Jamita Minggu 2 November 2025 Minggu 20 Dung Trinitatis tarsurat di Nehemia 1 ayat 1 - 11. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Tuhan Manangihon Joujou ni NaposoNa." Rap ma hita mangihuthon hatoranganna.
Pendahuluan
Buku Nehemia masuk tu horong Padan na Robi jala buku on ndada masuk tu horong ketuvim di Padan na Robi jala tu buku sejarah Israel, secara khusus sejarah masa dung habuangan sian Babel rap dohot buku Ezra. Hata Nehemia marharoroan sian hata Heber nekhemyah sian hata dasar nikham manang nekhama na marlapatan pangapulion dohot hata yah singkatan sian goar ni Debata Yahwe, jadi Nehemia boi dilapati pangapulion na ro sian Debata.
Pembahasan
Ayat 1-3
Ndada sude halak Israel ditangkup jala dibolonghon tu Babel, adong do tong deba halak Israel na boi paluahon dirina sian na masa i, manang na digoari turpuk on teba manang pasipasi ni halak Israel na tarbuang di Jerusalem. Jala huta Jerusalem ibu kota ni Israel, na di bagasanna jongjong Bagas Joro ni Debata pe nunga dilohai, tarurak, parik ni Jerusalem na salelengon kebanggaan ni Israel nunga bungbung be jala pintu harbangan ni huta Jerusalem pe nunga ditutung dohot api, di bagasan hadangolan dohot haurakon do parngoluan ni teba manang pasipasi ni halak Israel na tarbuang na tongon di Jerusalem.
Turpuk on mangombarhon tu hita pangontak ni dosa na mansai ngeri, songon dia ngerina molo sapala nunga ro rimas ni Debata laho mambaloshon angka pangalaho dosa ni jolma i, na so olo marhamubaon ni roha. Satongkin do dibahen Debata molo naeng paluahon jala pasangaphon jolma i, songon Israel sian bangso hatoban di Misir laos gabe tuan na sangap di tano Kanaan. Laos boi do muse satongkin bahenon ni Debata laho manguhum manang patoruhon ngolu ni jolma, laos ndang adong gogo manang sangap ni jolma na boi lhao mangambati sapala ro panguhuman rimas ni Debata. Ala ni i sai taarahahon ma ngolunta on gabe ngolu na parohon lomo ni roha ni Debata, unang ma parohon rimas ni Debata, ai so tartaon jolma i sapala ro rimas ni Tuhan i.
Ayat 4
Somalna adong dua pangalaho ni jolma molo madabu tu pangunjunan, i ma lam takang manang lam mananda diri, alai si Nehemia halak ni Debata di angka na masa i dibahen do i gabe panandaion diri dalan laho paserephon rohana di adopan ni Debata, laos i do na gabe tiruan di hita di turpuk ni Jamita on. Panandaion diri manang serep ni roha ni si Nehemia tarida ma i sian pandohan di hata Heber yāśabti na boi ni lapatan hohom (dwelt), marsinggang (sitting, to sit down), lapatanna molo ro angka hamaolon na mansai posi, i ma tingki di hita pahohom diri laho marsinggang tu adopan ni Debata.
Jala dipangke hata wä'et'abbelah na boi ni lapatan marhabot ni roha (mourned), mangandungi (mourns, lamented). Jala dipangke hata săm, na marlapatan marpuasa (fating). Martangiang (Heber: palal) di bagasan hahohomon, marsinggang, mangandungi jala marpuasa tontu ndada tangiang hasomalan on alai tanda na situtu, na tutu hita martangiang, ndada holan dagingta martangiang, alai dohot do tondinta martangiang songon pandohan ni si Marthin Luther martangiang ma ho sahat na tutu situtu ho martangiang.
Ayat 5
Tangiang ni si Nehemia ndada manalahon Debata siala na masa i manang patuduhon mohop ni roha laho pasintonghon diri di tongatonga ni na masa i, alai tangiang na mangelek roha ni Tuhan i do tangiang ni si Nehemia. Masa pe angka hangalutan tongtong diakuai si Nehemia ia Debata i ma ělõhe wehannôã haggādôwl na marlapatan Debata na timbul jala na songkal (God and awesome great). Lapatanna di bagasan hatimbulon jala hasongkalan ni Debata do si Nehemia mangalapati angka na masa i, asa i didok si Nehemia songon dia pe na masa molo Jahowa, i ma Debata habberit sômer na marlapatan Debata na tongtong marningot padan dohot asi ni rohaNa. Lapatanna, nang pe songon i posana na masa i, ndada dilapati si Nehemia dalan laho pamatehon bangsoNa Debata, alai dalan laho mandisiplinhon parngoluon ni partondion ni bangsoNa do Debata disi.
Ayat 6
Somalna jolma martangiang hombar tu roharohana sambing, maksudna martangiang ibana pas ingot, dung i so, di tangiang pe laos songon i ma lalap, ai boha ma roharohana do gogo tangiangna ndada partondionna. Alai si Nehemia didok turpuk on wâlaylâh yōwmām manang arian dohot borgin (night and day) manangiahon Israel. Laos taringot hita tu pandohan ni si Marthin Luther martangiang ma ho di ganup tingki sahat tu na dapotmu pinangido ni tangiangmi.
Ayat 7
Isi tangiang ni si Nehemia ndada laho pasintonghon diri manang tangiang na margaya-gaya asa songon na hebat begeon, alai tangiang na olo mangaku hasalaon asa i didok si Nehemia di turpuk on häböl läk häbalnú na marlapatan tung na marroha mago situtu hami marparualon dompak Ho. Artina tangiang na sintong ma, tangiang serep jala marhatopothon nasa hasalahan manang dosa, ai boi do jolma i martangiang alai tangiangna i patuduhon ginjang ni roha.
Ayat 8-11
Dalan laho mangelek roha ni Debata si Nehemia marojahan angka tona ni Debata do, ndada songon tangiang ni jolma na asing, martangiang ibana laho patuduhon angka pambahenanna manang angka si adonganna manang hajagoanna songon tangiang ni angka sadusi dohot parise. Ia molo di turpuk on parhitean ni halak Israel manjalo tona ni Debata i ma marhitehite si Musa alai molo di hita hakristenon marhitehite Jesus do hita manjalo tona ni Debata. Asa i, ingkon di bagasan Jesus do hita martangiang, anggiat dilehon Debata asi dohot holong ni rohaNa di tongatonga ni rimas ni Debata na marpiarpiar. Laos di ngolunta si ganup ari, molo nunga muruk dongan unang ma lam dipagalak, alai di murukna i paingot ma ibana di angka padan manang tona angka na dengan na hea didok ibana. Mangasahon padan manang tona ni Debata i do si Nehemia yakin situtu, ndada laho mambolonghon Debata di na masa i tung mulak roha ni Tuhan i, papunguonNa do muse bangsoNa i, siala tong do angka naposoNa do angka na ni murukanNa i.
Kesimpulan dan Refleksi
Ondolan ni Jamitanta di Minggu on i ma Tuhan Manangihon Joujou ni NaposoNa, alai porlu do patorangon joujou na songon dia do na ditangihon Debata? Sapala joujou hita tu Tuhan i unang ma joujou na marpangansi, unang ma joujou na alang, joujou na mardua roha manang joujou na di bagasan ginjang ni roha. Joujou na ditangihon Debata songon joujou si Nehemia do, i ma joujou na marojahan di tona nang padan ni Debata. Tongtong do joujou si Nehemia arian dohot borngin. Joujou na di bagasan haserepon no roha, na manopoti hasalaan jala na pasangaphon Debata di tongatonga ni hapariron na masa. Joujou di bagasan hahohomon, parpuasaon, marsinggang dohot mangandungi. Antong asa ditangihon Debata joujounta tatiru ma songon joujou ni panurirang Nehemia tu Debata. Amen.
Posting Komentar