Jamita Minggu 30 Agustus 2026 Minggu Pasampulutoluhon Dung Trinitatis tarsurat di Jeremia 15 ayat 15 - 21. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Hata ni Debata Gabe Las ni Rohangku." Rap ma hita mangihuthon hatoranganna.
Pendahuluan
Panurirang Jeremia, ima panurirang na tongon di haposoonna tarjou gabe panurirang, jala diongkuhon ibana do na so talup dope ibana tu ulaon na naeng pinasaat ni Debata tu ibana. Dimulana i, dang barani ibana mangulahon panurirangon i, ala dietong ibana ulaon panurirangon ima ulaon na mansai borat situtu jala godang resiko na ingkon siadopanna (Jer. 1:4-10). Alai, ala Debata sandiri do na manjou jala manongos ibana, ndang sian hagiot na sandiri, ingkon do ulaon na parsuruon ni Debata sian unduk dohot serep ni roha. Mangula do panurirang Jeremia di masa pemerintahan raja Hosea, Yoas, Yoyakhim, yoyakhin dohot Zedekia. Pasahathon barita ni Debata do panurirang Jeremia tu bangso Juda na diatiha I mangadopi ancaman bangso Babel. Di tihas do panurirang Jeremia gabe sahalak provokator (pemecah belah), dibahen i pola dianiaya jala di hurung ibana. Bindu 15 on, ima dialog panurirang Jeremia dohot Debata di tonga ni kemelut batin (pergumulan) na niadopan panurirang I di tingki hona taban ibana ala panurirangon ni ibana di tonga-tonga ni bangso Juda. Joujou (Meratap) do panurirang i tu adopan ni Debata. Patar (Terus terang) do si Jeremia pasahathon saluhut na niadopanna jala mansai tangkas tu adopan ni Debata, aha do naniadopanna di tingki mambaritahon hata Debata ibana tu tonga-tonga ni bangso i. Laos taida ma di turpuk on padan (bagabaga/janji) ni Debata na gabe las ni roha dohot gogo di parngoluan ni panurirang i.
Pembahasan
1. Alualu (Ratapan) ni panurirang Jeremia dompak Yahowa (Ay. 15 – 18)
Andorang so turpuk on, di Ay. 10 jumpang ta do alualu ni panurirang i dompak Jahowa. Pola do sahat angguk na manolsoli hatutubuna (Bnd. Jer. 20:14-18). Jala dialusi Jahowa do alualu/ratapan ni panurirang i, marhite Ay. 11-14. Alai dung jumpang ta muse di Ay. 15-18 on, mangalualu/meratap do muse panurirang i paduahalion tu adopan ni Jahowa. Nunga apala mansai hansit na masa na niadopan ni panurirang Jeremia, pola sampe dua hali ibana alualu dompak Jahowa di angka sitaonon na niadopanna. Molo di bibel ta on, molo meratap/mangalualu angka panurirang/naposo ni Debata (Cth: Psalmen, Kitab andung, Jeremia, dll) ima na meliputi: Sebuah keluhan, membandinghon angka masa lalu na denggan dohot angka na buruk na niahap na di tingki gabe naposo ni Debata, andung boi do gabe tangiang mangido haluaon, jala andung boi do gabe pernyataan marhaposan tu Debata. Nunga loja panurirang Jeremia pasingothon bangso i asa marhamubaon, jala mulak tu Debata asa dapotan haluan. Alih-alih marhamubaon (bertobat) na pinatuduhon ni bangso i. Bahkan mengancam, manaban, bahkan pola sahat tu na naeng pusaonna/pamateonna panurirang Jeremia (Jer. 11:18-23). Molo tajaha di kitab Jeremia on, angka na masa na niadopan ni si Jeremia di panurirangonna ima: Ditangkup imam Pashur si Jeremia (20:1-2); Panurirang gapgap ni si Hananya na menentang si Jeremia di jolo ni natorop (28:1-17); Penderitaan ni si Jeremia dohot bangsona (32:1-15); Didabuhon angka induk si Jeremia tu sada godung/sumur berlumpur namun gersang (38:1-6); Penderitaan si Jeremia dohot bangso Juda di halelengse ni Jerusalem (39:1-10). Jadi sahat tu ujung ni panurirangonna, angka na dokdok do naniahapan ni panurirang Jeremia hinorhon ni hatangkangon ni bangso I dompak Debata.
Ay. 15-16: Dipungka panurirang Jeremia do alualu, na tongtong marhaposan ibana di panandaion dohot holong ni Debata Tu Panurirang i (Ay. 15). Manaon na porsuk pe ibana holan ala ni panghobasion dohot hasatiaonna do tu adopan ni Debata dohot tu parsuruon ni Debata tu panurirarang i. Marhaposan do si Jeremia ingkon do diparateatehon Debata sude angka na masa na tinaon ni si Jeremia, jala manumbolhon angka na mengancam dohot mambahen na so denggan tu ngolu na. Di Ay. 16, diingot si Jeremia do di tingki panjouonna (Jer. 1:4). Dijama Jahowa do pamangan ni si Jeremia jala sahat Hata ni Jahowa tu pamangan ni si Jeremia (1:9). Jala marhite hata i do dipabangkit Jahowa si Jeremia laho mangurati dohot maniaphon, mangago dohot mangaloha, paulihon dohot manuan (1:10). Di Ay. 16 ma taida pengakuan ni si Jeremia. Marhite hata ni Debata naung sahat tu pamanganna, jala gabe bahagian diri ni si Jeremia do Hata ni Jahowa. Hata ni Jahowa gabe las ni rohana. Disolsoli ma angka angguk/holso ni roha naniahap na ala ni panurirangon i, dung di ingot ibana Hata ni Jahowa na adong dibagasan dirina. Arga do si Jeremia di adopan ni Debata, dibahen i dipasahat hataNa tu ibana. Jadi manang aha pe namasa dipanurirangon ni si Jeremia, ala arga do si Jeremia di adopan ni Debata, ingkon do asian ni Debata ibana disandok angka na masa di panurirangon na i. Laos I do gabe gogo ni panurirang Jeremia manaon angka haporsuhon laho manurirangi dompak bangso Juda sahat tu ujung ni ngoluna satia ibana di panjouon i.
Ay. 17-18: Dipaholang si Jeremia do hadirionna dohot hajongjonganna sian angka parpunguan ni halak pangarehei (walaupun sedang dalam konteks festifal-festifal/hari raya/hari besar kejahudian yang penuh dengan hingar bingar). Mandao di Si Jeremia sian angka na torop i, ala beban panjouonna dohot pelayanan di panurirangonna. Jala dang ulaon na mura pasiding hadirion/menyingkir/mandao sian na torop (menyendiri), sementara angka na asing marsonang-sonang jala marpesta. Alai sadar do si Jeremia di tugas na pinasahat ni Jahowa tu ibana. Na ingkon saurdot do pandohan dohot di pangalaho na pinatuduhon ni si Jeremia. Nunga tangkas dipasahat Debata visi tarsingot hasesega ni bangso i, ala pangalaho na manghorhon rimas ni Debata. Jadi ala angka na nidok ni Debata do na pinasahat ni si Jeremia tu bangso i dibahen holang si Jeremia sian angka na torop i. Nangpe nunga di ula si Jeremia angka na nidok ni Jahowa, alai dokdok do parniahapan ni panurirang i. Di Ay. 18, pola mansai rimas si Jeremia dompak Jahowa, jala pola sahat didok Jahowa sipaotooto (menipu). Di pandohan on, Jeremia melangkah mendekati batas penghujatan dan bahkan melampauinya. Boi nidok, haluar do si Jermia sian kelompok na porsea tu Jahowa jala masuk tu kelompok horong na so porsea tu Jahowa (atheis). Alasan on, boi do mambahen Jahowa rimas gabe manulak hadirion ni si Jeremia, jala mamilit panurirang na asing. Alai dang diulahon Jahowa i. Diboto Jahowa do balga ni hasatiaon ni si Jeremia, jala songon dia dokdok na niadopan ni si Jeremia laho mambaritahon Hata ni Jahowa.
2. Jahowa mandongani jala paluahon (Ay. 19-21)
Di ay. 19 Dipatuduhon Debata do asi ni rohaNa tu si Jeremia. Dilehon Debata do kesempatan tu si Jeremia asa olo marbalik mambaritahon hata ni Debata tu bangsoNa. Dilehon Debata do kesempatan tu si Jeremia laho “mulak” (kata ini umumnya menggambarkan kembalinya Israel kepada Yahwe. Dan terkadang diterjemahkan sebagai “bertobat”: 1 Rajaraja 8:47-48), jala jongjong muse di jolo ni Jahowa laho marhalado. Molo dipaso si Jeremia do andung (kelehun) na dompak Jahowa, rade dope Jahowa manjalo si Jeremia gabe parhaladoNa (untuk terus menjadi hambaNya). Di ay. 19b-20, diratarata i Jahowa (dipertegas) muse padanNa tu si Jeremia songon na tarsurat di Jer. 1:18-19 “BahenonHu ma ho gabe huta na gonting dohot gabe tiang bosi dohot gabe parik haksa dompak sandok tano i”. Dicoba Bangso Juda do marhite hagogoon ni portibi laho mangalengsehon angka panurirangon na pinasahat ni si Jeremia. Alai dang tolap nasida menghancurkan Jeremia, bahkan gabe baliksa do na masa, diri nasida sandiri do gabe mandapot hinamago i. Dang alani gogo ni si Jeremia na mambahen sisongon i gabe masa, alai hagogoon ni Jahowa. Jahowa do na paluahon si Jeremia jala mangaramoti (Ay. 20). Dang hea marpadan Jahowa tu si Jeremia ingkon mandai na denggan ma si Jeremia di panurirangonna. Dang mudah na niadopan ni si Jeremia di pardalanan ni ngoluna gabe parhalado ni Jahowa. Alai marjanji do Jahowa “paluahon sian tangan ni parjahat na naeng mangago si Jeremia” (Ay. 21)
Kesimpulan dan Refleksi
1. Gabe las ni roha dohot gogo naimbaru do Hata ni Debata na pinasahat ni Debata tu panurirang Jeremia. Ido na ni ingot ni si Jeremia, dibahen na margogo ibana sahat tu ujung ni panurirangonna, bangkit ibana sian keterpurukan mental, satia ibana mangadopi angka na masa (baik penganiayaan dan berbagai penderitaan). Suang songon i do di ngolu ni angka na porsea. Ingkon marpos ni roha do hita di hagogoon bagabaga ni Debata marhite hatana na mandok “na sai dongannanKu do hamu ganup ari, rasirasa ro ajal ni hasiangan on” (Matius 28:20)
2. Tapasahat ma sude angka nahinolsohon (digumulkan) ni rohanta tu Jahowa. Dang ragu si Jeremia pasahathon na niahap na tu Debata. Angka na hansit, bahkan keraguanna tu hajongjongan ni Jahowa. Dison boi idaonta di jangkon Debata do angka na jujur jala tulus pasahathon angka na solot di ngoluna, angka na sorat i tu adopan ni Debata. (Lih: Mat. 11: 28: Ro ma hamu tu Ahu, hamu angka na loja jala na sorat, asa hupasonang hamu). Jumpangta do haluaon dohot hagogoon mangadopi angka parungkilon i, molo tapasahat sude angka na sorat di ngolunta tu adopan ni Debata
3. Mulak ma tu panjouon Ni Debata. Dung di ingot si Jeremia hata ni Debata di tingki panjouonna, gabe mulak do gogona laho manaon angka parsorionna, jala dipangke Jahowa muse si Jeremia di ngoluna gabe parhaladona. Taingot ma muse panjouon ni Debata di tongatonga ngolunta. Marhite hata ni Jahowa, mulak ma muse hita tu “koridor” panjouon i. Jala pergumulan na ta adopi, gabe bahagian ni panjouon ni Debata do di tongatonga ni ngolunta. Dang gabe so ditiop persoalan/pergumulan/beban hidup hita. Alai na didongani Debata do hita di sandok angka na masa i, jala paluaona na hita sian angka musunta na naeng mangago hita. Porsea ma hita disi jala porsea ma hita di Hata ni Debata na gabe hagogoon di pardalanan ni ngolunta. Amen.
Posting Komentar