Jamita Partangiangan Epistel Minggu 5 Oktober 2025 Minggu 16 Dung Trinitatis tarsurat di buku 1 Timoteus 6 ayat 11 - 16. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Debata na Sumangap dohot Parbinoto na Bolon." Rap ma hita mangihuthon hatoranganna.
Pendahuluan
Timoteus i ma sahalak naposo na gabe dongan pangurupi ni Paulus laho marbarita na uli. Timoteus gabe dongan pangurupi Paulus na satia. Ala ni hasatiaonna Paulus manurathon goarna di lima surat ni Apostel Paulus. Nang pe ndang adong hubungan mudar antara si Paulus dohot Timoteus alai holong ni si Paulus tu si Timoteus tung ias situtu do ndang marlindang, ndang adong motivasi na asing sian si Paulus tu si Timoteus laho manghaholongi ibana, dipersiaphon si Paulus do si Timoteus gabe panggantina laho marbarita na uli tu saluhut bangso.
Jala diboto si Paulus na naeng suda nama bohalna, ala ni i si Timoteus gabe pangudutina laho marbarita na uli tu sandok portibi on. Tung godang do parsiajaran na pinasahat ni si Paulus tu si Timoteus dalanna mamodai si Timoteus; ala ni haposoonna, tu ulaon parbarita naulion, dipatogu si Paulus do haporseaonna asa margogo ibana laho marbarita na uli tu liat portibi on. Diboto si Paulus do ingkon mangadopi hamaolon do ibana di ulaonna, ala naung jumolo dihilala si Paulus na hansit di ulaon marbarita na uli.
Pembahasan
Turpuk 1 Timoteus 6 : 11-16 on; bagian hata parujungan sian si Paulus tu si Timoteus, i ma poda na pinasahat ni si Paulus tu si Timoteus. Angka aha ma poda na pinasahatna i, tapamanat ma marhite hatorangan on:
Ayat 11
Poda on dipungka dohot pandohan ni si Paulus tu si Timoteus: "Alai anggo ho halak ni Debata". Dibuhai si Paulus do pamodaionna marhite na pajolohon pangondoshononna di tohonan ni anak na hinaholonganna i, i ma tohonan panjouon dohot pamilliton ni Debata di si Timoteus songon halak ni Debata. Na marlapatan do on ia si Timoteus i ma jolma na ditompa Debata jala jolma na ginomgoman ni Debata manang ampuna ni Debata. Jala hata on boi do marlapatan ia si Timoteus nunga gabe sahalak naposo ni Debata na paradehon diri laho marbarita na uli na jinou jala na pinillit ni Debata tu ulaon Barita na Uli. Timoteus songon halak ni Debata Disosoi si Paulus do asa tontong mangeahi ngolu na di bagasan hatigoran, hadaulaton, haporseaon, holong ni roha, habengeton dohot lambok ni roha.
Molo nunga mangolu di bagasan angka hata on si Timoteus gabe dapotna do angka sangkap na denggan di bagasan ulaonna laho marbarita na uli. Di bagasan haposoon ni si Timoteus diboto si Paulus do songon dia hasomalon na diulahon angka naposo, na olo tangkang alana mangadopi fase peralihan tu dewasa. Si Paulus marpangidoan ingkon marasing do si Timoteus tu angka donganna di tingki haposoonna. Ingkon dihangoluhon si Timoteus do angka parange na denggan na pinasahat si Paulus songon amana. Jala di ayat on tongtong do tarida holong ni roha si Paulus dompak si Timoteus, songon sahalak ama laho paborhaton anak na mangaranto jolo disosoi do marhite angka sipaingot dohot poda na uli. Songon i ma tong posisi ni si Timoteus disosoi do ibana dohot angka poda na uli sian Paulus.
Ayat 12
Disosoi si Paulus do asa berjuang si Timoteus di haporseaon na polin asa dapot ibana hangoluan na saleleng ni lelengna. Haporseaon na polin tu Debata ndada mamboan jolma tu hamatean alai haporseaon na polin tu Debata mamboan jolma tu hangoluan. Panjouon tu si Timoteus gabe parbarita na uli, i ma laho mangolu di bagasan haporseaon asa tung mangolu ibana muse di haporseaonna. Jala gabe sitindangi hata ni Debata na manghatindaghon hata na bonar di sandok ulaonna, on ma panjouon sahalak sitindangi, ndang boi ibana mandok na marasing tu fakta na sasintongna. Sahalak sitindangi ingkon mandok angka na sintong na diboto ibana. Hatana do pangalahona jala pangalahona do hatana.
Ayat 13
Dipatiki si Paulus do si Timoteus di jolo ni Debata dohot Jesus Kristus. Istilah di patiki dison i ma nunga dipaojak/disumpah si Timoteus di jolo ni Debata jala di jolo ni Jesus Kristus na manghantindanghon na sintong di jolo ni Pontius Pilatus. Anggiat songon i ma ngolu ni si Timoteus ingkon maniru Jesus na manghatindanghon na sintong nang pe ingkon marsitaonan ibana sahat tu na mate tarsilang humophop jolma pardosa. Ulaon dohot ngolu si Timoteus ingkon marojahan tu Hata ni Debata jala mangihuthon parange ni Kristus.
Ayat 14-15
Paulus mandok tu si Timoteus asa satia ibana laho pangoluhon panjouon na gabe ulaula ni Debata parararathon hataNa. Ingkon diingot ibana do molo ngoluna ndang ibana be nampuna, ai Debata do nampuna ngoluna. Jadi ingkon dijaga do dirina sian angka ulaon dosa dohot hajahaton. Molo jumpang tingkina patar do Jesus i gabe pargogo jala Raja di angka raja. Di na ro Jesus i ingkon diuhumi do jolma na mangolu dohot na mate. Ai jolma na patupahon angka parange ni Kristus sai jumpangan angka halongangan jala ingkon dihilala do angka huaso ni Debata, tarlumobi ma ingkon dapot ibana do haluaon sian Debata. Sada jaminan ni ngolu do on di ngolunta songon halak Kristen. Halak siihuthon Kristus i ma panean di ngolu saleleng ni lelengna.
Ayat 16
Dipuji si Paulus do Debata Jahowa di surat na tu si Timotius. Ai ibana do sondang hatiuron na mamboan ngolu tu sandok portibi on, na manjou halak pardosa tu hangoluan, na paluahon angka na di bagasan arsak ni roha asa marpanghirimon holan tu Ibana, jala na mangalehon sada tujuan ni ngolu, i ma surgo hasonangan i. Holan tu Jahowa sambing do hita marhaporusan jala ingkon sangap do Ibana tabahen di bagasan ngolunta. On ma gombaran na naeng di patuduhon si Paulus tu si Timoteus. Margogo do Jahowa di sandok portibi on jala marmulia do goarNa.
Kesimpulan dan Refleksi
Sian turpuk ni Epistel on, adong pigapiga na naeng dipasahat tu hita, i ma: sada kewajiban do di hita halak Kristen di pardalanan ni ngolunta ingkon gabe sitindangi di Hata ni Debata. Nunga tung godang pasupasu na tajalo sian Debata marhite parngoluonta. Diparar Debata do ngolunta asa gabe pasupasu tu humaliangta. Ingkon gabe sitiruon do hita di ngolunta, marhite na patuduhon hasintongan, hatigoran, hadaulaton, haporseaon, holong ni roha, habengeton dohot lambok ni roha.
Dipargogoi Tondi Parbadia ma hita mangulahon angka ulaonta jala ingkon boi do hita gabe sondang hatiuron tu saluhut halak na so mananda Debata dope, asa gabe parsidohot nasida gabe parjambar di harajaon ni Debata. Dipatuduhon Debata do dalan na sintong tu hita (Johannes 14:6) asa mardalan hita hombar tu lomo ni rohaNa.
Ndang dihalomohon Debata naposoNa tartuktuk manang tarrobung. Alai sai ditogutogu jala diain do angka naposoNa marsihohot mangula ulaon na tigor, na sintong jala tau tiruan di ganup jolma. Marhite parange ni angka naposo ni Debata, patar diida sandok jolma di portibi on na mangolu jala mian do naposo na tinodoNa i di bagasan Debata. Na saurdot hatana/ Jamitana tu pangalahona/ parangena.
Ala ni i tapasangap ma Debata marhite ngolunta, di hata nang parange, jala ngolunta ingkon gabe pelean na mangolu, na badia, jala na di halomohon Debata (Rom 12 : 1). Tuhan Jesus margogoihon hita naposoNa mangaradoti panjouon i. Amen.
Posting Komentar