Jamita Partangiangan Epistel Minggu 27 Juli 2025 Minggu 6 Dung Trinitatis tarsurat di buku Mateus 6 ayat 9 - 13. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Tangiang na Mangidohon Haluaon." Rap ma hita mangihuthon hatoranganna.
Pendahuluan
Mateus didok do muse Lewi, na jolo i ma sijalo beo, songon na tarsurat di Mateus 10 : 3, jala tarpillit ibana muse gabe panurirang (Mateus 9 : 9). Buku Mateus hirahira disurathon taon 60 an Masehi. Hirahira di tano Judea do panuraton ni Mateus laho mambaritahon panindangion taringot tu panindangionna marhite parnidaan na sintong taringot tu ngolu ni Jesus. Laho patoguhon haporseaon, ia Jesus i ma Anak ni Debata na dibagabagahon di Padan na Robi, naung leleng dipaimaima. Huhut laho pataridahon ia harajaon ni Debata dipasahat di bagasan dohot marhite Jesus Kristus di bagasan ulaon na so hea masa. Marragam do panjuaon di haroro ni Jesus di Halak Israel, ndang porsea nasida na ro Ibana gabe Sipalua. Alai tarida do patar muse hasangapon dohot hamuliaon ni Jesus.
Di tongatonga pardalanan pangajarion ni Jesus i ma diajari Jesus sude na porsea di Ibana martangiang. Asa jonok Ibana dohot sude na porsea nang pe nunga di banua ginjang Ibana. Alai boi do hita pajumpang dohot Ibana di bagasan tangiang dohot panghirimon.
Pembahasan
Dung dipasingot Jesus angka ulaon na so denggan di bangso Jahudi, diajari ma muse nasida martangiang tu Debata. Godang do hajahaton na lipe tu ulaon martangiang di tongatonga ni bangso Jahudi, Ala ni i Jesus marsangkap porlu mangalehon pangantusion na imbaru taringot tu tangiang. Laho pataridahon tu angka siseanNa songon dia do sasintongna isi dohot pangalaho manghatahon tangiang. Dipasahat Jesus ma i marhitehite angka hatahata na tung mansai denggan, asa dibahen i gabe tiruan.
Ngolu ni halak Kristen ndang tarsirang sian tangiang. Ai tangiang i do hosa ni na porsea. Tangiang Ale Amanami padomuhon, roha na so paburnang diri, manang na holan mangharingkothon dirina sandiri. Alai holong ni Debata tu saluhut jolma na porsea, Jesus ndang holan marnida tahi ni jolma laho martangiang dohot marulaon huria, laos ro do Jesus mangajari saluhut bangso songon dia do sasintongna martangiang. Martangiang i ma manghatai langsung dohot Debata, pasahathon aha na di bagasan roha. Di bagasan haserepon ni roha manjou Debata, AnakNa Jesus Kristus dohot Tondi Parbadia.
Tangiang i ndang na ala ni ganjangna, ala ndang patuduhon hamaloon manghatai. Alai tangiang ro sian habuluson ni roha laho mambahen pardonganon dohot Debata na mambahen tama ngolunta di adopanNa. Tangiang na denggan patujolohon haporluon ni Debata di bagasan ngolunta sian haringkoton ni dirinta, ala ni i ma didok mansoadahon diri. Ra nunga sude hita mamboto dohot umbege tangiang Ale Amanami na niajarhon ni Jesus. Tangiang i dibuhai dohot sise haporseaon tu Debata na sangap dohot marmulia di habangsaNa di banua ginjang. Laos diujungi muse marhite panindangion ia sude na di portibi on marharoroan sian Debata jala Ibana do nampuna saluhutna di harajaon, hagogoon dohot hasangapon.
Tangiang i mangajarhon hita, asa mangido tu Debata hombar tu na ringkot sadari on dohot na tahaporluhon saonari. I ma tanda haserepon ni roha laho martangiang. Ndang holan manghatindanghon pangidoanta tu Debata, alai asa sangkap dohot tahi ni Debata na saut di tongatonga ni ngolunta.
Kesimpulan dan Refleksi
Tangiang hatopan ndang na holan si ingoton manang si hatahononhon, alai ingkon sihangoluhononhon do. Jesus mangajarhon tangiang on, asa gabe hosa, gogo, haporusan ni na porsea. Tangiang mambahen pardonganon dohot Debata. Mambahen Ibana haporusan dohot habaoran ni nasa saluhut na taadopi di parngoluan. Ala ni i ganup tingki ingkon martangiang, asa lam jonok tu Debata, lam uli dohot denggan parsaoran dohot Debata. Tangiang sada tanda manghamuliatehon basabasa ni Debata do i naung pinasahatNa di ngolunta. Manghatindanghon sude pangaramotion na pinasahat ni Debata, ndang ala ni gogo manang pistarta boi hita mangolu, alai ala asi ni roha ni Tuhan i do. Amen.
Posting Komentar