Jamita Minggu 18 Oktober 2026 Minggu Paduapuluhon Dung Trinitatis tarsurat di 2 Petrus 1 ayat 3 - 11. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Dijou jala Dipillit Debata." Rap ma hita mangihuthon hatoranganna.
Pendahuluan
2 Petrus 1:3-11 marisihon sosososo manang sipaingot mamarangehon habadiaon; i ma marhite na manjou na porsea asa marurat jala martumbur huhut matoras di asi ni roha dohot parbinotoan ni Kristus Jesus. Jala mangondoshon na tongtong do diparade Debata do angka na ringkot di ngolu ni angka na badia jala tontong martambatamba gogo dohot bisuk di na mangula angka ulaon na marguna di panjouon dohot pamillitonna.
Panjouon dohot pamilliton i dipatupa marhite pangauhononna tangkas manosohon angka na porsea mangauhon sian nasa gogo, marhite denggan ni parange di bagasan haporseaon i, dung i marhabisuhon di bagasan parange na denggan sian pangarajumion ni diri, manghaholongi dongan di bagasan biar mida Jahowa, marhite na mangulahon angka ondeng nunga patandaphon panjouon dohot pamilliton na tu hita, togu marurat martumbur jala marparbue di bagasan ngolunta na mamboan hita tu lomo ni roha ni Debata.
Pembahasan
Tangkas do taboto jala taantusi tujuan ni Debata manjou jala mamillit hita adong di portibi on, i ma asa marlapatan, manang marguna tu na humaliang hita. Pandohan godang do na tarjou alai otik do na tarpillit ndang na mandok na mamilliti, na so adil Debata, alai na godangan do jolma mamillit dirina asa unang tarpillit.
Asa marlapatan ngolunta ingkon barani do hita ndang sarombang dohot portibi on, jala hibul mangihuthon Tuhan, tanda na pilillit ni Debata hita. Huaso ni Debata naung dibasabasahon tu hita nasa na tau di hangoluan dohot hadaulaton, angka na marguna di ngolu na marhabadiaon, sian panandaionta di Debata na manjou hita di bagasan huasoNa na marmulia jala gok halongangan i, i ma marhite na nilehonNa tu hita hagogoon ni hadebataonNa i. Asa gabe partohap hita di hadebataonNa i. Ngolu na marhabadiaon i ma ngolu na dipapulik sian haholomon ni portibi on: Ndang sarombang dohot portibi on, marhaporseaon na togu jala na taruji, ringgas mulaulaon jala marparbue, ndang gabe batu partuktuhan.
Ndang Sarombang dohot Portibi on (ayat 4-6)
" ... Dung sanga maporus hamu sian hamagoan, na di bagasan hahisapon na di portibi on" (ayat 4). Di tingki sarombang hita dohot portibi on, on ma na mambahen hita mago jala mate, ndang partohap di hadebataon. "Dibahen i, haringgashon hamu ma sian nasa gogo, manurdukhon denggan ni parange di bagasan haporseaon i, dung i habisukon ma di bagasan parange na denggan i" (ayat 5). Marhite na olo hita " ... manurdukhon denggan ni parange di bagasan haporseaon i, dung i habisukon di bagasan ma parange na denggan i; dung i pangarajaion diri na di bagasan habisukon i, dung i habengeton ma di bagasan pangarajaion diri i, dung i hadaulaton ma di bagasan habengeton i" (ayat 5-6).
Baca juga: Khotbah Minggu 18 Oktober 2026 - 2 Petrus 1 ayat 3-11
Marhite na so sarombang dohot portibi on nunga tajalo be gogo dohot asi ni roha ni Debata na gabe sarombang manang sapangalaho (karakter) hita dohot Kristus Jesus na manaluhon portibi on. Tongtong ma hita marguru tudos tu rupa dohot pangalaho ni Debata, asa rade di hita haluaon na pinaradeNa. Songon na di Buku Endeta nomor 481 "Godang Dope Siguruhononmi", didok: "Godang dope siguruhononMi, asa tudos ho dohot Tuhanmi."
Marhaporseaon na Togu jala na Taruji Marhite na Manghaholongi Dongan (ayat 7)
Na manghamham Patik ni Debata i ma manghaholongi Debata sian nasa ateate, hosa, dohot roha, doshon ni i, i ma manghaholongi dongan jolma doshhon dirinta sandiri (ida Mateus 22:37-40). Saringar ni holong i dipatangkas di ayat 7 on tanda ni bagas ni holong i pajonokhon dirinta di panjouon dohot pamilliton ni Tuhan i. "Dung i holong ni roha di dongan ma di bagasan hadaulaton i, dung i holong ni roha di na saluhutna ma di bagasan holong ni roha di dongan i" (ayat 7). Di 1 Korint 13:13 didok "Asa tolu do na hot: I ma haporseaon, panghirimon dohot haholongon; alai haholongon do na umbalga i."
Ringgas Mulaulaon jala Marparbue (ayat 8 dohot 10)
"Ai molo jumpang angka i di hamu jala ganda, ndada loasonNa hamu losok jala so marparbue, laho mananda Jesus Kristus, Tuhanta i" (ayat 8). Jolma na so ringgas, tontu i ma jolma na malas manang na losok. Pingkiran ni halak si songon on pe majal do jala ndang humusor. Secara hataridaan na masa ndang tarpangke on agia tudia, jala ndang tarparbaga. Jolma si songon on, ndang mungkin boi manghusor ngoluna tu ngolu na lam denggan. Ala ni i do dipabagas di ayat 10, didok: "Dibahen i, ale angka dongan, lam ringgas ma hamu pahothon panjouonNa dohot pamillitonNa di hamu; ai molo diulahon hamu i, ndang olo be hamu tinggang." Jolma na olo ringgas mulaulaon, i ma jolma na olo dipatureture, jala rade marpanghirimon manang managam, adong parbue ni na hinaringgashonna.
Ndang Gabe Batu Partuktuhan (ayat 9)
Jolma na so tuk manang ndang dapot di ngoluna angka ulaon na marguna, hombar tu lomo ni roha ni Debata, dipatudos do i tu halak na mapitung, parmata na jonok, naung lupa di haiason sian dosa, na di ibana najolo; na tontu na jotjot tartuktuk mardalan na so marnida angka pambahenan ni Debata di hasesaan ni dosana. Mapitung di asi ni roha dohot haluaon na nilehon ni Debata. Ingkon ngolu na tarpasupasu do ngolu ni na porsea manang siihuthon Jesus jala gabe pasupasu, ndang gabe partuktuhan.
Kesimpulan dan Refleksi
Marragam do angka basabasa dohot haboion ni ganup jolma, jala saluhut haragamon i, silehonlehon ni Debata do i, hombar tu panjouon dohot pamillitonNa. Panandaon di basabasa dohot panghonghop ni Debata di ngoluna, boi do mangonjar ibana patupahon parlojongon na dumoras mangula dohot mangalojongi angka ulaon lomo ni roha ni Tuhan i. Satia jala marsihohot marguru tudos tu rupa dohot pangalaho ni Tuhan i manang sarombang dohot Tuhan na andul marasing sarombang dohot portibi on. On ma tandana na jinou jala na pinillit ni Debata, marsihohot mangihuthon panjouon ni Debata marhite na satia jala unduk mangulahon lomo ni roha ni Debata jala paholanghon diri sian angka hagiot ni portibi. Marhite huaso ni Tondi Parbadia pargogoionNa do hita mangula angka ulaon lomo ni roha ni Debata asal ma tinggil hita managihon soara panjouonNa i. Amen.
Posting Komentar