Jamita Minggu 20 Juli 2025 Minggu 5 Dung Trinitatis tarsurat di Lukas 10 ayat 38 - 42. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Mamillit na Dumenggan." Rap ma hita mangihuthon hatoranganna.
Pendahuluan
Adong sada istilah di hita halak Batak na mandok, "tading do na ringkot binahen ni na rumingkot". Somalna, hahonaan ni pandohan on tu angka ulaon si ganup ari do, asa molo tung pe adong angka ulaon na somal diulahon, alai molo tung adong ulaon na apala sumurung sian ulaon na somal i, mamintor ma dihalaputhon. Alai, molo dung diulahon ulaon i, tongtong ma di bagasan tulus dohot ias ni roha. Dibahen i, sapala naung diharingkothon ingkon ma antong marlaba jala marlapan parulaon i tu na denggan. Jala lam tu dengganna ma i tutu molo boi rap diula na ringkot i dohot na rumingkot si naking. Tandip do ianggo parulaon si songon on, songon parulaon ni si Marta dohot si Maria uju na ro Tuhan Jesus mandulo nasida. Manigor do humalaput si Marta patuhobas laho manghobasi saluhut, songon laho mempersiaphon angka sipanganon. Alai, si Maria pintor hundul do jumonok tu Tuhan Jesus, laho mananginangi; tumangihon Barita na Uli na binoan ni Tuhan Jesus. Asa molo tapatongon pe songon pandohonan na di ginjang, ringkot do di roha ni si Maria na laho mangurupi si Marta marhobas, alai di rohana rumingkotan dope na manangihon Barita na Uli i na sian Tuhan Jesus. Baliksa, ringkot do di roha ni si Marta laho tumangihon Barita na Uli na sian Tuhan Jesus, alai na rumingkot nuaeng i ma na laho manghobasi angka na naeng sipatupaon. Ai di roha nang pikkiran ni nasida nadua, sasahali do ro Tuhan Jesus mandulo nasida. Hinorhon ni i denggan do parulaon ni nasida nadua i, alai dia ma rumang ni na dumenggan na ingkon si ulahonon ni nasida? Tapaihutihut ma hatorangan ni turpuk on.
Pembahasan
Si Marta dohot si Maria i ma na marhaha anggi jala nadua on i ma iboto ni si Lazarus. Nasida tinggal di huta Betania (patudos Johannes 11 : 1 - 2). Na ringgas do na dua on, lumobi ma dung na marhamubaon si Maria, i ma di na miniahanna simanjojak ni Tuhan Jesus dohot miak na hushus (patudos Lukas 7 : 37 - 38 & Johannes 12 : 3). Jala na rap marhobas ma nasida na dua di sada ulaon partamueon laho mandapothon Paska dung pinabangkit ni Tuhan Jesus, iboto nasida, si Lazarus (patudos Johannes 12 : 2 - 3). Jadi, di turpuk on, on ma muse parjumpangan nasida na mangihut. Dibahen i, tardapot roha do songon dia kedekatan emosional ni nasida pajumpang dohot Tuhan Jesus. Molo songon si Marta na somal marhobas, ibana ma tuan rumah na burju, i do umbahen pintor humalaput ibana patupa angka sipatupaon. Alai molo si Maria, hombar tu pangalahona na sai laon, i ma dung na marhamubaon ibana sian hadosaonna, sai mauas male dope ibana di Barita na Uli i. Dibahen i do pintor hundul ibana jonokhon Tuhan Jesus na laho tumangihon Barita na Uli na sian Tuhan Jesus.
Nang pe songon i rumang ni penyambutan ni nasida, pintor tandip do perbedaan ni nadua on. Di roha ni si Marta, ringkot tahe laho patupahon partamueon di Tuhan Jesus, ai balga situtu rohana boi manamue Tuhan Jesus dohot angka siseanNa, lumobi ma i di naung pigapiga hali nasida pajumpang. Songon na hurang do dengganna molo so marsipanganon. Ai nang pe ndang apala tangkas dipandok di turpuk on taringot tu rumang ni panghobasion ni partamueon na di turpuk on, alai hombar tu terjemahanna didok "ulaon di dapur", boi ma pinaandar tu na patupa parsipanganon. Adong tohona tutu, ia unang do lalap sai manghatai hape gabe lupa na marsipanganon, hurang do tutu dengganna. Alai, hinaringkot ni na manangihon Barita na Uli na sian Tuhan Jesus, sai hira na bosuran do dihilala si Maria. Barita na Uli, paulihon roha na magopo jala patogu haporseaon huhut partinandaan di huaso ni Jahowa. On ma na mambahen pintor uli roha ni si Maria laho tumangihon hata ni Tuhan Jesus.
Asa molo nidok pe nakin berbeda nasida, alai anggo di roha nasida naeng patuduhon hinadenggan ni parsaoran (parjumpaan) dohot Tuhan Jesus do. Alai, di tongatonga ni parulaon na denggan i, manigor ma tubu roha elat manang late di roha ni si Marta. On ma sibonsiri na gabe manghorhon hurang "tagi" ni parsaoran i. Tarida do i di pandohan ni si Marta na mandok, " ... Tuhan, ndang diantoi rohaM, na pinasombu ni anggihi ahu marhobasi sahalakhu?" Terkesan memunculkan polemik ma si Marta hinorhon ni ungutungut on. Nian, dapot roha do songon na ni hilala ni si Marta; loja do tutu nasida, hape si Maria holan ripe hundul. Alai, gabe hurang ma denggan ni panghobasionna hape nunga pola loja ibana manghalaputhon i sian na parjolo holan ala ni hatana i. Umbege i, didok Tuhan Jesus, " ... O Marta, Marta! Lan do disarihon jala dihasusahon ho!" Sasintongna, hata ni Tuhan Jesus dison, ndang na pola mangkritik panghobasion ni si Marta, na gabe terkesan, sai hira so porlu pambahenan manang partamueon ni si Marta di Tuhan Jesus dohot angka rombonganNa. Alai, sapala naung dihalaputhon ibana hian nian panghobasion i, asa marpanghorhon tu na denggan, ingkon sipasidingonna ma roha elat. Ingkon burju ma ibana mangula si ulaon i, songon patuduhon paboa naung jonok nasida maradophon Tuhan Jesus. Asa dihalaputhon si Marta ma antong ulaon panghobasion i, di bagasan roha na ias, i ma parbue ni Barita na Uli naung tinangihon ni si Maria. Ai ndang na pola bermaksud "menyudutkan" si Marta Tuhan Jesus, umbahen didok muse, "Sada do na ringkot! Dipillit si Maria do tohap na uli i ... ", asa na ringkot dison i ma ingkon tangi jala unduk tumangihon Hata ni Debata asa dapotan roha dame jala gok holong mangula siulaon dung i marpanumpak tu na denggan.
Ndang adong di roha ni si Maria, roha hosom, sai hira sidalianna hundul jumonok tu Tuhan Jesus, laho menghindari ulaon panghobasion. Diboto Tuhan Jesus do roha ni si Marta suang songon i nang si Maria. Molo si Maria tulus do rohana laho tumangihon Hata ni Tuhan Jesus. Umbahen didok muse, " ... Tohap na uli, ndang sibuaton i sian ibana." Artina disi, jaminan ni golu na ro di saleleng ni lelengna do ianggo Hata ni Tuhan Jesus na ingkon sipeoponna jala si hangoluhononna. Asa sian Ibana ma ro angka pasupasu marhite pos ni roha di na laho mandalani ngoluna lumobi ma di na laho mangula si ulaon. Dibahen i, denggan do parulaon ni nasida na dua i, alai lam dumengganan ma i anggo so marlaok ungutungut na gabe manghorhon dosa ulaon i.
Kesimpulan dan Refleksi
Mansai ringkot ulahononta angka ulaonta na marragam i dohot denggan. Alai, molo tung pe sipata tading na ringkot binahen ni na rumingkot manang ndang tarula hita na rumingkot i hinorhon ni angka na asing, sandok unang gabe marlaok dosa angka ulaonta i. Ingkon manumpak tu na denggan ma nian saluhut angka ulaonta i. Unang marisuang uloanta angka naung ta halojahon i, hinorhon ni roha na elat manang late. Nasa ungutungut na nionjar ni dosa olo do gabe harhar angka ulaonta na denggan i hinorhon ni i. Bahkan, hita sandiri gabe madabu tu dosa. Dibahen i, hinaringkot ni rohanta, asa gabe manumpak tu na denggan angka ulaonta i ma ingkon ni rajaan ni Hata ni Debata ma hita. Tangi jala unduk ma hita di Hata ni Tuhan. Jala ingkon mauas male do hita laho tumangihonsa. Asa molo loja pe hita humalaput manguduti angka ulaonta si ganup ari, taingot ma saluhut na ringkot i di hita, tung sian pamatoan ni Debata do i. Ndang porlu hita mambandingbandinghon dirinta dohot angka na asing gabe manghorhon ungutungut, holan taulahon ma ulaonta dohot denggan, nunga pilihan na dumenggan be i. Asa molo didok pe naking tading do na ringkot binahen ni na rumingkot, sasintongna di turpuk on, ndang na holan mandok bahwa rumingkotan manangihon Hata ni Tuhan Jesus songon na binahen ni si Maria, alai rumingkotan do mangulahon siulahon alai ndang mardongan ungutungut na manghorhon dosa. Ai si Maria manang si Marta diula be pe ulaonna alai molo tohapna be ingkon do si hangoluhonon angka uli ni roha i. Dung i denggan ma saluhutna, jala i ma na dumenggan.
Manang aha pe latar belakang ni ulaonta, ingkon marpanumpak tu na denggan ma i. Molo tung angka parhobas (pelayan Tuhan) pe hita, ingkon parjolo ma ginohan ni Hata ni Tuhan hita asa marhobas. Ai godang parhobas ni Debata na holan marbarita na uli alai partondionna kosong. Ai saluhutna dihalaputhon alai sai mangasahahon gogo dohot parbinotoanna sambing, umbahen gabe harhar sude panghobasion, ai ndang maringan Hata ni Debata di dirina. Molo tung pe angka tenaga pelayan masyarakat hita, isarana guru, aparat, perkantoran dohot lan na asing; ingkon parjolo do hita manghangoluhan angka hasintongan nang angka uhum na adong. Ai gok do angka si boto hasintongan dohot uhum alai ndang diulahon, dung i manghorhon hasesega. Bahkan, dipalomolomohon aturan i holan laho mangaithon tu ngadol. Molo tung pebisnis manang pengusaha hita, ingkon tulus jala bulus do rohanta marroha na tangi di arahan ni Hata ni Debata. Ai gok do angka naung tarpasupasu ngoluna marhite usahana alai gabe holan sipalessem. Ndang gabe pasupasu tu humaliang. Suang songon i angka ruas ni huria, unang be tapasomalsomal mandok, "matemate na burju". Sotung gabe marisuang angka pambahenanta na dengan na sai laon, tadokma, "mangolumangolu na burju". Molo songon i, i ma na dumenggan jala i ma tohap na uli di hita sebagai halak na marhaporseaon, ai ndang adong na tuk mambuat i sian hita. Amen.
Posting Komentar