Jamita Partangiangan Epistel Minggu 21 Juni 2026 Minggu 3 Dung Trinitatis tarsurat di buku Mateus 6 ayat 25 - 34. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Pangaramotion ni Debata tu Saluhut." Rap ma hita mangihuthon hatoranganna.
Pendahuluan
Margoar do turpuk on: “Jamita ni Tuhan Jesus di atas Dolok”. Ima na marisihon pernyataan namarpardomuan tu hasintongan ni Hata ni Debata namanogu roha ni halak na tumangihonsa gabe porsea di Tuhan Jesus Anak ni Debata namangolu i, dohot di Tondi Parbadia namangula di rohanta sandiri mambahen hita margogo mangadopi angka na masa di ngolunta. Ganup halak na naeng masuk tu Harajaon ni Debata, ingkon jumolo ma panghilalahononna ngolu na mauas male mida Harajaon ni Debata dohot poda na niajarhon ni Tuhan Jesus. Molo taparrohahon ngolu partondionta, mansai jotjot do talu binahen ni: (1) Holso ni roha di portibi on, (2) Tipu daya na sinuanhon ni hamoraon (Mat. 13: 22), (3) Hamoraon dohot hisaphisap na asing i (Mark. 4: 19), (4) Hahisapon na mambahen ndang matoras parbue ni hata i, (Luk 8: 14), dohot (5) Ndang manongtong mian di bagasan Kristus (Joh. 15: 4).
Pembahasan
Ragam do pangalaho dohot hasusaan na ingkon siadopanta di ngolu siganup ari. Ragam ni pangalaho dohot hasusaan i do apala na ditaringoti Tuhan Jesus dison, ai dibereng Jesus do angka pingkiran dohot panghilalaan na pasorathon rohanta di ulaon na taharonsothon ganup ari. Torop do halak na manghilalahon, paboa na so mardomu Jamita na tabege di Gareja tu ngolu siganup ari. Ai ianggo didok roha ni na deba, asing do angka pangalaho na tinaringotan di parmingguan manang di partangiangan sian ragam ni na tahalojahon di ulaonta siganup ari, isara di jabu, di pertanian, manang di perkantoran. Ala ni i, gabe hatop ma lupa nasida di angka Jamita na binagena, dung haruar sian Gareja manang molo dung mulak sian partangiangan. Jala tubu do tu rohana, maol do mangulahon poda ni Jamita i, ai mansai maralo do i tu ruhutruhut ni portibi on sian angka pangalaho partondion na somal na tinudu ni Hata ni Debata di bagasan Jamita i.
Masa do di Huria na parjolo i pangantusion na sala taringot tu umpama ni Tuhan Jesus songon na jumpang hita dison, adong do halak na manulak umpama on, ai didok roha nasida, nunga dipasohot Tuhan Jesus ragam ni ulaon na somal niulahon ni halak Kristen. Ai ndang mungkin pidong dohot bungabunga gabe tiruan di hajolmaon. Molo tung gabe pidong angka namartongatonga langit dohot bungabunga na di ladang i do sitiruonta, ba, tapasohot ma angka ulaonta. Tuhan i ma namanarihon hita. Ibana naung mangalehon hosa tu hita, nda di boto Ibana manarihon na ringkot di hita? Ninna nasida. Laos didok nasida do muse: Naeng hatop mulak Tuhanta i tu portibi on. Ala ni i ndang pola be pungkaonta manang ulaon dia pe paima ro Tuhan Jesus. Angka halak na songon on pangantusionna, di goari Ap. Paulus do i, na so maradat parangena. (2 Tes. 3: 11).
Alai nang pe songon i pangantusion nasida, anggo poda na sian Hata ni Debata, tangkas do manulak pangantusion na sala i. I do alana umbahen dipaingot apostel Paulus Huria na di Tessalonika naung maninggalhon angka ulaonna, marhite sada sipaingot na tullom, mandok: “Ai nang andorang di tongatongamuna hami, nunga hurodihon hami tu hamu: Na so ra mangula, unang ma ibana mangan, ai tarbege do tu hami, adong do deba sian hamu na so maradat parangena, angka na so mulaulaon, na so siulaon do tahe di jama. Tu angka sisongon i hupatikhon jala hurodihon hami mangasahon Tuhan Jesus Kristus: Bulus ma nasida mulaulaon, asa na niomona be dihangoluhon. Alai anggo hamu, ale angka dongan, unang ma marnaloja hamu mambahen na denggan”. (2 Tess 3: 10: 10 – 13).
Apostel Paulus sandiri pe mulaulaon do arian dohot borngin, unang sorat Huria i mamingkirhon ngoluna. Asa, na tinudu ni Tuhan Jesus dison, ndang asa tapasohot ulaonta siganup ari jala asa maradian hita sian angka ulaonta, daoma i. Ai molo songon i do pangantusionta, gabe madabu ma hita tu pangantusion na sala songon Huria na parjolo i. Ingkon mansai arga do bahenonta ulaonta siganup ari. Ai nang Tuhan Jesus sandiri pe, diula Ibana do ulaonNa saleleng arian, ai dung ro borngin, ndang adong be na boi mangula disi. (Joh. 4: 9). Arga do ulaon i dirajumi Ibana, ai ndang haleaon i.
Jadi molo songon i, dia do na tinudu ni turpuk on, boasa ma pola pidong angka na martongatonga langit dohot bungabunga na di ladang i sitiruonta? Adong do tujuanna, i ma: Diuji Tuhan Jesus do haporseaonta na manungkun hita be: Ise do dihaposi roham di angka pangalaho siganup ari? Ise do Tuhanmu namangarajai disi? Mansai ringkot do pahusorhusoron ni rohanta sungkunsungkun on. Ai tangkas songon na taboto, ia na jotjot ditaringoti hajolmaon di tingki on, angka pangalaho hasusaan namarpardomuan tu ngolu siganup ari do, i do na sai tinaringotan ni ganup halak manang didia pe. Jadi ndang tagamon so balga panghorhon ni pangalaho hasusaan i maradophon ngolu partondionta.
Diboto Tuhan Jesus do, ianggo na sai manait roha ni jolma di portibi on, ndada Hata ni Debata, alai taringot tu ngolu pardagingon do, i ma namenyangkutpaut tu sipanganon dohot parabiton. Jala diboto Ibana do muse naung gabe sada batu partuktuhan do ngolu pardagingon i maradophon ngolu partondionta be. Ganup ari minggu, sai tahatindanghon do haporseaonta, namandok: Ahu porsea di Debata Jahowa, Pargogo na so hatudosan........! Alai adong dope panindangion na ummaol ulahonon sian i jala na rumingkot, i ma: Parrohaonta, parangenta, pangalahonta na tarida di jabu, di ladang, di pasar, manang di perkantoran pe. Sandok nang di sude ulaon, dinamangalului hangoluan siganup ari i pe hita, tung mansai ringkot do hatindanghononta pambaen ni Debata di ngolunta. Nian, ndang marsoara nagogo panindangion i, alai apala marhite i do tarida manang sintong hita porsea di Debata Ama, Pargogo na so hatudosan i. Disi do patar tarida manang na tutu Debata Jahowa Tuhanta, manang na adong dope debata na asing na jumolo talului di ngolunta. Alana umbahen ditaringoti Jesus pe sipanganon dohot parabiton, apala i do na parjolo pinardebata ni hajolmaon di sandok portibi on. Songon i do nang di halak Jahudi na jolo, suang songon i muse nang di hita jolma na modern nuaeng. Alai molo songon i, molo so dohot Debata Ama gabe Tuhan nang diulaonta siganup ari, hatop do masuk hita tu na ginoaran dison “Sahit ni hajolmaon”, i ma: “Holso ni roha”. Holso ni roha, i ma sada soara nasai manggasa di bagasan rohanta, na tongtong manghusiphon “Nunga monding Debata Amanta”. Manang pingkiran na mandok: “Ndang mangolu be Debata”, “Nunga dao Debata sian hita”. Apala parrohaon na songon on do napinarbuehon ni pangunjunan na songgop tu hita lumobi di ringkot ni ulaonta siganup ari. Ulaon i do na gabe tuhan di hita, ulaon i do na gabe tujuan na tumimbo, ulaon i do na gabe sipalua. Jadi mansai jorbut do ujung ni i, ai gabe hatoban hita jala ulaonta sandiri ma na gabe tuhan dohot rajanta.
Asa, songon burbur manang rayap do holso i di ngolunta, na boi pamatehon panghirimon, holong ni roha nang haporseaonta. Sangat berbahaya do holso ni roha i, ai ndang boi holso ni roha i patupa las ni rohanta, gariada lam jotjot hita holsoan, lam jonok do maut menjemput hita. Tung tapaholang ma holso i sian ngolunta ai hasusaan do parbue ni i. Holso ni roha, manang pangunjunan on, ndada holan di halak na pogos i masa. Alai nang di halak na mora pe sada ujian do i di ragam ni angka ulaonna. Tung na susa do ngolu ni halak na holsoan, halak napogos sai holsoan do ala na soadong di ibana. Suang songon i do nang halak na mora, marholso ni roha do ala hamoraonna na godang i, boha ma unang mago hamoraonna i. Jadi dos do na dua i, gabe hatoban binahen ni angka na masa di ngoluna di hasiangan on. Nunga lupa nasida di Amanta Pargogo na so hatudosan i. Ala ni i, dipanghulingi Hata ni Debata do nang angka na pogos nang angka na mora, sude hita angka na marholso ni roha ala ni angka hasusaan na masa di hasiangan on, mandok: “Namangolu do Debata Amamuna na di banua ginjang i”. Ala ni i: “Sai jumolo ma lului hamu Harajaon ni Debata dohot hatigoranna, dung i tambahononNa do sude angka ondeng tu hamu”.
Taringot tu holso ni roha on, tarsingot do tu roha Barita namasa taringot tu Dr. Marthin Luther di tanggal 31 Oktober 1517, i ma parmulaan ni Reaformasi di tonga-tonga ni Hurianta Lutheran termasuk ma dohot HKI. Dihamamasa ni Reformasi Luther, Sipata mansai gondok do rohana ala ni ragam ni hasusaan na songgop tu ibana ala ni ulaonna na borat i. Di nasahali hundul ma si Marthin Luther di jabuna jala mansai marsak do rohana jala sorat rohana mamingkiri manang songon dia ujung ni reformasi i. Alai ia pardihuta ni Dr. Marthin Luther, i ma namargoar si Katharina sada halak na burju do huhut na pistar. Jadi marnida gondok ni roha ni tuan Marthin Luther i masuk ma si Katharina tu kamarna, di tukar ma hatop abitna, alai dung satongkin nari haruar ma ibana sian kamarna i marabit baju na birong, i ma parabiton na somal dipangke halak Jerman molo adong halak na monding. Jadi masuk ma si Katharina tu kamar ni Marthin Luther, mansai marsak do di bahen bohina. Marnida i tarsonggot situtu ma Marthin Luther, ninna ma: Aha do na masa umbahen na marabit na birong hamu? Adong do huroha halak na monding? Jadi dialusi inanta i ma Marthin Luther mandok: Ba, ndang diboto hamu, nunga marujung ngolu ni Debata Amanta. Nda, alani i do umbahen namarholso ni roha hamu? Ninna si Katharina. Jadi dung dipahusorhusor DR. Martin Luther satongkin di bagasan rohana hata ni si Katharina i dohot tujuanna, mengkel ma ibana huhut marlas ni roha. Ai diida ibana do nuaeng haotoonna i, i ma: “Holso ni rohana na so porsea di Debata”. Songon i do tujuan ni turpukta sadari on. Naeng sungkunon ni Hata ni Debata do tu hita: Tung tarbahen hamu ma marholso ni roha, molo anak ni Debata Ama, Pargogo na so hatudosan i hamu? Alusna, Ndang.
Adong do na istimewa siulahononta, i ma: “Sai jumolo mangalului Harajaon ni Debata dohot hatigoranNa, dung i tambahononNa do sude angka ondeng tu hita be”. Marhite on dilehon Tuhan Jesus do alus na tangkas tu sude holso ni rohanta. Mansai uli do barita on jala ringkot hangoluhononta, manang songon dia pe keadaanta, manang na pogos manang na mora pe hita. Dipaboa Hata on do tu hita: Ia di parngoluonta on, sai adong be do na ingkon “Jumolo luluanta”, jala adong muse do pangalaho na asing nanidok angka “SitambahononNa tu hita be”. Mansai ringkot do tutu di hita sipanganon dohot parabiton dohot sude angka na asing i. Alai molo marholso ni roha hita ala ni angka na ringkot i, sada tanda do i, paboahon naung lupa hita di Debata Amanta na di banua ginjang i. Jala molo lupa hita di Ibana, nda maargahu do tatuhor sipanganon dohot parabiton? Maarga hu do. Mardomu tusi, dipangido ma nuaeng tu hita, asa rade hita manangkasi dirinta manungkun tu rohanta be: Aha do na jumolo hulului di portibi on?
Harajaon ni Debata, i do na jumolo siluluan ni rohanta. Ianggo Hata Harajaon ni Debata, i ma namangidohon tu hita: Asa tapabangkit Debata gabe Raja di saluhut angka ulaonta siganup ari, mangarahon Ibana bongot tu rohanta, asa Ibana namarhuaso di ngolunta, jala na tumimbo sian angka ulaonta siganup ari. Molo saut taihuthon podaNa, naeng ma lam asing ngolunta sian tingki naung salpu. Napasti, ingkon adopanta do renge ni ulaon, jala hasusaan pe sai adong do. Alai boi do marlas ni roha hita di ronsot ni angka ulaon i. Ai manang songon dia pe ujung ni angka pangalaho i, molo pos rohanta di Ibana, gabe taboto ma namarhabangsa do Debata Amanta na di banua ginjang i manarihon ngolunta. Sada sungkun-sungkun na gumodang alusna, i ma: Aha do naniluluanmu di ngoluon? Mungkin songoni godangta na pungu di bagas Gareja, songon i ma godang ni alusta tu sungkunsungkun i. Ai mansai godang do na talului di portibi on.
Anggo angka na poso mangalusi sungkunsungkun i mansai hatop do mandok: Pacar, rongkap manang kekasih. Halak na pengangguran, pasti do mangalusi naeng humatop jumpang ulaon. Angka natoras, pasti do mangalului kebutuhan hidup ni keluargana. Angka halak na ro tu Gareja, pasti do mangalului kebahagiaan manang las ni roha, nanggo apala tingki tu Gareja iba las roha ninna. Angka Pengusaha dohot Pegawai, parpasar, mansai sonang do rohana mangalusi: Keberhasilan, keberuntungan, torus adong tender jala monang, lancar angka urusan, godang langganan, naek golongan, nanggo apala tamba gaji, otik sosadia. Angka keluarga na so harmonis, naeng hatop rukun, asa bersemi kembali. Manang dia pe na talului di portibi on, pasti do adong resepna, i ma: Tapatujolo ma namangalului Harajaon ni Debata dohot hatigoranNa, dung i tambahononNa do sude angka ondeng tu hita.
Kesimpulan dan Refleksi
Songon halak na porsea hita, na bertanggungjawab do hita mangalului Harajaon ni Debata dohot hatigoranNa, jala ingkon tapanghilalahon, paboa halak na mauas male do hita di bagasan Harajaon ni Debata. Molo hata ni Debata do na rumingkot/naparjolo talului dingoluon, laos hata ni Debata di na paimbaruhon hita ganup ari. Diajari hita marsitutu mangula di bagasan haporseaon lobi songon pidong nang bungabunga di ladang i.
Ingkon tutu do porsea hita, paboa na mangula do Debata Parholong ni roha i patupa na ummuli, na dumenggan demi kelangsungan ni parngoluonta: Lehonon ni Debata do tu hita habaranion laho mangadopi dohot manghamonanghon nasa hamaolon siadopanta marhite kejujuran, jala ndang boi hita melarikan diri sian kenyataan na sedang taadopi di ngolunta. (Jes. 41: 10). Lehonon ni Debata do tu hita habisuhon, laho mangantusi pambahenanNa di ngolunta. (Jak. 1: 5). Lehonon ni Debata tu hita hagogoon laho mangulahon lomo ni rohaNa siulahononta ganup ari. (Pilp. 4: 13). Lehonon ni Debata do tu hita haporseaon laho manghaporseai Ibana asa margogo hita menyelesaikan angka masalah-masalah na sedang taadopi di ngolunta. (Psalm. 37: 5).
Antong! Marlas ni roha ma hita manghirim dipanarihon ni Debata di ngolunta siganup ari mandok: “Na sonang au, bolong do sasude namangarsahi au. Las rohangki, nuaeng nang sogot pe, diapul Jesus au. Ndang huholsohon be ngolungku, Sude do guru di Amangku, na sonang au, na sonang au”. “Na sonang au! Burju do Amangki namanari-hon au. Huhut basa, sude na ringkot i dilehon do tu au. Parbegu do nahumolsohon, ngoluna dohot sipanganon. Au sonang do. Au sonang do”. Ende No. 209: 2 - 3.
Imbaru ma hita, na pinaimbaru ni harajaon ni Debata asa margogo hita mangula dibagasan haporseaon. Dao ma holso alai mangula ma hita dibagasan pastitutuon lumobi porsea dipanarihonon ni Debata. Ala porsea hita, mangula ma hita lobi songon pidong dohot bungabunga i. Amen.
Posting Komentar