Jamita Partangiangan Epistel Minggu 1 Juni 2025 Minggu Exaudi tarsurat di buku Pangungkapon 22 ayat 12 - 21. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Jahowa do Raja." Rap ma hita mangihuthon hatoranganna.
Pendahuluan
Buku Pangungkapon on marisi pangungkapon na sian Tuhan Jesus Kristus tu si Johannes uju na tarbuang ibana di Pulo Patmos. Laos ditongos ma isi ni pangungkapon jinalona tu halak Kristen 7 huria, i ma na di Epesus, Smirna, Pergamus, Tiatira, Piladelpia dohot Laodikia. Maksud ni surat on laho mangapoi, mangapuli nang margogoihon halak Kristen uju i, na mangadopi pangaleleion (dipasiaksiak) ala ni na mangihuthon Jesus Kristus. Pangaleleion i marharoroan sian pamarenta Rom na manghasogohon hakristenon uju i.
Turpuk Pangungkapon 22 : 12 - 21 on bagian na parpudi di pangukapon na tu si Johannes, dison dipabotohon Jesus do taringot tu hadirionNa, tarlumobi ma haroroNa na paduahalihon di bagasan hasangapon, laho mamboan upa tu angka na porsea, jala uhum tu angka parjahat. Paposhon roha ni ruas ni huria na manaon na porsuk i manghirim di hamuliaon ni Debata, sieahan nasida.
Pembahasan
Gira nama Haroro ni Jesus Kristus (ayat 12)
Di bindu 22 on, 3 hali Tuhan Jesus pabotohon haroroNa, i ma di ayat 7, 12 dohot 20. HaroroNa na didok dison i ma haroro di bagasan hasangapon. Haroro ni sada Raja na marmulia. Jala dipabotohon ia haroroNa gira, tibu (segera), na marlapatan ndang di tingki na leleng.
Ndang dipabotohon ari sadiharina. Alai na ingkon ro do Jesus i sebagai Raja. Dipabotohon Jesus dison, ia di haroroNa i, Ibana mamboan upa tu saluhut. Upa ni halak na satia, porsea di Tuhan Jesus, atik pe mangadopi hasusaan, tumpal hangoluan ma jambarna (Pangungkapon 2 : 20). Di ayat 11 dipabotohon, hita mamillit, manghangoluhon hajahaton (hinasogohon ni Debata) manang manghangoluhon hatigoran (lomo ni roha ni Debata). Asa di haroroNa na paduahalihon, ndada songon haroroNa na parjolo i, na gabe jolma jala posoposo, alai sebagai Raja na ro manguhumi jolma di bagasan hasintongan.
Jesus do Mulana dohot Punsuna, Parjolo jala Parpudi, Bonana jala Ujungna (ayat 13)
Na niondolhon ni pandohan on, i ma taringot tu Jesus Kristus, hadebataonNa. Ibana bonana dohot ujungna (Alpa Omega) na manongtong salelenglelengna. Andorang ditompa dope portibi on nunga adong Jesus Kristus, jala salpu pe portibi on adong do Ibana. Ndada songon panandaon ni parhaporseaon di luar ni Kristen na mandok, sada sian angka panurirang (nabi) do Jesus i, na marlapatan, holan jolma sambing do Jesus na digoari na deba nabi Isa, manang songon pandok ni Saksi Jahowa na so mangokui hadebataon ni Jesus.
Di Pangungkapon 1:8 dohot 21:6, nang di ayat 13 on dipapatar Tuhan Jesus do diriNa Alpa dohot Omega, bonana dohot ujungna. Istilah Alpa dohot Omega on pabotohon hadirionNa na tumompa langit dohot tano on. Laos marhite i naeng pahothon roha ni halak Kristen, asa tongtong marpos ni roha tu Tuhan Jesus Kristus.
Martua ma na Mamuri AbitNa (ayat 14-15)
Dipabotohon Tuhan Jesus do, na martua do na mamuri abitNa. On ma na manggombarhon halak na marsaulihon hasesaan ni dosana di bagasan mudar ni Tuhan Jesus i, jala na manundalhon dosa, na marsihohot marhaporseaon, huhut haporseaonna i patar marhite na manghangoluhon lomo ni roha ni Debata. Hatuaon ni halak na mamuri abitNa, i ma parjambar di hau hangoluan dohot di huta Jerusalem na imbaru di inganan hasonangan, na so adong be disi iluilu dohot na hansit (Pangungkapon 22 : 15). Baliksa, di ayat 15 tangkas dipabotohon paboa ndang parsidohot marsaulihon hau hangoluan dohot bongot tu Jerusalem naimbaru i angka biang dohot angka siulahon rasun dohot angka parmainan dohot pamunu, dohot sioloi na so Debata, ro di nasa na manghaholongi jala na mangulahon gabus." Na nidokna dison, i ma angka jolma na mangadop di dosa, jala na so satia, angka na marpangalahohon na jat (patudos Pangungkapon 21 : 8). Nasida manjalo tohapna di laut na gor api dohot barerang, i ma hamatean na paduahon i.
Di pangungkapon bindu 2, dohot 3 adong di huria i uju marpangalahohon songon na nidokna di ayat 15 on na marpangalahohon biang, mangalangkup, sombong, mardebata si leban. Angka na holan manghangoluhon hagiot ni daging nang haportibion. Di ayat 16 dipertegas Tuhan Jesus do diriNa di pandokNa: Ahu do urat dohot marga ni Daud (Tunas Daud), Bintang Sipaias (Bintang Timur) na marsinondang i. Jesus Kristus do naung sinuriranghon di Padan na Robi, Mesias na sian pomparan ni si Daud (Jesaya 11 : 1, 10), suang songon i do nunga disuriranghon 4 Musa 24 : 17, ia Mesias na naeng ro i: "Binsar do sogot sada Bintang sian Jakob, jala hehe do sada tungkot harajaon sian Israel. Alai di ayat 16 on digoari Jesus i Bintang Timur (Bintang Timur adalah planet Venus, bintang yang paling terang di cakrawala, juga disebutkan bintang fajar atau terbitnya pagi). Dison digoari do Kristus i "Bintang Sipaias na Marsinondang", manggombarhon Jesus Kristus Raja siboan haluaon.
HuriaNa Manjanghon (menyambut) Haroro ni Kristus (ayat 17)
Di na pinabotohon ni Kristus na gira/ tibu ma haroroNa tu portibi on (ayat 7, 12), diolophon huria / na porsea i marhite na mandok "ro ma Ho". Na porsea digombarhon do sebagai oroan (pengantin perempuan, na manjanghon Kristus i songon pangoli (pengantin laki-laki). Diuduti ma muse, marhite sosososo tu angka jolma na mauas di haluaon nang hangoluan, manjalo aek hangoluan na di bagasan Jesus, so pola marpanuhor, alai basabasa ni Debata na di bagasan Jesus Kristus (patudos Johannes 4 : 10).
Sipaingot asa Unang Manambai manang Mangorui Hata ni Debata (ayat 18-19)
Isi ni buku Pangungkapon on, marharoroan sian Tuhan Jesus Kristus, na pinasahatNa tu si Johanes (Pangungkapon 1 : 1), jala nunga sahat tu angka huria uju i, sahat tu angka partingkian na mangihut nuaeng nang tu tingki na naeng ro. Marhite pandohan na di ayat 18-19 on dipaingot tangkas, asa unang adong na manambai manang mangorui. Alana manambai dohot mangorui, manguba manang mamalsuhon isi ni pangungkapon ni Tuhan Jesus, i ma hajahaton na hinagigihon ni Debata. Ai molo ditambai manang diorui gabe manghorhon pangantusion na marasing sian na pinasahat ni Tuhan Jesus Kristus. Laho patoguhon sipaingot i, dipabotohon do dison uhum sijaloon ni manang ise pe na manambai manang na mangorui. Di na manambai uhumna i ma haporsukon, suang songon i tu na mangorui, ndang partohap di hau hangoluan dohot di huta na badia i ma Jerusalem na imbaru na pinarade ni Debata. Atik pe na di turpuk on ditujuhon manaringoti buku Pangungkapon on, alai suang songon i do nang maradophon na tarsurat di saluhut 66 buku na di Bibelta i, ndang jadi manambai manang mangorui. Di Padan na Robi pe di 5 Musa 4 : 1 - 2 dipaingot si Musa do bangso Israel laho manangihon jala mangoloi Patik ni Debata, asa unang manambai manang mangorui (patudos Poda 30 : 5-6).
Na ro ma Jesus i Tibu (ayat 20-21)
Pandohan na di ayat 20 on i ma pandohan na parpudi, penegasan ni Tuhan Jesus paboa na ro ma Ibana. Haroro ni Jesus padua halihon didok tibu, naeng mandok, asa rade na porsea i, managam haroroNa i. Sadihari do haroroNa i? Ia tingki ni Debata, ndang sarupa tu partingkian ni hita jolma. Di 2 Petrus 3 : 8 didok do: "Alai sada ari do di Tuhan i songon 1000 taon, jala 1000 taon songon sada ari". On pe ndang boi hita mangetong partingkian ni Debata secara hurufiah. Na pinangido ni Debata asa hobas, manang rade hita managam haroroNa.
Kesimpulan dan Refleksi
Di Buku Ende nomor 802 didok "pangke tingkim saonari, dapothon ma Tuhanmi, ... ingot jempek ngolumi. Taingot na di Mateus 25 umpama taringot tu 5 halak anak boru na rade managam si pangoli, gabe parsidohot di na bongot tu hasampuran rea, alai na so rade, sordak do pintu i, manang ndang parsidohot. Saleleng di portibi on di na managam haroroNa i, di bagasan haporseaon, huhut mangulahon lomo ni roha ni Tuhan. Jala ala ni panghirimon di haroroNa i, tung pe godang angka haporsuhon tabolus, ndang be mandele, alai margogo jala marhiras ni roha ma hita. Amen.
Posting Komentar