Jamita Minggu 27 Juli 2025 Minggu 6 Dung Trinitatis tarsurat di 1 Musa 18 ayat 22 - 33. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Tangiang na Mangidohon Haluaon." Rap ma hita mangihuthon hatoranganna.
Pendahuluan
Turpuk 1 Musa on i ma buku na parjolo di Padan na Robi, na gabe patujolo sian sude Hata ni Debata na tarsurat di Buku na Badia. Di hata Heber, 1 Musa digoari beresit lapatanna (di mula ni mulana). 1 Musa disurathon hirahira taon 1445-1405 SM. Turpuk on patoranghon parmulaan ni panompaon ni jolma sahat tu hararat ni jolma i tu sandok portibi on.
Di Bindu 18 on dipasahat Debata ma sangkapNa tu si Abraham nang tu huta Sodom dohot Gomorra. Ala nunga dibege Debata na mardosa nasida maradophon Debata. Ala ni i ma ro Debata manopot si Abraham, laos pasahathon sangkap dohot uhumNa tu Sodom dohot Gomorra.
Pembahasan
Turpuk on patoranghon taringot tu haroro ni Tuhan manopot si Abraham dohot jolmana si Sarah. Alai di ulaon na asing, ingkon soadahononNa nama Sodom dohot Gomorra. Ala naung dibege Debata do anggukangguk badar sian Sodom dohot Gomorra. Dipasahat Debata sangkapNa laho mandabu uhum tu Sodom dohot Gomorra, ala naung dipilllit Debata do si Abraham gabe ama ni saluhut bangso. Debata marsangkap laho patoguhon panjouonNa tu si Abraham huhut laho marnida saluhut huaso ni Debata di atas tano on.
Diboto si Abraham do di huta i mariganan si Lot dohot jolmana dohot boruna. Ala ni i dipasahat si Abraham ma pangidoaanna tu Debata asa unang nian mate keluarga ni si Lot di huta i. Pola sahat onom hali si Abraham pasahathon pangidoanna tu Debata.
Ayat 24. Atek tung adong lima pulu halak, angka na tigor di bagasan huta i, tung ripashononMu ma i, ndang olananMu huta i ala na lima pulu na tigor i, angka na di bagasan i. Molo adong dope lima pulu halak na tigor di huta i ndang ripashonon ni Debata, alai ndang adong be lima pulu halak.
Ayat 27. Dung i ninna si Abraham ma mangalusi: Sombanghu ale Tuhan, nunga sapala hum ahu mamungka manghatai dohot Ho; atek pe orbuk jala sirabun ahu. Diboto si Abraham do ia dirina ndang dos songon Debata, ai ndang tama nian ibana pajumpang rap manghatai dohot Debata, alai dipasiat Debata do ibana pasahathon pangidoanna laos ditangihon Debata do ibana. Alai mangulahi do si Abraham mangido pangidoanna tu Debata ala ndang adong be torop ni jolma songon na pinangidona i.
Ayat 28. Ua tung moru lima halak sian na lima pulu angka na pintor i, tung ripashononMu ma huhut huta i ala ni na lima i? Jadi ninna ma: Ndang ripashononHu molo tung jumpang Ahu disi opat pulu lima. Ayat 29. Ua tung opat pulu jumpang disi! Jadi ninna Jahowa ma: Ndang hahuaonhu nasida ala ni na opat pulu i.
Ayat 30. Atek tung jumpang disi tolu pulu! Jadi ninna Jahowa ma: Ndang hahuaonHu nasida, molo tung jumpang Ahu tolu pulu disi. Ayat 31. Ua tung jumpang disi dua pulu. Jadi ninna Jahowa ma: Ndang ripashononHu ala ni na dua pulu i. Ayat 32. Atek tung jumpang disi sampulu? Jadi ninna Jahowa ma: Ndang ripashononHu nasida ala ni na sampulu i.
Saluhut pangidoan na pinasahat ni si Abraham tu Debata ndang adong na dijua Debata. Dipaloas do si Abraham pasahathon nasa pangidoanna. Sahat tu na parpudi ingkon saut nama sangkap ni Debata. Pangidoan ni si Abraham ndang na so dioloi Debata, alai ala ndang adong be tudos tu bilangan ni na pinasahat ni si Abraham. I ma tangiang, pangidoan ni si Abraham tu Debata. Ndang na so dioloi Debata, alai dipasahat do haluaon i hombar tu sangkap dohot lomo ni roha ni Debata. Si Abraham mangido sian lima pulu sahat tu sampulu, alai holan opat nama na porsea tu Debata, jala tolu do di ujungna na malua sian parmaraan i. Dibahen i ma gabe pos ni rohanta, managam di hinauli dohot na denggan na naeng pasahaton ni Debata di ngolunta. Ai nunga diparade Debata haluaon di na so boi tardodo pingkiranta. Jala sude pangalahonta ndang adong na lipe sian parnidaan ni Debata.
Kesimpulan dan Refleksi
Tangiang na tapasahat tu Debata hombar do i tu saluhut na tahilala, tapingkiri di bagasan rohanta. Tapangido haluaon, hahipason, arta dohot angka na asing. Sude na i, i ma sangkap dohot lomo ni rohanta. Alai marhite turpuk on diajari hita, sude sangkap dohot lomo ni rohanta i ditangihon Debata do, alai nunga diparade Debata na umuli sian na tapangido, tapingkiri. Ndang na so dialusi Debata pangidoanta, alai dipasahat Debata hombar tu lomo ni rohaNa. Marhite turpuk on dipodahon tu hita, asa sian bilangan na otik i boi hita parsidohot di haluaon i. Ndang ala ni hagogoonta alai marhite parangenta na uli di adopan ni Debata. Jala Ibana na manodo hita gabe parjambar di haluaon i. Amen.
Posting Komentar