Jamita Partangiangan Epistel Minggu 6 Juli 2025 Minggu 3 Dung Trinitatis tarsurat di buku Jesaya 66 ayat 10 - 14. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Gabe na Tinompa na Imbaru." Rap ma hita mangihuthon hatoranganna.
Pendahuluan
Molo tapamanat turpuk on, nunga sahat jala bongot be bangso Juda di Jerusalem dunghon mulak nasida sian habuangan Babel na pinalua ni Debata marhite Raja Kores sian Persia. Nunga dibongoti jala diingani nasida be bona pasogit nasida. Nuaeng sahat ma nasida tu na manghobasi laho pajongjonghon bagas joro naung marokso binahen ni Raja Nebukadnesar sian Babel. Alai maringanan dope nasida di pasipasi (rongsokan) ni saluhut angka bagas naung maloha diluntak Nebukadnesar i, ndang adong dope bagas parmianan (Jesaya 61 : 4). Tung mansai hurangan dope nasida di saluhutna, luat niinganan nasida ndang tuk dope mangalehon situasi na demak, digohi arsak dope nasida ai di bagasan roha na monditondit dope nasida jala digohi ila. Jala tarjalo roha do paboa na so stabil dope situasi politik nang ekonomi, marpanghorhon do i paboa na so apala tarida dope las ni roha na singkop di nasida atik pe nian nunga malua nasida sian tano habuangan, alai baliksa suharna dope na jumpang diadopi nasida.
Ndang apala tandi dope na masa niadopan nasida hatiha di habungan martimbanghon bona pasogit nasida na sai hinalungunhon jala niandunghon nasida uju di habuangan, marpanghorhon sai hira na dao jala lipe nasida sian bagabaga naung pinatolhas ni angka panurirang.
Ala ni i ndang apala longang tu roha molo tung adong jumpang sian tongatonga nasida naung sahat tu Jerusalem songon na tarhirim, ai ndang pintor sonson jala solpa na tonggi singkat ni na paet na niadopan nasida hatiha di tano habuangan. Songon i ma na masa di bagasan panghilaan nasida, sian na so panagaman ingkon adopan nasida do na masa i. Tung mansai balga jala timbo do na hinirim (ekspektasi) ni roha nasida, taringot tu huta Jerusalem na naeng sibongotan nasida, alai ndang jumpang songon na hinirim jala pinarsinta nasida i. Dihorhon i ma masa ketegangan, nang kesenjangan. Angka paradongan tarlalap do laho pajongjonghon bagas nasida be (Hagai 1 : 4), alai anggo angka na pogos jala na so mardihadiha sai mandedei ma, ai ndang adong sipatupaonna di na laho manggugui na ringkot tu na pajongjonghon bagas joro i (Hagai 1 : 6). Di situasi na songon on ma panurirang Jesaya pasahathon barita hapanurirangonna na marondolan: "Tangihon ma Hata ni Jahowa ... (ayat 5). Pandohan ni panurirang on panalnalhon paboa na adong di ibana sahala (otoritas) ni Debata laho manghatai dohot bangso i.
Pembahasan
Asi ni Roha ni Debata Jahowa tu Bangso PinillitNa (ayat 10-11)
Patanakhon soara nang barita panurirangon sian panurirang Jesaya tu bangso Juda asa marlas ni roha jala marolopolop nasida. Diaithon jala diarahon panuriang Jesaya bangso i asa sai tinggil manangihon soara ni Jahowa na mangarahon nasida asa marlas ni roha.
Diparata panurirang Jesaya paboa naung digorga Debata sangkap haluaon naung nipadanhonNa tu bangsoNa, asa tung so muba jala mose Ibana disi. Sangkap haluaon i ndada marharoroan sian jolma, manang sian bangso i sandiri, alai tung sian Debata sandiri do naung diuarihon mamungka tu ompu nasida si Abraham, Ishak dohot Jakob. Laos sangkap i do na pinaratarata ni panuriang Jesaya marhite turpuk on tu angka jolma na patorbanghu panghirimonna, alai ndang benget paihutihut pambahenan ni Debata. Debata do na mamungka jala patulushon sangkapNa hombar tu lomo ni rohaNa. Ndang mungkin Debata manangkapi dohot mamungka ulaon haluaon i, alai laos Ibana sandiri mangose jala pasohon, ai Debata na satia jala bertanggung jawab do Ibana na so olo meret jala mose sian naung nipadanhonNa manang ala ni aha pe. I do umbahen dihatindanghon panurirang, "ai munsat pe angka dolok jala humuntal angka robean, alai aggo asiasingKu na so tupa munsat sian ho, jala padan ni hadameonHu na so tupa humordit, ninna jahowa siasii ho" (Jesaya 54 : 10). Laos dipatangkas panurirang i do asa dipamanat nasida saluhut pambahenan ni Jahowa mamungka sian pamillitonNa i di nasida gabe bangsoNa, pangiringiring ni Debata di pardalanan ni ompu nasida sahat tu nasida sandiri. Saluhutna angka pambahenan ni Debata laho patulushon haluaon tu nasida, jala mansai hatop do mardalan, so pola mangihuthon poda natur. Digombarhon do hatop ni pardalanan i songon na somal niae ni sada ina na naeng manubuhon posoposona; i dope mambebe hape nunga manigor sorang (Jesaya 66 : 7 - 9).
Apulapul sian Debata tu BangsoNa (ayat 12-13)
Diparatarata jala dipatogu panurirang Jesaya do panghirimon ni bangso i, asa manaili mata nasida mamereng angka ari na naeng ro di na naeng pasingkopon ni Debata angka bagabagaNa i tu nasida. Digombarhon do las ni roha i songon las ni roha ni dakdanak manang posoposo di abingan ni natorasna, ina na manubuhon ibana. Saluhut do na ringkot tu dakdanak i diparade inana, tu pamatangna i ma 'susu' nang tu tondina i ma hasonangan nang hadameon di abingan nang na niompana. Asa tung so adong be inganan na asing na tuk patupahon saluhut jaminan di saluhut na ringkot di posoposo i, asingni abingan ni inana na manubuhon. I do umbahen manang songon dia pe haradeon ni sada ina, martapian manang ndang, mansai dame, sonang jala bebas dihilala dakdanak i molo dung di abingan ni inana. Ala ni ndang adong hatauon (keterampilan) na tuk manoluk pangaramotion ni sada ina laho mangabing dohot mandideng posoposona. Laos songgon i ma gombaran ni hadameaon, hasonangan dohot kebebasan na naeng sijanghonon ni bangso Juda sian Debata di huta Jerusalem. Laos digombarhon dope Debata tu sada ina na mangapul anakna. Tutu molo adong boban ni sada dakdanak na mansai dokdok situtu, pola ndang tolapsa manuhuk, manigor sai tu inana do dakdanak i maporus, jala pintor jalo do inana i mangapuli. Boasa pintor jalo inana i mangapuli ianakhonna i? Ala marhaborhatan sian roha nang ateate (empati) natorasna i tu ianakhonna. Tung so talup sada ina marnida arsak na manggoppang di ianakkonna, tupa ndang marlapatan do dihilala sada ina molo so boi diapuli ianakonna.
Denggan Basa ni Jahowa tu NaposoNa (ayat 14)
Di ayat on, mansai nalnal dipatuduhon songon dia haburjuon nang denggan basa ni Jahowa tu naposoNa molo tabandinghon tu Jesaya 65 : 13 - 14 mansai tandi ma paboa asi ni roha nang holong ni roha ni Debata tu bangsoNa na ginoaranNa naposoNa i ma ganup halak na marsomba jala satia tu Ibana. Asa Debata do na gabe ina ni bangso Juda, jala mansai tangkas do dihatindanghon panurirang Jesaya paboa na so lupa sada ina di posoposo na tinubuhonna, laos songon i ma Debata di anakNa bangso Israel (Jesaya 49 : 15). Molo digombarhon Debata tu sada ama, ia na naeng ondolhononna i ma hagogoon, huaso dohot panghophopon ni Debata tu bangsoNa. Nuaeng tubu ma sungkunsungkun na marpardomuan tu na niadopan ni bangso Juda on, ai sadia leleng nai asa sahat nasida tu si las ni roha, olopolop, mahapan minum susu, aha do jaminan ni bagabaga on? Sasintongna nunga adong jaminan, i ma huta Jerusalem naung niinganan nasida i. Alai ingkon nasida sandiri do paulihon hutanasida, ai nunga bebas be nasida laho paulihonsa. Asa ingkon jumpang di nasida las ni roha, olopolop, hadameon jala sonang panghilalaan nasida laho patupahonsa. Molo nunga jumpang do roha nang panghilalaan na di bagasan las ni roha nang olopolop, ndang sai laho be roha marsungkun sadia leleng nari, alai saurdot tu na patupahon jala mangulahon laho paunehon Jerusalem, mardalan do partingkian i laos disi ma panghilalahonon ni nasida paboa nunga jumpang si las ni roha nang apulapul i.
Kesimpulan dan Refleksi
Turpukta on mangondolhon mutiha na mansai bagas situtu paboa na diparade Debata do apulapul di tongatonga ni arsak nang sitaonon. Diajarhon jala diarahon do hita paboa di tongatonga ni arsak, sitaonon nang pambebeon ni ngolu mangodothon hita na pola sipata tarajumi ponjot hita so haru na bolon jala sungkot hita so haru na timbo, sai songon naung suntol panghilalaanta, alai taingot ma paboa Debata manongtong do na gabe haroroan ni apulapul na songkal jala na umbalga. Ndang tuk portibi on patupahon apulapul songon naung pinatupa ni Debata marhite Jesus Kristus na patupahon hangoluan na imbaru di hita. Dipaandar hadirionNa songon sahalak ina na mangapul ianakhonna, patuduhon holong ni roha na tung mansai bagas. Molo dipasahat tu hita songon na 'manusu', dipatanak i do paboa Debata patupahon saluhutna na ringkot di ngolu pardagingon nang partondionta. Diontang do hita asa rade hita mandai jala mamparsaulihon holongNa na so tarasam i jala na pola marjulakjullak di ngolunta. Marhite naung dipatupa Debata apulapul di pardalanan ni ngolunta, ingkon jumpang ma nian haimbaruon jala ingkon sai rata do panindangionta di gogo nang huaso ni Debata di tongatonga ni ngolunta. Ingkon tubu ma haporseaon na matoras di ngolunta marharoroan paboa na diparmudumudu Debata hita. Gombaran songon ingkau rata, patanakhon paboa ingkon martumbur jala rata do ngolu ni haporseaon nang partondionta ala naung taruli hita di apulapul na sian Debata. Ingkon jumpang hita do haimbaruon dohot haporseaon na sai manongtong martumbur molo sai solhot hita jala marsigantung tu Debata. Tupa sai tarpaima dope hita di alus nang apulapul sian Debata, sipata tubu tu rohanta paboa ndang dihaholongi Debata hita ai sai taadopi dope ragam ni hamaolon. Alai taingot ma paboa nunga digorga Debata sangkap na umuli di ngolunta, nunga digorga masa depan na marsillak jala marsinondang di jolo, antong mangasahon gogo nang apulapulNa i, taeahi ma bagabagaNa i di ngolunta marhite las ni roha nang olopolop. Amen.
Posting Komentar