Jamita Partangiangan Epistel Minggu 13 September 2026 Minggu 15 Dung Trinitatis tarsurat di buku 1 Petrus 2 ayat 1 - 10. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Jahowa Patupahon Parulaon na Bolon tu BangsoNa." Rap ma hita mangihuthon hatoranganna.
Pendahuluan
Si Petrus, ima sada sian sisean ni Jesus na mansai godang panghobasionna di gurithon di Bibel. Dimulana, ia goarna ima si Simon, alai mamungka sian uju dijou ibana gabe sisean ni Jesus disingkat Jesus do goarna gabe si Petrus (bah. Yunani) manang Kefas (bah. Aram) na marlapatan “Batu Mamak.” Jala didok Jesus do, pajongjongon bagas joro ni Debata di atas ni si Petrus (Mateus 16: 18).
Marmula sian panghobasionna mangihuthon Jesus, diuduti do panghobasionna i marhite na pajongjong huria di Antiokhia dohot di Korintus. Alai nangpe gabe uluan dohot parhobas ibana di Antiokhia dohot di Korintus, diradoti ibana do nang haporseaon ni angka huria na marserak di Asia na metmet, marhite na tinongosna suratna tu angka huria i. Di suratna na parjolo, ditongos do tu huria na lima, ima huria: Pontus, Galatia, Kappadosia, Asia dohot Bitinia
Turpuk epistel on, ima bagian ni surat ni si Petrus, na paingothon asa tongtong huria i dibagasan ngolu hombar manang songon naung tubu paduahalihon nasida, na ingkon patar marhite-hite na radot manghangoluhon haporseaon i, ima turpuk epistel on.
Pembahasan
1. Pasiding hajahaton, angkal, pangiburuon dohot panihaion (ay. 1-3).
Digoari si Petrus do huria na lima i, ima huria naung pinillit. Somalna, molo mamillit sipillton, sai itapillit do na dumenggan, jala molo dung dipillit, dipabahir ma i sian angka na so tarpillit i. Ido dipaingot si Petrus tu huria i, paboa nasida nunga tarpillit gabe siihuthon Kristus, jala nunga dipabahir sian angka na so tarpillit.
Songon angka naung tarpillit, ingkon tangkas do hataridaan ni haulion ni angka natarpillit i. Jesus do mamillit nasida, jala pamilliton ni Jesus i nionjar ni holong ni Tuhan i. Asa gabe uli nasida, mudar ni Jesus do na mamuri nasida, alani ido digoari nasida naung tubu paduahalihon.
Paboa naung tubu paduahalihon, ingkon padaoon manang pasidingon nasida ma angka parulan na so lomo roha ni Tuhan i. Si Petrus manggoari angka sipasidingon ni huria i, ima hajahaton, angkal, pangiburuon dohot panihaion. Ra sungkun-sungkun do rohanta mandok, ai holan na opat on do sipasidingon ni angka na porsea angka naung tubu paduahalihon? Sungkun-sungkun on nunga dicoba angka na malo mangalului boasa holan na opat on sipasidingon. Na deba mandok, angka pangalaho na opat on, ima angka ulaon na jotjot di ulahon Halak Yahudi, alani i, ingkon tangkas do patar di ngolu ni Halak Kristen, na so saurdot nasida dohot Halak Yahudi. Na deba mandok ala sipasidingon na opat on, ima angka ulaon na somal diulahon ni angka na magodang, ai poso-poso manang dakdanak ndang boi dope mangulahon na songon i. Alai laos adong do na menyangkal pandapot on mandok, angka dakdanak jotjot do mangulahon pangiburuon. Adong do na mandok muse, paboa sipasidingon na opat on, mansai jotjot do i manegai parsaoran ni huria. Molo songon i, dia do tutu maksudna umbahen na didok si Petrus na opat sipasidingon on?.
Nang pe holan opat bagian na ingkon sipasidingon ni angka naung tubu paduhalihon didok si Petrus, sasintongna ndada na opat i sambing nanidok ni Petrus di surat na i, alai lobi sian i, nunga didok angka panurirang dohot Jesus nang apostel na asing pe, ima na digurithon di buku na badia i. Ido umbahen na didok si Petrus, asa songon poso-poso na imbaru tubu ma hamu na uasan di susu na tama.
Dihasomalhon jolma di sandok hasingan on, nasa poso-poso na baru sorang sahat ro di na marumur 6 (onom) bulan, ndang adong sipanganon na asing panganon dohot inumonna so holan susu murni sian inana, manang Air susu Ibu na lebih dikenal dengan ASI. Gabe sada gombaran do i dibahen si Petrus, na manggombarhon susu natama nanidokna ima hata ni Debata. Huria na di Asia na metmet, targoar do songon poso-poso na imbaru tubu, ala na baru dope nasida mananda Kristus i. Alani i, molo tung godang angka suara dohot aturan na mambahen bingung nasida, aeng ma manontong nasida marsihohot tu hata ni Debata, ima diparguru jala dibahen gabe suhat-suhat.
2. Rade gabe batu na mangolu (ay 4 - 10)
Dimulana, molo pajongjong sada bangunan, sai dipillit do batu na tumogu (pir), dipeakhon ma i di suhi ni bangunan na naeng dipajongjong i, laos batu i ma manea sandok bangunan i. Di tingki Padan na robi, nunga disuriranghon si Jesaya paboa peakhonon ni Debata ma batu na togu, jala tarpillit di Sion, ima gabe ojahan na togu (Pat. Jes 28: 16-17). Hata i, nunga dipatulus Debata marhite na haroro ni Mesias, ima Jesus na digoari Batu Parsuhi. Dipatangkas si Paulus ma i di na nidokna: Kristus Jesus sandiri gabe batu parsuhi (Ef 2: 19-21).
Di turpuk Epistel on, dipasunggulhon si Petrus do huria i, paboa nunga didapothon nasida Ibana, songon batu na binolongkon ni pande bagas, alai gabe batu na pinillit jala arga di Debata. Pandohan on, marsipatudu do i tu Jesus Kristus, ai nunga songon na dibolongkon Jesus di hau silang i, mate jala ditanom. Alai hehe do Ibana di ari patoluhon, jala manaek tu banua ginjang, hundul di siamun ni AmaNa di Surgo i.
Nunga dioloi jala diihuthon huria Jesus i, alai ndang mansohot olat ni i, adong dope siradotan nasida, ima na ingkon rade do nasida dipauli gabe batu na mangolu. Songon dia do tompa ni batu na mangolu. Somalna molo magodang aek di dolok, sai olo do aek i mamboan batu, pola olo ditompas huta di toruan. Alai na nidok ni si Petrus batu na mangolu ndang songon i, alai batu sunge na mardalan mangalo arus ni aek nangkok tu dolok, dohot cara: uju ro aek sian dolok, ndang boi dibaor batu i, gabe rihit i do mabaor jala lam leleng lam bagas ma habaoran ni rihit i, laos disi ma batu i maju tu jolo. Songon i do na nidok ni si Petrus asa huria i gabe batu na mangolu, ima na tongtong bertahan di hata ni Debata gabe ndang taraithon portibi on nasida, alai di atas ojahan na togu ima Jesus Kristus, tongtong do maju nasida mamareahi na dumenggan.
Kesimpulan dan Refleksi
Di minggu on, tapestahon do parale-aleon ni huria HKI dohot huria EKK Hamm di Jerman. Mansai las do roha ni HKI dung boi marale-ale HKI dohot angka huria na marragam di hasiangan on. Ai mamungka sian mulai jongjong taon 1927 godang do na so olo mardongan dohot HKI, jala ruas na martondong tu HKI, sai dipabali do sian huria nasida. Dung pe di taon 1965, mulai ma mardongan HKI tu HKBP, laos marudut ma tu angka huria nang lembaga na asing, temasuk ma maraleale HKI dohot EKK Hamm di taon 1981, laos mamungka sian i, tapestahon ma paralealeon i, songon di minggu on.
Marhite turpuk epistel on dipasunggulhon do tu hita, i ma:
1. Huria na mangolu ima huria na tongtong pasiding diri sian hajahaton, angkal, pangiburuon dohot panihaion. Jala nang pe dibahen dongan angka na songon i, ndang jadi baloshonon. Ai molo dibalos na jat alo ni na jat, lam pararat hajahaton do hita di si. Alai molo tabahen na denggan balos ni na jahat, gabe lam moru ma hajahaton i.
2. Na marhaha anggi do saluhut ruas ni huria i. alani i, naeng ma nian Jesus gabe ojahan ni parsaoran di huria. Gabe lam tu ulina ma huria i jala gok pasu-pasu, ai diparbaga Debata do pasu-pasu na godang tu na marsada roha.
3. Nunga diloas Tuhan i hita marale-ale dohot EKK Hamm, nang pe asing hata, dohot warna kulit, alai Jesus Kristus ulu ni huria, ido na padomuhon hita. Antong marsangap ma Jesus I di parsaoranta dohot dingolunta marsada-sada. Amen.
Posting Komentar