Jamita Minggu 26 Juli 2026 Minggu Paualuhon Dung Trinitatis tarsurat di Rom 8 ayat 26 - 30. Tapabagas ma pangantusionta taringot tu turpuk ni Jamita on. Ojahan ni Jamita i ma: "Sibahenon ni Debata tu Bangso na PinillitNa." Rap ma hita mangihuthon hatoranganna.
Pendahuluan
Molo tajaha Buku Rom bindu 8 on, adong tolu impolana. Na parjolo, ganup halak Kristen ingkon mangolu di bagasan tondi na sian Debata (ayat 1-17). Na paduahon, taringot tu hamuliaon na naeng ro, sijalahan ni angka na porsea (ayat 18-30). Na patoluhon, taringot tu hamonangan ni haporseaon i. Lapatanna naeng arahonon ni Apostel Paulus do huria na adong di Rom lumobi ma marhite bindu on asa mangantusi hinaarga, hinauli dohot hagogoon ni haporseaon laho mangadopi nasa na masa di portibi on. Ala di portibi on dope huria i, ndang dope huria na maringanan di banua ginjang, jala hombar do i tu tangiang ni Tuhan Jesus, ingkon tongtong ma mangolu huria i di bagasan haradeon manghatindanghon Kristus marhite hata manang pambahenan. Ala ni i molo masa pe angka pangaleleon songon na binolus ni Huria na parjolo i, termasuk huria na di luat Rom ingkon porsea do nasida Kristus naung manghophop huriaNa i do na tongtong mandongani jala mangurupi.
Pembahasan
Di turpuk ni Jamita di bagasan minggu on, didok si Paulus, ala ni hagaleonta gabe ndang taboto manang aha na tama sipangidoonta. Alai diurupi Tondi i do hita pasahathon pangidoanta tu Tuhan i. Adong dua alana boasa gabe ndang taboto aha na tama sipangidoonta di tangiang i: Na parjolo, ndang taboto aha na tama sipangidoonta, ala ndang taboto aha na masa tu angka tingki na mangihut. Ndang taboto aha na masa sogot. Ala ni i martangiang hita asa malua sian parmaraan. Na paduahon, ndang taboto aha na mansai ringkot di ngoluta on. Di ganup situasi, sasintongna ndang taboto aha na dumenggan na mansai ringkot tu dirinta. Jotjot do hita songon dakdanak, mangidohon sesuatu, alai belum tentu na tapangido i mansai ringkot di hita. Alai Debata diboto do aha na ringkot di ngolunta.
Ndang taboto aha na mansai ringkot di ngolunta, ala mansai terbatas do pingkiranta laho mangantusi sangkap ni Debata. Ujungna holan hata na hinaruarhon na so tangkas hinatahon i do na “diterjemahon” manang “dipaboa” Tondi i tu Debata.
Mangihuthon pandangan ni si Paulus, tangiang i sian Debata do marhite TondiNa. Ala sian Debata, gabe ndang diboto jolma songon dia tangiang na sasintongna, nang pe dipangke jolma i saluhut kemampuan ni pingkiranna. Di ayat 27 didok do: “Alai diboto Sitanda roha i do na pinarrohahon ni Tondi i, ai marguru tu lomo ni roha ni Debata do pangondihonna di angka na badia i.” Lapatanna pangidoan manang tangiang na sempurna i ma molo bulus roha ni jolma i pasahathon sudena tu Debata: “Ale Debata tu tanganMu do hupasahat tondingKu” (patudos Psalmen 31:6) jala mampu hita mandok “sai saut ma lomo ni rohaM.” Diuduti si Paulus do hatoranganna: saluhut halak na manghaholongi Debata, angka na jinouna sian tahina hian manumpak tu na denggan do binahen ni Debata. I do pardalanan ni ngolu ni hakristenon: “Allah turut bekerja dalam segala sesuatu untuk mendatangkan kebaikan.” Di angka jolma na manghaholongi Debata: segala hal (nang pe na so dihalomohon rohana) boi do i gabe pasupasu di ngoluna. Molo porsea jala dihaholongi dohot pos situtu roha ni jolma i na parholong roha Debata, boi do i tarjalo ibana di bagasan serep ni roha sude na nilehon ni Debata manumpak tu na denggan nang pe ndang na hinalomohonna i. Boasa halak na porsea jala na mangholongi Debata boi manjalo saluhutna i di bagasan serep ni roha? Ala porsea ibana Debata na parholong roha pasti selalu bekerja untuk yang terbaik (manumpak tu na denggan).
Kesimpulan dan Refleksi
Debata do situmpak angka na denggan tu saluhut angka na porsea, jadi mansai porlu do hita angka na porsea pasahathon dirinta tu Ibana marhitehite tangiangta. Ai songon Endenta do di Buku Ende nomor 487 ayat 1 "Tung halak na margogo, si partangiang i. Dokdok pe sitaonon, ndang olo talu i. Pos situtu rohana, di Debata na i. Tuhan na manaluhon, sude pangalo i." Ala ni i olo ma hita mangontang Ibana mangantoi nasa ulaonta asa disi papataronNa huasoNa mangurupi hita jala lehononNa ma tu hita angka solusi na denggan, jauh dari apa yang kita pikirkan. Unang be mabiar hita martangiang tu Ibana, ai bahenonNa do na dumenggan sijaloonta, asal ma porsea hita tu Ibana. Amen.
1 komentar