Jamita Minggu 7 Juni 2026 Minggu Parjolo Dung Trinitatis tarsurat di Psalmen 50 ayat 7 - 15. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Debata na Nampuna Portibi dohot Saluhut Pangisina." Rap ma hita mangihuthon hatoranganna.
Pendahuluan
Ise do si Asap? Si Asap i ma halak Lepi na pinabangkit ni Raja Daud marhobas gabe uluan hadaulaton di parende Tabernakel, marsimbal jala marende di jolo ni Poti Parpadanan (ida 1 Kronika 6:31-32, 39; 1 Kronika 16:4). Ulaonna lobi sian sebagai sahalak pemusik, ala ibana pe dianggap do sebagai panurirang. Disurathon si Asap do pigapiga Psalmen (isarana Psalmen 50, 73-83), na paboahon angka uhum ni Debata, dohot angka tangiang ni bangso ni Debata mangalusi angka na masa di humaliangna. Dibaritahon si Asap do uhum ni Debata jala diarahon do jolma i asa mangalului Debata di tingki hagogotan. Dipangke ibana do silehonlehon ni Debata laho manurathon, dohot musik laho mamuji Debata jala pasahathon parange dohot hasintongan ni Debata tu portibi na marhahurangan.
Di turpuk ni Jamita sian Psalmen di Minggu on, dipasahat si Asap do pinsangpinsang tu bangso Israel naung sala mangantusi songon dia do parsombaon na tutu jala songon dia do parsombaon tu Debata Jahowa. Tongtong do nian bangso i mangaradoti padan nasida tu Debata marhite angka parsombaon dohot pasahathon pelean hamauliateon tu Debata. Alai, sekaligus do adong kecenderungan ni bangso i mangulahon angka ulaon i ndang marojahan tu pangantusion na sintong. Adong do pigapiga halak na mangalapati pelean hamauliateon, manang pelean tu Debata, i ma sada rumang ni panghobasion tu Debata. Dipatudos nasida do Debata Jahowa dohot angka debata na mangigil pelean laho manggantihon ngolu na dumenggan. Ala ni i, di Psalmen on, dipasahat si Asap do sipaingot ni Debata tu bangso i taringot tu pangalaho parsombaon na tutu dohot peleannasida.
Pembahasan
Di humaliang ni bangso Israel, mangolu do ragam bangso na marasing pangantusion dohot pangalaho parsombaonna sian angka na niajarhon ni Debata tu nasida. Godang do ugama na mandok, ingkon sipasonangon do, lehonon mangan, jala hobasan ni angka na manomba i do debatanasida. Jala mangigil do muse angka debatana i, ingkon sipatupaon haporluanna.
Diparadophon tu hasomalan mamelehon pelean, songon na pinatupa ni angka bangso na asing, di haporseaon ni bangso Israel pe, na manomba Debata Jahowa, adong do sada sian ragam ni ulaon panombaon ni halak Israel na mamelehon pelean situtungon, songon angka pinahan dohot pidong, tu Debata di Bagas Joro di Jerusalem, songon tradisi pelean ni angka ugamo Timur na jolo. On do na gabe paliluhon pangantusion nasida na mangarajumi, na sarupa do haporluan ni Debata ni Israel dohot angka debata ni parugamo na asing.
Jadi dipatandahon Debata Jahowa ma muse diriNa, "Sai tangihon ma, ale bangsongKu, … Ahu Debata do Debatam." Ndang dos Debata ni Israel dohot angka debata ni bangso na asing. Sala do pangantusionnasida di na pasahathon pelean tu Debata. Ala dilapati nasida do pasahat pelean i songon na mangurupi, jala mangasii Debata. Lupa do nasida na so porlu Debata urupan jala asian.
Sasingtongna ndang ringkot di Debata pelean sian nasida (molo dilapati do asa adong di Debata) ala Ibana do nampuna saluhut na adong di tano on. "Ndang nian pola sian jabum Ahu mambuat lombu, manang hambing sian angka baram. Ai guru di Ahu do sude binatang ni harangan, pinahan na marriburibu angka na di dolok pe. … Tung sura male Ahu, ndang pola tu ho Ahu mangalualu, ai guru di Ahu do liat portibi on ro di isina" (ida ayat 9-12). Debata do na manompa saluhutna, jala ala ni i, Ibana do nampuna saluhut na di tano on. Ndang marsigantung Ibana tu pelean, materi sian jolma laho manggohi haporluanNa, isarana juhut manang mudar ni pinahan. Jadi molo songon i, aha do na dipangido Debata sian bangsoNa?
Na dipangido Debata sian bangsoNa i ma roha na mandok mauliate di sude denggan basa dohot asi ni rohaNa. Adong do halak na mangalehon pelean ndang ala ni na mandok mauliate tu Debata, alai baliksa ala naeng manghirim. Dipangido Debata do asa antusan ni bangso Israel paboa pelean tu Debata ingkon marojahan sian roha na tongtong mandok mauliate di pambahenan ni Debata na mangalehon haluaon na manongtong i.
Marhite tona asa tongtong manggohi bagabaga naung dipasahat di adopan ni Debata, dihalomohon Debata do asa bangso Israel marsomba tu Ibana marhite na pasangaphon hadaulaton dohot huasoNa. Parange na pasangaphon hadaulaton ni Debata marlapatan do i, ingkon radotanta do bagabaganta, songon Debata na tongtong manggohi bagabagaNa. Di Debata pe, naeng ma hita marsigantung tu Ibana. Ndada holan marsigantung tu Debata uju marungkil hita, joujou tu Ibana, alai dohot ma pauliuli parsaoran holong tu Debata. Tabahen ma Debata gabe aleale dohot pangurupinta.
Kesimpulan dan Refleksi
Holan Debata do nampuna saluhutna, jala dao do Ibana marhuaso sian nasa na adong. Ala ni i, molo dilehon Debata do partingkian tu jolma laho pasahathon pelean, na marlapatan do i naung diajari do jolma i asa tongtong mandok mauliate di sude na pinasahat ni Debata di portibi on. Naeng ma antusanta panombaon tu Debata ingkon marojahan tu roha na tongtong mandok mauliate di ulaonNa naung mangalehon haluaon na manongtong i. Marhite na marsuru hita asa tongtong mangulahon padan naung tabahen di adopan ni Debata, parsombaonta tu Debata ingkon mardongan unduk tu hadaulaton dohot huasoNa.
Panombaon na sintong i do na mangonjar roha ni jolma asa tongtong marparsaoran na solhot tu Debata. Dipaimbaru do ngolu nasida marhite hamauliateon ni rohanasida na tongtong tu Debata. Jadi, boha do parangenta dohot aha do na mangonjar rohanta di na marsomba dohot mambangun parsaoran dohot Debata? Ra, saleleng on, godang do hita na mangulahon i holan ala ni hasomalan sambing. Tu joloan on tapasahat ma mauliate, sian ias ni rohanta tu Debata di sude pambahenanNa. Holan ala asi ni rohaNa do boi hita mangadopi ragam na masa di bagasan ngolunta.
Posting Komentar