Jamita Partangiangan Epistel Minggu 14 Juni 2026 Minggu 2 Dung Trinitatis tarsurat di buku Habakuk 2 ayat 1 - 5. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Dipintori Holan Ala ni Haporseaon." Rap ma hita mangihuthon hatoranganna.
Pendahuluan
Buku Habakuk digurithon hirahira taon 612-589 SM abad 7 SM, di bagasan haholomon pardalanan ni ngolu ni bangso Juda andorang marporang dohot Babel. Marasing sian angka panurirang na somal, panurirang Habakuk martontang dohot Debata, disungkun panurirang i do Debata: Boasa ma dipasombu Debata masa na so tingkos? Boasa Babel, bangso na jat dipangke Debata laho manguhum hasintongan (bangso Juda). Di bagasan parungkilon i, ndang ditadinghon Debata panurirang Habakuk. Nangkok do panurirang i tu palaspalas ni partanobatoan (ayat 1), paimahon alus sian Debata di bagasan unduk dohot serep ni roha, hasintongan jala benget ni roha.
Dialusi Debata do sungkunsungkun i, i ma sada hata na gabe panindangion haporseaon na rumingkot, i ma: "Alai anggo halak partigor i, mangolu do binahen ni parsihohotna marhaporseaon." Ayat on ma na gabe ojahan ni Apostel Paulus di angka suratna (ida Galatia 2, Rom 1 dohot Heber 10). Ojahan "Dipintori Holan Ala ni Haporseaon" ndada pangajarion na imbaru di bagasan Padan na Imbaru alai urat hatoguonna nunga adong hian uju di tingki masa haporsukon di buku Habakuk. Pangajarion ni Habakuk di tongatonga ni portibi on, halak partigor ndang dipalua ala ni pangalahona, hagogoonna, pambahenanna, alai marhite haporseaon na marojahan togu tu hasatiaon ni Debata.
Pembahasan
Di atas Panatapanhu do Ahu Jongjong (ayat 1)
Dibahen panurirang Habakuk do dirina di na maimaima alus ni Debata. Pambahenan on patuduhon: haporseaonna mardalan dohot hatigoran, ndang ditabunihon habojokonna. Ulaon na paimahon, i ma ulaon ni haporseaon (patudos Psalmen 130:5; Markus 13:33; Jesaya 21:6). Haporseaon i paimahon alus ni Debata ndada alus sian diri sandiri jala haporseaon i martahan di tonga ni haandaron maradophon Debata. Songon Apostel Paulus di Galatia 2 na manulak angka na mangalului parpintoron marhite pambahenan ni dirina sandiri, panurirang Habakuk pe songon i do, ndang olo mangalului angka alus sian parbinotoan ni jolma. Lapatanna, holan Debata do dihaposi ibana di angka sungkunsungkunna i.
Surathon ma Pangungkapon i jala Uhirhon (ayat 2)
Debata marsuru panurirang i asa manurathon hata i di batu panuratan, asa tangkas idaon ni halak na mamolus jala ndang boi sesa. Lapatanna, hasintongan ni Debata ingkon tangkas do idaon. Debata patuduhon diriNa marhite hata na tarsurat di buku na badia. Adong do hata ni Debata na mandok "Martua ma angka na umbege hata ni Debata jala na umpeopsa." Di Johanes 1:1 didok muse, "Di mulana i nunga adong Hata i, jala saor tu Debata do Hata i, jala Debata do Hata i." Hata i ndada holan tu panurirang Habakuk, alai tu sude halak dohot pinompar na laho ro do muse haduan. Ndang na hohom Debata, alai adong do sangkapNa na dumenggan na naeng patupaonNa. Hasintongan dipintori haporseaon i disurathon tangkas di Galatia 2:16 marhite Apostel Paulus songon tona na marhahonaan tu sude, tu ganup huria.
Na Ro do Sogot Pangungkapon i (ayat 3)
Ayat on manghatindanghon taringot tu sangkap ni Debata sai na saut do, jala gira do pasautonNa hombar tu tingkina. Lapatanna, manghaporseai Debata na satia nang pe angka padanNa i songon na so pintor taida dope. Parngoluon ni halak partigor jongjong di atas ni hasatiaan maradophon Debata, ndada hamubaon ni na masa. Songon hata ni halak Batak na mandok: "Hatop adong na niaduna, leleng adong na pinaimana." Halak na satia di angka ulaon na metmet, sai dipasupasu Debata do i di angka ulaon na balga.
Halak Partigor i Mangolu do Binahen ni Parsihohotna Marhaporseaon (ayat 4)
On ma impola ni buku Habakuk jala impola ni Barita na Uli ala adong tolu hata na patar diondolhon di buku Habakuk on, lumobi ma di bindu na paduahon on, i ma:
Halak na teal
Halak na teal dison ima gombaran ni bangso Babel na mangolu di bagasan mangasangkon hagogoon, ginjang ni roha, dohot moralitas sandiri. Alai na porlu siingotonta na pasti ima, ingkon rasip do nasida bahenon ni Debata. Angka na serep roha do na hinalomohon ni Debata, songon raja Salomo.
Halak partigor
Halak partigor ndada na halak na sempurna pangalahona, alai na sai marsihohot tu Debata. Ibana “mangolu” (Ibrani: ḥāyāh- ndada holan martahan, alai manjalo parngoluon sian Debata. Boasa didok halak partigor ndada halak na sempurna, ala memang halak partigor mangkasogohon ginjang ni roha jala na holong di serep ni roha.
Marhite haporseaon
Haporseaon dison artina hasatiaon dohot mamelehon diri tu adopan ni Debata. Dos do songon pandohan ni Apostel Paulus: “Jolma na dipintori ndada sian uhum ni patik, alai marhite haporseaon na marsihohot tu hasatiaon ni Debata” (bdk. Gal. 2:16). Dipatandap ayat on tu hita “Ginjang ni roha mangarasiphon hita di ari sogot, alai haporseaon paluahon”. Di hasogohon Debata do halak na ginjang rohana.
Tongon tahe pangose-ose do ianggo anggur, jungkat do baoa i, parsihohotna marhaporseaon (ayat 5)
Ayat on manggombarhon bangso Babel na ginjang roha, nalahang/tamak, jala na so olo puas. Intina: sude angka parulaan ni bangso Babel ingkon mangadopi panguhuman na sian Debata. Holan haporseaon do na mangalehon ngolu, ginjang ni roha mangkorhon hasesega.
Kesimpulan dan Refleksi
1. Parpintoron alani haporseaon ima prinsip konsisten ni haluaon.
Na gabe benang merah di bindu 2:4 ima taringot tu rencana haluaon. Abraham dipintori marhite haporseaon ( 1 Mus. 15:6), parpintoran ala haporseaon ima inti ni barita na uli (Rom. 1:17), ngolu ni halak Kristen ima ngolu na marhaporseaon tu Kristus (Gal. 2:16, 20), haporseaon mambahen halak na porsea gabe togu (Heb. 10:38). Pangajarion ni panurirang Habakuk ndada sada pengecualian; alai prinsip harajaon ni Debata sian mulana sahat tu ujungna. Prinsip ngolu na halak na porsea ima mangasahon haporseaon laho mangula nasa ulaon na asa unang marisuang saluhut angka parulaanna (Pslm. 127:1).
2. Haporseaon ima ojahan di sude angka pardalanan ni ngolu.
Panurirang Habakuk mangolu di bagasan keadaan invasi/tekanan pangarajaion ni bangso na asing, alai na gabe sitiopon ima prinsip ni ngoluna: “Parsorion ndang manontuhon ngolu ni halak na porsea alai haporseaon na satia tu Debata do na manontuhon”. Mangasahon Debata di angka parsorion ni ngolu ima na patuduhon adong do Debata na sumarihon ibana.
3. Debata manuntut serep ni roha, ndada parpintorion/pembenaran ni dirinta.
Bangso Babel sai berusaha do patogaphon dirina nang pe bangso na gale do anggo sasintongna. Ginjang ni roha mambahen hamagoan tu angka na sai mangulahonsa. Sebalikna, sai dihalomohon Debata do angka jolma na serep rohana.
4. Haporseaon i ndang siahut lomo ni roha, alai paimahon di bagasan habengeton.
Songon panurirang Habakuk na tindang di atas partanobatoanna (ay.1) patuduhon tu hita ima haporseaon i paimahon, martahan, porsea tu Debata mangula di bagasan ngolunta nang pe so taida. On ma na gabe pondasi manang ojahan panghirimon na mangolu di hurianta.
5. Kristus ma hagogok ni alus ni Debata tu si Habakuk
Molo diida panurirang Habakuk do padan i sian na dao, hita pe mangida hagogokna. Kristus ima halak partigor jala sempurna. Kristus mangolu salelengna marhite haporseaon dohot hasatiaon tu Debata amangNa. Marhite Ibana dapot hita ngolu, ima ngolu na dipadanthon di bagasan Habakuk 2:4. Ingkon pos do rohanta di sude angka sungkun-sungkun, tangiang, panghirimon sai na alusan ni Debata do i di angka tingki halehetanna. Songon hata ni BE. No.279 “Pasahat ma sudena, na hinolsohon mi,,,lan pe di tahi jolma, rohaNa do na saut”
Panurirang Habakuk mangajarhon tu hita, di tingki portibi on nunga mulai lomos, halak partigor ndada marojahan di hagogoon, pangalaho, manang huaso alai marojahan tu Debata marhite haporseaon na satia. Panurirang Habakuk patandaphon jumpangan ni haporseaon i do hagogokna di bagasan Jesus Kristus na mamintori hita marhite parulaanNa ndada ala parulaanta. Alani, sintong do hata ni panurirang Habakuk na mandok “Halak partigor ingkon mangolu dibagasan haporseaonna”.
Posting Komentar