Jamita Minggu 5 Juli 2026 - Sakaria 8 ayat 20-23 - Timothy Saragi

Jamita Minggu 5 Juli 2026 Minggu Palimahon Dung Trinitatis tarsurat di Sakaria 8 ayat 20 - 23. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Haluaon tu Angka Bangso." Rap ma hita mangihuthon hatoranganna. 

Pendahuluan 

Dapotan haluaon do tahe angka bangso na leban i? Manang holan tu bangso Israel dohot tu angka bangso na targoar Kristen do haluaon i? Alai andorang tapamanat, taingot ma hata ni Tuhan di Johannes 3:16, mandok: "Ai songon on do holong ni roha ni Debata di portibi on, pola do AnakNa na sasada i dilehon, asa unang mago ganup na porsea di Ibana, asa hangoluan na salelenglelengna di ibana." Nang tu si Abraham didok Jahowa do: "Sai na gabe bangso na balga jala na sangap do si Abraham sogot, jala dapotan pasupasu marhitehite ibana nasa bangso di tano on" (1 Musa 18:18). Marhite angka ayat i, patar do holong ni roha ni Debata di sandok portibi on, ai Debata Sebaot (alam semesta) do Ibana. Jala di Lukas 2:10-11 didok, hatutubu ni Jesus Kristus, barita halalas ni roha godang do i jala parsaulian ni sandok bangso ai haluaon ni saluhut jolma do i. 

Nian andorang dipapatar haluaon i tu angka bangso, jumolo do dipapatar haluaon i tu bangsoNa Israel ai nunga mulak marpamuati roha ni Tuhan i tu bangso na pinillitNa i. Di ayat 1-19, nunga dihatahon panurirang Sakaria hata ni Jahowa taringot haluaon ni Israel marhite hamumulak ni bangso Israel tu Jerusalem (ida Sakaria 8:7-8). 

Panurirang Sakaria anak ni si Berekia, tubu ni si Ido do manurat i (1:1,7 & 7:1) marhira taon  520-518 SM uju harajaon ni Darius I (Darius Agung). Dung mulak sian Babel taon 538 SM uju raja Koresh. Jala dung ro hata ni Jahowa tu panurirang Sakaria aktif do ibana manghehei roha ni halak Israel asa paulihon bagas joro dohot asa muba rohanasida, mulak marroha pangoloi tu Debata. Jala manurirangi ibana taringot tu haimbaruon (pemulihan) ni Jerusalem, haroro ni Mesias, panguhuman (penghakiman) nang haluaon tu angka bangso. 

Antong boha, dohot do angka bangso na leban, angka bangso na bolon, angka bangso parbegu hian dapotan di haluaon nang pasupasu sian Jahowa? I ma sipamanatonta marhite jamita di Sakaria 8:20-23 on. 

Advertisement - Scroll untuk terus membaca postingan.

Pembahasan 

Dapotan Haluaon do na Ro Marsomba tu Jahowa (ayat 20) 

"Songon on do Hata ni Jahowa Sebaot: Ro dope anggo sogot angka bangso dohot pangisi ni angka huta bolon." 

Taingot dope tahe ende di hatiha dakdanak mandok: "Ise na dohot ro ma tuson?" Somalna diendehon i molo adong sipanganon na boi bagion dope. Hira songon i do nang di ayat 20 on, manang ise pe na ro tu Jahowa marsomba jala mangido hangoluan, dapotan haluaon dohot hangoluan do. Jadi na porlu botoonta, adong pergerakan ro (datang) tu Jahowa. Ndang boi holan marsangkap manang ingin naeng ro, hape ndang saut ro, manang sundat ro, manang ro do nian alai olat ni satonga dalan. Ingkon ro do jala sahat tu adopan ni Jahowa. Molo tajaha umpama ni Jesus taringot anak na lilu, mulak ibana sian hadosaonna jala ro sahat tu amana na burju i (ida Lukas 15:11-32). Songon i do nang angka bangso, nang hita molo ro marsomba tu Tuhan i. 

Mangihuthon ayat 20 on, na ro tu Jahowa ndada holan sahalak manang sakeluarga sajo, alai sian angka bangso jala torop huta na bolon (banyak kota). Ndang apala didok goar ni angka bangso i manang huta dia, alai didok: Angka bangso dohot huta na bolon, na gogo, na marhuaso ro mangalului jala marsomba tu Jahowa Sebaot. 

Jamita on pabotohon, ia haluaon i dipatupa Jahowa tu Israel, alai marudut ma dohot tu angka bangso na asing, huta angka na bolon na olo ro marsomba tu Jahowa Debata. Nian angka parbegu na so porsea hian do nasida, alai nuaeng nunga tubu tu rohana ro marsomba tu Tuhan i. Songon i nang di angka ari sogot, ro dope angka na lilu mandapothon Debata laho marsomba dohot mangido haluaonna. 

Masibetabetaan tu Haluaon (ayat 21-22) 

Tung ulaon na uli do masibetabetaan tarlumobi ma tu ulaon na denggan, lumobi ma laho marsomba tu adopan ni Jahowa Sebaot (ayat 21). Sian saluhut bangso, houm, parhataan do muse marsibetabetaan ro marsomba tu Ibana. Pangisi ni huta na sada hehe sian hutana manopot huta na sada, dohot tu huta na sada nari, huta na jonok nang na dao mambetabeta mandok: "Beta hita rap marsomba tu bohi ni Jahowa, jala mangalului Jahowa Sebaot. Ahu pe naeng dohot do laho tusi." Pergerakan halongangan do on, ai marsibetabetaan jolma na so mananda Jahowa hian ndada laho mangulahon hajahaton songon hasomalan na sai laon, manang naeng manomba debata sileban, manang holan mansari. Alai dibetabeta donganna asa marsomba tu Jahowa. Tarsodar angka bangso na bolon, manomba Jahowa. Hea do masa songon on di barita ni buku Jona. Muba nang rajana dohot houmna, gabe marpuaso nasida jala manolsoli di adopan ni Jahowa, laos marasi ni roha Tuhan i, asa ndang be lalu rimasNa. 

Sungkunsungkun tu hita ruas naung mananda Jahowa: Taulahon dope nuaeng na masibetabetaan laho marsomba tu Jahowa? Atik tung so mardomu do hita dohot hombar jabunta, sisolhotta, keluarganta, gabe bangkol rohanta mambetabetai ibana asa rap marsomba tu Jahowa di bagas joro i, manang marminggu? Tasodar ma i, halak parbegu hian gabe laho rohana marsibetabetaan marsomba tu Jahowa, lam ma hita nian. Jala molo tapamasa di tingki on nuaeng masibetabetaan, lam bolon jala lam torop do angka na porsea na taruli di haluaon sian Tuhan. Antong unang be masa di hita na masibetabetaan tu angka ulaon na roa, mangulahon na so uhum, angka na so denggan di keluarga, masyarakat, tarlumobi di huria, alai masibetabetaan ma tu na denggan.

Tatiru ma Jesus na mandok, "Ihuthon hamu ma Ahu, bahenonHu do hamu gabe sijala jolma” (Mateus 4:19). Dibetabeta Jesus i do hita mangihuthon Ibana, jala asa hita dohot mambetabeta, gabe sijala jolma asa taruli di haluaon. Di ayat 23, ro ma angka bangso na bolon jala na marhuaso mangalului Jahowa tu Jerusalem. Ala ni aha? Ai nunga dipaimbaru Jahowa roha ni bangso Israel, pangisi ni huta Jerusalem, jala diida angka bangso na leban do i angka pasupasu na masa tu bangso Israel. Ala ni i do gabe ro tu roha ni angka jolma bangso na bolon naeng dohot manghilalahon pasupasu na pineop ni halak Israel pangisi ni Jerusalem i. Jala ala ni i do rongom angka bangso i masibetaan tu Jerusalem, Israel jala marsomba tu Jahowa (dan melunakkan hati Tuhan). 

Malua do Angka na Sauduran dohot jolma nidonganan ni Jahowa (ayat 23) 

Tarbege do barita ni Jahudi sahat ro di huta ni angka bangso na leban, na sai tongtong didongani Jahowa, sai marlaba (maruntung) jala sai dipasupasu Tuhan i bangso Israel (Jahudi). Gabe ro ma tu roha ni angka bangso parbegu, angka houm nang parhataan (berbagai-bagai bangsa dan bahasa) asa naeng sauduran nian nasida dohot Jahudi. Ro do nasida ganup, godangna sampulu halak) jala marsigantung tu suhisuhi ni ulos ni sada halak Jahudi huhut mandok: "Rap hita sauduran, ai nunga hubege hami: Debata do donganmuna." Pola didok, marsigantung nasida tu suhisuhi ni ulos ni Halak Jahudi jala momos ditiop asa tarjalo ni sada Halak Jahudi i nasida jala unang dipaduru sian adopanNa. 

Ise do na nidok ni Panurirang Sakaria taringot tu ‘sada Halak Jahudi i?’ Jesus do nidokna disi,  ai halak Jahudi do Jesus sian marga Juda, jala torop do halak maniop rambu manang suhisuhi ni ulosNa. 

Jala peran ni bangso Israel/ Jahudi naung manjalo pasupasu sian Jahowa, gabe parhitean (saluran) ni pasupasu ma nasida tu angka bangso na leban asa ro mandapothon Tuhan i. Laos songon i do peran ni angka jolma sitanda Jesus jala na manghaporseai Ibana, asa gabe pabotohon dirina naung manjalo pasupasu sian Tuhan i, jala laho marbarita na uli tu sandok portibi on songon parsuruon ni Jesus tu angka siseanNa (patudos Mateus 28:19, Ulaon ni Apostel 1:8) gabe laos marpangidoan dohot angka bangso na so mananda Jesus hian, mandok; "Rap ma hita sauduran, ai nunga hubege hami: Debata do donganmuna." 

Advertisement - Scroll untuk terus membaca postingan.

Kesimpulan dan Refleksi 

1. Boha do di tingkinta si nuaeng on? Ra torop dope jolma mandao manuntun lomona, ndang lomo rohana ro tu Tuhan i. Alai sai adong do tingki sogot, ro ma torop bangso dohot sian angka huta na bolon marsomba tu Jahowa. Antong binsan sadihari dope di ngolunta on, manang ise pe hita, sian bangso dia pe tahe, tung jolma pardosa pe hita, molo ro hita marsomba tu Jahowa, janghononNa do hita jala dapotan haluaon. Ai nunga pola ro Tuhan Jesus, antong ro ma hita di bagasan unduk ni roha tu Ibana, ro mandapothon parpunguan Minggu manangihon hataNa, ro mangido pasupasu, ro marsinggang mangido hasesaan ni dosa. Nang Jesus pe didok do; "Ro ma hamu tu Ahu, … asa Hupasonang hamu” (Mateus 11:28). 
2. Masibetaan ma hita, keluarganta, donganta tu angka ulaon na denggan i, ulaon mamuji dohot na pasangap Tuhan i, asa tarpasupasu hita saluhutna. Unang be adong di hita angka Huria tarlumobi naung tobang, masibetaan tu angka na ramun, na jahat, na maralo tu lomo ni roha ni Tuhanta. 
3. Martua ma na sauduran dohot angka partigor, angka na nidonganan ni Jahowa, na so manimbil sian dalan ni Tuhanta. Martua ma jolma na so olo mangihuthon tahi ni parjahat. Antong sauduran ma hita dohot angka jolma na marsomba tu Jahowa marhite Jesus Kristus. Amen. 

Catatan: 

Semua iklan yang terdapat pada website dan tulisan ini tidak ada hubungannya dengan timothysaragi.com. 

Dapatkan update artikel terbaru dari timothysaragi.com. Mari bergabung di Channel WhatsApp atau "timothysaragi.com Artikel Update", caranya klik link https://whatsapp.com/channel/0029VapB7ASBVJlBihjSSW2q, kemudian join. Atau di Channel Telegram, caranya klik link https://t.me/timothysaragicomupdate, kemudian join. Anda harus install aplikasi Telegram terlebih dulu di ponsel.