Jamita Parningotan Hananaek ni Tuhan Jesus tu Surgo Kamis 25 Mei 2025 tarsurat di Epesus 1 ayat 15 - 23. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Jesus Hundul di Siamun ni Debata." Rap ma hita mangihuthon hatoranganna.
Pendahuluan
Saluhut na porsea dijou asa mangolu marhite panandaion na sintong maradophon Debata. Di bagasan ngolu on, jotjot do hita mangadopi angka sitaonon jala ndang di bagasan habisukon hita mangantusi taringot lomo ni roha ni Debata marhite sitaonon i. Sipata, olo do tapanghilalahon sai hira na so tolap do gogonta laho mangantusi angka pambahenan ni Debata di ngolunta, jala memang ndang boi tarpasiding sitaonon i saleleng mangolu dope hita di hasiangan on. Surat ni Apostel Paulus ditongos tu huria di Epesus laho mangalehon parbinotoan na sintong taringot songon dia do mananda Debata marhite habisukon. Martangiang do Apostel Paulus tu huria na adong di Epesus, asa marhite habisukon nasida mananda Debata dohot huasoNa na mansai balga. Turpuk on laho patuduhon jala paboahon, sai dipargogoi Debata do hita laho mangantusi angka pambahenan dohot huasoNa jala silehonlehon na pinarade ni Debata di hita.
Pembahasan
1. Didok Apostel Paulus do "tung so mansadi ibana mandok mauliate di siala haporseaon dohot holong na adong di huria i." Haporseaon dohot holong ni rohanasida tu Jesus Kristus, suang songon i holong ni rohanasida sama nasida nunga sahat tu sipareon ni Apostel Paulus. Jala on do na mambahen Apostel Paulus jotjot manangianghon nasida. Dipatuduhon Apostel Paulus do, sasintongna haporseaon dohot holong i do tanda naung mangolu jolma di bagasan Jesus Kristus. Haporseaon mamboan hita asa mananda Debata, jala holong i manuturi hita asa manghaholongi donganta jolma (ayat 15 - 16).
2. Martangiang do Apostel Paulus asa dilehon Debata habisukon jala pangantusion tu Huria na di Epesus laho mananda Debata. Habisukon mangurupi hita laho mangantusi huaso ni Debata di bagasan ngolunta, jala parbinotoan i laho mangarimangi hasintongan ni Jahowa. Manghirim do Apostel Paulus asa anggiat Huria na adong di Epesus ndada holan mangantusi taringot tu Debata, alai ingkon ma nian mangolu di bagasan haporseaon (ayat 17).
3. Martangiang do Apostel Paulus asa anggiat diungkap Debata roha ni nasida laho mangantusi taringot tu: (a) Panghirimon di panjouon ni Debata, (b) Hamoraon na sian Debata tu halak na porsea di Ibana, (c) Huaso sian Debata.
Di panghirimon panjouon ni Debata, manghatindanghon saluhut halak na porsea sai dijou Debata do marhite panghirimon, na manaluhon angka sitaonon. Halak na mangolu di bagasan haporseaon tu Debata, ndang tagamon ibana holsoan ala ni sitaonon, alai ingkon lam pasolhot diri ma tu Debata.
Hamoraon na sian Debata manggombarhon taringot tu pasupasu ni Debata naung pinaradeNa. Hamoraon na balga jala na arga di halak na porsea i ma pangantusion na bagas tu angka pambahenan ni Debata (patudos Poda 8 : 12).
Huaso sian Debata, diondolhon Apostel Paulus do, huaso na nilehon ni Debata di hita i ma huaso doshon tu huaso na pabangkithon Jesus sian hamatean. Lapatanna, huaso na manaluhon saluhut siatonon na sai jotjot mambahen ganggu haporseaon.
4. Ayat 20-23, dipatuduhon Apostel Paulus do hagogoon huaso ni Debata marhite haheheon ni Kristus sian hamatean. Haheheon ni Kristus patuduhon huaso ni Debata na mansai balga jala na so tarasam. Ndada holan na pabangkithon Jesus Kristus, alai Debata patimbulhon Ibana tu inganan habadiaon songon Ama i asa pola didok "hundul di siamun di Debata." Marhuaso do Debata manaluhon huaso ni portibi, jala marharajaon di banua ginjang dohot banua toru. Kristus do uluan ni Huria, marhitehon i hita pe na gabe ruasNa marhuaso songon Ibana laho manaluhon hamatean (mate ni haporseaon, mate ni panghirimon, jala mate ni parulan).
Kesimpulan dan Refleksi
Marhitehon i, hita angka na porsea tu Debata ingkon marsiajar laho mangolu di bagasan panandaion tu Debata. Molo dung mangolu di bagasan habisukon na sian Tondi Parbadia hita, ndang holan antus hita ise do Debata, alai antusanta ma panjouon, hamoraon dohot huaso na nilehon ni Debata tu hita. Marhite Jamita on, manogihon jala manuturi hita laho mangharingkothon:
1. Haporseaon na di hangoluhon jala holong marhite parulan. Haporseaon na mangolu tu Jesus Kristus ndada holan mian di bagasan roha, alai ingkon do diulahon marhite holong tu dongan jolma.
2. Mangharikothon habisukon jala panindangion. Ngolu na so di bagasan habisukon na sian Tondi Parbadia, tung so boi ibana mangantusi angka sangkap dohot pambahenan ni Debata jala panjouon ni Debata di ngoluna.
3. Hagogoon dohot huaso na nilehon ni Debata. Hita na mangolu di bagasan Debata, ingkon porsea tu Jahowa, sai na dongananNa do hita mandalani ariarinta. Dilehon Debata do tu hita hagogoon laho mangadopi saluhutna i, dung i manghirim ma hita di ngolu na dame jala na manghaholongi Debata dohot dongan jolma.
Huria na hinaholongan, ingkon gomos do hita martangiang tu Debata asa dilehon di hita habisukon asa anggiat lam mananda hita di Ibana marhite haheheon ni AnakNa na sasada i. Marhite roha na pantas jala na ias, idaonta ma panghirimon, hamoraon, jala huaso na sian Debata. Ala ni i, ingkon mangolu hita di bagasan haporseaon, holong, hagogoon jala rade gabe sitindangi Hata ni Jahowa di pardalanan ni ngoluta. Amen.
Posting Komentar