Jamita Partangiangan Epistel Minggu 12 Juli 2026 Minggu 6 Dung Trinitatis tarsurat di buku 5 Musa 15 ayat 6 - 11. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Rap Mangurupi." Rap ma hita mangihuthon hatoranganna.
Pendahuluan
Di taon na salpu tongon di ujung ni Agustus sahat tu bona ni September 2025, masa do demonstrasi dipigapiga luat manang kota di Indonesia, lumobi ma di Jakarta. Demonstrasi i menolak kenaikan tunjangan anggota DPR-RI dohot menuntut UU perampasan aset. Marjogetjoget do pigapiga halak sian anggota DPRRI mangkalashon kenaikan tunjangan i. Marnida i muruk do masyarakat, diroha ni masyarakat hurang sensitif angka pejabat nang wakil rakyat tu keadaan ni rakyat na gale perekonomianna jala torop dope na di bawah garis kemiskinan. Gabe masa ma demonstrasi na memakan korban jiwa, anarkis sahat tu na menjarah bagas ni pigapiga anggota DPRRI. Sian na masa i boi ma dohonon nunga hurang situtu kepekaan manang empati di ngolu ni pejabat nang angka paradongan maradophon masyarakat na pogos jala na di bagasan hasusaan. Ketidakperdulian i mambaen terjadi kesenjangan antara ni na mora dohot na pogos. Lam marpogos ma angka na pogos alai lam mamora do angka na mora. Aut sugari adong roha na marsiurupan dang masa kesenjangan i.
Di zaman na lam mago parasi ni rohaon/ roha mangurupi, ngolu na holan mamikkiri diri sandiri (individualis), ro Hata ni Debata mamarenta hita asa rade mambukka roha nang tangan mangurupi angka na pogos. Sahat tu tingki on adong do na pogos di tongatonganta, alani mansai ampit do Turpuk on paingothon hita asa tongtong taulahon torus kewajibanta, ima mangurupi angka na pogos, na so mardihadiha. Mangurupi angka na pogos dang marisuang, alai margunan situtu do i tu angka dongan na taurupi laho palumbangkon sitaonon nasida. Jala dang holan i, tu angka na olo mangurupi dibagasan las ni roha dapotan sombu ni partondion, jala usehonon ni Debata do pasupasuNa tu angka na olo mangurupi angka na pogos i.
Pembahasan
5 Musa 15: 6-11 on manaringoti jala paingothon bangsoNa asa tongtong mangulahon ulaon parasi ni rohaon (bermurah hati) tu halak na patut siasiaan jala siurupan. Asa bukka roha nang tanganta mangurupi dongan na di bagasan hasusaan. Pangurupion i boi do marhite mangalehon marsali tarlumobi mangurupi secara cuma-cuma. Dang jadi papiron roha jala manutup tangan maradophon dongan na pogos. Mangasii angka dongan na pogos ro sian parenta ni Debata, alani ingkon siulahononta do i dipargoluonta siganup ari. Ingot ma, dang marisuang manang gabe rugi hita mangurupi angka na pogos. Manang ise na mangalehon pangurupion tu angka na pogos tau jaloonna do pasupasu sian Debata (ay.6). Asa dang marisuang haburjuon dohot haoloonta mangurupi angka na pogos. Diida Debata jala arga do i di adopanNa. Lobi sian na talehon tu angka na pogos i baloshonon ni Debata marlompit ganda tu hita.
Parenta mangurupi angka na pogos dipasahat Debata marhite si Musa tu bangso Israel. Parenta ni Debata on gabe pedoman ni halak Israel laho mangatur parngoluon ni Israel. Tontu, nangpe di mulana parenta on holan tu Israel alai sahat do tu hita, ai nunga gabe anak dohot boru ni Debata di bagasan Jesus Kristus. Di Turpuk on fokusna ima mangurupi angka na pogos dohot hinaringkot ni mangulaon ulaon parasi ni rohaon di parngoluon ni bangso i. Diajari do hita asa mangurupi na pogos tanpa mamereng latar belakang. Bangso parbegu i pe patut do urupan (ay.6), alai jumolo ma haha anggi na di bagasan hasusaan urupan. Diparentahon Debata do asa unang papirhon roha jala manutup tangan (holit) tu angka dongan na pogos. Pangalaho “Pir roha” patuduhon karakter na so parduli manang dang berempati tu donganna na susah. Sedangkan manutup tangan (holit) manggombarhon sifat na so olo marbagi sumber daya tu halak na patut siurupan.
Disosoi turpuk on asa adong di hita pangalaho na ungkap (sifat na terbuka) dohot haradeon laho mangurupi angka halak na hurang beruntung. Halak naung manjalo pasupasu ni Debata dipaingot do asa luhut gabe halak parasiroha manang bermurah hati, na olo secara sukarela painjamhon na adong laho palumbanghon hasusaan ni angka dongan na pogos. Roha na bukka jala rade mangurupi na pogos tanpa syarat ima na dihalomohon roha ni Debata sian bangsoNa. Alani sipahembangonta do ngolu na saling parduli tu angka dongan lumobi ma i tu angka dongan na sedang berjuang haruar sian hapogoson manang hasusaan. Sai tongtong do adong na pogos ditongatonganta sahat tu tingki on, hombar tu Hata ni Debata adong do tanggung jawab na berkelanjutan sian ruas ni Tuhan i laho mangurupi jala mangangkat nasida sian hapogoson. Ingkon ringgas do hita mambukka tangan dohot pasali hambar tu hahurangan ni dongan (ida ay.8). Dipaingot do bangso Israel asa unang manontong paingotingot singirna. Diparentahon Debata do asa ditaon papituhon ingkon paluaon saluhut na marutang sangoni naung gabe hatoban. Molo pe nunga jonok taon papituhon dang gabe sundat mangalehon parsalian, ai dosa do i (ay.9).
Di Poda 19:17 didok: “Na pasali Jahowa do manang ise na mardenggan basa tu na pogos, jala Ibana mamaloshon dengggan basaNa i tu ibana. Di Mateus 25:35-40, Jesus sandiri manaringoti hinaringkot ni mangurupi na male, mauas dohot na marsaimara. Hata ni Jesus di Mateus 25:35-40 mangondolhon melayani angka na metmet i dos do i na melayani Ibana. Jakobus 2:15-17 paingothon hinaringkot ni pasadahon haporseaon dohot pambahenan, khususna di bagasan konteks mangurupi angka na ringkot siurupan. Angka ayai i menyoroti peran integral asi ni roha (kemurahan hati) di bagasan haporseaon ni halak Kristen. Sian angka ayat-ayat i dipaingot do asa buas mangurupi angka na pogos. Jala mangurupi di bagasan las ni roha. Mangkorhon uli do tu hita molo buas mangurupi na susa. Pasupasuon ni Debata ma angka na taula dohot saluhut angka na jinama ni tangan (Ay.10). Prinsip-prinsip holong ni roha (kemurahan hati) dohot rasa tanggungjawab mangurupi angka na pogos tongtong ma i taulahon. Nangpe naung lam maju portibi on, alai isu hapogoson dohot ketimpangan sosial tetap dope gabe isu na sentral sitanggulangan ni pamarenta nang saluhutna hita angka na porsea. Marhite na olo hita mambukka roha nang tanganta berkontribusi nyata mambangun masyarakat na adil sejahtera. Mambukka roha nang tangan di bagasan las ni roha dang holan paubahon parngoluon ni halak na manjalo, alai sekaligus do mangalehon las ni roha dohot sombu ni partondion tu na mangalehon.
Kesimpulan dan Refleksi
Ringkot do hita mengevaluasi sikap dohot pambahenanta na saleleng on tu angka dongan na pogos/na patut siurupan. Alana nunga mansai individualis sifat ni jolma nuaeng, nunga ngali holong, nunga lam mago rasa empati tu dongan na susa. Molo tapamanat, adong do naung gok hepeng nang artana alai dang olo mangurupi tondongna, tetanggana angka na pogos. Baliksa menindas angka na pogos i do diula. Adong muse do pejabat na pulut rohana manangko (korupsi) na aturan sipangkeon na ringkot mangurupi rakyat na di bagasan hapogoson, gabe diahut tu dirina. Godang muse do halak Kristen na sahat tu tingki on na paanakhon hepeng dohot bunga na patorbanghu. Painjamhon do nian, alai dang na dalan mangurupi, alai na mambuat pangomoan do. Adong muse do na sai merasa pogos, gabe alasanna dang olo mangurupi donganna na pogos alai tahe gabe bermental siurupan. Nuaeng dipaingot jala diparentahon Turpuk on do hita asa parduli jala olo mambukka roha nang tanganta tu angka halak na pogos/rentan. Alani, tabolongkon ma sian rohanta pangalaho na so parduli, roha na pir jala holit. Alai lam bukka ma rohanta nang tanganta marasi ni roha di ngolu siganup ari. Itaulahon ma hata ni Debata manghaholongi donganta jolma doshon dirinta. Mambukka tangan nang roha tu angka dongan na ringkot siurupan na pasahathon holong ni Kristus do i tu donganta.
Jotjot do hita tu halak na taurupi ala dang dibalos angka na tabahen i. Apalagi tu angka na maminjam hape ndang ra dipaulak. Unang pola sai murukmuruk hita molo adong singirta na so marna dipaulak. Molo bagas tarimangi di bagasan haporseaon, boi do dang sian na tapasali i jaloonta balosna manang gararna, alai sian Debata do marhite ragam ni pasupasu na tajalo sian ibana. Boi do i marhite angka gabe na niula songoni nang angka na jinama ni tangan. Molo parenta ni Debata ingkon bebashonon do i di taon papituhon. Alai hita sipata sahat tu pomparanna sai tapaido do asa digarar utang ni natorasna. Daripada sai mardosa mangido singir na so ra digarar, tumagon ma antong jaloonta pasupasu na godang sian Debata. Mansai bagas do pangkorhon ni na olo mangurupi dongan na pogos. Pangurupionta i palumbangkon sitaonon na dodok di dongan. Dang holan i, dohot do tu na mangalehon di bagasan las ni roha dapotan kepuasan batin, marlas ni roha jala manjalo pasupasu sian Debata. Ringgas jala buas ma mangurupi angka dongan na susa. Taingot ma mangulahon parasi ni rohaon na mangulahon parenta ni Debata do i. Ngolu na buas jala ringgas mangurupi i do na di halomohon Debata sian hita.
Pangurupionta i diida jala arga do i di Debata, alani usehonon ni Debata do pasupasuNa singkat ni na talehon mangurupi dongan. Amang/ inang nang saluhutna hita, gabe habaoran ni holong jala pasupasu ni Debata ma hita saluhutna marhite mangurupi angka donganta na pogos. Sian nasa roha holong (kemurahan hati) dohot las ni roha ma hita mangurupi donganta na di bagasan hasusaan i. Amen.
Posting Komentar