Jamita Partangiangan Epistel Minggu 28 Juni 2026 Minggu 4 Dung Trinitatis tarsurat di buku 4 Musa 14 ayat 11 - 19. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Holong na Manghorhon Las ni Roha jala Patoguhon." Rap ma hita mangihuthon hatoranganna.
Pendahuluan
Hal na sangat membosankan do paimahon molo so tigor haporseaon tu na pinaima. Di na mandalanhon ngolu siganup ari tabolus do ragam ni hamaolon, tabolus angka hasusaan mambaen tubu biar ni roha hira na so adong be kepastian ni ngolu on. Alai tung saluhutna i ala so margogo do hita mangadopi na masa on ala tung mansai metmet do haporseaon i. Laos i do na ni adopan ni bangso Israel hatiha i, uju diloas Debata nasida ruar sian tano habuangan parade diri mamongoti huta Kanaan, huta na binagabagahon ni Debata tu bangso hasianNa i.
Kondisi ketidakstabilan ni haporseaon ni bangso Israel hinorhon ni torop dope sian bangso i na parsidohot ruar sian Misir alai sai mulakulak rohana ala nunga sanga maduma nasida di Gosyen. Digombarhon do hinasonang ni ngolu nasida uju di Misir, hape ingkon boluson nasida do padang gurun Qadesy, padang gurun Haran. Hinorhon ni jempek ni haporseaon nasida gabe sai marungutungut nasida tu Jahowa. Polas sahat tu Kadesy huta na jumonok tu kanaan dang ra suda ungutungut ni bangso i. Sian situasi i dibuat si Musa do tingki martangiang tu Debata anggiat dipalua Jahowa bangso parungutungut i, bangso na so satia i sian rimasNa. Anggiat malua bangso i sian parhatobanan sahat tu tano bagabaga i.
Pembahasan
Ndang Satia Mula ni Uhum sian Jahowa
Digombarhon do diturpuk on songon bangso Israel molo marbandinghon padang Haran ima tu Misir songon gombaran ni kenikmatan. Asa dung sahat nasida tu padang Haran gabe sai disalahon nasida do Debata mandok: “Tung so mate hami nian uju di tano Misir dope hami, manang mate dope hami nian di halongonan on! Boasa tung togihonon ni Jahowa hami tu tano on, asa marragean hami bahenon ni podang, jala jolmanami dohot ianakhonnami ripe tabanon? Nda tagonan nian hami mulak tu Misir? Sandok luhutan ni bangso i pangiar soarana be mangangguhi jala tumatangis bangso i manipat sabornginna i., pola martahi nasida pajongjong sada ihutan (pangulu) asa mamboan mulak tu Misir (4). Disalahon nasida do Jahowa, apalagi barita na pinasahat ni angka baoa na sinuru ni si Musa panghahap huta Kanaan marbarita na so mungkin nasida bongot tu tano Kanaan, ala nunga torop bangso na mangingani huta i.
Gabe dipabiarbiar nasida do bangso i dohot barita ragam ni kesulitan. Laos i do mula ni pambarontakan nasida tu Jahowa. Dang porsea tu otoritas, asi ni roha dohot hasatiaonNa. Tung so porsea nasida di bagabaga dohot pangaramotion ni Debata, gariada gabe curiga jala negatif thinking nasida marungutungut mandok: "Boasa boanonMu hami tuson?", gabe bangso pambarontak do bangso i tu Debata.
Pangalaho na mangalaosi patik ni Jahowa mambahen rimas ni Jahowa mandok: “Sadia leleng on insahan ni bangso on Ahu? Jala sadia lelengna i ndang olo nasida porsea di Ahu, binahen ni sude tanda angka na hubahen di tongatongana? Toruangku nama nasida marhite sian begu antuk jala rendephononku nasida, jala bahenonku ho gabe bangso na balga, jala na gumogo sian nasida.
Tuhan merespons protes bangsa Israel dengan menunjukkan kemuliaan-Nya di Kemah Pertemuan (14:10). Marronirimas Jahowa (sangat kecewa dan sangat murka) hape nunga ditatap basida hamuliaon ni Debata jala nunga diida nasida angka ragam halongngan di Misir rodi parhorsihan i. Alai tahe pola do 10 kali diunjuni nasida Jahowa di parhorsihan i (22). Ingkon lalu ma uhuman ni Jahowa tu bangso i, pusaonna di parhorsihan 40 taon lelengna. Angka naung marumur 20 taon tu ginjang na so tuk bongot tu tano bagabaga i (14:29, pt. Josua 5:6). Sian on na gagal do bangso Israel dibagabagana tu Jahowa huhut ndang porsea dihata ni Jahowa.
Pangondianon na Manghorhon Haluaon
Nian dang apala boi tung saluhut bangso i tolhas bongot tu Kanaan. Alai mauliate do di pangondianon ni si Musa tu Jahowa, gabe adong do sian bangso i na sahat malua. Didukung muse angka panghahap na mulak sian tano Kanaan adong na patupa laporan palsu, alai anggo si Kaleb dohot si Josua tung barita na denggan (positip) do laporanna. Kegagalan nasida, ala gumodang na mamaritahon angka kecurigaan dohot kebimbangan umbahen sai mardua roha bangso i, gabe torop na hona rimas ni Jahowa. Termasuk rimas ni jahowa mambahen ‘aek mara’, ima aek na paet sahali. Seharusna ragam ni dalan ni Jahowa (penyataan umum) peristiwa angka na balga i nga ingkon mambaen nasida porsea tu Debata. Alai gabe patubu rimas do na ro.
Panandaion setipis sanggesange do panandaion ni Bangso tu Debata maos manihai. Dirimpu nasida na so tuk Debata paluahon nasida. Tarida do diujung ni turpuk on hinorhon ni na so unduk nasida, gabe mate nasida di tongan dalan, dang dapotan asiasi dohot parbue bagabaga i. Gabe hona uhum ni Jahowa do nasida.
Hadirion dohot sikap haporsean ni si Musa na sigop mananda Jahowa, mangidohon parjolo, ima hasesaan ni dosa, anggiat marpamuati roha ni Jahowa mida bangso i sapala naung marhite gogo ni tanganna Ibana paluahon bangso i sian Misir, “Begeon ni halak Misir ma barita i, ai nunga ditogihon Ho bangso on ruar sian tongatonganasida marhitehite hagogoonmu.Paboaonnasida huhut hata i tu halak isi ni tano on, angka naung umbegesa tutu Ho, ale Jahowa, di tongatonga ni bangso on, nunga pola adop bohi be Ho, ale Jahowa diida, jala ombunmu marsijongjong di atasnasida, jala Ho mardalan di jolonasida marhite sian ombun na marsijongjong ia arian, jala marhitehite api na marsijongjong ia borngin. Sapala naung dibona i paluahon ba naeng ma udutan ni Jahowa sahat tu na saut bagabaga i (ayat 13, pt, 2 Musa 32:11).
Kedua, Dipangido ibana anggiat dipertimbanghon Jahowa hasangaponNa maradophon bangso Misir, “Ala na so tuk gogo ni Jahowa manogihon bangso on tu bagasan luat, naung niuarihonna tu nasida, umbahen dipotongi nasida di bagasan halongonan. Nuaeng pe, sai marmulia ma gogo ni Tuhan i songon naung nidok ni hatam” (ayat 16-17, Pt. 2 Musa. 32:12)
Patoluhon, na parpudi jala na umpeting dipangido si Musa do Tu Jahowa asa martinting Johowa, ai parlambok jala parlambas roha do Ibana, “ai nimmu do: Na lambas do roha ni Jahowa jala parasi roha godang, na marpamuati do rohana mida hajahaton dohot pangalaosion, alai ndang loasonna malua sian uhum anggo halak parsala, sai na luluhononna do hajahaton ni amaama tu angka anakna ro di sundut patoluhon dohot paopathon. Antong sai marpamuati ma roham mida hajahaton ni bangsom, hombar tu hinagodang ni asi ni roham, ala naung sapala marpamuati roham mida bangsom olat ni Misir dope rasirasa nuaeng (17b-19, Pt. 2 Musa. 34:6-7). Laos dialusi Jahowa do pangidoan ni naposoNa si Musa do napinatoguNa i bagabaga i “Nunga marpamuati rohangku ala pangidoanmu. Alai tahe, songon sintongna mangolu Ahu, ingkon gok hamuliaon ni Jahowa sogot liat portibi on. Ai saluhut baoa, angka na sanga marnida hamuliaonku dohot tanda angka na hubahen i di Misir dohot di halongonan, hape nunga pola sanga sampulu hali diunjuni nasida Ahu, jala ndang ditangihon nasida soarangku. Na so tupa idaonnasida tano naung huuarihon nian tu ompunasida i, sude tahe angka naung manginsahi Ahu, ndang jadi idaonna tano i. Alai anggo naposongku si Kaleb, ala tondi na asing diparrohahon ibana jala marsihohot rohana mangihuthon tu Ahu, boanonku ma anggo ibana masuk tu tano na niebatanna i, jala pinomparna manean tano i. Dipatogu padanNa pada asi ni roha (covenantal love), na porsea layak malua alai anggo na tangkang roha i na so jadi bongot nasida.
Kesimpulan dan Refleksi
Aha pe na masa di ngolum on, Tuhan manjaga ho .... ima gombaran ni haporseaon na togu tu Jahowa. Unang songon bangso Israel sai dipatuduhon na so unduk huhut mambarontak tu Debata, ragu jala maol manghamauliatehon angka pambahenan ni Jahowa. Mura marungutungut, ndang olo puas di keadaan na jinalona, jotjotan reaktif, curiga dohot negatif thinking berlebihan, merasa diri ummalo, merasa lebih berhikmat sian donganna laho mangaturhon parngoluon on. Pangalaho sisongon on ma na porlu siambolonghononhon sian hadirion ni angka anak ni Debata.
Molo anak hatiuron ingkon dijaga do roha, pamangan, ateate nang pingkiran unnang sai negatif. Naeng ma hita barani bersikap jujur, molo tung pe hea hita ragu gabe tasungkun hatigoran ni Tuhan i uju masa hamaolon, molo masa angka pangunjunan molo songgop angka hangaluton, hata ni Tuhan i sai hot do i. Sai tiop padan ni Tuhanmu, manipat ari golomonmu. Tuhanmi nampuna ngolumi.... du. Rap tajaga ma rohanta unang pola patubu rimas ni Jahowa, ingotma asi ni roha ni Jahowa naung paluahon, porsea memang ba burju do Tuhan i.
Boi jadi do hurang tasadari marhite hananangkon ni pengaruh media sosial sinuaeng on, gabe lam maol do jolma porsea tu Jahowa. Unang i, haru manghaporsea i donganna pe maol, ujungna keadaan ni halak na saling menudu hasalaan pe nunga lam mangimbukbuk. Lam tumagon ma ummura manudu hasalaan ni dongan sian hahurangan niba. Tubu ma masa ima zaman saling tuding, rap dang masihaposan. Molo tapatudos do tu pangungkapon 22:11, ingkon lam masama torop halak na vocal, kritis (mengutarakan pendapat, mengkritik), so alang tobal ni bohina so ada ila bahkan dilatik marhite facebook, twitter dna di website asalma adong konten. Onpe tong do on dorongan sian roha pemberontak. Hape idama dang maol be jumpang hita aturan musu gabe dongan jala dongan gabe musu holan alani hagiot ni roha, na sala gabe sintong na sintong gabe sala bahkanmangalo uhum ni Jahowa asalma saut na sinangkap ni roha (Kepentingan).
Naeng ma nian lam bagas pangantusionta mangadopi angka na masa i songon si Musa intor ditopoti rohana do mangondihon bangso i asa unang hatophatop manguhumi dohot na manalahon dongan manang manalahon Tuhan i. Dang gabe panguhum tugasta molo pe hita sintong manang dongan na sala. Dang tugasta i. Malah molo so malua dope hita sian pangalaho i, lalu ma rimas ni jahowa. Sungkup ma Jaowa panguhum di partingkian sinuaeng rodi marsogot ujung ni portibion.
Dungi ringkot adong masisesaan dosa (1Pet 4:8) dang tarbaen so sala, jala Tuhan i pe mangalusi tangiangta ndada marhite ingkon hata na lamboklambok, terkadang dilehon do na koras bahkan na paet sahali, lam marbisuk ma hitaala ni asi ni roha ni Tuhan i huhut ringgas martangiang, asa malua hita, malua nang bangso ni Tuhan i, tuk pataridahon dirinta parholong na manghorhon lasniroha jala patoguhon. Molo tung adong na hurang di pangalaho hatop ma ibana ro tu debata pasesahon dosana, molo tung adong na hurang di pangondianon pasahatma dalanmu tu Jahowa jala haposi Ibana, asa ibana paturehon. Amen.
Posting Komentar