Jamita Partangiangan Epistel Minggu 2 November 2025 Minggu 20 Dung Trinitatis tarsurat di buku Jakobus 5 ayat 12 - 18. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Tuhan Manangihon Joujou ni NaposoNa." Rap ma hita mangihuthon hatoranganna.
Pendahuluan
Buku Jakobus i ma buku di Padan na Imbaru jala dipamasuk tu horong surat-surat umum, sahorong dohot buku Judas, 1-2 Petrus dohot 1-3 Johannes. Di buku on panurat holan patandahon dirina marhite pandohan naposo ni Debata, Tuhan Jesus Kristus (Jakobus 1 : 1), alai secara tradisi niantusan ni na porsea, Jakobus nidok na dison i ma saudara ni Tuhan Jesus. Buku on mulana ditujuhon tu halak Kristen Jahudi jala pesan teologis buku on laho manogunogu halak Kristen asa haruar sian hasomalan na jat manang pangalaho haportibion, jala manghangoluhon ngolu hakristenon i di bagasan hasintongan.
Pembahasan
Di ayat 12 dioarai do hita halak Kristen manolonnolon, molo di hata Junani dipangke hata omnüete na boi nilapatan bersumpah (swear). Alai panolonan na diorai turpuk on molo mangasahon parlangitan (Junani: ouranons, heavens) manang tano (Junani: gen, earth). Molo Jesus mandok ndang jadi jolma i manolon tu langit, ai habangsa Debata do i, manang mangasahon tano, ai disi do jongjong huta na songkal Jerusalem jala huta raja na bolon, manang panolonan mangasahon ulu manang simajujung, ai so adong gogo ni jolma nang saotik pabironghon manang pabontarhon nanggo saobuk (Mateus 5 : 34 - 36). Jala dipadimpos Jesus nasa panolonan na sala, i ma nasa hata na diuarihon, na so diulahon manang digarar (Mateus 5 : 33). Alai on ma na ingkon didok jolma, olo hot ma i molo olo, unang ndang hot, asa unang madabu tu bagasan uhum (patudos Mateus 5 : 37). Molo nilapatan turpuk on ndada panolonan i na diorai, alai unang pangke panolonan i dalan laho margabus, dalan laho paluahon diri sian tanggung jawab. Molo ndang tolap jolma i jujur manang konsisten manang berintegritas unang pola dioloi panolonan, tumagon didok ma, olo molo olo, ndang molo ndang, asa unang martamba panguhuman ala ni dosana.
Di ayat 13 turpuk on berbicara haporsukon jala songon dia mangadopi haporsukon i? Haporsukon di hata Junani i ma kakopathei, na boi nilapatan manarita alani hajahaton (the suffer evil), manaon panaritaan (endure affiliction). Lapatanna haporsukon na nidokna dison ndada haporsukon siala pangontak ni hasalaan manang ala ni dosanta, alai haporsukon na ro siala hahotonta mangulahon na denggan. Molo adong na manaon na porsuk siala ni pangontak ni dosana tontu paubahon roha ma solusina, alai molo adong na manaon na porsuk siala mangulahon na denggan solusina martangiang ma ibana. Tangiang di hata Junani dipangke proseuchomai na marlapatan mamelehon tangiang (offer prayer), lapatanna tangiang margogo do i pahothon haporseaonta asa unang gabe jora hita patupahon na denggan nang pe sipata balos ni na denggan i ro haporsukon. Didok molo adong na marlas ni roha (Junani: euthümei, is cheerful) marende (Junani: Psallető, let him sing praise) ma ibana. Lapatanna marende mamuji Debata margogo do i mambahen jolma i asa unang sombong, manang ginjang rohana molo ro angka si las ni roha.
Di ayat 14-15 manghatai taringot na marsahit jala songon dia mangadopi parsahitan i? Di hata Junani hata marsahit dipangke asthenei na marlapatan gabe gale (to be weak), gabe marsahit (to be sick). Lapatan ni marsahit dison ndada holan sahit pardagingon dohot do tong parsahitan roha manang pingkiran nang mental (physically then morally). Didok dijou ma angka sintua ni Huria i, molo di hata aslina dipangke hata presbuteros ho ekklesia, lapatan ni hata angka sintua (presbuteros) i ma pimpinan (elder), na umtoras (seniors). Lapatanna hata Sintua ni Huria ndada mandok perorangan alai mandok ise do uluan manang representasi sian sintua ni Huria i. Jala diulahon ma mandampol na marsahit i dohot miak dohot mananianghon ibana marhite goar ni Tuhan i. Tangiang dohot mandampol marhite miak di bagasan goar ni Tuhan i, boi ma nilapatan, hamamalum sian parsahitan ingkon di bagasan usaha dohot tangiang, ndada holan hatahata tangiang, tongtong do ingkon diulahon tangiang i marhitehite usaha tu hamamalum isarana marubat. Alai di ginjang ni saluhut, haporseaon na mangolu do na mambahen margogo tangiang nang usaha parubatan i. Haporseaon di hata Junani dipangke hata pisteōs na boi nilapatan iman (faith), kepercayaan (belief), keyakinan (trust), kepercayaan diri (confident). Artina ndang boi adong ganggu ni roha manang roha alangalang molo didok haporseaon, unang ma coba-coba alai sian roha na marsitutu na tutu.
Di ayat 16 tangkas dipaboa so boi tubu haporseon na manongtong molo dipeop rohanta dope dosa, ala ni i asa tubu haporsean na sintong ingkon parjolo do diambolonghon dosa i marhitehite cara marsitopotan dosa ma. Lapatanna molo nunga martangiang halak na porsea di bagasan hasesaan ni dosa, gabe partigor ma ibana di adopan ni Debata, gabe saut ma na tinangianghonna i, ai tangkas do didok turpuk on margogo situtu do tangiang ni halak partigor.
Di ayat 17-18 dilehon si Jakobus tiruan jolma partigor na martangiang gabe dioloi Debata tangiangna songon tangiang ni si Elia na pasohon udan, pola sahat tolu taon onom bulan, dung i martangiang ma muse ibana gabe ro udan gabe dipartubuhon angka tano do parbuena. Porlu tangkas talapati aha do makna ni partigor, molo di hata Junani dipangke hata dikaiou na boi ni lapatan halak na sintong (righteousman). Sintong na boha do? Siala didok buku na badia i do sude do jolma mardosa, sada pe ndang tuk paturehon dirina (Rom 3 : 23 - 26). Jadi hata sintong dison ndada ala ni pangalaho ni jolma manang ala ni hagogoon ni pambahenan ni jolma, alai sintong dison siala asiasi dohot holong ni roha ni Debata sambing do. Jadi asa boi jolma i sintong ingkon jaloonna do parjolo asiasi ni Debata i ma hasesaan ni dosa na pinatupa ni Debata di bagasan Kristus, dung i dipasintong Debata ma ibana. Antong tatopoti be ma dosanta, porsea ma hita tu Tuhan Jesus jala marhamubaon ni roha, dung i dipasintong Debata ma hita. Gabe margogo ma tangiangta di adopan ni Debata songon tangiang ni Elia na margogo jala dibege Tuhan Debatanta.
Kesimpulan dan Refleksi
Ondolan ni Jamita Minggu on i ma ditangihon Debata do joujou ni naposoNa, marsiajar hita sian turpuk on, holan halak na sintong do na ditangihon Debata joujouna. Tarimangi be ma ngolunta jolma na sintong do hita? Asa boi taruli hita di hasintongan, Debata na pasintonghon ngolunta, tatopoti be ma dosanta, tapauba be ma dirinta laos porsea ma manongtong tu Tuhan Jesus, dung i sintong ma ngolunta siala nunga dipasintong Debata. Dung di bagasan hasintongan ni Debata ngolunta, gabe margogo ma tangiang manang joujounta songon joujou ni si Elia. Amen.
Posting Komentar