Jamita Minggu 28 Juni 2026 Minggu Paopathon Dung Trinitatis tarsurat di Pilemon 1 ayat 4 - 7. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Holong na Manghorhon Las ni Roha jala Patoguhon." Rap ma hita mangihuthon hatoranganna.
Pendahuluan
Tung so sonang do roha, molo adong dongan nilehon haposan hape gabe manegai ugasan niba. Tung so boi pe nian gabe haposan, unang apala gabe manegai pardonganon. Di angka halak si songon on ma roha na so manghamauliatehon pambahenan na denggan sian dongan. Gabe sanga hurang denggan parsaoran ni si Pilemon songon sada tuan na mora nampuna ugasan mangalehon haposan tu sahalak naposona si Onesimus.
Surat ni Apostel Paulus tu si Pilemon do on songon sada surat na jempek di Padan na Imbaru, na mangalehon sada pangantusion na bagas taringot tu holong, kepedulian, halak na manghamauliatehon pambahenan ni donganna, rasa bertanggung jawab di ulaonna dohot hasesaan ni dosa.
Pembahasan
Mangargahon Pardonganon
Dipatorang do di turpuk on bagas ni huaso ni Barita na Uli na tuk paubahon pangalaho ni sasahalak songon si Pilemon songon sahalak na mora, nampuna angka naposo (budak) manang hamba, i ma si Onesimus. Sahalak sian naposona i do si Onesimus na barani mansuasaehon arta ni tuanna i jala ditangko gabe ditadinghon ulaonna jala laho tu Rom gabe pajumpang dohot si Paulus gabe di hurungan, maruntung dope si Onesimus jumpang ibana dohot parbaritanauli gabe ditangihon ibana haluaon i, gabe olo ibana marhamubaon ni roha. Sude parngoluonna muba jala dijangkon ibana Tuhan Jesus Kristus. Dijangkon ibana do si Paulus marhobas paubahon rohana. Sian barita i ma ditongos si Paulus suratna ala dung ditangihon ibana saluhut proses ni masalah i gabe olo parsidohot si Onesimus marhobas tu Tuhan marhite na manongos surat on tu si Pilemon asa dijangkon mulak si Onesimus jala na so jadi uhumonna. Ndada mansohot disi, naeng ma nian jangkononna naposona i gabe sada songon anggina di bagasan Kristus.
Taringot tu si Onesimus i ma naposo ni si Pilemon, tangkas do i dipatorang di pardalanan ni harajaon Rom. Tung torop do nasida na gabe naposo ni tuanna i. Didok pola do satonga pangisi ni huta Rom hatiha i gabe budak. Molo dihatai naposo manang budak dietong do on songon barang na boi gadison jala tuhoron. Toropan do nasida gabe parkarejo kasar (buruh) di tuanna be. Angka na bisuk boi ma dipangke gabe parkarejo tu kalas na lobi timbo. Alai molo naposo na tardok tuk nampuna keterampilan khusus, tung diargahon tuanna i do nasida asa tuk marhobas marhite ragam ni keahlianna be, isarana gabe pangubati, silehon angka poda dohot pandapot, guru dohot lan na asing di tongatonga ni keluarga i. Lumobi ma molo songon na marjasa do naposo i jala satia gabe dilehon tuanna i do sada huaso tu naposona sada haposan manang haluaon. Didok ma i gabe aleale na boi mulaulaon di bagas ni tuanna, songon sada penghargaan. Nang pe sahalak siupaon naposo i boi ma ibana mulaulaon mambahen ture jala sangap tuanna i.
Di sisi na asing angka naposo ndang dilehon hak asasi tu nasida, isarana laho marhasohotan, bahkan ndang boi nasida nampuna arta pribadi, kecuali pigapiga halak sian naung dilehon haposan i (dikhususkan). Molo tardapot mangulahon na sala, tuan i pe marhagogoon do patupahon uhuman sahat tu uhum hamatean. Na so jadi adong pembelaan tu nasida molo tung mandabu uhum tuanna i. Taringot tu uhum on hot do anggo haporseaon ni Apostel Paulus na so jadi sesaon taringot tu uhum perbudakan i lumobi taringot tu status sosial naung tinontuhon. Na umpenting di rohana hak do uhum i di si Pilemon ala memang naposona do si Onesimus. Alai ndang sae ro di si. Ala olo do si Onesimus gabe naposo ni Kristus isara manolsoli dosana jala diakui naposo na sala ibana di adopan ni tuanna gabe malua do ibana jala dapotan hasesaan ni dosa, diparar tuanna i do ibana tutu gabe haposan. Na umbalga muse ndada holan naposo ni si Pilemon alai dipabalga gabe naposo ni Kristus na patutoru diri marbarita na uli mamboan haluaon dung dipasesahon hadosaonna.
Mandok Mauliate jala Manangianghon Dongan
Hinorhon ni sejarah na mansai balga i gabe dipataridahon Apostel Paulus do mauliate ni rohana tu Debata, marningot angka parbue ni tangiangna i tung sintong mangula. Di jolona dihatindanghon si Pilemon do holong dohot haporseaonna di Huria Kolosse. Anggiat nian lam tarida parbue ni haporseaon na songon i nang di luat i, ai Kristus do hangoluonna gabe mardalan parbaritanaulion dohot denggan jala marimpola. Hinorhon parulaon ni si Pilemon gabe manghorhon haluaon dohot las ni roha do i di angka horong na badia manghorhon hasonangan tu humaliang di angka na mangulahon parbaritaon na uli. Nunga tung maol situtu jumpang di pudian ni ari on songon las ni roha ni Apostel Paulus on, na so pola mamingkirhon ketenaran ni goarna. Alai parbue ni holong dohot haporseaonna i na ringkot dipatuduhon ibana na sian Debata ai siat tangiangna, marhamubaon angka donganna gabe parholong ni roha na tutu, tuk patuduhon kepedulian, tuk menjembatani donganna tu las ni roha nang pe di situasi hajolmaon mengalami harugian, na so tarjalo roha ala posisi na terzolomi posisi pesakitan manang dikorbankan ibana alai tuk do ibana manesa dosa ni musuna huhut patuduhon dalan haluaon. Dang rodi si, na umbalga manjangkon angka pardosa manang parsala na bagas situtu gabe alealena (saudara) di bagasan Kristus. Nang pe pararta na godang si Pilemon nda tung dipatuduhon ibana ketenaran ni hajolmaonna, nang pe di deba halak tung mansai ringkot do i bahkan sangat menentukan masa depan ni ngoluna. Jala ndang sala halak na mangalului ketenaran, apalagi molo ala ni goar ni Debata. Jadi ndang haluluan hita be songon karakter ni si Pilemon on nuaeng. Boi ibana mangulahon ulaonna tepat gabe parbarita na uli jala haluaon ni torop jolma. Tung so ditonjolhon ibana huaso nang artana.
Songon i nang partangiangon. Naung gabe kebutuhan ni saluhut halak do manghangoluhon ngolu partangiangon. Diajari Apostel Paulus do bahkan ro di tangiang pribadi manangianghon donganna. Nang pe rupani sai solot dope angka ragam ni sitaonon, ringkot situtu do na martangiang jala dihangoluhon, ala i do sada dalan manghaholongi dongan, lumobi angka dongan saulaon "Manongtong ma hamu martangiang; dungo ma hamu disi, huhut mandok mauliate!" (Kolosse 4:2). Boi ma tapatudos songon tanggung jawab ni halak Kristen na manangianghon dongan, Jesus pe ditangianghon do donganNa, "Alai Ahu do manangianghon ho, unang mintop haporseaonmi. Jala dung mulak sogot roham, pargogoi ma roha ni angka haha anggim" (Lukas 22:32). Ditangianghon Jesus do si Simon, ala sanga ambal haporseaonna. Ditangianghon Jesus do asa lam sada angka na porsea i: "Ndang na sian portibi on nasida, songon Ahu na so sian portibi on. Parbadiai ma nasida di bagasan hasintongan; hataMi do hasintongan i" (Johannes 17:17), dohot na asing dope mangondihon haluaon ni angka na porsea. Tujuan utama manangianghon dongan asa margogo nasida jala bertahan, saling peduli, tangiang do gogo dalan masiurupan rap dohot angka na porsea di punguan, lumobi di huria.
Taringot tu Hasangapon
Ragam do silehonlehon ni Debata, molo tung pe gabe parhuaso manang naposo dos do i di adopan ni Debata. Molo tung pe rarat artana, unang ma i gabe dalan gabe ndang mangargahon haluaon ni donganna. Nda tung saluhut halak tarjou gabe parhuaso, nda tung saluhut pintor boi balga jala parbarita songon Apostel Paulus, songon i nang angka parbarita na uli na asing. Alai songon sada pamatang ni Kristus hita tarjou, songon sada uluan na so jadi ma ibana mangasanghon si nadonganna manang ala ni huasona. Suang songon i nang baliksa, ala dilehon tuanna huaso manang haposan gabe marsilomolomo, sala do i. Naeng gok ma roha na bertanggungung jawab di parbue ni ulaonna manghorhon parbue na tonggi naposo i tu tuanna. Jala tuanna i pe antong tarida ma holong ni rohana mangalehon haluaon na manghorhon las ni roha. Tontu marasing do hita, ingkon adong do na gabe uluan, laos adong na gabe ruas. Tarida sian pangalaho ni si Pilemon on marhite pangondianon ni apostel i, ndang apala dipatuduhon ibana habonggalonna ala dirajumi ibana do ise dirina di adopan ni Debata. Ndang porlu ibana jolo gabe halak na bonggal asa tuk pasangaphon goar ni Debata. Ndang ala sai ingkon jolo bonggal ibana asa pasangap goar ni Debata, alai naeng ma marhite ias ni roha, mengampuni jala mangondihon mulak angka na madabu, palua angka na mabugang di humaliangna.
Holong na Ias, Kepedulian, Masisesaan Dosa
Parjumpangan ni si Paulus dohot si Onesimus di hurungan Rom mangihut tu partinandaan nasida na rosu, si Onosesimus marhite haoloonna manjangkon Kristus songon i nang tu si Pilemon. Ndada marhite parenta alai tung dipataridahon nasida do i marhite holong na ias na sian Kristus, marpangidoan apostel i, tarida di ayat na mangihut didok: "On pe, godang do nian hiras ni rohangku di bagasan Kristus, mangarodihon na tama tu ho. Alai ala ni holong ni roha i, tagonan ma ahu mangelekelek. Nunga songon i ahu, Paulus, naung matua, jala tarihot nuaeng ala ni Kristus Jesus" (ayat 8-9). Nang pe adong dope otoritas ni apostel i, gabe dipillit ibana do pendekatan kepedulian dohot holong na ias na sian Kristus padomuhon roha nasida na tolu songon gombaran ni huria i. Asa songon gombaran do on tu hita unang pintor sai patujolohon otoritas manang huasonta. Gabe hasesega do molo sai ala marhuaso gabe sai mamarenta, hape ulaonna si ganup ari pe so bolas. Manghorhon sogo ni roha do tu dongan na sai mamarenta nang pe adong huasona, alai molo so ture do nang pangalahona, si sogo do i, jala hira hurang marparbue do na niulana. Boi ma idaonta angka pangalaho si songon on molo parjolo hita di holong dohot kepedulian, sejahtera ma ruas ni huria i, ala ukuranna, tarajumi hahuranganta, ai so adong jolma na singkop ia so ala ni Kristus.
Adong muse ma on, ingkon diantusi, didok "ahu dope uluanna." Di angka si songon i, muba ma. Adong do pigapiga pangantusion ni holong dohot kepedulian on. Sada sian terjemajahan on i ma "andul ni roha" arti harfiahna "rasa di dalam hati." Asing ni i "holong ni roha" yang berarti "kasih sayang" atau "cinta" na mencerminkan kepedulian. Didok ma on "roha na mangantusi" manang "memahami" atau "peduli" perasaan ni donganna. Isarana "Andul ni rohangku ma tu ho": (Aku merasakan kepedulian kepadamu). "Holong ni roha dohot pangurupion": (Kasih sayang dan pertolongan adalah bentuk kepedulian).
"Mangantusi do ahu tu pangalahom": (Aku memahami kepedulianmu terhadap tingkah lakuku). "Urupi ma ibana, mangantusi do ahu": (Tolong dia, aku peduli). Jadi sian pandohan on, ndada sebatas perasaan, alai ingkon mangihut do tindakan nyata na mangapuli huhut mangargahon dongan. I do umbahen na sai dipatupa halak Batak tradisina "mangapuli" i ma tradisi menghibur jala mangurupi dongan. Di konteks kepedulian boi do on diterjemahon berhubungan dohot habot ni roha, manang pangalaho na mambahen habot ni roha, i ma perhatian na tung bagas. Tung so mungkin do adong perhatian na tung bagas molo so jolo adong rasa manang so jolo tangkas partinandaan. Dung adong roha na masianjuan i ma pandohan na menekankan rasa empati manang saling mendukung molo masa angka hamaolon. Di kepedulian i tarida ma muse pandohan na patoluhon, i ma ‘ngolu masihobasan’, na menekankan tindakan nyata, ndang holan hata laho mangurupi. Tindakan kepedulian na umbalga i ma tangiang masitangiangan dalam bentuk perilaku, tontu sahali mampanghorhon ma i asa sejahtera parngoluon ni dongan i.
Di hubunganta ganup ari nunga ringkot taukur holong dohot kepedulianta na mardongan. Holan hata dope manang holan di pangantusion? Aha do lapatan ni holong dohot kepedulian di pardonganonta si ganup ari? Molo marsala dongan, torop dope hita na pintor putus hubungan. Taingot jo pandohan ni apostel Paulus, "atik i alana, umbahen na sirang ibana sangombas sian ho, asa gabe salelengna ibana di ho! Ndada be naposom ibana, tung lobi sian naposo, songon dongan na hinaholongan; lumobi di ahu, lam beha ma di ho: Mangihuthon ruhut tano on, tole di bagasan Tuhan i. Asa molo dietong ho ahu donganmu, jangkon ma ibana songon ahu" (Pilemon 1:15-16). Olat ni dia ma parbue ni haporseaon i molo ingkon jolo burju donganta manang jolo jujuanta mulaulaonta asa taurupi nasida? Di dia do hapeakan ni na masianjuan jala masisesaan dosa di ngolunta? Jangkon ma ibana, ai nunga dohot naposo ni Kristus ibana, ai nunga olo ibana mangido hasesaan ni dosa jala dipangido asa dijangkon mulak. Olo tutu, toropan dope halak na manghilala so marsala nang pe naung bidang lombang manirang ibana dohot donganna i ala ni pangalahona. Nunga pola adong songon istilah melukai jala dilukai hape laos so martomu dope rohanasida. Antar songon dia ma hajolmaon ni i molo so ojak dope haporseanna na masisesaan dosa na mansai ringkot (patudos Mateus 18:21-35).
Padame Roha dohot Patalu Diri
Ditambai si Paulus do muse di turpuk on sada penegasan hajolmaon na imbaru tujuan ni poda i i ma padame roha dohot patalu diri, na so tarsirang tu turpuk jamita on "Asa molo dietong ho ahu donganmu, jangkon ma ibana songon ahu. Alai molo tung adong salana manang utangna di ho, tu ahu ma i rajumi" (Pilemon 1:17-18). Tung dipatuduhon apostel i do holonng ni roha dohot kepedulian na so ruar sian pandohan sambing. Anggiat nian si Pilemon dohot si Onesimus gabr mardame. Bahkan ringgit pardamean dohot harugian ni si Pilemon i pe unang be dietong i utang asa unang sai adong be na mangambati rohanasida.
Songon halak Kristen hita songon dia do hita tuk padame roha dohot patutoru diri? Molo tung adong masa angka konflik, na intor putus do hubungan, na boi do rujuk manang mardame? Aha do sibingkasi umbahen maol mardame?
HOLONG NA IAS na di bagasan rohami... ido rupani dipatujolo. Taingot molo hooong dohot manghaholongi nunga gabe atribut na paling utama jala na umbalga i rupani di ngolunta songon siihuthon Kristus hita. Ingkon sipatuduhononton do i. Sotung lupa, unang lari sian ulaon holong i, alana i do esensi na mangolu hita di bagasan Kristus, ima mangalahon tiruan taringon tu na manesa dosa ni dongan.
Pataridahon holong dohot kepedulian marhite tindakan nyata, tanpa menuntut asa sai ingkon dongan jumolo mangulahon tu diri niba menang ulaon na maol situtu do i. Alai ingot, Tuhan Jesus sandiri pe nunga dipadomu hita dohot Ama gabe songon sada bentuk kekeluargaan songon siihuthon Kristus na menyoroti pentingnya holong na ias dohot kepedulian on. Asing ni i denggan ma antong tadok mauliate tu donganta. Soal otik manang blga pambahenna dang i mambaen hita asa gabe sidok mauliate. Ingkon tarida ma antong ngolu na bertanggungjawab song sda halak naung pinalua jala naung disesa dosana. Holan halak na mampu mandok mauliate do jolma na tuk marlas ni roha, sebalikna tung so tarbaen do las roha molo so tuk manghamauliatehon najinalona. Mandok mauliate ima bentuk rasa syukur ala haluaon naung tajalo sian Debata songon pembuktian ni holong dohot asi ni roha ni Debata marhite Jesus Kristus. Molo pe jotjot hita songon na so puas disilehon lehon ni Debata, asa ingkon bonggal, jolo pimpinan au, manang ingkon sai songon na dirohangkon pasauton ni Debata. Penting siingotonta, Tuhan i nang sangkapna i dang gombaranmu ibana, alai hita do gombaran ni Debata. Hita do naringkot patauhon diri tu Debata. Alani i hamauliatehonma hajonohonmu tu Debata, asa martua Ho dohot donganmi. Amen.
Posting Komentar