Jamita Partangiangan Epistel Minggu 20 September 2026 Minggu 16 Dung Trinitatis tarsurat di buku Jona 4 ayat 1 - 11. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Saluhutna do Tarpatupa Ahu di bagasan Tuhan." Rap ma hita mangihuthon hatoranganna.
Pendahuluan
Buku ni panurirang Jona i ma buku na mamaritahon pengalaman ni panurirang Jona. Goar Jona lapatanna i ma pidong "darapati", anak ni si Amitai sian huta Gat-Hefer; 800 km dompak Irisanna (Timur Laut) sian tao Galilea. Buku on patariashon ulaon panghobasion ni panurirang Jona, na sinuru ni Debata laho paingothon huta Ninive (ibu kota ni harajaon Assur), alai gabe laho do ibana sumoding manuntun lomo ndang mangulahon parsuru ni Debata na tu ibana. Dung dibondut ihan na balga, dung i diutahon, mulak ma ibana borhat tu Ninive pasauthon parsuru ni Debata mandok asa marhamubaon tu pangisi ni huta i. Haundukon dohot pangoloion ni panurirang Jona di parsuru ni Debata manghorhon haluaon ni huta Ninive sian uhum ni Debata. Sian barita on dipapatar do hagogoon dohot asi ni roha ni Debata, songon i nang ringkot dohot uli ni na pauba roha (bertobat).
Pembahasan
Ndang tarotapan holong ni Debata mandok dilehon holan tu halak Israel, bangso na pinillitNa i, alai tu saluhut jolma na di portibi on do (Johannes 3:16). Di sada sisi, tardok do barita na tarsurat di Jona 4:1-11 on patuduhon sikap eksklusivisme ni panurirang Jona, alai di sisi na asing pabotohon perhatian dohot kepedulian di Debata tu halak Ninive. Ditulak panurirang Jona do borhat tu huta Ninive laho palumbahon halelengse ni huta i. Boasa? Ala ibu kota ni harajaon Assur do Ninive, musu ni bangso Israel, na tumagon malengse di roha ni panurirang Jona. Alai ndang i sangkap ni Debata, dihaholongi Debata do saluhut jolma, jala ndang adong na tuk mangotapi Debata di panghaholongion dohot di na marpamuati rohaNa.
Piripirion Panurirang Jona (ayat 1-3)
Ndang dioloi panurirang Jona parsuru ni Debata borhat tu huta Ninive, alai di ujungna marhite barita na di bagasan butuha ni dengke, sahat do ibana tu huta i (2:17; 3:10). Mangalumbahon halelengse ni huta Ninive do anggo ulaonna (3:4). Alai gabe sogo do rohana jala muruk ibana tu Debata ala marpamuati rohaNa tu huta i ala olo jala ro raja nang sandok pangisi ni huta i pauba roha jala mangido asa marpamuati roha ni Debata (3:1-10). "Alai sogo situtu do roha ni si Jona disi, jala piripirion ibana" (4:1). Di bagasan murukna i, sadar do panurirang Jona ia Debata; songon na nidokna di tangiangna i, i ma " … Debata parasi roha jala pardengganbasa, lambat tarrimas, jala parasi roha godang, jala na olo sumolsol rohana taringot tu hamagoan" (4:2). Alai justru holong ni Debata dohot roha na marpamuati i do na mambahen panurirang Jona gabe piripirion jala mangido tumagon ma ibana mate, di pandokna: " … ua buat ma tagonan hosangku sian ahu … " (4:3). Marimbar do sikap eksklusif ni panurirang Jona on tu sangkap ni Debata na manghaholongi dohot na marpamuati maradophon huta Ninive. I do alana umbahen na disangkapi Debata laho paingothon (menyadarkan) panurirang Jona.
Dipaingot Debata Panurirang Jona (ayat 4-9)
Dipaingot Debata Panurirang Jona, parjolo marhite sungkunsungkun: "Tung turut ma ho marro ni rimas?" (4:4). Sian sada sisi layak do panurirang Jona muruk. Musu ni bangso Israel do Ninive; pantas do i molo gabe malengse, ndada gabe dihaholongi jala marpamuati roha marnidasa. I ma anggo sian roha ni jolma. Alai ndang martomu i maradophon sangkap ni Debata songon na nidok ni panurirang Jona di tangiangna i mandok ia Debata parasi roha do Ibana jala pardengganbasa, lambat tarrimas, jala parasiroha godang, jala na olo sumolsol rohaNa taringot tu hamagoan. Borhat sian las ni roha ni panurirang Jona (mangaloas huta Ninive malengse) dipaadop tu sangkap ni Debata tu huta i.
Dipamanat panurirang Jona do sian balian ni huta Ninive manang aha na naeng masa tu huta i (4:5). Di tingki i ma dipadiri Debata hau dulang sada bahen parlinggoman di atas ni uluna, jadi las situtu roha ni panurirang Jona (4:6). Alai satongkin do las ni rohana i, sogotna i di parnangkok ni sibalik hunik, nunga mate hau i ala ni gulokgulok na pinadiri ni Debata (4:7). Dung i binsar ma mata ni ari, ro ma alogo na mohop sian Purba, didoit mataniari ma ulu ni panurirang Jona. Mandate ma rohana jala didok: "Dengganan ahu mate sian na mangolu!" (4:8). Roha na mandate sahalion marimbar do i sian na parjolo. Anggo mulana mandok tumagon agoan hosa panurirang Jona, ala dihaholongi jala marpamuati roha ni Debata maradophon huta Ninive. Alai na paduahon on, mandok tumagon ibana mate siala ni hasonangan dohot las ni roha na nihilalana i holan parsatongkinan. Roha na mandate i duansa berpusat tu kepentingan ni dirina sandiri do. Muruk panurirang Jona jala mandok tumagon ibana mate ala dihaholongi jala marpamuati roha ni Debata tu huta Ninive, hape di rohana haru malengse nian huta i. Muruk panurirang Jona jala paduhalihon mandok tumagon ibana mate, ala malos hau dulang na gabe parlinggomanna i, na patubu sonang dohot las ni roha di ibana (4:9). Sihol ni roha (keinginan) i maralo maradophon sangkap ni Debata.
Dihaholongi Debata do Ninive (ayat 10-11)
Dihaholongi Debata do luhut jolma, saluhut nasida na marhatopothon dosana jala olo pauba rohana, marpamuati do roha ni Debata mida nasida. Suang songon i do nang huta Ninive. "Baliksa pala ahu, tung so marasi ni roha ahu mida Ninive, huta na bolon i, na marisi lobi saratus dua pulu ribu jolma … " Haru sasada panurirang Jona dihaholongi jala marpamuati do roha ni Debata, lumobi ma pangisi ni huta Ninive na olo ro marhatopothon dosana, olo paubahon rohana jala ro tu adopan ni Debata mangido asa marpamuati rohaNa.
Kesimpulan dan Refleksi
- Songon panurirang Jona na bersikap eksklusif jala mementingkan diri, suang songon i do nang di roha ni luhut jolma, songon i nang halak Kristen; dapot roha do si songon i. Alai, songon halak Kristen, sasintongna ndang tama be marroha jala marparange na berpusat holan tu hadirionna, ingkon fokus tu Kristus, na gabe Sipalua di ibana, jala mangolu di bagasan lomo ni rohaNa (Pilippi 2:5). Songon hata ni Buku Ende nomor 476, "Ndada au guru di au be, Jesus do nampuna au. Las rohangku dung hubege Jesus Sipangolu au. Ndang be au guru di au, Jesus do humophop au, nampuna au. Tung saleleng au mangolu, Jesus do nampuna au."
- Jahowa Debatanta i ndada sarupa tudosanna tu standart ni hajolmaon. On do na gabe tona (pesan penting) sian barita ni panurirang Jona. Holong i do Debata (1 Johannes 4:8, 16, Indonesia, Allah itu kasih). Holong, i ma: Marasi ni roha, mardenggan basa, lambat tarrimas, parasi roha godang jala na olo sumolsol rohana taringot tu hamagoan. Holong i, ndada siida bohi manang eksklusif, alai silehonlehon do i tu saluhut na tinompaNa.
- Ndang tarula jolma haholongon i anggo sian dirina sandiri (patudos Rom 7:14-25). Ai ndang tarlangkahon jolma i nanggo sallangka na ture molo so mardonganhon Debata. Songon panurirang Jona na so tarbahen ibana mangalangkahon simajojakna mangoloi Debata ala borhat sian hadirion dohot kepentinganna, alai ala ni huaso ni Debata na pinapatarNa marhite halongangan gabe tarbahen ibana bongot mangulahon parsuru ni Debata. Suang songon i do nang ngolu ni angka na porsea di Jesus Kristus, ingkon mardonganhon Jesus do, asa gabe tuk patupahon haholongon i, di tingki na une nang so une, maradophon saluhut jolma nang nasa na tinompa pe. Dilehon do Tondi Parbadia na gabe hagogoon dohot hatauon di angka na porsea mangoloi Ibana. Songon pos ni roha ni Apostel Paulus, songon i ma nang angka na porsea mangauhon: "Saluhutna do tarpatupa ahu marhitehite Ibana, na margogoihon ahu!" (Pilippi 4:13). Amen.
1 komentar