Jamita Minggu 14 Juni 2026 Minggu Paduahon Dung Trinitatis tarsurat di Galatia 2 ayat 15 - 21. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Dipintori Holan Ala ni Haporseaon." Rap ma hita mangihuthon hatoranganna.
Pendahuluan
Godang do angka pangajarion di masa saonari on na boi mambahen guntur ni haporseaon. Ima na masa di huria na adong di Galatia. Huria na di Galatia ima huria na manjalo barita haluaon sian Apostel Paulus marhite las ni roha. Alai di bindu 2 on, huria Galatia di bagasan hagunturon di siala pangajarion manang paham sian halak Jahudi Kristen Konservatif manang ginoaran Judaisme ima halak na mangondolhon haluaon i ndang tuk holan alani haporseaon tu Jesus Kristus, alai ingkon marhite parulaan uhum ni patik tarsongon sunat, aturan parmanganganon, dohot angka lan na asing na patuduhon identitas ni halak Judaisme. Na gabe ciri khas ni halak Judaisme ima angka halak na ginoaran halak na marsunat. Na gabe persoalan saonari jala na ringkot ima “sasada halak dipintori Debata alani na mangulahon uhum ni patik do manang alani haporseaon na tu Jesus Kristus? Di bagasan Galatia 2:15-21 on, Apostel Paulus ndada holan mangondolhon alus teologi na, alai paboahon turiturian ni ngoluna secara pribadi taringot tu dalan haluaon ima: dapot hita holan alani haporseaon ndada parulaan manang pambahenan ni uhum ni patik i. On ma ayat na gabe ojahan manang pusat teologi ni Apostel Paulus taringot tu pamintorion.
Amang/inang, on do na mambahen huria i mangadopi hagunturon na tung mansai mangarsahi jala manggunturi roha nasida. Di sada sisi, identitas nasida pe gabe dipertanyakan kembali, gabe adong do nasida beranggapan ndang cukup hape holan haporseaon i palua nasida jala gabe ganggu roha nasida manang naung sintong do dijalo Debata nasida. Ido umbahen surat on ima surat laho mangampini barita na uli ndada holan surat pastoral biasa ala memang di tingki di gurithon si Paulus surat na on di bagasan emosional, retoris, argumentatif dohot profetis. Boasa apala songon i keadaan ni apostel Paulus manggurithon surat na on ala memang na dipertaruhkan ima barita haluaon i. Paulus naeng patandaphon haluaon ndada alani na mangula uhum ni patik i, alai alani haporseaon tu Jesus Kristus do. Ndada holan sekedar teologi na, alai taringot tu mate dohot mangolu do barita haluaon i. Ai molo taula pe angka uhum ni patik i, alai ndang marhaporseaon hita tu Kristus tudos ma hita na ngalian di hos ni ari. Adong 3 pilar teologi pamintorion apostel Paulus, ima: (1) Ndang boi jolma dipintori uhum ni Patik (ay.16), (2) halak na porsea mangolu di bagasan hasadaan dohot Kristus-mati jala hehe raphon Ibana (ay.19-20), (3) molo boi do haluaon i dapot hita marhite uhum ni patik, sia-sia ma Kristus na mate di hau parsilang (ay.21). On ma bagian inti sian surat Galatia on jala sada argumentasi na ringkot di apostel Paulus di sude padan na imbaru.
Pembahasan
Andorang so bongot hita tu ayat 15-21 on, adong do peristiwa na ingkon siingotonta ima si Petrus (Kefas) na rap mangan dohot halak non-Jahudi, alai di hatihai mandao ibana ala mabiar ibana dikritik. Dipinsang si Paulus do si Petrus hatiha i ala memang pangalaho ni ibana na mambahen pemahaman Kristus dohot patik mangkorhon haluaon. On ma na mambahen halak non-Jahudi gabe hurang rohani, alani i do ayat 15-21 on “puncak teologis” sian parmasalahan i. Paulus patandaphon “hita dipintori Debata ndada alani Patik alai haporseaon.
1. Identitas Jahudi ndada gabe jaminan haluaon (ay.15)
Dipungka Apostel Paulus do sian pangantusion ni halak Jahudi ima: dipillit nasida do patik, huria na pinillit ni Debata do nasida, ndada halak na mardosa nasida songon halak naso Jahudi. Alai, dipabalik si Paulus do pangantusion i secara halus “Sian haporseaon di Jesus Kristus do dapotan pamitorion jolma i”. Artina, nang pe adong patik di halak Jahudi alai dang tolap gogo nasida dipintori (bdk. 1 Mus 15:6). Ala memang di Roma 4: Abraham bapa ni halak na porsea ndada bapa ni halak na marsunat. Halak na sintong ima halak na nisesaan dosana, ndada halak na mangulahon uhum ni patik (Pslm. 32:1-2). Identitas agama ndada I na mambahen secara otomatis paluahon hita. Itisarana ndada ala anak ni gubernur hita laos gabe gubernur hita sogot.
2. Dipangke si Paulus do 3 frasa laho patandaphon jala sengaja do ibana mangulahi hata i (ay.16)
Ndang dipintori uhum i hita, holan haporseaon tu Kristus do jala ndang adong sahalak pe dipintori alani na mangulahon uhum ni patik. On ma gaya retorika Jahudi laho patandaphon hasintongan na sasintongna. Dibenarkan/dikaioō marlapatan dinyatahon sintong, dijangkon Debata, dipalua sian uhum ni dosa, ndada mangondoshon prestasi rohani alai marhite ulaon ni Kristus. Naeng ditangkasi si Paulus do “jolma i ndada boi parohon haluaonna, alai jolma i dipintori alani Kristus na palua ibana. Pambahenan dohot parulaan ni jolma i ndang margogo laho mambahen jolma i gabe halak dipintori alana uhum i, tuntutan doi alai ndada pauba roha. Pamintorion ima silehonlehon ndada alani upa.
3. Haporseaon na sintong ndada mangkorhon dosa jala mulak tu hasintongan hata ni Debata (ay.17-18).
Halak Jahudi manihai ima molo haluaon i dapot hita marhite haporseaon, boi ma silomo-lomo jolma mangulahon angka dosa, alai dialo Apostel Paulus do hata i. Patik i do mambahen jolma i sadar di angka dosana alai ndang mangalehon huaso manaluhon haporseaon i. Molo mulak muse Apostel Paulus tu uhum ni patik i gabe ojahan pamintorion ni Debata, na mandok nama ibana disi: ndang tuk holan hamamate ni Kristus di hau parsilang i, na mangarehei Kristus nama ibana disi. Alai didok Apostel Paulus do “Ai hupanjongjong do diringku pangalaosi molo hupauli muse naung hulohai”.
4. Mate maradophon uhum, mangolu di bagasan hasintongan hatani Debata (ay.19-20)
Hata “ai nunga mate ahu di patik i hinorhon ni patik i asa mangolu au di Debata” (ay.19) artina: uhum i mangidohon hapolinon, jolma na so mangolu di hapolinon ni haporseaon mangkorhon uhum. Marhite hamatean ni ibana di uhum, Paulus mangolu di bagasan Debata (Rm 8:1-4). On ma ayat na mambahen manghitiri tondinta “Ndada ahu be na mangolu i nuaeng, Kristus do mangolu di bagasan ahu”. Hasintongan i mangalehon 3 aspek ima:
Identitas/jati diri na imbaru: Ciptaan baru, halak na imbaru.
Hasadaan dohot Kristus: Kristus mate ndada holan tu hita, alai hita pe mate raphon Ibana.
Mangolu di bagasan haporseaon siganup ari: Haporseaon i ma hosa hangoluan di halak na porsea..
5. Molo adong do hasintongan marhite patik, marisuang ma hamamate ni Jesus Kristus.
Jala on ma hata ni Apostel Paulus na tung mansai karas molo boi patik mangalehon hasintongan, sia-sia ma hamamate ni Kristus (bdk Yoh. 11:25; Mrk. 10:45). Patik ndada boi gabe dalan haluaon tu hasonangan, manambah uhum tu silang i dos ma i na manulak silang, jala haluaon i holan asi-asi na sian Debata do i. ndang adong haluaon di luar ni silang, ndang adong huaso ni patik laho paluahon,silang ima pusat sejarah ni haluaon i.
Kesimpulan dan Refleksi
1. Haluaon i ima silehonlehon do i ndada ala usaha manang pambahenanta. Porlu ingotonta di bagasan rohanta ganup ima: laos boha pe gogonta, huaso dohot hamoraonta ndang boi hita paluahon hita sian uhum ni hadosaonta. Dipalua pe hita ndada alani: rajin marminggu, hobas di angka pelayanan, pantun dohot porman, pangalaho dohot sian gareja dia hita. Saluhutna i denggan alai ndang margogo laho mamintori hita di adopan ni Debata. Haluaonta ima sian silang ni Kristus, haporseaon na manjalo sude pambahenan ni Debata dohot asi ni rohaNa. (Kej. 15:6; Rom. 4:3)
2. Unang mulak tu ngolu naung salpu. Ngolu di ari-ari na salpu ndang na holan dosa, alai ugamo na so di bagasan Kristus (Gal. 2:20). Mangalului Debata marhite pambahenan dohot parulaan na denggan di adopan ni Debata, jala manguhum halak hombar tu asi ni Debata. Ai di dok si Paulus do na mulak tu aturan ni patik ima kemunduran rohani.
3. Ngolu di bagasan haporseaon artina paloashon Kristus mangolu di bagasan hita. Kristus na mangolu di bagasan hita, artina pikiran dohot hadirionta Ibana na manuturi, holong gabe ojahan ni ngolu, maninggalhon dosa ndang alani biar tu uhum ni patik alai alani hita naung manghaholongi Kristus. Haporseaon na sintong sai marparbuehon na denggan (Kel. 20).
4. Unang adong be huaso di ginjang ni silang manang aha pe, ai Kristus manaluhon hamatean di hau parsilang. Artina, porlu hita pasangaphon silang ni Kristus asa unang mago arga ni panghophop ni Kristus i di hita. Alani i, ngolunta on ingkon pasangaphon Kristus merhite: ngolu na badia, ngolu na marhamauliateon, ngolu di bagasan holong, jala ngolu na manghobasi.
5. Adong do aturan ni ngolu halak na porsea ndang silomo-lomo mangula dosa. Alai behonma nasa gogo laho manghobasi, manghaholongi, dohot pasangap Debata.
On do pussu manang puncak pembelaan ni Apostel Paulus marhite barita na uli. Marhite ayat on ma hita mangantusi: jolma dipintori haporseaon ndada alani parulaan manang pambahenanna. Ngolu ni halak na porsea ima adong Kristus dibagasan dirina.
Posting Komentar