Jamita Minggu 28 September 2025 Minggu 15 Dung Trinitatis tarsurat di Lukas 16 ayat 19 - 31. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Debata Manganturehon Halak na Gale." Rap ma hita mangihuthon hatoranganna.
Pendahuluan
Ragam do sian na masa di portibi on na paandarhon dua gombaran ni parngoluon ni jolma, i ma halak na boi marsaulihon las ni roha na marragam marhite si humisik na pinapungupunguna di bagasna, laos adong do na mandele jala mandate binahen ni hapogoson dohot na soada. Alai molo Debata marpanatap do torus tu bagasan roha ni jolma i huhut parniulaonna di bagasan ngolu haporseaonna uju mangolu di atas tano on. Lapatanna, na niula ni jolma manisia i hombar tu tona ni Debata, i do na gabe patuduhon dia ma tumpal sijaloonna di ari na parpudi i.
Si Lasarus na pogos dohot sahalak na mamora i patolhashon tu hita dua gombaran parngoluon na mansai tandi. Ngolu ni sahalak na pogos na so tupa daion ni sahalak na mora, songon i sabalikna. Dison ma taida pangajarion na naeng si pasahaton ni Jesus marhite si dua halak i. Antong boha do parngoluon ni si dua halak i, laho pabagashon parbinotoanta hombar tu dalan ni Debata manganturehon halak na gale? Denggan ma tapaihutihut di bagasan hatorangan ni turpuk on.
Pembahasan
Tudostudos na mansai unik do na pinasahat ni Jesus on siala holan goar ni na pogos i do na dipaandar dison, i ma si Lasarus. Alai molo na mora i ndang adong na umbotosa. Sada dalan do on laho patuduhon tu hita, na ditanda Jesus do na paradangolon i. Alai pandohan "na mora" dison boi do i manghangham manang ise, ai ndang manigor tu sasahalak jolma. Ndang dipaboa ianggo dison songon dia do hubungan ni si Lasarus dohot na mora i, ndang holan pasahathon turiturian ni parngoluon nasida i.
Turiturian taringot surgo dohot rura ni hamatean (naroko) pe jotjot dope patubu parsoalan di angka na umbegesa, alai mangihuthon ilmu Teologi, boi do antusanta ndang tarbahen hita maningkat (mangganti) ingananta i dung sahat di ari paruhuman i. Boi do dapot antusanta turpuk on, marhite opat horong ni turpuk, i ma: situasi andorang so hamatean (ayat 19-21), situasi di ujung ni portibi on (ayat 22-23), panghataion ni na mora i dohot si Lasarus mangido pangurupion (ayat 24-26) dohot pangidoan ni na mora i di angka si solhotna (ayat 27-31).
Ditanda Debata do BangsoNa na Marhagaleon (ayat 19-21)
Dipatolhas dison, tandi do parngoluon ni na mora dohot si Lasarus na pogos i. Didok dison gok do arta pardagingon ni na mora i. Marharbangan na balga do ianggo bagasna jala marabithon sutra na rara na gabe tanda ni hamoraon hatiha i, abit bontar na lamot do ianggo paheanna, pahean na umarga di tingki i. Tandi ma tu si Lasarus, na so umpuna agia aha, peak di pintu ni harbangan i, gabe panehenehe na mangidoido, gok baro nang dagingna. Pola do didilati angka panangga nang baro na di dagingna i, jala gabe najis binahen ni tijur ni panangga i.
Ditatap Debata do Roha ni BangsoNa (ayat 22-23)
Dung dipatuduhon dua situasi na marimbar i, dipatuduhon ma muse sada situasi na padoshon hatandion i, i ma hamatean. Hamatean i ndada holan padoshon sambing, alai dohot do nang pabalikhon situasi ni nasida. Ndang adong na asing na manontuhon inganan si eahan ni si dua halak i dunghon ni hamatean, nda holan roha nasida i do. Ditadinghon nasida do sude na masa di portibi on uju di ngoluna.
Dung marujung ngolu si Lasarus na pogos i, gabe diboan angka surusuruan do ibana tu ampuan ni si Abraham. Diboan do ibana tu inganan na gok pasupasu dohot las ni roha. Alai molo na mora i, mangae na porsuk do ibana jala diboan tu rura ni hamatean, inganan na gok haberniton dohot panguhuman na dokdok. Manaili do ibana dompak ginjang jala diida ma si Lasarus na rap di ampuan ni ompuna si Abraham. Ditanda na mora i do si Lasarus na pogos i jala diboto do na ringkot di ngoluna uju mangolu, alai ndang manghuling rohana laho mangurupi.
Dilehon Debata do Haluaon di Angka na Marroha Satia tu Ibana (ayat 24-26)
Sai joujou na mora i mangido pangurupion tu si Abraham, asa tung asi nian rohana, asa disuru si Lasarus manornophon jarijarina tu aek, asa tung boi palamohon dilana. Ra dietong rohana do na boi si suruonna do ianggo si Lasarus dos songon uju tingki mangolu nasida. Alai dipatuduhon si Abraham do tu ibana, na so tupa boi unsaton manang singkaton (gantion) ingananna i, na lehonon do disi Lasarus dohot na mora i hombar tu na ni adopanna di bagasan ngoluna.
Dijadihon do sada lung na bagas gabe holangholang ni surgo dohot naroko i, asa ndang adong na talup taripar sian sada inganan tu inganan na asing. Laos dison ma dirajumi na mora i naung masa jala na niadopanna nuaeng, ndang tarbahen urupan be ibana di habernitonna i, alai ianggo si Lasarus siapulon do ianggo ibana ai nunga tung bernit na tinaonna i uju ngoluna, na mora i na patut siuhumon do, ai ndang diulahon ibana lomo ni roha ni Debata.
Diparade Debata do Dalan Haluaon di BangsoNa na Olo Manangihon HataNa (ayat 27-31)
Dung dirajumi na mora i na ingkon hona uhum na saleleng ni lelengna do ibana, diingot ma nang haha anggina na mangolu dope, na tinadinghonna di portibi on. Diauhon do na dos do ianggoa parrohaon ni haha anggina i songon ibana, na mangalaosi jala ndang mangulahon lomo ni roha ni Debata. Dipangidohon rohana jala marsihohot mandok tu si Abraham dohot si Lasarus, asa tung disuru tu bagasna paingothon haha anggina i na di bagas ni amana di portibi on. Alai ditotahon si Abraham do marhite na mandok: Adong do di nasida surat ni si Musa dohot angka panurirang paingothon nasida.
Na ringkot ingkon tubu di rohanasida, nda holan roha na olo manangihon Hata ni Debata sambing do, ai digurithon do disi hombar tu holong maradophon angka dongan jolma. Pangoloion tu Debata tarida do i marhite na manghaholongi jala mamarateatehon dongan jolma tudos songon nidok ni Jesus manghaholongi Debata dohot manghaholongi dongan jolma (Markus 12 : 28 - 34) jala ndang adong na umangat sian i. Tung pe marsigolgol na mora i mangidohon na ingkon adong ma nian na hehe sian hamatean laho paingothon nasida, diondolhon si Abaraham do mangalusi, na so jadi boi do i antusan ni haha anggina i tung pe hehe sahalak sian na mate, ianggo so olo nasida manangihon Hata ni Debata na ginurithon ni si Musa dohot angka panurirang.
Kesimpulan dan Refleksi
Ra di bagasan ngolunta, sipata olo do hita manghilalahon ngolu songon si Lasarus na gok haberniton dohot hinadangol di portibi on. Alai sasintongna, ditatap Debata do luhut na taadopi di bagasan ngolunta. Ditatap Debata do nang roha parbagasanta, na mangadopi parungkilon di portibi on. Alai ndang adong na asing ianggo na pinangidoNa sian hita, nda holan hasatiaon dohot pangoloion manangihon sangkap dohot lomo ni rohaNa do. Laos dipaingot Hata ni Tuhan on do nang tu hita, asa unang dos songon halak na mora i, na marhaadongon di arta na boi pangkeonna laho mangurupi angka na marhagaleon, alai ndang diulahon jala ndang dianturehon nang i.
Laos marhite turpuk on boi antusanta, gabe dao jala ndang dihaholongi na mora i Debatana uju di ngoluna, ai marhite hamoraon na ni dapotna i, gabe paholang dirina sian Debata, jala diambolonghon tu rura linggom ni hamatean, ai ndang tama parngoluonna di adopan ni Debata. Alai sangkap ni Debata marhite turpuk on, naeng nian hita mangalehon rohanta tu donganta na marhagaleon, asa marhite i dipargogoi jala taruli hita di holong ni Debata. Amen.
Posting Komentar