Jamita Minggu 19 Oktober 2025 Minggu 18 Dung Trinitatis tarsurat di 1 Musa 32 ayat 22 - 32. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Nunga Huida Debata." Rap ma hita mangihuthon hatoranganna.
Pendahuluan
Jakob lapatanna: penipu, di hata Heber didok Jaaqob lapatanna penipu. Ndang ala na kebetulan si Jakob manipu hahana si Esau umbahen na diartihon si Jakob gabe panipu. Goar somalna boi do gabe ngoluna jala dipardaginghon. I do asa sai jotjot didok goarna do daina. Goar i boi do gabe manghorhon tu pangalaho manang panghuling (goar tulut).
Diuarihon Debata do goar i tu si Abraham ingkon gabe bangso na bolon ibana jala pinomparna gabe pinompar ni Debata, jala marhite bangsoNa i gabe torop jolma dapotan pasupasu manang asi ni roha. Si Jakob i ma pahompu ni si Abraham sian si Ishak. Tontu si Jakob panipu i gabe parhitean ni sangkap ni Debata. Ala ni i porlu do ibana manjalo goar na dipaimbaru asa dohot pangalahona i dipaimbaru asa masitomuan jala sarombang goarna dohot pangalahona. I ma na naeng putihonta sian turpuk on na gabe parsiajaran.
Pembahasan
Ayat 22-24a
Boasa borngin jala parpudi si Jakob borhat sian huta ni simatuana? Alusna: ndang apala na disangkapi parbungkas ni si Jakob sian huta ni simatuana laho muli tu bona pasogitna. Alai ala naung hira sega do parsaorannasida dohot simatuana hinorhon ni na dituhashon angka tungganena (hulahulana) anak ni si Laban na mandok: nunga diahuti si Jakob sinamot ni amanta sasudena, jala marharoroan sian na di amanta i do hamoraonna on sudena (1 Musa 31 : 1 - 3).
Somalna molo nunga masa angka parsoalan, jala ndang denggan be angka roha sai humatop do dilului dalan boha asa unang be pajumpang bohi, gabe dao ma sian parsoalan i. Ndang apala dao dope parsoalan ni si Jakob dohot hahana si Esau, tung mansai rata dope di parningotanna, ala ni i, sai disura rohana do ingkon ro hahana si Esau patupahon pamoloson. Ala nunga martambatamba angka parsoalan na diadopi, ingkon do bahenonna dalan laho manghamonanghon saluhutna i. Dilehon ibana ma marhite silehonlehon na niadu di jolonghu, dung i pe asa idaonhu bohina, anggiat mira bohina marnida ahu (ayat 20).
Ayat 24b-26
Jadi ro ma sada halak marsiranggut dohot ibana ro di buha siang ari. Sungkun-sungkun di bagasan roha, ise do donganna marsiranggut? Alusna Debata do dongan ni si Jakob na marsiranggut i. Boasa pola marsiranggut nasida? Sangkap ni Debata i ma paingothon asa diongkuhon si Jakob marhite pangalaho, panghuling na sintong do ibana, Jakob i ma panipu (hata Heber: Jaaqob, i ma: panipu) ndang tarbahen gabe parhitean ni pasupasu dohot sangkap ni Debata. Ala ni i, ingkon jolo disingkathon jala ditallushon do goar dohot pangalaho naung salpu i tu goar dohot pangalaho na imbaru. I ma sangkap ni Debata di parsirangguton i. Alai ingkon siula padan ni Debata nama si Jakob.
Parsirangguton ni si Jakob dohot debata ro di buha siang ari. Boi do ra tadok buha siang ari, i ma pukul lima sahat tu pukul onom manogot ni ari. Mangihuthon sarito di hasomalan di dunia bagian timur, didok nasida ia roh-roh halus (na so niida ni mata) ndang olo be mulaulaon molo nga jumpang buha siang ari, maila manang ndang tolap nasida pajumpang dohot jolma. On do ra na mempengaruhi pengarang Jahwist (sumber J), gabe dipartudoshon nasida ma Debata dison songon roh-roh halus i, ndang tolapna pajumpang dohot jolma. I ma asa marsiranggut holan ro di buha siang ari.
Jala dietong nasida ma na talu Debata na marsiranggut i. Alai ndang na talu Debata, aut sugari lomo roha ni Debata manaluhon si Jakob ndada pola sanghidop mata nunga boi do sudahononna si Jakob i (2 Musa 4 : 24 - 26). Boasa pola digurithon parsirangguton ni si Jakob dohot Debata sahat ro di buha siang ari di turpuk on? I ma patuduhon paboa si Jakob sahalak na mansai gogo situtu. Ai nang pe naung disoro soitna tong dope marsiranggut ibana, ndang tallus ibana sian alona i. Jala boasa sai digogo si Jakob na marsiranggut i ndang olo ibana manallushon dirina sian alona na marsiranggut i? Ala ditanda si Jakob do ise donganna na marsiranggut i, i ma Debata.
Aut sugari ndang ditanda si Jakob donganna na marsiranggut i, i ma Debata, ndada dohononna: Ndang hupalua Ho, nda jolo dipasupasu Ho ahu. Ai ndang mungkin pangidoon ni si Jakob pasupasu sian jolma dohot sian sibolis. I ma umbahen tubu di ibana tekad nang pe loja jala sahat tu na ngendul soitna ndang dipalua ibana parsiranggutonna i dohot Debata so ingkon jolo dipasupasu ibana.
Ayat 27-28
Disungkun do goar ni si Jakob jala diganti muse goarna gabe si Israel. Boasa pola disungkun? Ndang na pola so ditanda na manungkun ise si Jakob, jala ndang na so diboto ise si Jakob i. Alai marhite panungkunon i do Debata mamasumasu si Jakob. Ai goarna do daina, goarna i do nang pangalahona. Pasupasu i, i ma sian goar Jaaqob, Jakob lapatanna panipu disingkathon ma goarna gabe si Israel, ai dialo ho do Debata dohot jolma (pejuang Allah). Aut sugari ndang dipasupasu Debata si Jakob i, sai tong nama si Jakob gabe panipu.
Alai dung muba sian panipu gabe pejuang Allah, taruli ma ibana di hamonangan. Ala, pasupasu ndang holan sinamot manang arta. Aut sugari ra sinamot dilehon marlompit ganda ndang hatontuan i gabe mambahen ibana manjumpanghon hamonangan. Jadi pangoloion ni Debata tu pangidoan ni si Jakob i, ndang ala na talu Debata, alai na hombar do pangidoan ni si Jakob tu sangkap ni Debata, i ma gabe "ompu ni na porsea" hombar tu padan ni Debata tu ompuna si Abraham.
Ayat 29-32
Disungkun si Jakob goar ni Debata, jala digoari do inganan parsirangguton i, i ma Peniel. Jumolo nunga disungkun Debata goar ni si Jakob, dungi muse disungkun si Jakob ma goar ni Debata. Nian ndang apala tangkas dioloi Debata sungkun-sungkun ni si Jakob i. Boasa ndang dioloi Debata? Naeng tangkas botoonta ala marpardomuan do i tu patik patoluhon i, i ma: Ndang dohonon goar ni Debata ianggo so ture dalanna. Debata manjamothon habadiaon i asa unang marsineang si Jakob mandok Debata. Asa unang dipangke goar ni Debata tu angka na so ture dalanna. Isarana nuaeng, torop do halak mandok demi Tuhan, alai holan manutupi diri asa hira na badia.
Somalna, ia angka ompu ni na porsea molo adong dibereng angka tanda-tanda halongangan sai pintor dipajongjong do batu martinditindi dohot tujuanna disi asa gabe parningotan ma i di rohana. Songon i do nang si Jakob di turpuk on, nian ndang apala dipajongjong batu martinditindi alai songon i do anggo sangkapna. Dibahen ibana do di inganan i partanda siingoton tu angka pinomparna sogot. Dibahen ibana goar ni inganan i Peniel lapatanna bohi ni Debata. Di inganan i ma tangkas diida si Jakob bohi ni Debata marhitehite na marsiranggut nasida, jala mamboan tua dohot hamonangan do parsirangguton di ibana, ndada mamboan hamagoan manang parmaraan.
Kesimpulan dan Refleksi
Tangkas do taboto inganan hasusaan do anggo portibi on. Jala nunga tabereng marhite angka pardalananta, ragam do angka hamaolon tabolus. Olo do so salpu dope angka hamaolon i nunga ro muse angka hamaolon na asing manahop ngolunta. Suang songon i do nang las ni roha, olo do marlas ni roha hita saonari jala satongkinnari ro muse angka las ni roha na asing. Gabe mardapotdapot ma las ni roha i mambahen marolopolop tondinta. Suang songon i do nang di pardalanan ni Hurianta sangombas tabereng do hamonangan marhite mangerbang do Hurianta sahat tu tingki on sahat di angka luat na marragam i, nang ihut ro angka siparungkilhononta di pardalanan ni huria i.
Alai ingkon tahaporseai do di parsirangguton i, disi do Debata mamasumasu. Di na marsiranggut dohot Debata di las ni roha nang di parungkilon pe dapot Debata ma hita gomos maniop Tuhan i asa dapot nang sian huriaNa manghatindanghon songon nidok ni si Jakob "ndang paluaonhu Ho saleleng so di pasupasu Ho au. Sai na tambaan ni Debata do pasupasuNa tu hurianta (parhobas, ruas) tu joloan on tamba ni angka naung adong i asal ma hombar pangidoanta i tu sangkap ni Debata.
Ndang pola ala hebat ni angka dalan naung pinatupa ni si Jakob asa malua iba sian rimas ni hahana si Esau, alai tung sangkap ni Debata sambing do naung jumolo paimbaruhon diri ni si Jakob. Laos marhite haimbaruon i ma Debata mamasumasu, paluahon si Jakob sian rimas ni hahana si Esau. Suang songon i do nang hita, ingkon tongtong do ongkuhononta gogo ni Debata di bagasan pardalanan ni ngolunta on.
Ndang ala ni ragam dalan naung tapatupa di pardalanan ni ngolunta on, alai tung holan asi ni roha ni Debata marhite AnakNa Tuhan Jesus Kristus naung mate di hau pinarsilang i do umbahen boi hita malua jala monang sian jorgong ni dosa i. Amen.
Posting Komentar