Jamita Partangiangan Epistel Minggu 19 Juli 2026 Minggu 7 Dung Trinitatis tarsurat di buku Johannes 10 ayat 11 - 16. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Ari Parolopolopon ni Bangso ni Jahowa." Rap ma hita mangihuthon hatoranganna.
Pendahuluan
Di na opat evangegelium i, tangkas do digombarhon taringot tu Jesus sahalak parmahan, ima parmahan nadenggan. Molo taida di angka gombaran/lukisa; sai digombarhon do Jesus sahalak baoa nauli rupana, ganjang obukna jala atur (rapi), nang pahean-Na pe bontar, ias jala marhillong huhut mangompa sada anak ni biru-biru nabontar jala ias situtu. Marnida i, gabe dao do moru gombaran/panandaon di sahalak parmahan. Ai dang targombar disi parngoluon ni sahalak parmahan na jotjot mangadopi hasusaan, mara, jala dang hea marpahean na atur ala jotjotan ingkon mandalani angka bustak – gabe dorsun idaon. Jotjotan modom di harangan i do parmahan rap dohot angka biru-biru i, martaon udan las niari dao sian hariburon. Ditingki i, molo didok parmahan; antusanna sahalak na jotjot mangadopi hapariron; parngoluon na borat jala jotjot mangadopi mara.
Di jolo ni turpuk jamita on, dipabotohon do taringot tu sahalak namapitung sian hatutubuna (9:1-34). Dipamalum Jesus do ibana, laos on sibonsiri parsualon tu halak Parise naso porsea tu halongangan na binahen ni Jesus jala huhut mangalului dalan laho pasidingkon jala pagasiphon Jesus. Di ujung ni namasa on; halak napinamalum i – marpanindangi taringot tu Jesus; gabe dipabali halak Parise sian luat i – tung andul marasing, sahalak namapitung hian taruli pasu-pasu dohot pangantusion partondion jala gabe marnida, hape angka uluan ni parugamoon ni halak Israel dang dapot marnida namasa i – on ma nanidok ni Jesus “mapitung angka namarnida” (9:35-41).
Pembahasan
Jesus Parmahan na denggan
Di tradisi ni halak Yahudi, marmahan ima sada ulaon na memiliki tanggungjawab nabalga (1 Musa 30:29, 31:38-39; 2 Musa. 2:19) huhut rade mangadopi hasusaan dohot mara humongkop napinarmahanna (1 Musa. 31:40, Luk. 15:15-16). Di manogot ni ari ditogu parmahan i do angka dorbiana tu jampalan, jala ditogu muse mulak tu handang di botarina. Ingkon luluan ni parmahan i do panjampalan dohot mual na tio bahen diangka pahan-pahanan i, jala ingkon ramotan do nasida sian ragam ni parmaraan ro di angka babiat panoro (1 Sam. 17:34-35, Joh. 10:12).
Didok Tuhan Jesus; “Parmahan na denggan do anggo Ahu”. Molo di Padan Narobi, hata Parmahan (Gorik “kalos”) jotjot gabe metafora manggombarhon Debata (1 Musa 48:15; 49:24; Psalm. 23:1; 28:9; 80:1; Jes. 40:11). Digoari Debata do angka uluan gabe parmahan di halak Israel (3 Musa 27:16-17; 2 Samuel 5:2; 7:7; 1 Tawarikh 11:2; 17:6; Jesaya 44:28). Laos hata “Parmahan” ido muse dibahen Jesus gabe tudosan-Na laho patoranghon hadirionNa.
Pinomat adong dua partanda ni parmahan nadenggan i: Parjolo. Naginoaran parmahan nadenggan; diseahon do hosana humongkop angka birubiruna (ay.11b - dengan sengaja menyerahkan nyawa-Nya dan secara sadar melepaskan diri-Nya dari nyawa-Nya). Pandohan on pasunggulhon pambahenan ni si Daud uju marmahan ibana mangalele jala mambunu singa dohot gompul naro manoro biru-biruna (1 Sam. 17:34-36). Alani I ma dang tarulahon ni halak parbiar marmahan ala jotjot mangadopi mara. Olo do marmara jala agoan hosa parmahan ala manghophop biru-biruna maralohon angka panoro, nang angka panangko. Alai lumobi dope sian i nabinahen ni Jesus, dilehon jala diseahon do hosa-Na humongkop biru-biruna. Molo angka parmahan – atik pe ingkon maralohon babiat panoro manang gompul jala boi agoan hosa humonghop biru-biruna, alai dang disangkapi asa pola mate ibana – naeng do musunai naingkon talu manang mate; alai ianggo ibana naeng do malua sian hamatean. Alai molo Jesus, ala haunduhon niroha-Na tu Ama i – dilehon do hosanna (Joh. 10:17) asa malua dorbiana sian hamatean (10:28, pat. Yoh. 15:13, 1 Yoh. 3:16, Pangk.7:17).
Paduahon. Ditanda parmahan (Jesus) i do angka biru-biruna “dinaung gabe jolma Ibana, jala maringan ditongatonganta” (1:14). Di dok Jesus ditanda do na di Ibana jala ditanda nasida do Ibana “songon Ama i na tumanda Ahu jala Ahu tumanda Ama I” (ay.15a). Digombarhon ayat on do parsaoran nasolhot dimulai sian parsaoran-Na dohot Ama i laos mangerbang tu napinasahat ni Ama i tu Ibana (17:6) dohot tu sude halak “angka na naeng porsea dope di Ahu, tinogu ni hatanasida” (17:20).
Parmahan na niupaan
Sahalak nampuna godang biru-biru sai dilului do halak mangurupi laho marmahani biru-biruna i. Dumenggan ma marnampunahon parmahan atik pe naniupa martimbanghon so adong marmahani. Jala molo nunga adong dapot parmahan gabe tung pos do roha – ai didok roha gabe adong ma mangaramoti biru-biru i, sonang ma roha ni nampuna biru-biru i. Atik pe so ibana nampuna biru-biru i, alai ulaonna tung dos do; ima laho mangaradoti na ringkot dipahan-pahan i. Parmahan nasongoni ma digoari “naniupaan”. Alai hape Parmahan sisongoni, ala dang ibana nampuna biru-biru i – holan mangharingkothon upana do ibana. Dang holong rohana di biru-biru jala dang marsitutu ibana mangulahon tanggung-jawab – namangarajumi haparmahanon i ndada panjouon na tu ibana – alai holan pangula sipangan upa (sebagai pekerjaan) do ibana, mangalului haluaonna sandiri uju ro mara jala pasombuhon panoro pansuasaehon angka dorbia i (ay.13). Halak nasongoni ma parmahan nasodenggan.
Di jolo ni turpuk on dibaritahon do sahalak namapitung sian hatutubuna na pinamalum ni Jesus. Na sinungkun ni halak Parise natoras ni namapitung i (ay.19), alus ni natorasna: “Na huboto hami do on anaknami jala (9:1-34) na mapitung do ibana tubu. Alai ndang huboto hami, manang beha pangalahona gabe marnida; ba, ndang hutanda hami na mangungkap matana. Ibana ma sungkun hamu; nunga tang dagingna, botoonna do mandok sidohononna (9:20-21). Alus nasida songoni ala mabiar mida halak Jahudi (22). Tarrajum do pangalaho ni natorasna i doshon parmahan naniupaan na marnida ro babiat panoro ditadingkon do birubiru i laho maporus (10:12). Holan ro halak Parise hira naeng manoro – dipalua do dirina dipasombu gabe holan anakna i mangadopi panoroon ni halak Parise i.
Birubiru na asing
Adong dope angka birubirungku na asing, na so sian bara on. Ingkon dohot do angka i togihononku (ay. 16). Bara (Gorik: aules, Ind. kandang) – ima inganan parmianan ni angka dorbia (birubiru) molo nunga botari tusi ma nasida bongot marondingonding jala sian i ma muse laho tu panjampalan. Di dok Jesus, togihononna do tusi birubiru naasing i jala gabe asa sada punguan (Gorik: poimne) jala sada ma parmahan (poimen) - tangihononnasida do soarangku. Dang dipapungu angka biru-biru naasing tu sada bara (inganan) asa sada bara nasida dohot napinarmahan-Na hian, alai didok “asa sada punguan”.
Nunga mar 2000 taon naung salpu dihatahon Tuhan Jesus hata on, jala nunga marjuta-juta halak naung ro jala masuk tu “punguan” i, sian nasa ragam ni houm dohot bangso naung namanghatindanghon jala manghaporseai Jesus, silehon hangoluan jala haluaon i. Ima hape boasa godang (ragam) ni angka biru-biru ni Jesus i; parhataan (Bahasa), dogma, aliran – alai nang pe godang punguan I sude do marpanindangi Jesus do Parmahanna, uluanna, rajana, Tuhan-na, jala barita taringot tu Jesus do tongtong dihatindanghon. Tutu torop dope angka bangso (negara) naso manjangkon Jesus jala dang manjalo tu Barita Haluaon (Injil) i; pola dipaluntakluntak angka parpunguan dohot usaha ni halak naporsea tu Kristus disi; alai anggo halak naporsea i, torus do martumbur jala marerak di inganan i.
Kesimpulan dan Refleksi
Mansai bagas do lapatan ni pandohan ni Jesus na nidokna “Ahu do Parmahan Nadenggan”. Ndada asal parmahan Ibana; alai Ibana ma Parmahan Nadenggan !. Hata “Nadenggan” patuduhon parasingonna sian angka parmahan naasing, patuduhon keunggulan moral dohot kepedulian namamolin (yang tulus). Marimbar sian angka parmahan naasing, tung dirohahon Jesus do hasonangan, hademahon ni napinarmahanNa. Jala pandohan “Hutanda do angka na di Ahu, jala ditanda nasida do Ahu” mangondolhon parsaoran na tung mansai denggan jala hontot. Dang asal ditanda, alai panandaon nabagas jala tangkas.
Marhite jamita on, disosoi do hita asa lam mananda holong niroha ni Tuhan i di ngolunta, jala asa taboto tangkas Ibana nampuna hita. Ala Ibana do nampuna hita, sai na parmahanionna do hita dibagasan holong-Na namamolin i. ditanda do hita, ditanda do soaranta jala diboto do namasa tu hita jala bahenonna do nadumenggan tu hita. Naeng songoni ma nang hita, asa tatangihon jala olo hita parmahanionNa; asa tongtong hita mangolu dibagasan haluaon naung pinarade-na I di hita. Sian pandohan “Ahu do Parmahan nadenggan i” naeng diondolhon Jesus, tung mansai dirohahon Jesus do haluaonta, jala narade do Ibana mangondihon hita sian hamaolon ni parngoluoan on. Laos marhite on ma dipabotohon; tahaposi ma Ibana na rade manjalo nasa hatahutan jala holsonta (Rom. 8:28), Ibana do Parmahan Nadenggan (Psalm. 23).
Torop do angka parmahan naung dipabangkit laho mangaradoti biru-biru ni Tuhan Jesus. Godang sian nasida marpangalahohon songon parmahan naniupaan, gabe mambahen moru panghaposion tu parmahan i. Nian molo nunga tarrajum gabe parmahan naeng ma gabe parmahan nadenggan, jala ingkon ma ditanda angka napinarmahananna, jala unang adong nanggo sada sian napinarmahan i gabe malua sian pangaradotion ni parmahan. Marhite huria i, dirajumi do hita (Pandita, Guru Huria, Sintua dohot Parhalado na asing) gabe angka parmahan maradophon ruas ni huria. Naeng ma taihuthon pangajarion ni Jesus Kristus asa masuk horong ni Parmahan nadenggan hita, na hinalomohon ni Parmahan Nadenggan i, jala marolop-olop biru-biru ni Tuhan na taparmahani i. Amen.
Posting Komentar