Jamita Minggu 12 Oktober 2025 Minggu 17 Dung Trinitatis tarsurat di Rom 1 ayat 8 - 15. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Mambaritahon Barita na Uli sian Hibul ni Roha." Rap ma hita mangihuthon hatoranganna.
Pendahuluan
Hatiha i di Makedonia (luat Korintus, tano Junani) do Apostel Paulus saleleng tolu bulan. Buas do Jamitana disi mangapoi angka na saluat i. Sian i disangkapi rohana do naeng marparau laho tu tano Siria manguduti ulaon marbarita na uli i, alai gabe sundat do i ala torop halak Jahudi na disi ni mangonggopi ibana (bermaksud membunuhnya) (Ulaon ni Apostel 20 : 2 - 3). Dibahen i dipaputus ma di rohana asa gabe mulak sian Makedonia i ma laho borhat manuju Jerusalem manaruhon angka asiasi (bantuan sosial) na pinapungu ni huria Makedonia dohot Akhaya. Sasintongna molo ala ni sihol ni rohana nian asa naeng pajumpang dohot huria Rom, naeng do disangkapi jolo sian Rom ma ibana asa tu Jerusalem. Alai gabe sundat do sude sangkap i dibahen angka pangonggopi i (Rom 15 : 25 - 32). Ala na so jadi i ibana tolhas manopot Huria Rom, gabe surat ma ditongos tu nasida laho pasombu siholna, i ma turpukta ombas on.
Pembahasan
Merasa berhutang moral do Apostel Paulus tu halak Junani, ala nasida ma na diparhitehon Debata paluahon ibana sian godang mara na sinangkapan ni halak Jahudi naeng mamusa ibana siala ulaon marbarita na uli i. I do asa didok ibana di suratna on: Mandok mauliate ahu jumolo tu Debatangku marhitehite Jesus Kristus siala sude hamu, ala tu liat portibi on do tarbarita haporseaonmuna (ayat 8 - 9). Jala ndang mansadi ibana marningot i huhut tumangianghon nasida. Pengalaman pribadi on do na mambahen ibana sai masihol naeng pajumpang dohot ruas ni Huria Rom, alai sai tarambat dope langkana sahat tu ombas ni surat on ditongos tu nasida (ayat 13). Di ayat 10 i didok ibana paboa na sai tongtong do dipangidohon di angka tangiangna, anggiat tung manang andigan pe lomo ni roha ni Debata patiurhon dalanna manopot nasida. Tujuanna, molo dung jumpang nasida di sada tingki na lehet, boi ma sagionna tu nasida deba silehonlehon partondion i (memberitakan Injil keselamatan) dalan patoguhon rohanasida (ayat 11).
Marojahan sian pangarajumion dohot sangkap na tartunda i, mansai serep do rohana patandahon diri tu huria i marhite suratna on. Ai ndang na hea dope nasida pajumpang jala masitandaan. Jongjong pe huria di Rom, ianggo na pajongjonghonsa angka donganna parbarita na uli na asing do. Tangkas marparbue do Barita na Uli (Injil) naung pinasahat ni angka donganna i tu nasida. Ai didok di ayat 8 i, tu liat portibi on do tarbarita haporseaonnasida.
Di jolo ni Turpuk Jamita on, dipatandahon dirina margoar Paulus, naposo ni Jesus Kristus, na tarjou gabe Apostel jala pinapulik tu ulaon mamaritahon Barita na Uli na sian Debata (ayat 1). Goar na dibahasahon tu hata Latin (atau nama Yunani) do i, ala marbahasa Latin dohot Gorik do halak Rom i. Molo di hata Heberna, Saulus do goarna. Di panjouonna di suratna on tu ruas ni huria Rom i ndang songon panjouonna na tu ruas ni huria Korint mandok angka donganhu di bagasan Jesus Kristus (saudara-saudara dalam Kristus). Alai holan dirina do dipabotohon paboa naposo ni Jesus Kristus do ibana, na tarjou gabe Apostel jala pinapulik tu ulaon mamaritahon Barita na Uli na sian Debata (ayat 1). Strategi penginjilan do na binahenna i. Na marlapatan patuduhon sebagai pelayan manang naposo ni Kristus i do ibana. Tontu ala naung dijalonasida do barita taingot tu Kristus i, laos gabe angka siihuthon Kristus ma nasida nuaeng, jala naposoNa ma ibana na manongos surat on, dibahen i besar kemungkinan umura ma jaloonnasida hadirionna molo dung pajumpang nasida muse di sada tingki. Manjalo harorona i molo jumpang nasida muse, berarti tudos do i na manjalo Kristus i. Baliksa, manulak ibana berarti na manulak Kristus i do nasida disi.
Dung songon i patujolo ni hatana, di suratna on tangkas dipaboa ibana do sangkap haroro dohot sihol ni rohana i anggiat tarjalo nasida i muse. Di ayat 12 dohot 15 i didok, on do tahe: Naeng dapotan hiras ni roha nang ahu sian hamu hinorhon ni haporseaonta be. Dibahen i husangkap sian nasa rohangku manjamitahon Barita na Uli i nang di hamu di huta Rom. Sian elek ni hata dohot gomosna i na mardongan strategi pelayanan, dapot hita ma sada parsiajaran na arga situtu paboa mansai denggan do songon nidok ni ojahan ni Minggunta on: Mamaritahon Barita na Uli sian Hibul ni Roha, marhite i gabe dapot tardungdung ma angka halak na so tinanda dope gabe hasahatan ni Barita na Uli i.
Kesimpulan dan Refleksi
1. Mandok mauliate, on ma sada hasomalan na mansai ringkot situtu ingkon adong di ganup hita. On do hata parjolo di pamuhai ni turpuk Jamitanta on na dihatahon Apostel Paulus i. Jala ndang holan dison pandohan i dihatahon ibana, alai tung mansai jotjot do i. Di 1 Tessalonik 1 : 2 didok do, "Na mandok mauliate do hami tongtong tu Debata siala hamu saluhutna; ai hutaringoti hami do hamu di tangiangnami"; 1 Tessalonik 5 : 8 didok do muse, "Mandok mauliate ma hamu siala saluhutna! Ai i do dipangido Debata sian hamu marhitehite Kristus Jesus". Tu huria Korint pe didok do, "Mandok mauliate do ahu tongtong di Debatangku siala hamu, marningot asi ni roha ni Debata, naung nilehonNa tu hamu di bagasan Kristus Jesus" (1 Korint 1 : 4). Tu Huria Epesus, "ndang mansadi ahu mandok mauliate siala hamu, marningot hamu" (Epesus 1 : 16); Dumimpos dipodahon muse tu huria mandok, "Manongtong ma hamu mandok mauliate siala saluhutna tu Debata Ama, di bagasan Goar ni Tuhanta Jesus Kristus!" (Epesus 5 : 20). Godang nari dope tahe molo tajahai di Bibel i, na mamodahon asa sai mandok mauliate hita. Mandok mauliate berarti ndang jadi lupa di angka na denggan na hinilalahon. Somalna ia halak na lupa mandok mauliate manang manghamauliatehon angka naung jinalo dohot hinilalana, i ma halak na lupa diri, na so tau diri. Nuaeng on nunga lam torop be jolma na lupa diri. Lupa hita tu nasa pambahenan ni natorasta sian na uju i sahat tu saonari. Ujungna gabe ndang tarhona mandok mauliate tu natoras i, gariada gabe diburai do. Hape natorasta i do di mulana i na mangajari hita manghatai. Hape dung taboto nuaeng manghatai jala lancar hita disi, gabe taburai nasida. Natorasta i do uju i mananta hita asa gabe boi hita mardalan (tattah ... tattah ... ), hape dung gabe boi hita mardalan jala marlojongi nuaeng on, gabe so olo hita manogu natorasta i dung bukukon nasida. Natorasta i do manulangi, mangalehon mangan sahat tu na pasingkolahon hita asa gabe boi hita dapotan parkarejoan na tama songon saonari on, alai dung songon i gabe tung bangkol do hita mangurupi nasida dung di hatuaonna. Songon nidok ni na bisuk: Satu orang tua itu tidak takut berkekurangan dengan memberi kepada anak-anaknya, tetapi 5 orang anaknya sangat kuatir jadi berkekurangan dengan memberi kepada orang tuanya. Ragam nari dope tahe di hangoluanta on molo jujur hita mamerengsa paboa jotjot do hita lupa mandok mauliate. Jamita on nuaeng pasunggulhon hita asa unang lupa hita mandok mauliate (mengucap syukur dalam segala hal dan mengakui karya Tuhan dalam hidup kita).
2. Dipabotohon apostel i do di turpuk on sihol ni rohana asa naeng pajumpang dohot mangebati huria Rom, asa boi lam tangkas nasida masipatoguan. Pangalaho on patuduhon hinaringkot ni parsaoran, pertemuan, persekutuan na masipatoguan (saling menguatkan). Di hamajuon ni zamanta si nuaeng on, pangalaho dohot sihol ni roha di parjumpangan si songon on ma naung lam sumurut. Rap pungu do nian, alai asik be do hita masijamajama HP na, ujungna ndang jumpang na rap manghatahatai dalan masipatoguan i. Ia so i di program ni punguan dibahen do pertemuan bulanan, isara ni partangiangan marga, partangiangan Huria sahali saminggu, partangiangan ni lembaga huria (PA, PPr, PNB) par tolu bulan, songon i nang parsermonan ni angka parhalado, alai torop do hita masibahen sidalianna gabe ndang mandohoti parpunguan i. Parsoalanta nuaeng on, sihol ni roha naeng pajumpang dohot dongan i nunga lam tipis be. Panghilalaan sai masihol naeng pajumpang dohot dongan on ma gabe sada poda na arga situtu ingkon hangoluhononta sian Jamita on. Parjumpangan dohot angka dongan i ingkon parhaseangonta do laho martukar pikiran, saling membangun dohot pasolhot pardonganon. Molo Apostel Paulus mandok: Anggiat tung tarlehon ahu tu hamu deba silehonlehon partondion, patoguhon rohamuna.
3. Merasa marutang do dihilala Apostel Paulus tu saluhut halak (di halak Junani nang di bangso na leban, di angka parhapistaran nang di angka na hurang roha). Siala panghilalaan i ma asa gabe sada kewajiban do di rohana mamaritahon Barita na Uli i tu angka nasida. Di pudi ni turpuk Jamita on didok ibana ma: Dibahen i husangkap sian nasa rohangku manjamitahon Barita na Uli i nang di hamu di huta Rom (ayat 15). Pangarajumion si songon on ma tongtong na ingkon suan di ganup rohanta be, asa gabe sada kewajiban i tahilala na Mamaritahon Barita na Uli i Sian Hibul ni Roha. Marbarita na uli so pola marnida bohi, alai ingkon tu sude. Antong tahangoluhon ma i. Amen.
Posting Komentar