Jamita Partangiangan Epistel Minggu 15 Juni 2025 Minggu Trinitatis tarsurat di buku Rom 5 ayat 1 - 5. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Mambaritahon Taon Parasinirohaon ni Debata." Rap ma hita mangihuthon hatoranganna.
Pendahuluan
Aut sugari adong na manungkun, ise do hita na mangido masa sitaonon na porsuk dohot parsorion di ngolu on? Tontu ndang adong hita na mangidohon masa sitaonon manang parsorion, baliksa tahe angka si las ni roha, hahipason dohot pasupasu do na jotjot tapangido tu Debata di bagasn tangiangta.
Nang pe ndang hea hita mangidohon asa masa sitaonon manang parsorion di ngolu on, alai tung na so boi do tarpasiding sitaonon dohot parsorion ro. Olo do ro sungkunsungkun di bagasan roha, na naeng manaon sitaonon do jolma i ditompa Debata? Ndang ditompa Jahowa Debata jolma asa manaon hinahansit dohot hinabernit, jala so tupa Jahowa Debata manurpukhon jolma asa marsitaonon.
Molo songon i, boasa ma ingkon masa sitaonon dohot haporsukon tu ganup jolma tarlumobi tu halak Kristen? Sipata songon na dipasombu Jahowa Debata hita manaon na hansit jala na bernit. Hombar tu si do marhite turpuk on, diajarhon tu hita boasa masa sitaonon dohot haporsuhon tu hita? Asa lam tu antusna hita mangantusi taringot sitaonon dohot aha do panghorhon ni sitaonon i masa, masuk ma hita tu hatorangan ni turpuk.
Pembahasan
Luat Rom i ma sada huta na mansai balga na gabe ibu kota harajaon Rom. Nunga sahat be Barita na Uli di luat Rom, alai ndada sian parbue ni ulaon parbaritanaulion ni si Paulus, andorang so sahat ibana tu paruhuman mate sian harajaon ni Rom, ndang hea dope ibana ro laho marbarita na uli tu huria na di luat Rom. Torop do na bisuk marpandapot Apostel Petrus do na pajongjonghon huria di luat Rom.
Uju harajon Rom diuluhon Kesar Nero, torop do halak Kristen na mangadopi hinahansit dohot na bernit. Sai dituduhon si Nero do hata na so tutu dompak halak Kristen, asa i dalanna laho mangalele, mamusa dahot mamunu halak Kristen uju panggomgomionna. Didok do halak Kristen na manegai jala na manggaorhon luat Rom, hape sasintongna si Nero do na mangulahonsa. Mansai sorat dohot mansai hansit do na dihilala halak Kristen uju i. Disurathon si Paulus do suratna on di taon 55-56 M laho pahothon haporseaon ni halak Kristen, nang pe ingkon na hansit jala na bernit ditaon. Laos dalan laho manosoihon halak Kristen, nang pe masa angka na hansit dohot na bernit, ndang manundati nasida tongtong mambaritahon taon parasinirohaon ni Jahowa Debata naung singkop di bagasan hadirion ni Tuhan Jesus Kristus.
Molo sian hadirion ni jolma, ndang adong jolma na so mardosa. Dosa i do mambahen jolma i mangula hombar tu lomo ni rohana, panghorhon ni dosa do ianggo pangiburion, elat, teal, late songon i hosom. Marhapatean tu hamagoan dohot hamatean do ianggo panghorhon ni dosa. Ndang adong na boi sipujion sian hadirion ni jolma, jala hinorhon ni dosa i ndang tama jolma i marpasoran dohot Debata mangido gogo dohot pangurupion tu dirina. Dihagigihon Jahowa Debata do sude angka parulaon ni dosa, alai marasi ni roha do Jahowa Debata tu ganup jolma. Dilehon do AnakNa na sasada i gabe pelean hasesaan ni dosa dohot pelean hadameon (patudos Johannes 3 : 16). Di bagasan Jesus Kristus do singkop dipatupa Jahowa Debata hasesaan ni dosa dohot haluaon tu jolma, laos padengganhon parsaoran na denggan tu Jahowa Debata. Ndada ala ni hadirion ni jolma umbahen dipintori Debata hita sian angka dosanta dohot paluahon hita sian hamagoan manang hamatean, tung holan ala ni asi ni roha ni Debata do (sola gratia).
Tahaporseai ma asi ni roha ni Debata naung mamintori hita sian angka pangalaosion dohot dosa. Laos hinorhon ni haporseaon i do hita mardame tu Debata Ama marhitehite Tuhan Jesus Kristus (patudos ayat 1). Ndada ala ni gogo manang hadirionta, alai tung holan asi ni rohaNa do, jala holan marhite haporseaon do boi hita mardame tu Debata Ama, asa unang mabiar be hita ro tu Ibana jala unang mabiar manjou Debata, Abba manang Ale Amang. Haporseaon ndada hata na so mulaulaon, alai hata na marudut tu parulaon. Mangolu do angka partigor hinorhon ni haporseaonna na polin di asi ni roha ni Debata Ama di bagasan Tuhan Jesus Kristus. Haporseaon marudut tu pamelehon diri na hibul gabe ampuna ni Tuhan Jesus Kristus. Asa hita ndada mangolu be tu dirinta, alai mangolu rap dohot Tuhan Jesus Kristus. Holan di bagasan Tuhan Jesus Kristus do masuk hita tu asi ni roha, jala hajongjonganta nuaeng dalan haporseaon, laos i do na gabe hatuaonta marningot hasangapon ni Debata na tahirim i (ayat 2).
Holan di bagasan Tuhan Jesus Kristus do margogo hita di ragam ni angka haporsukon, jala gabe hatuaon do tahilala molo manaon haporsukon di ngolu. Ala taboto do hinorhon ni haporsukon i do habengeton ni roha, jala hinorhon ni habengeton ni roha i do hatuaon, jala hatuaon i do manghorhon panghirimon (ayat 35). Uju rap dope Tuhan Jesus dohot angka siseanNa, nunga dipaboa Jesus hian , aha do na ingkon masa tu angka Apostel, laos mangihut sahat tu si nuaeng. Tuhan Jesus Kristus mandok: "Molo dihosomi portibi on on hamu, boto hamu ma, naung jumolo Ahu dihosomi. Aut na sian portibi on hamu, haholongan ni portibi on do donganna. Alai ndang sian portibi on hamu. Ahu do tahe mamillit hamu sian portibi on; ala ni i do, umbahen na dihosomi portibi on hamu. Ingot hamu ma hata naung Hudok tu hamu: Ndang na umbalga anak somang sian indukna. Molo diburui nasida Ahu, buruanna do nang hamu; molo diradoti nasida HataKu, radotanna ma nang hatamu. Alai songon i bahenonnasida tu hamu, ala ni GoarHu; ai ndang ditanda nasida na marsuru Ahu" (Johannes 15 : 18 - 20). Unang ma ala ni hasalaanta, hajahaton dohot ragam ulaon na jat gabe marsitaonon hita, ala so dapot si pujion si songon i, alai naeng ma holan ala na tongtong hita hot di haporseaon jala na marsihohot manghatindanghon asi ni roha dohot holong ni Debata tu sude jolma.
Manghorhon habengeton do anggo haporsukon. Habengeton marlapatan do na so olo lalap manang talu hinorhon ni haporsukon na masa. Tubu hiras ni roha (semangat berjuang). Habengeton boi do dilapati ketekunan manghangoluhon dohot mangulahon parbue ni haporseaon. Ndang sumurut jala ndang jumpang pandelean di bagasna. Alai lam dokdok sitaononna, lam hansit dipanghilalahon lam semangat do ibana mangulahon dohot manghangoluhon haporseaon i, ndang mabiar ibana mangadopi hamaolon na adong di adopanna. Marpanghorhon hatuaon do ianggo habengeton, jala hatuaon i manghorhon panghirimon. Panghirimon i na mambahen hita lam margogo, lam semangat. Panghirimon i do na manjou hita asa margogo hita di na manaon sitaonon. Panghirimon na nidokna dison, i ma panghirimon di pangurupion, pandonganion dohot haluaon na pinatupa ni Jahowa di bagasan Jesus Kristus, paima jumpang tingkina di na ro Tuhan Jesus Kristus di bagasan hasangapon dohot hamuliaonNa. Di ari i, marsingkat ma hoihoi, dohot haberniton na tataon di portibi on gabe olopolop dohot las ni roha. Ndang adong be masa angguangguk, alai angka parendeon nama na masa, ndang na murak hita bahenon ni panghirimon i, ala nunga diusehon tu bagasan rohanta holong ni roha ni Debata marhitehite Tondi Parbadia, naung nilehonNa i tu hita (ayat 5). Nunga dibagabagahon Tuhan Jesus Kristus taringot pangurupion ni Debata molo masa angka haberniton. Jesus Kristus mandok: Jala pangidoonHu ma tu Ama i, asa dilehon tu hamu sada Pangondian na asing, asa I mandongani hamu salelengna. I ma Tondi hasintongan i, na so tarjalo portibi on, ai ndang diida jala ndang ditanda; alai ditanda hamu do Ibana, ai na rap ma Ibana dohot hamu jala di bagasan hamu ma Ibana. Ndang tadinghononHu hamu so marama; na ro ma Ahu mandapothon hamu" (patudos Johannes 14 : 16 - 18).
Kesimpulan dan Refleksi
Sadihari be salpu angka sitaonon manang na hansit on? Aha nama bahenon asa malua hita sian ragam sitaonon? Martua ma hita molo masa na hansit dohot na bernit di ngolunta, alai unang ma nian ala ni parulaonta na jat hita marsitaonon. Molo pe ingkon masa na bernit manang na hansit di parngoluan on, ingot ma hita tu Jesus Kristus. Ingot ma hita naung dipapita Debata marhite asi ni rohaNa na singkop di bagasan diri Tuhan Jesus Kristus. I ma holong ni Debata tu hita. Holan ala holong ni rohaNa do na mampargogoihon, mamparbisuki hita manaon na hansit dohot na bernit. Ndang paloasonNa hita punjung manaon angka sitaonon dohot na hansit. Sai urupanNa, ramotanNa, jagaonNa do hita manalpuhon saluhut angka sitaonon dohot parsorion na masa. Dipatuduhon Tuhan Jesus do holong ni rohaNa tu hita di ragam ni sitaonon na masa. Di bagasan diriNa do dipadame hita tu Debata Ama, bona jala mual ni hangoluan. Dung dipadame hita tu Debata Ama, marlapatan nunga saor be hita rap dohot Debata. Hinorhon ni i do barani hita manjou Ibana ale Abba, na marlapatan Ale Amang. Molo Debata do gabe Amanta jala hita gabe anakhonNa, marlapatan do i panarihonon, pangaramotionNa tu hita songon sada ama na manarihon jala mangaramoti ianakhonna, jala na so jadi paloasonNa hita marujung di sitaonon, alai marujung tu hangoluan saleleng ni lelengna do.
Marbenget ni roha ma hita manaon angka sitaonon dohot haporsukon i huhut tongtong manghirim di pangaramotion dohot pandonganion ni Debata tu hita marhitehite Tondi Parbadia. Tondi Parbadia do na mangondihon hita di sitaonon i, Tondi Parbadia do na mangapuli jala na manogunogu hita mamolus sitaonon na masa. Marhite benget ni roha i do hita dijou laho pararathon taon parasinirohaon ni Debata tu angka jolma. Mambaritahon taon parasinirohaon ni Debata i ma mambaritahon Tuhan Jesus Kristus. Ibana naung ro tu hita ndang na laho paluahon jolma i sian parungkilon ni pamatang, alai paluahon sude rante ni dosa dohot soropna, paluahon angka na porsea sian hurungan manang hisap ni dosa marhite hagiot ni daging dohot portibi on. Asa marhite i saluhutna, ndang mabiar be jolma i mandalanhon ngoluna nang pe ingkon marungkil manang manaon na hansit sian portibi on. Pos ma rohanta, Debata do donganta saleleng ni lelengna. Amen.
Posting Komentar