Jamita Partangiangan Epistel Minggu 1 November 2026 Minggu 22 Dung Trinitatis tarsurat di buku Psalmen 43 ayat 1 - 5. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Mangolu Hombar tu Lomo ni Roha ni Debata." Rap ma hita mangihuthon hatoranganna.
Pendahuluan
Buku Psalmen ima panindangion ni angka na porsea marhite ende, pujipujian, tangiang dohot araara manogihon dongan marsitutu manghaporseai Debata. Alani buku on marpardomuan tu ngolu peribadahan (partangiangan), adong do group ni angka parende di bagas joro i, ganup jumpang punguan manang partangiangan angka parende sian horong ni si Kora, sian Asab dohot na asing i ma mangendehon Psalmen on asa marture pamujion i hombar tu lomo ni roha ni Debata. Molo taida sian isi ni turpuk bindu 43:5 on adong do hasarupaon ni isina tu bindu 42:5, 11 na mandok: “Boasa tungki ho, ale tondingku jala boasa sai rusak ho di bagasan ahu? Haposi ma Debata, ai sai na pujionku dope Ibana, hatuaon ni bohingku jala Debatangku”. Lapatanna sada hasadaon do bindu 42 dohot bindu 43 diendehon tingki. Alani ma marhite sian bindu 42:1 na gabe hasarupaon ni panurat tu bindu 43 on ima na marharoroan sian bani Kora di bagas joro di Jerusalem nanisurathonna marharoroan sian pengalaman ni Raja Daud di tingki naniletelete ni Raja Saul manang di tingki naniusir ni anakna si Absalom sian harajaonna, masihol roha ni raja Daud di keadilan ni Debata jala marsigorgor rahana naeng mamuji Debata di bagas joro ni Debata. Turpuk on marisihon tangiang mangido tumpak maradophon musu huhut mangidohon tu Debata asa paluahonNa nasida sian roha hajahaton naniulahon ni angka baoa siulahon sipaotooto dohot hajengkelon. Asa turpuk on pajamothon huria sian roha mago ala mangalo lomo, ulaon, patik dohot sangkap hatuaon ni Debata gabe mangolu hombar tu lomo ni roha ni Debata. Jala manogunogu na porsea tu parsitutuon marsigantung holan tu holong dohot hatigoran ni Debata. Ai disi do haluaon, hasesaan ni dosa, hangoluan ni angka na martua dohot ngolu na manontong. Alani taida ma songon dia angka na porsea mangolu hombar tu lomo ni roha ni Debata marhite turpuk on.
Pembahasan
Mardalan di bagasan Hadaulaton (ayat 1-2)
Di ayat on dipangido parpsalmen do asa luluhonon ni Debata jala badahonon ni Debata badana dompak bangso na so Daulat. Dihilala ibana do dirina halak na daulat dohot na bonar di adopan ni Debata. Jala dihilala ibana dirina tongon di bagasan ancaman ni baoa siulahon sipaotooto dohot hajengkelon. Ise do baoa siulahon sipaotooto dohot hajengkelon di roha ni parpsalmen on? I ma Raja Saul dohot si Absalom na naeng mambuat takhta harajaonna sian raja Daud (patudos 2 Samuel 15). Didok parpsalmen do ai Debata do hagogoonna (Bahasa Indonesia: tempat pengungsian), boasa tung ambolonghononMu ahu? Merasa do parpsalmen on diambolongkon Debata sian joloNa. Bentuk protes ni ibana ma on tu Debata, ai menurut pingkiranna molo halak na nilinggoman ni Debata ingkon boi do pataluhon angka musuna jala sonang ngoluna. Jala diuduti ibana do muse manungkun tu Debata, “boasa ingkon sai martujungtujung ahu mardalan binahen ni pangarsahi ni musu? Halak na martujung i ma halak na tongon marsak ala ni angka haporsuhon na nialamanna. Haporsuhon di bagasan turpuk on i ma na mian ibana di bagasan panggosagosa ni musuna, ndada ala ni na hamatean ni na nihaholonganna ibana.
Ala ni dipangido ibana tu Debata asa unang ma nian ibana sai marsak martujung ala ni angka na binahen ni pangarsahi ni musu. Tu Debata do ibana marpangidoan ndada tu jolma manang tompatompaan ni Debata na asing i. Dipatarihon ibana boni ni haporsaonna na holan tu Debata ibana marsigantung di ngoluna. Ala ni boi taida sian parngoluon ni parpsalmen on taringot tu ngolu on. Molo tung pe mardalan di bagasan hadaulaton ndang sai manontong mian di bagasan ngolu las ni roha alai sipata dipaloas Debata do angka na porsea i mian mardalan di bagasan arsak ni roha manang pangunjunan. Ala ni sipangidoon sian Debata, asa Debata ma pamonang angka na porsea i pamonangkon pangunjunan i.
Mardalan di bagasan Hatigoran ni Debata (ayat 3-4)
Sihol ni roha ni parPsalmen naeng borhat nangkok bongot tu bagas joro di Jerusalem jumolo do dipangido ibana sian Debata hatorangon dohot hatigoran asa i manogu ibana di pardalananna tu langgatan bagas joro ni Debata. Di bagasan haporsuhonna, parPsalmen on sihol rohana marnida pambahenan ni Debata di bagasan ngoluna jala aha do napinangido ni Debata sian hadirionna. Disadari ibana do ndang boi ulahononna saluhutna i anggo holan sian dirina sandiri, sialani disungkun jala dipangido ibana do dalan (petunjuk) sidalananna sian Debata. Asa dung dilehon Debata hatorangon dohot hatigoranna i ima dalanna nangkok tu bagas joro ni Debata, jala dung sahat ibana di bagas joro langgatan ni Debata ma ibana pasahathon pamujionna mardongan parhinaloan (hasapi). Asa molo saut napinangidona i, saut ma ibana muse mangarajai harajaon Israel. On ma bentuk penyerahan hidup ni ibana tu Debata asa Debata na manguluhon ngoluna di bagasan hatigoran i.
Haposi ma Debata (ayat 5)
Ayat parpudi sian turpuk on patuduhon paboa parPsalmen on berusaha patoguhon rohana naung malala i asa tongtong togu marpos ni roha tu hagogoon ni Debata. Disadari ibana do paboa di ujungna ndang adong di ibana alasan tertekan jala merasa ditadingkon manang diambolongkon Debata na gabe sipargogo di ibana nang di bagasan haporsuhon. Debata do sipargogo jala Debata do na mangalehon pasupasu tu ibana. Alani dihaposi rohana ma Debata jala sai na pujionna do Debata ni hatuaonna na manontong di ngoluna.
Kesimpulan dan Refleksi
Gok angka arsak, hamaolon, parsahiton nang sitaonon na taadopi di bagasan ngolunta, songon i do nang angka las ni roha. Marsingkat sorin do ro tu bagasan ngolunta. Sipata tahilala dao jala martabuni Debata sian hita. Alai taingot ma na Debata do napaluahon hita sian angka hamaolon na mambaen marsak roha jala Debata do na mangalehon angka las ni roha dohot ragam ni pasupasu. Holan hagogoon ni Debata do na tau tapangasahon, ndada gogonta sandiri, na gale do hita. Di saluhutna i, tapasahat ma ngolunta tu Debata di bagasan tangiang dohot elekelek. Ai holan ibana do na tau mangurupi hita jala Ibana do na marlulu dompak hita gabe marhamonangan hita. Molo tung pe sipata ndang sahat na hinirim ni rohanta, jala gabe na so tahirim i do ro, na mambaen sipata Debata manabunihon bohiNa sian hita, alai ingot ma Ibana do na mangalehon inganan paradianan di hita, padaohon hita sian angka parmaraan dohot musu, Ibana do na mangalinggomi hita.
Aha do responta molo dialusi Debata tangiangta? Nunga malua hita sian dosa marhite hamamate dohot haheheon ni Kristus. Nunga ditangihon tangiang hasesaan ni dosanta, nunga muba arsak ni roha gabe las ni roha. Sibahenonta ima pasahat hamauliateon ni roha dohot pujipujian tu Debata jala mangolu ma hita hombar tu lomo ni roha ni Debata ima mardalan di bagasan hadaulaton, mardalan di bagasan hatigoran ni Debata jala tongtong hita manghaposi Debata di ngolunta on. Unang sanga mansadi hita mandok mauliate dohot mamuji Debata tarlumobi ma alani Kristus Jesus naung paluahon hita sian hamatean alani dosa i. Alani, tama do tapuji Ibana di saluhut na binahenNa i. Jala taarahon ma angka dongan natorop laho mamuji Debata asa lam mananda nasida di asi ni roha ni Debata jala mangolu ma hita hombar tu lomo ni roha ni Debata. Amen.
Posting Komentar