Jamita Minggu 8 Juni 2025 Minggu Pentakosta 1 tarsurat di Johannes 14 ayat 15 - 26. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Ulaon ni Tondi Parbadia tu Angka na Porsea." Rap ma hita mangihuthon hatoranganna.
Pendahuluan
Di bagasan turpuk on i ma pangajarion ni Tuhan Jesus tu angka siseanNa uju so diparsilanghon dope Ibana. Diajari Jesus do angka siseanNa i, asa margogo di na laho mangadopi angka hamaolon, tagan so laho Ibana sian portibi on. Ditangkasi Ibana do taringot tu hubungan ni angka siseanNa i tu Debata, suang songon i holong ni nasida na ingkon do dipataridahon marhite pangoloion tu angka patik ni Debata. Holong dohot pangoloion ndada holan sekadar patuduhon relasi manang hubungan ni jolma tu Debata, alai naeng patuduhon komitmen dohot hasatiaon ni sisean i manghaholongi Debata. Laho mangulahon i marpadan do Jesus di na laho manongos Tondi Parbadia di na laho mandongani jala mambuka sada pengalaman na imbaru tu haporseaon ni halak na porsea tu Ibana.
Hasasaor ni Tondi Parbadia gabe sada tanda na berkelanjutan di hadirion ni Jahowa di tongatonga ni bangsoNa, nang pe nunga laho Jesus Kristus sian portibi on. Asa di turpuk on, ndada holan gabe pangapulion ni Jesus tu sisean i, alai gabe dasar utama ni parngoluan ni haporseoan ni halak Kristen salelengna. Ala ni i molo pe secara fisik Jesus manadinghon sisean i, ndada i ujung ni parsaoran ni Jesus dohot sisean i, alai mula ni nasa parngoluan na imbaru di bagasan huaso ni Tondi Parbadia, na mandongani, mangurupi, mangajari nang pahothon haporseaon ni angka na porsea tu Ibana sahat tu haroroNa na paduahalihon.
Pembahasan
Holong Marhite Pangoloion (ayat 15, 21-24)
Molo na Holong rohamuna di Ahu, radotanmuna do angka patikHu, na pataridahon adong hubungan na mansai erat antara holong dohot pangoloion. Holong manang kasih dalam Bahasa Yunani ἀγαπᾶτέ "agapate" na merujuk tu holong na so marbalos manang tanpa syarat na menghasilkan tindakan ndang holan teori manang holan hata tu angka dongan jolma nang tu Debata. Hataridaan ni holong i, i ma adong pangoloion "ketaatan" di na laho mangulahon angka Patik ni Debata. Pangoloion i ma sian Bahasa Yunani ὑπακοή (hupakoé) berarti "ketaatan" atau "kepatuhan". Bukti ni na marholong ni roha tu Debata, i ma na mangoloi patikNa, "manang ise na maniop angka patikHu jala diradoti, i do na holong roha di Ahu", artina love needs proof, not talk only, "cinta itu butuh bukti, bukan hanya perkataan saja". Cinta kepada Allah dibuktikan dari ketaatan melakukan perintahNya. Molo na holong rohamuna di Ahu, radotanmuna do angka patikHu.
Muncul do sada pertanyaan sian si Judas i ma: "Dia do Alana Tuhan umbahen na holan tu hami papataronMu diriM, ndada tu portibi on?" Na pataridahon di angka siseanNa i na so mananda dope nasida taringot tu karakter nang penyataan ni Jesus di ari na naeng ro. Marhite pandohan i, ro do Jesus mangalusi nang pahothon songon dia do hubungan ni holong nang pangoloion dohot hadirion ni Jesus na bersifat rohani, ndang secara fisik be diida nasida songon na diigil ni torop jolma nang halak Jahudi hatiha i.
Seorang teolog terkemuka, John Stott, mengatakan, "kasih dan ketaatan tidak dapat dipisahkan, kasih yang sejati akan menghasilkan ketaatan." Asa Pangoloion tu hata ni Jahowa ndang holan sekadar formalitas, alai gabe sada parbue ni holongta maradophon Jesus Kristus do.
Parpadanan na hot di bagasan Kristus (ayat 18-20)
Ndang tadinghononHu hamu so marama, gabe sada pangapulion di angka siseanNa i, adong padan na ditiop sisean i gabe sada hagogoon nang semangat marhite haheheonNa di ari patoluhon nang haroro ni Tondi Parbadia na mandongani dohot mangurupi sahat tu haroroNa na paduahalihon. Nang pe sacara fisik, Jesus ndang raphon nasida, alai kehadiran ni Jesus tetap do rap dohot sisean i marhite hasasaor ni Tondi Parbadia na mian di bagasan ngolu ni jolma.
Seorang Teolog na margoar J. I. Packer menyatakan, "kehadiran Roh Kudus membawa kita masuk dalam persekutuan dengan Kristus sendiri." Na marlapatan marhite parsaoran ni Tondi i, boi do hita rap marsaor dohot Jesus Kristus Tuhanta di ganup ari nang tingki pe. Ala ni i, boi do taida songon dia parpadanan na hot di Debata Ama, AnakNa Jesus Kristus nang Tondi Parbadia boi pahothon parpadananta angka na porsea tu Ibana.
Tondi Parbadia na mandongani, mangajari jala paingothon (ayat 16-17, 25-26)
Tondi Parbadia i ma pribadi na patoluhon sian si hatolusadaon ni Debata Ama, Anak dohot Tondi Parbadia, na di padanhon tu angka siseanNa asa gabe pangurupi, mangapuli roha nang mandongani nasida. Di bagasan turpuk on, diboto Jesus do na ingkon mandalani hamatean Ibana, mulak mangolu di ari patoluhon dohot na ingkon manaek tu surgo, artina ndang rap be nasida. Jala diboto Jesus do siseanNa i mabiar, alana ingkon mangadopi angka hamaolon do sisean i di bagasan ngolu nang pelayanan pasahathon Barita na Uli i di portibi on, molo ndang rap nasida.
Ala ni i dibagabagahon Jesus do tu sisean i lehononNa sada pangondian na asing, na boi mandongani salelengna (ayat 16). Sada pangondion na asing dalam Bahasa Junani i ma parakletos (παράκλητος) na marlapatan "perantara" atau "penghibur" i ma Tondi Parbadia. Pangondian na asing na dibagabagahon i naeng tongtong mandongani salelenglelengna. Menurut Alkitab Terjemahan King James Version (KJV) hata "mandongani" manang "menyertai" digurithon "abide" sian bahasa aslina "meno" na marlapatan "tinggal" raphon halak na porsea salelenglelengna.
Tondi Parbadia na mian di bagasan ngolu ni na porsea, pasahathon angka barita na sintong jala mangajari nang manogunogu tu dalan na sintong. Johannes 15 : 26 mandok "i ma Tondi hasintongan i, borhat sian Damang; i do na manghatindanghon taringot tu Ahu", na marlapatan Tondi i, i ma sada pribadi na naeng manghatindanghon taringot tu Jesus Kristus. Ala ni i, ulaon ni Tondi marhite turpuk on i ma:
1. Mangajari saluhut angka na denggan tu ganup halak na porsea marhite HataNa (FirmanNya).
2. Paingothon ganup na naung diulahon Jesus nang naung diajarhon Jesus marhite HataNa.
3. Mandongani, mangurupi ro di salelenglelengna.
Nang di 2 Timoteus 1 : 7 mandok, ia Tondi na dibagabagahonNa i, ndada tondi hatahuton, alai Tondi hagogoon, haholongon nang pangarajaion diri. Ala ni i, boi do tapahami ulaon ni Tondi ndang dibatasi manang aha pe nang dohot manang ise pe jala ulaon ni Tondi Parbadia do mengalehon bisuk manang na mangajari jolma i di na laho memahami taringot tu pangajarion ni Kristus di bagasan ngolu ni halak na porsea tu Ibana.
Kesimpulan dan Refleksi
Pentakosta i ma ari palimapuluhon, lapatanna ari hasasaor ni Tondi Parbadia tu ganup na porsea. Marhite turpuk on, dipaingot Jesus do siseanNa, nang hita pe saluhutna, i ma taringot tu hubungan ni holong dohot pangoloion. Manghaholongi Jesus ndang holan sebatas di hata, alai naeng ma marhite komitmen na dipataridahon sian tindakan nyata. Asa hataridaan paboa tadok na holong rohanta tu Debata, patuduhononta ma i di angka ulaonta dohot di angka panghobasionta marhite na mangaradoti patikNa.
Unang tadok holong rohanta tu Debata, alai angka hosom dohot late dope na sai lohot di rohanta. Molo songon i do, na bersandiwara jala na berpurapura do hita manghaholongi Debata. Satukan kata dengan perbuatan ninna angka na bisuk. Mangaradoti Patik ni Jahowa i ma sada ekspresi tertinggi hataridaan manghaholongi Ibana.
Dibagabagahon Jesus do pangondian na asing na gabe pandongani, pangajari, panuturi dohot panogunogu di hita angka na porsea di Ibana. Tondi Parbadia na mangelohon panghirimon na mangolu di ganup pardalanan ni haporseaon ni halak Kristen. Tondi Parbadia na gabe hagogoon, habisuhon, pangapuli di ganup angka ulaonta dohot na masa di bagasan ngolunta, jala Tondi i do na pahot haporseaonta tu Jesus Kristus asa boi manjalo hangoluan na salelenglelengna. Dibahen i marhite Minggu Pentakosta i ma Minggu hasasaor ni Tondi Parbadia, asa saor ma nang Tondi Parbadia di bagasan ngolunta dohot di ulaon panghobasionta. Amen.
Posting Komentar