Jamita Minggu 9 Agustus 2026 Minggu Pasampuluhon Dung Trinitatis tarsurat di Mateus 14 ayat 22 - 33. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Pos ma Rohamuna, Unang Mabiar." Rap ma hita mangihuthon hatoranganna.
Pendahuluan
Somalna sai rap borhat do Jesus dohot angka siseanNa molo nunga sidung mangajari sian sadasada huta. Alai sahali on ndang songon i masa, dung sun dilehon Jesus mangan na torop i, disuru do jumolo angka siseanNa marparau asa taripar tu bariba (Genesaret), didok asa jolo dipamuli Ibana jo angka na torop i. Dung muli angka na torop i holan sasada Ibana nama di inganan i, nangkok dope Ibana tu sada dolok laho martangiang.
Tarhira dung lima kilo meter daona di tao i posisi ni parau na tinumpangan ni angka sisean i, tompu ma ro alogo sakal na patupa galumbang na balga situtu di tao i. Didosak do parau na tinumpangan nasida i. Gabe mabiar situtu ma nasida sude na di bagasan parau i. Tamba do muse biarnasida ala tompu adong dibereng di sisik ni aek i mardalan hira jolma, dirimpu rohanasida begu do i, hape Jesus do. Tongon na di bagasan biar i nasida, hombar tu ojahan ni jamitanta on, dipanghulingi Jesus ma nasida, didok: Pos ma Rohamuna, Unang Mabiar.
Pembahasan
Sasintongna molo taringot tu ombak, habahaba, naik dohot surut pasang nunga somal i diadopi angka sisean i, apalagi ma angka nasida mantan pardengke i (nelayan). Alai nang pe naung marpengalaman nasida mangadopi si songon i, ra dibahen naung leleng i ndang hea be diadopi na songon i, dung i muse ala naung loja nasida manghobasi sipanganon tu na torop nakin, angka i ma deba na gabe mambahen mombut habaranionna, manang pasuruthon habaranionna di na masa i. Gok holso dohot biar do nasida di situasi i. Laos tamba muse do holsona dung tarbereng nasida adong songon tondi (begu) mardalan di sisik ni aek i mandapothon nasida, aha ma tutu so lam tamba biar nasida. Di ayat 26 didok, "marlangan jala pola mangangguhi be nasida." Tuani do pintor dipanghulingi Jesus nasida, didok, "pos ma rohamu, Ahu do on, unang hamu mabiar" (ayat 27), dung i pintor hira na mago ma di na satongkin i holsonasida i. Alai dalan mamastihon i didok si Petrus do: "Ale Tuhan, molo Ho do hape, dokhon ahu ro mandapothon Ho, mardalan sian aek i" (ayat 28). Marpanganju do Jesus di hahurangan ni haporseaonnasida i, gabe didok ma tu si Petrus: "Ro ma antong" (ayat 29). Saut do mijur si Petrus sian parau i, mardalan sian aek i mandapothon Jesus. Alai ala otik ni haporseaonna, tongtong do gumogo roha biar sian haporseaonna, na mangarajai roha dohot pingkiranna di situasi i, ujungna gabe naeng lonong do ibana (ayat 30). Alai di partingkian na marhadirion si songon i pe si Petrus, tongtong do dipalua Jesus (ayat 31).
Jadi nang pe hape naung ariari angka sisean i rap dohot Jesus, alai hurang dope panandaionnasida tu hadirion ni Jesus. Tarlumobi ma si Petrus na mangetong dirina sandiri naung tumangkas mananda Jesus, alai tong dope hape marganggu ni roha ibana di lambung ni Jesus i. Hape na baru dope Jesus patupa tanda halongangan marhite 5 roti dohot 2 dengke, alai hurang porsea dope si Petrus tu huaso dohot hagogoon ni Jesus. Berarti intap ni na manghaporseai (believe) sambing dope nasida di huaso ni Jesus, ndang sahat dope tu na manghaposi (trust). Dung pe so alogo i dibahen Jesus, asa didok nasida "tutu do Ho anak ni Debata" (ayat 33).
Kesimpulan dan Refleksi
1. Saleleng mangolu di hasiangan on dope hita, ndang tarpasiding hita ragam ni galumbang ni ngolu. Tingki sadihari manang di inganan dia pe, na boi do ro galumbang dohot habahaba i tu sude jolma nang pe so dipangido. Ndang mardia imbar halak na tinompasna; na poso manang na matua, na marpangkat manang ndang, na pogos manang na mora, tung sude do hita on disonggopi. Sipata tompu do harorona, jala sipata marudutudut (bertubitubi). Siala i, margogo/manahan manang ndang, ianggo galumbang i ingkon adopanta do. Antong ndang adong gunana molo lari hita, ala ro do ibana mandapothon hita di tingki na so tinagam. Dibahen i ma asa ingkon adopanta do nasa na masa i mardongan pos ni roha tu Debata. Ra atik adong nuaeng sada manang dua, manang nunga marudutudut haroro ni galumbang (parsoalan) i mangarongom ngolunta, pola gabe songon na marlangan bohinta (hilang semangat hidup, putus asa) jala sai tumatangis di si habunian, soara ni jamitanta sadari on marsaringar paposhon rohanta mandok: Pos ma Rohamuna, Unang Mabiar. Angkup ni i parpsalmen mandok: Sai manatap do mata ni Jahowa tu angka partigor, jala pinggolNa tu angguknasida (Psalmen 34:16). Sian na so tinagam ni angka sisean i do haroro ni Jesus, dipaboa di jamita on, laho paluahon nasida. Songon i do Jesus nantoari, songon i sadari on, sahat ro di salelenglelengna (Heber 13:8). Antong pos ma rohanta, di na laho mamanghulingi hita pe jotjot sian na so tinagam do haroroNa marhite ragam dalan.
2. Haporseaon i do padamehon roha ni angka na di bagasan biar. Porsea do hita paboa na so loasonNa holan sasada hita susa mangadopi parsoalan ni ngolunta. Ai ndang adong parsoalan na so boi sidung bahenon ni Jesus, molo tajouhon Ibana songon na binahen ni si Petrus di jamita on. Sian pengalaman na songon i do tongtong gabe tubu panindangion ni si Paulus mandok: Saluhutna do tarpatupa ahu marhitehite Ibana, na margogoihon ahu (segala perkara dapat kutanggung di dalam Dia yang memberi kekuatan kepadaku) (Pilippi 4:13). Si Petrus pe gabe didok do: Tingganghon hamu ma nasa na hinolsohon ni rohamuna tu Ibana, ai disarihon do hamu (1 Petrus 5:7). Hata "tingganghon" dison, di hata Indonesia "serahkanlah". Hatiha dijouhon laos "diserahkan" si Petrus parsoalanna i tu Jesus, pintor disurdukhon Jesus do tanganNa paluahon ibana. On ma las ni rohanta martuhanhon Tuhan Jesus Kristus, ai ndang diloas hita madabu sandiri di parsoalanta, asal ma girgir hita manjouhon goarNa. Na bisuk mandok: seribu tangan menarik kita ke bawah agar tenggelam, tetapi hanya dengan satu tangan Tuhan Yesus dapat mengangkat kita ke atas menyelamatkan kita.
3. Gabe dame do panghilalaan molo tangi hita di hata ni Jesus. Ro hata ni Jesus mandok, "Pos ma rohamu, ahu do on!", maksudna ndang begu ahu, alai Tuhanmu do na ro laho paluahon hamu. Sian na tumangihon i do mamboan nasida tolap mamereng halongangan (mukjizat) pinatupa ni huaso ni Jesus. Angka dongan, tapareso be ma jo dirinta, ra torop dope sian hita na hurang girgir tumangihon hata ni Debata, ujungna ndang tolap marnida angka halongangan na pinatupaNa di ngolunta. Hatiha ro parsoalan ni ngolunta, ndang jumpa hita dalan haruar na tama, ujungna olo ma gabe paningkotningkoton. Manangihon hata ni Debata, ndang sae holan umbegesa, ai na paotooto dirina do na songon i (Jakobus 1:22), alai ingkon pahusorhusorhon do laos hangoluhonon, asa martua hita. Ingkon paradeonta do tingki, roha dohot pikiran na ungkap, songon didok di BE. No. 815 "Uli do tingki na hohom" (Indahnya saat yang teduh). Ai jotjot do ndang tatanda jala ndang tasadari naung Debata do hape na ro marhite suruanNa laho paluahon hita. Taingot do ra ilustrasi taringot tu na masa banjir bandang, ro parparau suruan ni Tuhan i naeng paluahon sahalak naung sai martangiangi di ginjang tarup ni jabuna, alai ndang olo ibana naek tu parau i. Hatana mandok tu par parau i, lao ma hamu, ro do annon Tuhanhu paluahon ahu, ninna. Ndang disadari, ndang ditanda hape na par parau i do hape naung sinuru ni Tuhan i paluahon ibana, songon alus ni tangiangna i. Jadi suman tusi, jotjot do ndang tasadari naung Debata do ro marhite suruanNa laho paluahon hita, alai tatulak. Toho do hita naung tadok parhaporseaon na togu, bulus pasahathon diri dohot ngolu tu Debata (orang saleh), alai caranta mangarespon pambahenan ni Debata jotjot lipe. Angka sisean i pe taida di turpuk on, sai dirimpu nasida do begu na ro i, gabe tamba ma biarna, hape sasintongna naung Jesus i sandiri do na ro i. Antong pos ma rohanta, unang mabiar mardalan raphon Tuhan i. Amen.
Posting Komentar