Jamita Minggu 5 Oktober 2025 Minggu 16 Dung Trinitatis tarsurat di Habakkuk 1 ayat 12 - 17. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Debata na Sumangap dohot Parbinoto na Bolon." Rap ma hita mangihuthon hatoranganna.
Pendahuluan
Buku Habakkuk i ma buku na sinurat ni panurinang Habakkuk. Buku Habakkuk on disurathon si Habakkuk patolhashon taringot tu holso ni rohana tu Debata, ala dipabangkit Debata do Babel gabe panguhum tu bangso Juda di hasalaan ni nasida. Sada partontangan do on di roha ni si Habakkuk boasa pola dipabangkit Debata Babel gabe singkatNa laho manguhum bangsoNa. Boasa bangso Babel, bangso na so mananda Debata, jala bangso na lobi tangkang sian bangso Israel pangkeon ni Debata padabu uhum tu bangsoNa.
On ma na sai marhusari jala patontang di roha ni panurirang Habakkuk. Alai dalan ni Debata ndang tardodo ni jolma jotjot suhar do roha, pingkiran ni Jolma maradophon pingkiran dohot dalan ni Debata. Di Jesaya 55:8 "Ai ndada pingkiranHu, pingkiranmuna i, jala ndada dalanmuna angka dalanHu, ninna Jahowa."
Molo dipillit Debata pe bangso Babel laho manguhum Juda, na patuduhon otoritas ni Debata do i, pabotohon saguru lomo ni roha ni Debata do luhut na masa di pardalanan ni ngolu ni jolma. Boi do on gabe sada dalan laho paubahon roha ni sada bangso jala boi do on gabe dalan laho manguhum bangso i. Debata do na mardaulat mangatur ngolunta.
Raja na marhuaso hatiha i di Babel i ma Raja Nebukadnesar na mamboan halak Juda tu habuangan Babel. Marhite buku Habakkuk on diurupi Habakkuk do halak Juda laho mangantusi cara ni Debata laho patuduhon huasoNa. Ndang dipasombu Debata bangsoNa di bagasan arsak dohot sidangolon alai ingkon gabe sada parsiajaran do on di bangso na pinillit ni Debata.
Sai na marpangulahi do roha ni Debata tu bangsoNa, ndang umbalga rimasNa sian holong ni rohaNa tu bangsoNa. Alai molo jolo diuhum Debata pe bangsoNa i pataridahon holong do i, jala ingkon adong do hamubaon ni roha di bangso Israel. Ndang boi be nasida manomba debata sileban alai ingkon tontong do nasida marhaporusan tu Debata Jahowa.
Pembahasan
Ayat 12-13
Dipungka panurirang Habakkuk do di ayat 12 na mandok "Nda Ho do ale Jahowa DebataHu sian na robi dope na sun badia di ahu?" pandohan on marlapatan diparhatutu si Habakkuk do habadiaon ni Debata molo pe ingkon marsitaonon ibana, ala diida ibana songon dia realita na masa tu bangsoNa. Debata Jahowa i ma Debata na sun badia sian na robi sahat tu saleleng ni lelengna. Dirajumi panurirang Habakkuk do songon dia habalgaon dohot denggan basa ni Debata di ngoluna. Ndang tagamon dipasombu Debata nasida mate ala ni dosa na binahenna, alai ingkon dipalua Debata do bangsoNa sian angka hagogotan, on ma haporseaon na polin sian Habakkuk.
Dipatoru do dirina laho martangiang tu Debata, ala Debata do dalan hasitongan. Di tangiang ni Habakkuk disangkapi ibana do laho umboto songon dia do huaso ni Debata, boasa pola ingkon bangso na so mananda Debata na gabe panguhum bangso Juda, na tangkang marroha lumobi sian hatangkangon ni bangso Juda. Alai sian on do tarida songon dia do dalan dohot sangkap ni Debata, ai dalan ni Debata marasing do sian dalan ni jolma (patudos Jesaya 55 : 8). Alai molo pe songon i tongtong do dipuji Habakkuk Debata marhite tangiangna, didok ibana do ianggo Debata gabe dolok batu na marlapatan ma i, ia Debata gabe parlinggoman ni bangsoNa pasidinghon angka musu na ro.
Di ayat 13 diboto Habakkuk do tung so marlomo ni roha do Debata marnida angka na roa jala mida pangarupaon, alai boasa ma ingkon masa na si songon on tu bangsoNa. Adong sada bentuk pikiran na eksklusif sian Habakkuk, alai on ma sada na di pataridahon Debata Jahowa, ai ndang na holan tu bangso na mangolu di bagasan hasintongan Ibana ro alai tung ro do Ibana tu bangso na mananda Ibana jala ingkon dipaimbaru do rohanasida marhite haroroNa. Jadi molo pe ingkon Babel na gabe panguhum di bangso Israel na laho patuduhon dalan ni Debata do i.
Ayat 14-16
Dipatudos panuring Habakkuk do bangso Juda songon dengke di laut jala songon gulokgulok; na marlapatan na mura do tangkupon. Nang pe godang bilangan ni bangso Juda alai boi sude gabe unduk tu bangso Babel. Di ayat 15 didok "Tung saluhut do disintak nasida tu ginjang marhitehite hail, jala dipapungu di bagasan jalana, jala dionjat tu bagasan hadanghadanganna." Lapatanna, molo dengke naung masuk tu hadanghadangan i ndang boi be malua, nang pe mangalo ibana. Songon i ma situasi dohot kondisi ni bangso Juda hatiha i ndang be boi malua nasida ala naung di bagasan gomgoman ni Babel. Bangso Israel nunga gabe sada bangso na lilu jala golap parnidaanna manang lumlam. Halumlamon ni bangso Juda mambahen nasida mura diluntak jala diboan tu habuangan Babel. Jala dipatuduhon Babel do huaso haportibion mangasahon gogo ni militer. Mardebatahon gogo ni militer (gogo ni militer i ingkon di ginjang ni sudena). Mamparhatutu ala ni hagogon ni militer do umbahen boi nasida mamboan halak Juda tu Babel jala ala ni gogo ni militer do nasida boi pabidanghon wilayah nasida. Huaso haportibion mangasahon gogo on gabe dalan hamamago do di bangso Babel di angka tingki na mangihut. Songon hata ni umpasa na mandok pantun hangoluan, tois hamagoan.
Ayat 17
Pangungkapon na pinapatar ni panurirang Habakkuk on, pintor udut do tu songon dia bangso Babel mandalani ngoluna. Dipataridahon do di ujung ni pardalanan ni ngoluna; Babel gabe sada bangso na jungkat dohot na tangkang marroha maradophon bangso na asing. Ala torus do dipangasahon nasida gogona sandiri gabe timbul ma sada pangatusion na lipe di bangsona, marhatuhuhon mamangke gogona laho mamunu bangso na asing. Alai ujungna ingkon dapot nasida do pamaloson tu angka pangalahona. Manghorhon hamamago do molo mangasahon gogo, mangolu di bagasan ginjang ni roha. Alai baliksa Hata ni Debata mandok sai na patimboon ni Debata do halak na olo patutoru dirina (patudos Mateus 23 : 12).
Kesimpulan dan Refleksi
a. Sian turpuk ni Jamita on, dipake Debata do uhumNa laho mamincang bangsoNa. Tung holong do roha ni Debata tu bangsoNa ndang diloas nasida mate ala ni dosana. Tung marasing do dalan ni Debata sian dalan ni jolma. Molo pe dilehon Debata hita sada halobion unang gabe dalan marginjang ni roha. Ganup halak na ginjang roha ingkon madabu do tu pangunjunan, alai ganup halak na patutoru diriNa taruli hatuaon (martua) do di bagasan ngoluna.
b. Ingkon tongtong do hita martangiang tu Debata molo pe di bagasan marsitaonan hita, ai nolnol do mata ni Jahowa tu angka na manghabiari Ibana, angka na manghalungunhon asi ni rohaNa (Psalmen 33 : 18). Angka na Uli na denggan do na naeng taida molo marhaporusan hita tu Debata marhite tangiangta.
c. Ingkon gabe tiruan ni na denggan ma ngolunta ganup ari, tarlumobi ma di panghataion, di parange, di holong ni roha, di haporseaon, nang di hatomanon (patudos 1 Timoteus 4 : 12).
d. Debata do nampuna hita jala Debata umboto aha na gabe panghirimon di rohanta. Ala ni i sian turpuk Jamita on, ingkon pos do rohanta tu Debata jala porsea ma hita ingkon sarihonon ni Debata do ngolunta jala ingkon gabe ulaula ni Debata do hita laho pararathon HataNa. Amen.
Posting Komentar