Jamita Partangiangan Epistel Minggu 26 Juli 2026 Minggu 8 Dung Trinitatis tarsurat di buku 2 Musa 19 ayat 1 - 6. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Sibahenon ni Debata tu Bangso na PinillitNa." Rap ma hita mangihuthon hatoranganna.
Pendahuluan
Buku 2 Musa on jumpang hita do catatan taringot tu hasopar manang hagabeon ni bangso Israel na mansai denggan jala berkembang di tano Misir. Hinorhon ni hamajuon dohot denggan ngolunasida gabe tubu ma kegelisahan ni bangso Misir mamereng godang ni pinompar ni bangso Israel. Panghorhon kegelisahan i gabe dipatupa raja Piraun ma 2 strategi laho mangorui laju pertumbuhan pinompar ni bangso Israel, ima: Marhite kerja paksa/ kerja rodi asa loja situtu angka baoa na karejo i jala marmatean di inganan kerja paksa i; kemudian dibunu ma posoposo baoa na tubu marhite angka bidan dohot parangan ni raja Piraun. Di peristiwa na songoni ma tubu si Musa jala magodang di Istana raja Piraun. Dung magodang si Musa dipajongjong Tuhan i ma ibana manguluhon bangso i mulak sian tano Misir. Laos ido tema utama ni buku 2 Musa on: peristiwa haboborhat ni bangso Israel sian tano Misir (tano parhatobanan) menuju tano Kanaan (tano parpadanan) na gok susu dohot situak ni loba, i ma tano kemerdekaan.
Pembahasan
Di bindu 19 turpuk Epistelta tu Minggu VIII dung Trinitatis on, dibaritahon do pardalanan ni bangso Israel na niuluhon si Musa sahat tu halongonan/ padang gurun Sinai jala jonok na ma i tu dolok Sinai. Marsaro (berkemah) ma nasida di halongonan i hirahira sataon ma lelengna. Tubu sungkunsungkun di roha, boasa maradian bangso Israel na niuluhon si Musa di halongonan i?? Alusna ala di bagasan pardalanan do nasida sian tano Misir tu tano Kanaan, tontu adong ma sangkap dohot tona na naeng sipasahaton ni Tuhan i tu nasida songon bangso naung dipillit sian sude bangso na adong di tano on.
On ma hata ni Tuhan i tu bangso Israel marhite si Musa: "Songon on ma dohononmu tu pinompar ni si Jakob, paboaonmu tu halak Israel. Nunga diida hamu na Hubahen i tu halak Misir, na huboan i hamu hira di atas ni habong ni pidong rajawali pasahat hamu tu Ahu." Sian pandohan on boi berengonta hadirion ni si Musa songon pemimpin ni bangso Israel (na manguluhon bangso i) huhut songon naposo ni Tuhan i (na pasahathon angka hata dohot tona sian Tuhan i tu bangso Israel).
Adong dua kata kunci na gabe ondolan na mansai arga dihata on, ima nunga diida dohot huboan. Tangkas situtu do nunga diida bangso Israel pambahenan dohot huaso na dipatupa Tuhan i tu halak Misir umbahen na boi malua nasida sian parhatobanan Misir. Dipatupa Tuhan i do hukuman manang tulah tu halak Misir jala ndang adong solusi ni tulah i, asing ni “menyerah” nasida tanpa syarat. Jadi ndang adong be alasan nasida marsidalian di bagasan haluaon na pinatupa ni Tuhan i, ai ndang adong gogo dohot peran ni jolma di bagasan haluaon na dipatupa Tuhan i. Holan gogo dohot pambahenan ni Tuhan i do umbahen boi nasida malua sian parhatobanon Misir. Kemudian, "Na Huboan i hamu." Tuhan i sandiri mamboan bangsoNa i marhite si Musa naposoNa i ruar sian parhatobanon Misir. "Huboan hamu hira di atas ni habong ni pidong rajawali", on ma sada gombaran na dipangke panurat buku 2 Musa on laho manggombarhon hagogoon dohot huaso ni Tuhan i na marhapataran situtu di na ruar bangso Israel sian parhatobanon Misir.
Angka dongan, dung disunggulhon Debata tu bangso Israel angka pambahenanNa i, didok ma muse: "On pe molo ditangihon hamu soarangku jala diradoti hamu padan na Hubahen i, jala hasianKu ma hamu sian nasa bangso, ai gok di Ahu do liat portibi on." Molo ditangihon hamu soarangKu... gabe hasianKu ma hamu. Ringkot adong parsitutuon laho manangihon soara ni Tuhan i, ringkot adong ungkap ni roha dohot roha na serep (ada kebutuhan untuk mendengar). I do na dihirim Tuhan i sian bangsoNa. Molo rade nasida mangulahon i (hati yang mendengar), dibagabagahon Tuhan i ma gabe anak/ boru hasian ma bangso Israel i di joloNa. Manjadi harajaon malimmalim ma bangso i di Debata, jala bangso na badia. Ima hinaarga ni bangso i diadopan ni Debata.
Kesimpulan dan Refleksi
Dipangido Tuhanta naung manjou hita gabe marga na pinillit, hamalimon na raja, bangso na badia, houm na ginomgomanna, naung manjou hita sian na holom tu hatiuronna halongangan i (1 Ptr 2: 9) lam hatindangkononta ma na tongtong do Debata berkarya di bagasan ngolunta. Anak/ boru hasianNa do hita na berhak menikmati “fasilitas” na adong di Ibana. Jalo jala daima di bagasan roha mauliate huhut argahon ma saluhut pambahenan ni Debata di bagasan gulmit ni ngolunta, keluarganta, hurianta, bangso dohot negaranta. Amen.
Posting Komentar