Jamita Partangiangan Epistel Minggu 21 September 2025 Minggu 14 Dung Trinitatis tarsurat di buku Mateus 6 ayat 25 - 34. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Jahowa Zebaot, Ibana do Raja Hamuliaon i." Rap ma hita mangihuthon hatoranganna.
Pendahuluan
Ra ndang lupa dope parningotanta sian angka na masa di taon 1998, uju i masa krisis moneter (jotjot digoari: krismon) na marpanghorhon tu sandok gulmit ni ngolu ni jolma dohot perekonomian ni negara. Di hamamasa ni krisis moneter i, lam moru arga (nilai) ni hepeng Indonesia (rupiah) maradophon angka mata uang ni negara na asing lumobi ma dolar Amerika, gabe marpanghorhon tu hamaolon ni parngoluon, ai lam arga situhoron, dohot godang perusahaan tutup gabe lam martamba torop pengangguran, lam martamba utang ni negara tu angka negara kreditur.
Panghilalaan na hampir sarupa do nang pe asing rumangna, parniahapan na masa di Jerusalen lumobi di halak Jahudi. Uju negara Israel dikuasai Kesar Rom, tung hansit do panghilalan nasida hinorhon ni hapogoson dohot panggosa ni pamarenta Kesar Rom, marhite na papungu balasting na balga, mambahen bangso i ndang boi humusor (marsiak). Ai holan laho manggohi balasting naung ditontuhon kesar, gabe tading angka na rumingkot (kebutuhan primer) si ganup ari. Diboto Jesus do parniahapan ni na torop i, jala ndang dipasombu Ibana jolma i sai di bagasan hatahuton. Dijamitai ma nasida huhut disoarahon, asa unang sai di bagasan hatahutan nasida taringot tu sipangon dohot parabiton i.
Inganan ni Jesus marjamita uju i, i ma di adaran na tumingka, ala ni i do umbahen na digoari turpuk Epistel on, deba sian angka Jamita di dolok. Sasintongna, marjamita di dolok, ndada hal na imbaru di halak Israel, ai mamungka sian partingkian ni si Musa manguluhon bangso i ruar sian tano Misir, jotjot do dipatupa si Musa papunguhon bangso Israel di sada adaran, laos disi ma ibana marjamita di adopan ni saluhut bangso Israel. Sada sian Jamitana pe, nunga dipabotohon si Musa, paboa na ro ma muse panurirang patindangon ni Jahowa di na nidokna: "Panurirang sada, songon ahu on patindangon ni Jahowa, Debatam sian tongatongami, sian angka hahaanggim; Ibana tangihononmuna" (5 Musa 18:15). Jadi Jesus do hasisingkop ni pandohan manang Jamita ni si Musa tu bangso i, songon na andar di turpuk Epistel on.
Pembahasan
Unang Holsoan
Di hata Indonesia holso diterjemahon kuatir: Molo dipatangkas tu hita, ise ma sian hita na so hea holsoan? Ganup jolma hea do holsoan, bahkan jotjot holsoan pola sahat tu na morongorong. Ala ni i do umbahen di turpuk Epistel on didok Jesus unang holsohon hamu hosamuna sumarihon sipanganon dagingmuna pasarisari parabiton.
Jolma di portibi on, nunga mansagi tingkatan ni angka na ringkot di ngolu ni jolma i. Adong do na digoari kebutuhan dasar (primer) isarana sipanganon, parabiton dohot bagas (inganan); adong do muse na digoari kebutuhan sekunder (paduahon) i ma angka na ringkot laho manggohi las ni roha (kebahagiaan) isarana handphone, kendaraan, perabot, hariburon dohot lan na asing; na mangihut muse adong do na digoari kebutuhan tersier i ma angka kemewahan, isarana: mobil mewah, rumah besar dan mewah, perhiasan dohot lan na asing.
Di ginjang nunga dipatorang paboa halak Jahudi di tingki ni Epistel on dijamitahon, sedang mangadopi hapogoson ala balga ni boban balasting na ingkon gararon nasida tu pamarenta, na pinapungu ni angka petugas na margoar sijalo beo. (Ulaon si jalo beo dipasahat manang dipatenderhon Kesar Rom do tu pihak ketiga manang swasta. Manang ise na monang tender, dilehon ma huaso tu nasida laho papungu balasting tanpa dibatasi jumlahna, asal ma target naung ditender boi digohi. Ala ni i, jotjot do sijalo beo mamaksa rakyat manuhuk balasting i, nang pe ndang tartuhuksa). Hinorhon ni balga ni balasting na ingkon sigararon ni masyarakat, gabe godang ma sian nasida na so boi menikmati manang manggohi kebutuhan primer, isarana sipanganon dohot parabiton.
Diboto Jesus do saluhut na masa na niadopan ni jolma, bahkan na sai marhusori di bagas roha ni jolma i, diboto. Ndang dipasombu na torop i dipasiaksiak hatahuton manang biar ni roha i. Tarlumobi muse, diboto Jesus do paboa ndang adong laba ni jolma molo sai holsoan, baliksa holso i patamba boban di jolma i, na mambahen sumurut gogo dohot panghirimon nasida. Alai Jesus di jamita on ndada na mengingkari (menutup mata) di angka na sonson di jolo ni jolma i. Ala ni i do, dibahen Jesus ma tudostudos, songon pidong ndang manabur, ndang manggotil, alai diparmudu Jahowa, suang songon i bunga di ladang ndang martonun, alai haulionna lobi sian ulos ni si Salomo.
Boasa boi songon i? Dipabotohon Jesus ma rahasiana, i ma: holan Tuhan Jahowa na tuk laho manggohi angka na ringkot di ngolu ni na tinompaNa i. Di Nuku Ende No. 279 ayat 2 didok: .... Ai ndang adong gunana, nang pe holsoan ho, tangiang do dalanna, asa taruli ho. Jadi holso i disingkat ma gabe tangiang.
Jahowa Manarihon na Ringkot di Nasa TinompaNa
Uju dipangido Jahowa tu si Abraham asa dipelehon anakna si Ishak gabe pelean situtungon, bulus do rohana mangoloi pangidoan ni Jahowa, diparade ma angka na ringkot isarana goluk, soban huhut ditogihon si Ishak tu dolok pamelean i. Di tingki na patupa pelean i, ditangkup surusuruan do tangan ni si Abraham, ala ni i gabe sundat ma si Ishak dipelehon, laos disingkat Jahowa ma marhite sada dorbia na solot di dangka ni hau jonok tu pamelean i. Marnida na masa i, digoari si Abraham ma inganan i Jahovah-Jireh na marlapatan Tuhan na manarihon manang paradehon (Tuhan Menyediakan).
Jahowa Jireh (manarihon) nunga dipapatar sian mula ni panompaon ni portibi on. Molo tapaihutihut do urutan ni panompaon sian ari parjolo sahat tu ari paonomhon, ringkot do botoonta, boasa jolma ditompa di ari paonomhon jala parpudi, hape digoari do jolma i na istimewa sian angka na tinompa na asing. Sasintongna, di panompaon i, nunga tangkas dipatuduhon Jahowa paboa Ibana manarihon jolma i. Tangkas ma i, jumolo do ditompa sekaligus diparade Jahowa angka na ringkot di jolma i, dung i pe asa ditompa jolma i. Lapatanna, saluhut do nasa na ringkot di parngoluon ni jolma i diparade Jahowa.
Di Jamita ni Jesus, diulahi do mansoarahon sada hasintongan naung dipapatar Jahowa sian mulana, bahkan tongtong marulak loni dipatupa Jahowa di sandok sejarah ni ngolu ni bangsoNa i, paboa Jehovah-Jireh, Ibana do na manarihon nasa na ringkot di jolma i.
Ala ni i do, mansai karas jala tegas do Jesus manangkasi na torop i, pola digoari (dijouhon) tu nasida "si otik haporsean." Panjouon na mandok Siotik Haporseaon, ndada na patoruhon hadirion ni na torop i, alai asa lam tangkas do diboto na torop i, paboa angka na sai holsoan di sipanganon dohot parabiton tudos do i tu sipelebegu na so porsea tu Jahowa.
Sasintongna, Jamita ni Jesus on, nunga tung lohot di roha ni huria Batak, ai jotjot do tarbege manang taendehon koor na marjudul "Disarihon do." Koor on, dimulai sian syair na mandok: "Disarihon do tongtong ngolunta saleleng mangolu di tano on, sahat ro di salelenglelena do asi ni roha ni Debata ... . Laos disimpuli muse mandok: Sai porsea ma hita disi."
Pillit ma na Dumenggan i
Didok Jesus, "Sai jumolo ma lului hamu harajaon ni Debata, dohot hatigoranNa, dung i tambahononNa do sude angka ondeng (semuanya) tu hamu. On ma panimpuli sian Jamita ni Jesus di turpuk Epistel on. Hata sai jumolo, berarti adong pigapiga hal na niluluan ni jolma. Na pasti sude do jolma mangalului na uli, alai sipata ndang haru tangkas diboto jolma i, dia ma na umuli sian angka na uli i, jala molo sala mamillit, gabe hasesega (jea) bolon do di ujungna. (Patudos si Abraham dohot si Lot na marbagi tano. Si Lot mamillit dompak sodom, ala mansai uli inganan parmahanan (jampalan) ni dorbia disi. Hape gok angka si ula na jat di huta i).
Jesus di JamitaNa on paingothon na torop i, asa unang sala pillit (hata Indonesia mandok: Pikir dahulu pendapatan sesal kemudian tiada berguna), i do umbahen na didok asa jumolo dilului harajaon ni Debata, na marlapatan ulaon harajaon ni Debata i ma gabe prioritas di pardalanan ni ngoluna. Laos diparbaga do tu angka na memprioritaskan harajaon ni Debata i ma na taruli angka ondeng (semuanya).
Ingkon angkuhononta do paboa mansai uli jala menarik do angka na di portibi on. Alai ingot si Adam dohot si Hawa madabu tu dosa, ala pia matana marnida parbue ni hau i. Hombar tusi ma dipaingot Jesus na torop i, mamillit na dumenggan.
Di huria bangso Batak, mamillit na dumenggan dohot parbuena nunga mansai lohot di parningotanna, ai adong do koor gereja Batak na marjudul: "Nunga Tangkas." Marhite ende on disosoi do asa mamillit hangoluan, na dumenggan asa mangolu ho dohot pinomparmu sogot. Pangke ma partingkian na nilehon ni Tuhan i, jala pangido panuturianNa, asa unang sala pillit.
Kesimpulan dan Refleksi
Di tahon 2025 on, Huria Kristen Indonesia (HKI), naung marumur 98 (sia pulu ualu) taon. Di umur na mansai ganjang, nunga tingkina jumpang di tonga ni huria pangabahan ni ngolu dohot haporseaon na lam pita. Alai, molo dibahen do rujiruji, ra satolop do hita mandok paboa mansai godang dope sipareahan ni ganup huria nang ruas ni huria i, baik marsasahalak nang rap angka dongan saparsaoran di huria i. Lam martamba ari, naeng do nian lam martamba bilangan ni angka na porsea, alai sasintongna, mansai dao do bilangbilang ni torop ni Ruas di buku (secara administrasi) molo dibandinghon tu torop ni na angka aktif di ulaon Huria i.
Uju ditangkasi parhalado (Pandita, Guru dohot Sintua) angka na so aktif di ulaon Huria, aha do alana umbahen na so aktif nasida. Godang do dibahen nasida sidalianna. Sian angka sidalian i, godangan do na mandok sibuk na mangalului ngolu, na deba mandok molo di ari Minggu tolu hali silompit gaji (upah lembur), alai adong do na mandok, inanta dohot dakdanak ma mewakili hami sakeluarga.
Taingot ma, Tuhan Jesus i ma Jahowa na manompa langit dohot tano on, na manarihon bangsoNa, sian tingki tu tingki. Sahat ro di tingki on, tontong do Debata manarihon ngolunta. Jala taingot ma molo jumolo do talului harajaon ni Debata, jumpang hita ma angka hinaragam na ringkot di ngolu on.
Di taon 2025, digoari do taon "Peningkatan Mutu Pelayanan dan Pendidikan." Panghobasion taringot tu Pelayanan dohot Pendidikan, ndada holan ulaon ni huria, alai saluhut na porsea di Tuhan i, termasuk ruas ni huria HKI.
Pendidikan na dumenggan lobi sian pendidikan formal, i ma pendidikan marhite pambahenan, pangalaho, panghataion manang digoari ma teladan, manang sitiruon. Molo si Paulus mandok, hita do surat ni Kristus, ala ni i, gabe pangajari na hohom ma hita, gabe tiruan ni ganup ruas ni huria dohot di angka na humaliang. Amen.
Posting Komentar