Jamita Partangiangan Epistel Minggu 26 Oktober 2025 Minggu 19 Dung Trinitatis tarsurat di buku Psalmen 84 ayat 1 - 7. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Diparbohali tu Ganup Ulaon na Denggan." Rap ma hita mangihuthon hatoranganna.
Pendahuluan
Tangkas didok Psalmen on i ma ende sian angka anak ni si Kora. Ise do huroha si Kora on? Mangihuthon 4 Musa 16, i ma na hehe mambingkasi bada dompak si Musa, rap dohot 250 baoa ni Israel na mandok: Boasa patimboonmuna dirimuna gumomgom huria ni Jahowa? Hape ida ma, da Debata sandiri do na mamillit ise na gabe marhaladoi di joloNa? Songon i nang halak Lepi, Debata do na manontuhon asa nasida na marhobas di joro i. Ala ni i ma ro uhum sian Debata tu nasÃda, pola do dipanganga tano i babana mamondut nasida, rap dohot saluhut ugasanna. Dohot do si Kora disi. Alai di 4 Musa 26 : 11 didok: Ndang mate anggo angka anak ni si Kora.
Nang pe di masa ni si Musa mambingkasi bada dompak si Musa si Kora, alai ianggo tu angka pomparanna, gabe angka na mamelehon dirina do di bagas joro i. Nasida i ma angka anak ni si Kora. Ia ulaon ni angka anak ni si Kora on di bagas joro, i ma: Marjaga nasida di lobulobu laho bongot tu undungundung i (1 Kronika 9 : 19; 26 : 1, 19). Jala di 2 Kronika 20 : 19, gabe dohot do angka anak ni si Kora bertugas dohot halak Lepi mamujimuji Jahowa, Debata ni Israel. Sian i ma botoonta, ndang diihuthon nasida parange na roa binahen ni angka amana uju i songon di masa ni si Musa gabe angka panggunturi di tonga ni luhutan i.
Sian pengalaman ni angka anak ni si Kora on na marhaladoi songon sijaga lobulobu laho bongot tu undungundung i, diida nasida do songon dia las ni roha na masa di bangso i uju mamongotisa. Pola do dihasiholi, dihalungunhon saluhut na tumanda Jahowa inganan bagas joro i. I do naeng idaonta di bagasan turpuk on.
Denggan Nai IngananMi Ale Jahowa Zebaot
On ma pengakuan na ro sian pamangan ni angka anak ni si Kora na mandok: Denggan nai angka ingananMi ale Jahowa Zebaot. Boasa gabe inganan na dumenggan undungundung i dihatindanhon di bagasan turpuk on? Hinadenggan ni undungundung i mungkin marsiala ma i ala ni angka peralatan na adong di bagasanna. Mungkin marsiala ma i hinorhon ni adong inganan na badia, nang inganan na sun badia. Alai ianggo hinadengganna na lumobi, i ma siala na adong poti parpadanan ni Debata di bagasanna. I ma songon inganan parmianan ni Debata di tongatonga ni bangso i.
Asa songon i do tongtong Huria. Hadengganon ni huria ndada apala siala angka ornamen manang peralatan ni Huria i, manang hiasanhiasanna. Alai: Mian do disi Debata manang ndang, i do. Asa molo didok si Martin Luther, Huria na denggan i ma: "Molo dibaritahon disi Jesus Kristus na tutu". Ai ingkon gabe sorminan do i di angka Huria di tingki na parpudi on, ise do dibaritahon di Huria i? Unang ma gabe hajolmaon manang habisukon ni si parjamita i na gabe barita di tonga ni Huria, ingkon Kristus na mangolu i do.
Dung dihalungunhon inganan ni Jahowa Zebaot i (na di bagasan), dung i dihalungunhon ma muse angka na di alamanna (parduru). Denggan do adong kebanggaan di hita hinorhon hinauli ni bagas joro, hinorhon ni hinauli ni angka alamanna. Alai na parjolo na porlu tahalungunhon i ma Jahowa na manginganisa do.
Suman do i tu halongangan. Godang do jolma masihol di angka halongangan masa di ngoluna. Alai gabe lupa do jolma i tu sipatupa halongangan i sandiri. Songon i ma tongtong taringot tu bagas joro i. Unang gabe longang di angka na boi niida, hape na so boi niida (i ma sipatupa halongangan i) gabe dihalupahon.
Ndang Ditulak Angka na Metmet di Bagas Joro ni Debata
Di pengalaman ni angka anak ni si Kora on, diida nasida do gari angka amporik dohot leangleang gabe marasar di angka langgatan pamelean ni Jahowa. Na naeng dohonon on do: Ia amporik i ma na so pola adong argana dietong hajolmaon. Alai pidong na so adong argana i, boi marasar, marlinggomlinggom, marhasonangan di langgatan pamelean ni Jahowa. Lapatanna angka jolma na metmet pe, boi do gabe rap taruli di las ni roha na pinatupa ni Debata di ngolunta.
Asa inganan haporusan do i bagas joro i. I do asa adong hukum internasional mandok: Molo adong parjahat lari martabuni tu bagas joro, tung so boi do pamateon parjahat i di bagas joro i. Ai molo Jahowa pe olo manjanghon parjahat, na ingkon songon i ma tongtong portibi on. Asa tung diargahon situtu do bagas joro i songon inganan haporusan. Lumobi ma marhite Tuhanta Jesus di hau pinarsilang i. Tu si ma hita maporus, ai rade do disi hasesaan ni saluhut angka pangalaosionta.
Martua ma na Mamuji Debata di HagogoonNa i
Holan di angka alaman ni bagas joro ni Debata pe nunga dihalungunhon godangan angka na manomba Ibana. Lam ma angka na mangingani bagas joro ni Debata? I do diparsinta torop halak Israel uju i. Songon si Samuel di Padan na Robi, didok do: "Alai magodang di adopan ni Jahowa do ianggo si Samuel" (1 Samuel 2 : 21). Jala di Padan na Imbaru pe, didok Tuhan Jesus do uju marumur 12 taon Ibana: "Boasa pola luluanmuna Ahu? Ndang diboto hamu na patut Ahu di bagasan bagas ni Damang?" Alai mangingani bagas joro i na rumingkot ndada bagas Joro na di portibi on. Alai i ma surgo hasonangan i, Jerusalem na imbaru i. Halak na martua dohot do angka halak na holan Jahowa dibahen na gabe hagogoonna di ngoluna (ayat 6).
Asa unang pola sai holan na di tano on na tahalungunhon. Jerusalem na imbaru i do na rumingkot si halungunhononhon, disi do rade hasonanganta na umuli sian na di portibi on. Martua ma hita molo rap parsidohot disi. Amen.
Posting Komentar