Jamita Minggu 18 Oktober 2026 Minggu Paduapuluhon Dung Trinitatis tarsurat di 2 Petrus 1 ayat 3 - 11. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Dijou jala Dipillit Debata." Rap ma hita mangihuthon hatoranganna.
Pendahuluan
2 Petrus 1:3-11 Marisihon sosososo manang sipaingot mamarangehon habadiaon; ima marhite namanjou naporsea asa marurat jala martumbur huhut matoras di Asi niroha dohot parbinotoan ni Kristus Yesus. Jala mangondoshon Natontong do diparade Debata sude angka naringkot dingolu ni angka nabadia jala tontong martambatamba gogo dohot bisuk dimangula angka ulaon namarguna di panjouon dohot pamillitonNa. Panjouon dohot Pamilliton i dipatupa marhite Pangauhonon natakkas manosohon angka naporsea mangauhon sian nasa gogo, marhite denggan ni parange di bagasan haporseaon i, dung i marhabisuhon di bagasan parange na denggan sian pangarajumion di diri, makkaholongi sude dongan sian biar mida Jahowa. Marhite namangulahon angka ondeng nungga patandaphon panjouon dohot pamilliton na tuhita togu marurat martumbur jala marparbue dibagasan ngolutta namamboan hita tu lomo n iroha ni Debata.
Pembahasan
Tangkas do taboto jala taantusi tujuan ni Debata manjou jala mamillit hita adong di portibion, ima asa marlapatan manang marguna ngolutta tu nahumaliang hita. Pandohan godang do natarjou alai otik do natarpillit ndang namandok namamiiti naso adil Debata, alai nagodangang do jolma mamillit dirina asa unang tarpillit. Asa marlapatan ngolutta ingkon barani do hita ndang sarombang dohot portibi jala hibul mangihuthon Tuhan songon na patandahon hita napilillit ni Debata. Ala huaso ni Debata naung dibasabasahon tu hita nasa natau hangoluan dohot hadaulaton angka namarguna di ngolu namarhabadiaon sian panandaonta di Debata namanjou hita di bagasan huasoNa namarmulia jala halongangani, ima marhite nanilehonna tu hita hagogoon ni hadebataonnai. Asa gabe partohap hita di hadebataonnai. Ngolu namarhabadiaon ima ngolu nadippulik sian haholomon ni portibion: NDANG SAROMBANG DOHOT PORTIBION, MARHAPORSEAON NATOGU JALA NATARUJI, RINGGAS MULAULAON JALA MARPARBUE, NDANG GABE BATU PARTUKTUHAN. Tasigati ma sadasada:
NDANG SAROMBANG DOHOT PORTIBION (ay 4-6)
… “dung sanga maporus hamu sian hamagoan, na di bagasan hahisapon na di portibi on. Ditikki sarombang hita dohot portibion on ma mambahen hita mago jala mate, ndabg partohap di hadebataon”. Dibahen i, haringgashon hamu ma sian nasa gogo, manurdukkon denggan ni parange di bagasan haporseaon i, dung i habisuhon ma di bagasan parange na denggan i. Marhite naolo hita manurdukkon denggan ni parange di bagasan haporseaon, dung i habisuhon ma di bagasan parange na denggan i. dung i pangarajaion diri ma di bagasan habisuhon i, dung i habengeton ma di bagasan pangarajaion diri i, dung i hadaulaton ma di bagasan habengeton i:
Marhite na so sarombang dohot portibion nunga tajalo be gogo dohot asi ni roha ni Debata na gabe sarombang manang sapangalaho (Karakter) hita dohot Kristus Jesus namanaluhon portibion. Tontong ma hita marguru tudos tu rupa dohot pangalaho ni Debata asa rade di hita haluaon napinaradena (BE 481)
MARHAPORSEAON NATOGU JALA NATARUJI MARHITE NAMAGKAHOLONGI DONGAN (Ay. 7)
Rangkoman ni patik ni Debata ima mangkaholongi Debata sian nasa roha, ateate, dohot gogo, doshon ni i mangkaholongi dongan jolma dohot diri sandiri (Mat 22:37-40). Saringar ni holong i dipatakkas di ay 7 on tanda ni bagas ni holong i pajonokkon dirita dipanjouon dohot pamilliton ni Tuhan i. Dung i holong ni roha di dongan ma di bagasan hadaulaton i, dung i holong ni roha di na saluhutna ma di bagasan holong ni roha di dongan i. 1kor 13:13 mandok “Asa tolu do na hot: Ima haporseaon, pangkirimon dohot haholongon; alai haholongon do na umbalga I”
RINGGAS MULAULAON JALA MARPARBUE (Ay. 8, 10)
Ai molo jumpang angka i di hamu jala ganda, ndada loasonna hamu losok jala so marparbue, laho mananda Jesus Kristus, Tuhanta I (Ay. 8). Jolma na so ringgas nunga tontu jolma na malas manang na losok. Pikkiran ni on pe majal jala ndang humusor. Secara hataridaan namasa ndang tarpakke on agia tudia jala ndang tarparbaga. Jolma na songonon ndang mungkin boi manghusor ngoluna tu ngolu na lam denggan. Alai ni ido dipabagas di ay 10; “Dibahen i, ale angka dongan, lam ringgas ma hamu pahothon panjouonna dohot pamillitonNa di hamu; ai molo diulahon hamu i, ndang olo be hamu tinggang”. Jolma na olo ringgas mula ulaon ima jolma na olo dipatureture jala rade marpanghirimon manang managam adong parbue ni nahinaringgashonna.
NDANG GABE BATU PARTUKTUHAN (Ay 9)
Jolma na so tuk manang ndang dapot di ngoluna angka ulaon namarguna hombar tu lomo ni roha ni Debata dipatudos tu namapitung, parmata na jonok, naung lupa di haiason sian dosa, na di ibana najolo; natontu najotjot tartuktuk mardalan naso marnida angka pambahenan Ni Debata di hasesaan ni dosana. Mapitung di asini roha dohot haluaon na nilehon ni Debata. Ingkon ngolu na tarpasupasu do ngolu ni na porsea manang siihuthon Jesus jala gabe pasupasu, ndang gabe partuktuhan.
Kesimpulan dan Refleksi
Marragam do angka basabasa dohot haboion ni ganup jolma, jala saluhut haragamon i silehonlehon ni Debata do i hombar tu panjouon dohot pamillitonNa. Panandaon di basabasa dohot panghongkop ni Debata dingoluna boi do mangonjar ibana patupahon parlojongon nadumoras mangula dohot mangalojongi angka ulaon lomo ni roha ni Tuhan i. Satia jala marsihohot marguru tu dos tu rupa dohot pangalaho ni Tuhan i manang sarombang dohot Tuhan naandul marasing sarombang dohot portibion. On ma tandana najinou jala napinillit ni Debata, Marsihohot mangihuthon panjouon ni Debata marhite nasatua jala unduk mangulahon lomo ni roha ni Debata jala paholangkon diri sian angka hagiot ni portibi. Marhite huaso ni Tondi Porbadia pargogoionNa do hita mangula angka ulaon lomo ni roha Ni Debara asal ma tinggil hita mambege soara panjouonNa i.
Posting Komentar