hataridaan ni na mangasahon Jahowa sebagai Raja, jala marholong ni roha tu Ibana, ingkon manghagigihon na jat. Na paopathon, marlas ni roha jala marolopolop ma mangoloi Jahowa Debata.
Pembahasan
Jahowa do Raja, Marolopolop ma Tano on, Marlas ni Roha ma Pulopulo (ayat 1)
Pandohan "Jahowa do Raja" Pengakuan Iman ni parpsalmen do i, taringot tu huaso ni Debata Jahowa na marhuaso di saluhut jadijadianNa. Paboa na so adong Debata na marhuaso dungkon ni Ibana. Jala dipatangkas do dison "marolopolop ma tano on dohot pulopulo marlas ni roha". Sian pandohan on botoonta, na so terbatas wilayah ni HarajaonNa.
Molo laho rohanta marnida sada harajaon manang pemerintahan di portibi on, adong do perbatasan ni wilayah harajaonna, batasan ni jolma na niuluhonNa (isarana, Indonesia: 270 juta jiwa), dohot angka keterbatasan na asing. Alai ianggo Debata manang di dia, sahat tu pulopulo na dao di sandok portibi on, manang sukusuku dia pe tuk do huasoNa mangarajai. Situasi ni ngolu na songon dia pe, di bagasan hangaluton dohot sori mago tuk do Ibana manatap jala paluahon.
Hinatimbul ni HuasoNa (ayat 2-6)
Raja na Tumimbul do Jahowa. Digombarhon do hinagogo nang hinasongkal ni huasoNa i "ombun jala haholomon na marimpotimpot humaliang Ibana, hatigoran dohot uhum ojahan ni habangsaNa. Api mardalan di joloNa manganhon angka aloNa humaliang. Disondangi angka hilapNa do portibi on, jadi lalolalo tano on marnidasa. Malala do angka dolok songon pantis maradophon bohi ni Jahowa, maradophon bohi ni Tuhan ni sandok tano on. Dibaritahon angka langit do hatigoranNa, jala sude angka bangso marnida hamuliaonNa".
Sebagian gombaran na di ayat 2-6 i boi idaonta di 2 Musa 19 : 16 - 19 di na pinapatar ni Debata Jahowa diriNa di Dolok Sinai di jolo ni si Musa dohot bangso Israel. "Tole patolu arihon, disi torang ari, masa ma angka soara ronggur dohot hilap dohot ombun manorop di atas dolok i, jala soara ni sarune mansai gogo, gabe tarsonggot ma sandok bangso na di parsaroan i. Dung i ditogihon si Musa ma bangso i ruar sian parsaroan laho manjumpanghon Debata, jala angka jongjong nasida solhot di bona ni dolok i. Jadi martimus ma sandok dolok Sinai maradophon Jahowa na tuat tu atasna di bagasan api, jala manaek timusna i songon timus ni pamurunan, gabe humuntal situtu sandok dolok i. Jadi dung lam ganda situtu gogo ni soara ni sarune, manghatai ma si Musa, gabe dialusi Debata ibana marsoara ronggur". Suang songon i uju na manghatai si Musa dohot Jahowa (2 Musa 34 : 5), jala angka panurirang na marnida na timbul i di bagasan biar ala ni huasoNa na balga di bagasan hilap, api nang lalo (Jesaya 6 : 1 - 4; Hesekiel 1 : 4 - 28; Daniel 7 : 9 - 14; Mika 1 : 3 - 4; Habakuk 3 : 3 - 15 dohot na asing dope.
Asa di turpuk on mansai tandi do huaso ni Debata Jahowa sebagai Raja (ayat 2). Hatigoran dohot uhum ojahan ni habangsaNa, asa na so mardalan di bagasan uhum dohot hatigoran, haholomon marimpotimpot ma bagianna (ayat 3). Ndang tarbahen aloNa angka parjahat manahan di adopanNa, ai sai na lengsehon ni apiNa i do aloNa, (ayat 4) hilapNa mambahen lalolalo tano on (ayat 5). Malala dolok maradophon bohi ni Jahowa (ayat 6). Langit mamaritahon hatigoranNa, bangso marnida hamuliaonNa. Asa Holan Jahowa Debata sambing do Debata sioloan. Molo Ibana nioloan dapot las ni roha nang olopolop.
Haurahon ni Halak Pardebata Sileban, Alai Mariaia ma na Tongtong Satia (ayat 7-8)
Dison dipapatar do respon ni jolma tu pangarajaion ni Jahowa, di ayat 7 i ma pangalaho ni halak na so satia tu Jahowa. Dihagigihon Jahowa do halak na marsomba manang mardebatahon ganaganaan (patung) manang mardebata sileban. Hombar do turpuk on tu patik paduahon di patik na sampulu i, "ndang jadi ganaonmu manang sumanonmu manang aha na na di banua ginjang, nang na ditano on, nang na di bagasan aek na ditoru ni tano ianggo tung gabe si sombaon manang si oloan".
Ise do na nidokna dison na mardebata sileban? Ingkon na marsomba tu patung do songon di masa uju nangkok si Musa tu dolok Sinai gabe dibahen bangso i patung lombu sian mas huhut disomba nasida? Na nidokna dison, i ma jolma na so olo mangasahon Debata Jahowa, isarana ateis, na marpangunsandean tu dirina sandiri, na so boi mangarajai hasrat sexual, na mangasahon huaso, ketenaran, sinkretisme (na marhaposan tu Debata alai huhut mangasahon hagogoon ni portibi) (Lukas 16 : 13), materialisme dohot angka pangalaho na hombar tusi.
Marhite bahasa na sarkas (sindiran kasar) parpsalmen mandok: "ingkon marsomba tu Ibana do sude angka debata sileban". Saluhutna pangalaho na so manghabiari Jahowa, sai na tarurak jala uhumonNa do na manundalhon Debata Jahowa. Di ayat 8, horong na berbeda sian pardebata sileban, digoari dison Sion, angka boru ni Juda, manggombarhon halak na marsihohot, mangasahon jala mardebatahon Jahowa, marolopolop jala marlas ni roha do nasida di paruhuman ni Jahowa, ai atik pe songon na sipata buni sipata pangurupion ni Debata tu halak na satia, alai tangkas do asi ni roha ni Debata, nang uhumNa di ari paruhumanNa i.
Na Manghaholongi Jahowa, Manghagigihon na Jat (ayat 9a)
Ditegashon do di turpuk on dalam bentuk perintah: "Hamu ale angka na manghaholongi Jahowa, sai hagigihon hamu ma na jat". Na badia do Jahowa Debata, jala dihagigihon Ibana do na jat. Laos songon i ma nang jolma na manghaholongi Debata, berkewajiban do manghagigihon dohot mangalo angka na jat, angka pangalaho na so hinalomohon ni Debata. Ragam do elaela tu halak na manghaholongi Debata asa kompromi dohot dosa isarana, dosa seksual (perselingkuhan dan yang berhubungan), korupsi uang maupun waktu, kecanduan tu angka hasonangan ni portibi: narkoba, minuman keras, nang ragam ni pangalaho na ramun.
Nian, ndang tarbahen jolma so mardosa, alai songon pandohan ni Martin Luther bapak reformasi: "Simul Justus et peccator" (Latin) lapatanna orang berdosa sekaligus dibenarkan/ diselamatkan. Asa unang be mangulahi hita parhatobanon ni dosa dohot sibolis i. Molo pe tarsomong hita mardosa ingkon hatop ma ro tu Tuhan i mangido hasesaan ni dosanta, jala unang margulu di bagasan dosa i.
Pasupasu ni Debata di Angka na Manghagigihon na Jat ala ni Tuhan i (ayat 9b-11)
Ndang ulaon na mura manghagigihon na jat. Alana molo ndang kompromi hita tu sada komunitas na mangulahon na jat, olo do gabe si sogo hita di komunitas i, bahkan boi do gabe hita dirajumi pargeduk. Alai atik pe songon i, ingkon tongtong do oloan hita di Debata, pasidinghon angka ulaon nang pangalaho na jat i. Di turpuk on dipabotohon do paboa ndang marisuang molo marsihohot manghaholongi Debata, jala manghagigihon na jat, di turpuk on didok: parjolo, sai ramotanNa do tondi ni na niasianNa, paluaonNa sian tangan ni parjahat, paduahon, sai dapotan hatiuron langkana, na patoluhon dapotan las ni roha.
Joujou Marlas ni Roha di bagasan Jahowa, dohot mamujimuji Ibana (ayat 12)
Tarjou do na porsea i marlas ni roha huhut marpamujion tu Debata Jahowa. Aha do na mangonjar rohanta asa tarbahen marlas ni roha jala marpamujion hita tu Ibana? Panandaon na tangkas di Debata na mangolu i. Ibana Raja na tumimbul, na so terbatas wilayah harajaonNa, Raja na manguhum hombar tu hatigoran dohot hasintongan. Tarlumobi ma di bagasan Jesus Kristus, Raja naung manobus hita pardosa di bagasan AnakNa na mate tarsilang manggarar utang ni dosanta, i ma hatigoran na pinatupaNa di hita.
Kesimpulan dan Refleksi
1. Debata ma Raja di ngolunta, Tuhan si sombaonta, naung papatar diriNa di bagasan AnakNa Tuhan Jesus Kristus Raja ni Huria i. Ibana do raja na tutu marhuaso patupahon hangoluan nang haluaonta sahat ro di saleleng ni lelengna.
2. Tapasiding ma ngolunta sian na mardebata sileban, marhite na so olo hita mardebatahon/mangasahon diri nang pingkiranta sandiri, haulion ni portibi, sinamot, huaso nang angka na suman tusi. Ai dihagigihon Debata do angka i, jala sai na tarurak do jolma si songon i.
3. Na manghaholongi Jahowa ingkon manghagigihon nasa na jat, jala mangulahon na hinalomohon ni Debata.
4. Marlas ni roha jala marpamujion tu Debata, ingkon gabe gaya hidup ma di na porsea.
5. Minggu Exaudi na marlapatan tangihon ma ahu (Psalmen 27 : 7a). Tangi do Jahowa di angka na porsea, na joujou tu Ibana. Amen.
Posting Komentar