Jamita Partangiangan Epistel Minggu 5 Juli 2026 - Pangungkapon 7 ayat 9-17 - Timothy Saragi

Jamita Partangiangan Epistel Minggu 5 Juli 2026 Minggu 5 Dung Trinitatis tarsurat di buku Pangungkapon 7 ayat 9 - 17. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Haluaon tu Angka Bangso." Rap ma hita mangihuthon hatoranganna. 

Pendahuluan 

Hira dos do sungkun parjolo di epistel on songon di hatorangan jamita nahusurathon i;  “Dapotan haluaon do tahe nasa bangso?” Ro do pangungkapon tu si Johannes, apostel ni Kristus natarbuang di pulo Patmos ala panghatindangina di Kristus. Mangihuthon barita nauli on, torop do jolma dapot haluaon sian Tuhan. Gari tumorop do sian nasa bangso (naasing) martimbanghon sian pomparan ni Israel, ai didok di ayat 4; sian pomparan ni Israel tarsahap do 144.000 halak. Alai ianggo sian nasa bangso, houm nang parhataan, pola ndang dapot bilangan ni jolma toropna. Antong ia haluaon na sian Tuhan i, basa-basa nabolon do i tu angka naporsea namaringan di sandok portibi on, bangso nang houmna.  Alani i tapamanat ma epistel on. 

Advertisement - Scroll untuk terus membaca postingan.

Pembahasan 

Torop jolma jala ndang dapot bilangan, marsoara nagogo marlas roha ala haluaon i (9-12) 

Dung sidung 3 parnidaan di bindu 7:1-8: a) Opat surusuruan jongjong di na opat desa maniop na opat alogo,  b) Surusuruan na asing maniop sahap ni Debata,  c) Bilangan ni angka na tarsahap sian Israel  144.000 halak. Dung i, mangihut ma parnidaan taringot tu nasa bangso, marga, houm dohot parhataan. ) na so dapot bilangan ni jolma toropna, jongjong di adopan ni habangsa ni Tuhan i, ima di adopan ni Birubiru i. Boasa ndang dapot bilangan? Ia Israel na 12 marga i  dapot dibilangi, hape bilangan nasian bangso naleban i ndang dapot bilangan ni jolma. Memang maol bilangan do molo pungu torop situtu di nasangobas (sekaligus) jala inganan namansai bidang, ala sian saluhut bangso na di portibi on do haroroan nasida. Alai Tuhan dapot dibilangi do i sude.

Antong mangihuthon pangungkapon on, ndada holan Israel na 12 marga i sajo hape gabe partohap di haluaon sian Jesus, alai saluhut bangso, houm, marga dohot parhataan na di portibi on. Ai sahat do hata barita haluaon na sian Jesus i nang tu saluhut bangso, houm dohot marga di bagasan panghulingna be. Laos alani i gabe patar ma panurirangon natarsurat di bukku Jesaya  45:23 B, “Ingkon  lompit sogot nasa ulu ni tot marsomba tu ahu, jala marmangmang tu ahu saluhut dila”. Asa ndang be holan jolma namarhata Heber manang Gorik nataruli di hatuaon ni Birubiru i (Anak Domba). Laos hataridaan ni padan ni Jahowa tu si Abraham; “Sai na gabe bangso na balga jala na sangap do si Abraham sogot, jala dapotan pasupasu marhitehite ibana nasa bangso di tano on” (1 Musa 18:18). Marhite Abraham oppu ni Israel, dapot padan haluaon Israel, jala marhite haporseaonna, sahat do baga-baga haluaon i tu angka naporsea di duru ni Israel, ai ibana do oppu ni naporsea.

Angka on do suman ni parange nasida di adopan ni Tuhan i:

1. Saluhut nasida  jongjong di adopan Birubiru i patuduhon naung sahat nasida di adopan ni Tuhan i ro sian bangso naasing, alai nunga  marpahean abit na saksak (jubah putih), ido nanidokna di ayat  14, angka bangso nadiburi ulosna jala dapot hasesaan ni dosa sian mudar ni Jesus natarsilang i. Patiop-tiop maremare (daun-daun palem) pasangap habalgaon ni Tuhan, Raja namarhabangso, Raja ni partondion ubahen diendehon nasida marsoara nagogo mandok: “Tua ma di Debatanta, na mangkunduli habangso i, dohot di Birubiru i!”  Jala marsoara nagogo (nyaring) patuduhon hinabalga holong ni roha dohot las ni rohana ala dapot haluaon  sian Tuhan i, ima  haluaon namanontong tarlumobi namanogu nasida sian angka hasusaan bolon. 
2. Dunghon marende jolma na ro sian nasa bangso,  jongjong ma surusuruan i mangolophon (marlasroha hira standing applaus). Doshon nidok ni Jesus natarsurat di bukku Lukas 15: 4;  “Hudok ma tu hamu: Suman tusi do masa las ni roha di jolo ni angka surusuruan ni Debata mida sahalak sipardosa na paubahon rohana”. Haru sada halak jolma malua, tung marlasroha do surusuruan i, gari on toropna na so dapot bilangan ni jolma, ido umbahen pola jongjong surusuruan i mangolophon nasida di adopan ni Tuhan i. 
3. Dohot ma muse sintua, parngolu naopat i (Pang. 4: 6-8) mamuji Tuhan i manungkap jala marsomba tu Debata. Hinorhon hinauli ni hasangapon ni Tuhan i dohot ala ni haluaon i, marsoara; “Pujipujian dohot hasangapon dohot hapistaran dohot hamauliateon dohot hagogoon dohot hatoguon ma di Debatanta ro di salelenglelengna! 

Marulos abit nasaksak na ro sian haporsuhon (13-15) 

Di na itajaha; “Marulos abit nasaksak (memakai jubah putih), gabe taringot do hita nidok ni panurirang Jesaya; “Tung sura rara dosamuna songon abit bunga dapdap,  bontar do bahenonku songon itak; nang pe rara songon abit hasumba, gabe songon hapas do muse (Yes. 1:18). Angka ise do nasida? Molo di bukku Jesaya i, nasida ma angka naung marhamubaon (naung bertobat), jala naung ringgas manangihon dohot mangihuthon hata ni Debata. Alai molo di bukku Pangungkapon 7:13-15 on di dok, ima angka: 

1. Jolma naro sian haporsuhon godang (kesusahan besar). Dia do nidokna na ro sian haporsuhon godang? Ragam do contoh di Bibel i dohot di sejarah ni huria; taringot jolma na ro sian haporsuhon. Taingot do tahe si Lazarus napogos i? Sian naporsuk do i (Luk.16:19-31). Angka panurirang, apostelNa, angka naporsea di huria naparjolo i pe hansit do diahap; adong ma i deba napinaburu-buru, dilelei, disiksa, dibunu, nahona tutung ala manghophop haporseaonna. Nang angka na satia porsea sinuaeng on, atik pe mamolus hasusaan holan mangihuthon Jesus i, manghohop haporseaon dohot mangulahon nadenggan. Jolma na tongtong marhuria atik pe adong ondam-ondam, diskriminasi, dohot lan naasing tahe. Angka i ma nidokna di Pangungkapon 2:10; “Unang habiarhon angka haporsuhon na naeng ro! ….. Sai burju ma ho rasirasa mate; dung i lehononku ma tu ho tumpal hangoluan i!”  Tarlumobi ma hatiha uju manurat bukku Pangungkapon i, kaisar Rom namarhuaso ima margoar Domitinus (taon 81-96). Posa do parenta ni Domitianus tu rakyat, ai pola dipaksa asa manjouhon kaisar i tuhanna. Siala i, godang ma partontangan sian haporseaon ni Kristen, ai Jesus do Tuhan. Hatiha i ma disurat buku on uju tarsiksa halak Kristen tung mansai posi (penganiayaan yang hebat). Alai martua ma naburju rasirasa mate. (Pang. 1:19;  2:10,13;  6:9-11;  7:14-17;  11:7;  12:11,17;  17:6;  18:24; 19:2;  20:4). 
2. Naung mamuri abitna jala dipasaksak di bagasan mudar ni Birubiru i. Boha do maksudna diburi tu mudar hape gabe saksak (bontar)? Nda gabe rara ma nian, ala narara do mudar i?  On do maksudna, jolma pardosa alai nunga mulak manghaporseai Jesus Kristus. Songon anak namago i (Luk. 15: 11-32), jala tudos anak nalilu i do hita, alai dijanghon  Ama pardengganbasa i do hita uju muba mulak tu Ibana. Doshon namarpahean hasumba najolo alai nuaeng marpahean nabontar songon hapas. Mudar ni Jesus, Anak ni Birubiru ni Debata namamelehon diriNa tarseat di silang di dolok Golgata, mudar namaniris tu tano di dolok i, asa hita jolma nanijadihonNa sian tano diburi jala paiashon hita, i do didok gabe marabit nasaksak. 
3. Jolma na sai tongtong di jolo ni habangso ni Debata mangoloi Ibana arian dohot borngin di bagasan joroNa i. Ise do i? Mangihuthon ayat 15 i,  ima angka naposo ni Tuhan i nasai tongtong satia mangula marhalado di adopanNa di bagas joro i (Bait SuciNya). Antong molo didok di ayat 9 sian nasa bangso, ndada sarupa i sian angka bangso (parbegu). Alai ima angka jolma nasatia ro di ujung ni ngoluna mangula parsuruon ni Tuhan i, jala naso munsat sian haporseaonna. Antong unang sai mandao-dao hita sian joro ni Jahowa. 

Ndang be adong sitaonon di surgo i (16-17) 

Marimbar do parniahapan di portibi dohot dung sahat di adopan ni habangso i muse. Di portibi on manang ise pe jolma, namora, nasangap, manang napogos so mardiha-diha, mangae sitaonon do. Ndang tardok ni jolma tu ngoluna, asa unang nian masa haporsuhon, sahit, sitaonon, male, mauas, ai marganti sorin do i dohot las ni roha. Alai ianggo sihirimonta, ima di sambulon ni tondinta i, angka las ni roha dohot dame nasumurung do. Ndang be masa na male, mauas, ndang be ditinggang las ni ari manang na mohop pe. Tung lambok do disi jala marolop-olop. Parmahan na Burju i nama, i ma Jesus manogihon saluhutna tu mual aek hangoluan, apusanNa nasa iluilu sian mata ni naporsea. Ndang adong natarilu manang alani aha pe sitaononna, alai marende las ni roha nama disi marolop-olop. Ndang ingoton be tu roha angka nahansit i, ai nunga salpu angka partikkian si songon i. 

Antong unang ma mandele hita angka naporsea, molo pe uju di portibi on tabolus jala tahiala angka namambahen hita marsak jala marsitaonon. Olo do tangis hita manghohop (memperjuangkan) haporseaonta, hasatiaonta dohot haburjuonta di tonga-tonga ni jolma parjahat. Ingotonta ma, hata ni Tuhanta natarsurat di ayat on; “...jadi apusan ni Debata nasa iluilu sian matanasida”. 

Sai tongtong nama rap dohot Parmahan i hita, jagaonNa ma hita naporsea i, matahononNa ganup tikki.  Ndang adong be angka nahurang panghilalaanta disi, ganup tikki tahe tung angka las ni roha do. 

Advertisement - Scroll untuk terus membaca postingan.

Kesimpulan dan Refleksi 

1. Marlas ni roha jala mandok mauliate ma hita, ai pardenggan basa do Jahowa naparade inganan di surgo habangsaNa i, na gok las ni roha di saluhut jolma naporsea tu Jesus i. 
2. Hita do na ro sian nasa bangso i, pinompar ni si Abraham oppu ni naporsea, antong jongjong mangadophon habangsa ni Debata ma hita. Tung unang mangadophon habangsa ni si bolis i, sibahen dosa hamagoan i. 
3. Marburi ma hita tu mudar ni Jesus i, gabe marabithon abit nasaksak jala unang be tapasombu dosa i sai mian mangaramuni ngolunta. Marhobas ma di adopan ni Debata. jala unang mandaodao be sian joroNa. 
4. Manontong ma hita satia, porsea, mangihuthon Jesus i jala marhaburjuon mangula nadenggan. Nangpe mamolus hasusaan godang, ai apusan ni Tuhan i do nasa ilu, lehononNa do tumpal dohot lasniroha, Amen. 

Catatan: 

Semua iklan yang terdapat pada website dan tulisan ini tidak ada hubungannya dengan timothysaragi.com. 

Dapatkan update artikel terbaru dari timothysaragi.com. Mari bergabung di Channel WhatsApp atau "timothysaragi.com Artikel Update", caranya klik link https://whatsapp.com/channel/0029VapB7ASBVJlBihjSSW2q, kemudian join. Atau di Channel Telegram, caranya klik link https://t.me/timothysaragicomupdate, kemudian join. Anda harus install aplikasi Telegram terlebih dulu di ponsel.