Jamita Minggu 21 Juni 2026 Minggu Patoluhon Dung Trinitatis tarsurat di 1 Musa 21 ayat 8 - 21. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Pangaramotion ni Debata tu Saluhut." Rap ma hita mangihuthon hatoranganna.
Pendahuluan
Mangihuthon lomo ni roha ni Debata, ima ciri khas ni halak na manghaholongi Debata! Jotjot do ngolu di portibi on mambahen torop halak ganggu jala sungkunsungkun, boasa masa angka songon i? Manang boasa hohom Debata? Taboto do, ndang boi muba uhum ni Debata. Molo lomo ni roha ni Debata, ndang adong na boi mangambati. Alai, adong do angka na masa i sian izin ni Debata. Jotjot do ndang taantusi boasa adong halak na mangulahon na so denggan pe tontong sonang ngoluna? On ma sada pergumulan na jotjot masa di hita angka na porsea di na mamereng portibi on.
Pembahasan
Dijangkhon do hatutubu ni si Isak marhitehite olopolop bolon nang las ni roha, dung marpulu taon dipaima si Abraham dohot si Sara bagabaga ni Debata. Dipatupa si Abraham do pesta bolon di ari si Ishak sirang susu (1 Mus. 21:8). Alai, di ari las ni roha i, dihilala si Abraham do lungun ni roha ala dipangido si Sarah asa dipabali si Hagar dohot si Ismael sian keluarga ni nasida. Hira na marnada muruk do hata on dihatahon, alai molo martudutudu tu Gal. 4:30, hira na dihatahon do hata on di bagasan tondi panurirangon. Si Sarah sandiri do na marnida pangaleaion i: diida ibana do boru Misir i mangarehei si Isak, ndang pola ragu, ai didok do, mardomu tu barita on (Gal. 4:29), ia ibana, ala tubu hombar tu daging, dilele ibana do na tubu hombar tu Tondi.
Boi do anggaponta, mansai hansit do roha ni si Abraham taringot tu parsoalan on. Ndang olo ibana mambahen kecewa si Sara, jala ndang olo ibana pabalihon si Ismael. Di bagasan hamaolon on, dipaboa Debata ma tu ibana aha na dihalomohon rohaNa, jala puas ma ibana di alus ni Debata i. Taparrohahon ma, Ndang adong na asing dipangido halak na burju di sada parkaro na ragu, asing ni na mamboto aha do tugasna, jala aha do na dihalomohon Debata siulahononna. Asa sonang roha ni si Abraham, dipajongjong Debata do di jolona songon dia sasintongna pangalaho saluhut angka namasa i, jala dipatuduhon tu ibana.
Paboa pangusiron ni si Ismael i ringkot do i tu hajongjongan ni si Isak laho mandapot hasurungan ni bagabaga i: Angka na targoar pinomparmu, i ma angka na marharoroan sian si Isak. Bagabaga on naeng pasahatonna tu si Ishak, jala dienet Apostel Paulus do i (Rom 9:7) laho patuduhon na so sude pinompar ni si Abraham gabe panean di bagabaga ni Debata dohot si Abraham. Si Isak, anak na dibagabagahon i, ingkon gabe ama ni pinompar bagabaga i. Ala ni i, “Padao hamu ma si Ismael, pabali hamu ma ibana, asa unang sega pangalaho ni si Isak manang naeng mangarampas hakna.” Aman do ibana tingki diripashon angka musuna. Pomparan ni si Abraham na tarmasuk tu bagabaga i, i ma na gabe bangso ni Debata sandiri, bangso na pulik, sian mulana, pulik jala ndang marlaok dohot angka jolma na di duru ni padan i. Ala ni i ingkon sirang do si Ismael. Holan si Abraham do na tarjou, songon i nang si Isak. Ida ma Jesaya 51:2. Boi do otik dipingkiri si Sarah taringot tusi (Joh.11:51), alai diparrohahon Debata do na nidokna i, jala dipauba gabe hata tona, songon na masa di pudian ni ari (1 Musa 27:10).
Ayat 17 Disarihon jala diondihon Debata do angka na ginosagosa, songon na tarida di 1 Musa 21: 17, disi ma ditangihon Debata anggukangguk ni si Ismael dohot si Hagar. Di 1 Musa 21: 18, dijanjihon Debata do na ingkon gabe bangso na bolon do pinompar ni si Ismael. Si Hagar dohot si Ismael dipabali sian keluarga ni si Abraham, alai diramoti do nasida jala dibahen gabe sada bangso na bolon. On ma na patuduhon, molo pe dipabali si Ismael, ndang gabe kehancuran di ibana. Alai tong do gabe bangso na bolon ibana, ala ibana pe tardok do pinompar ni si Abraham. Marhite on taida ma songon dia holong ni Debata. Debata na marasi roha jala na paluahon ganup jolma na tertindas/tarduru. Boi tapatudos sogon Psalmen 86:1. “Sai paeleng ma pinggolmu, ale Jahowa, alusi ma ahu, ai na dangol jala na pogos do ahu”. Dung i di Psalmen 86:7, dialusi Debata do tangiang ni parpsalmen i jala dipalua ibana. Ala ni i, manang sadihari pe hita digosagosa jala marsitaonon, sai tangihonon ni Debata do tangiang dohot anggukanggukta. Songon na masa di si Ismael, sai tontong do didongani jala diparmudu Debata ngoluni nasida.
Kesimpulan dan Refleksi
1. Boi do sadalan lomo ni roha ni Debata dohot lomo ni roha ni jolma alai sian perspektif na berbeda.
Di na dipangido si Sarah asa dipabali si Hagar dohot si Ismael sian jabuna, dibonsiri do i ala ni murukna tu si Hagar gabe ndang lomo roha ni si Sara mangida pinomparna i si Ishak mardongan dohot si Ismael. Muruk do muse si Abraham tu si Sarah. Kecewa do ibana ala dipangido si Sarah songon i. Alai sasintongna ditonahon Debata do tu si Abraham asa diulahon na pinangido ni si Sarah i tu si Abraham, i ma na pabalihon si Hagar dohot si Ismael. Nda sada na mambahen longang roha situtu do on? Nang pe sarupa tona i, alai huroha marasing do alasan ni si Sara dohot Debata. Ndang ala na so lomo roha ni Debata di si Hagar dohot si Ismael umbahen na dipabali nasida, alai ala si Ishak do anak bagabaga i, ndang si Ismael. Ingkon tu si Ishak do madabu panean ni si Abraham, ndang tu si Ismael. Dison taida hasil ujungna sarupa do, antara lomo ni roha ni si Sarah dohot lomo ni roha ni Debata. Alai, tung marasing situtu do motif dohot perspektif ni si Sarah dohot Debata. Jotjot do di ngolu on longang rohanta marnida sada peristiwa na dipaloas Debata, Nang pe taida peristiwa i mambahen ganggu rohanta. Alai laos taida ma tontong parmahanion ni Debata di ngolu ni jolma i, tung naso tadinghonon ni Debata do sahalak jolma na tinompa nai manaon hamaolan i.
2. Unduk tu pamarentaon ni Debata.
Mura do si Abraham pabalihon si Hagar dohot si Ismael? Ndang mura. Didok di Bibel, muruk do si Abraham mangida parange ni si Sarah. Alai laos taida ma. Di na ditonahon Debata tu si Abraham mangulahon i, diulahon si Abraham do songon na tinonahon ni Debata tu ibana. Tontu mansai maol do i diulahon si Abraham, ala holong do rohana tong tu si Ismael anakna i. Alai ingkon lobi sian lomo ni rohanta do pangoloion i tu Debata. Antong songon dia do hita boi mangoloi Debata lobi sian na dihalomohon rohanta? Boi do i ta oloi molo tasadari manang aha pe na dihalomohon Debata, i do na sintong jala na dumenggan dingolunta.
3. Ndang hea ditadinghon Debata angka jolma na olo mangihuthon lomo ni roha ni Debata.
Dioloi si Hagar dohot si Ismael do Debata marhite na borhat sian bagas ni si Abraham ala naung dipaabali nasida. Naung ditadingkon Debata do nasida? Ndang. Dihaholongi Debata do nasida ala si Ismael pe pinompar ni si Abraham do. Dilehon ma tu si Hagar dohot tu si Ismael sagusagu dohot aek satabutabu. Gabe lungun situtu ma roha ni si Hagar, dibahen ma anakna si Ismael tu ramba jala laho ma ibana sian i. Alai didok si Hagar, ndang tartaon ibana be mate anakna i. Dibege Debata do anggukangguk ni si Ismael jala marjanji do Debata sahali nari tu si Hagar na gabe bangso na bolon do si Ismael. Masa ma sada tanda halongangan. Dibungka Debata ma mata ni si Hagar jala diida ibana ma sada sumur di lambungna. Debata do na paradehon i. Ima sada rumang ni panarihonon ni Debata na denggan laho manguduti ngolu ni si Hagar dohot si Ismael. Nang pe ndang anak bagabaga si Ismael, alai tong do dipasupasu Debata si Ismael. Dung i lam magodang ma si Ismael gabe bangso na bolon. Pangoloion tu Debata ima sikap na menghormati Debata. Ndang hea dipasombu Debata angka na satia mangulahon manang aha pe lomo ni roha ni Debata di ngoluna. Unang mardua roha tingki mangulahon lomo ni roha ni Debata. Molo mardalan hita dibagasan lomo ni rohaNa, laos disi ma mangula pandonganion dohot pangurupion ni Debata.
Posting Komentar