Jamita Partangiangan Epistel Minggu 4 Oktober 2026 Minggu 18 Dung Trinitatis tarsurat di buku Mika 4 ayat 1 - 5. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Pasangaphon Debata di bagasan Saluhutna." Rap ma hita mangihuthon hatoranganna.
Pendahuluan
Mika i ma sahalak panurirang na marharoroan sian huta “Maresa (B.Ind :Moresyet), sada luat tar hira 35 Km tartungkan Selatan ni kota Yerusalem. Na manurirangi dimasa panggomgomion ni Raja Jotam, Ahas dohot Hiskia, angka raja sian Juda (Mika 1:1). Jala sezaman ma panghobasionna dohot panurirang Jesaya, alai umposo saotik panurirang Mika on sian panurirang Jesaya. Panurirang Mika dijou Debata laho maminsang/mencela pangalaho ni bangso Israel dohot Juda na so mencerminkan pangoloion tu Debata Jahowa, bahkan nunga dilaosi jala diluntak luntak nasida patik dohot uhum ni Jahowa. Mika memprotes pangalaho ni angka Induk ni bangsoi na mangarupa halak na pogos, angka Malim na manjalo upa laho mangajari, Panurirang manjalo perak laho mangarunding/menenung marhite na mangasahon Jahowa (Mika 3 :11). Songon i angka tuan tanah, mangarupa angka halak napogos jala na dangol, sandok sude patujolohon angka na ringkot didirina be so pola mamarrohahon angka halak na pogos, ketidak adilan sosial merajalela. Alani, panurirang Mika manuriranghon uhum sipamasaon ni Debata, tu tonga ni bangso na mangalaosi patik ni Tuhan i marhite parange hageduhon hinagigihon ni Debata. Ninggalaonna ma Sion gabe hauma tur, Jerusalem gabe timbunan batu jala dolok ojahan ni joroi gabe tombak (patudos Mika 3 :12) papatarhon harorongso ni kota Jerusalem diangka ari na mangihut.
Mansai tangkas paruhumon sipamasaon ni Debata disuriranghon panurirang Mika tu bangso Israel alani pangalaosion dohot hajahaton nasida, tontu sada dalan do i manogu bangso parparange na geduk i asa marroha mulak tu Jahowa jala paubahon rohana. Jala panurirangon ni si Mika on ndang holan maminsang dohot pabotohon uhum sipamasaon ni Jahowa, dohot do nang bagabaga taringot tu haluaon dohot kesejahteraan silehonon ni Debata disuriranghon si Mika. Ia bagabaga sinuriranghon ni panurirang Mika on ima taringot tu Harajaon hadameon; ima turpuk Epistel on.
Pembahasan
Turpuk dibuhai dohot pandohan :”Jadi masa ma sogot di ujung ni angka ari...”, ia pandohan on martudutudu tu ari nanaeng ro, ima ari manang masa hagogok ni bagabaga ni Jahowa tu bangsoNa taringot tu haroro ni Harajaon na gok dame (Zaman Mesianis). Ia partingkian manang zaman i dipapatar marhite haoojak ni dolok ni joro ni Jahowa dipunsu ni angka dolok, jala huminsat sian angka robean. Pandohan punsu ni angka dolok , jala huminsat sian robean ima sada analogi na manggombarhon hatimbulon dohot hamuliaon ni harajaon ni Jahowa na mangalobi i bahkan andul sian nasa harajaon na adong diportibion. Harajaon ni Tuhan i mangatasi saluhut angka harajaon na adong dihasiangan on. Ia harajaon I, ima harajaon na binoan ni Jesus Kristus Anak ni Debata Sipaluai jala silehon hadameon I na sian pinompar ni si Jakob. Marrongoman ma tu Ibana angka bangso, jala mardalan torop bangso parbegu na mandok : ‘beta hita nangkok tu dolok ni Jahowa, dohot tu joro ni Debata ni si Jakob asa diajarhon tu hita angka dalanNa”. Ia angka bangso nanidokna ima angka bangso diduru ni Israel atau Non Yahudi na ro mandapothon, mamongoti harajaon nagok dame i, ai sian Sion do marharoroan patik I jala hata ni Jahowa sian Jerusalem. Sian Sion/Jerusalem do marlopuk patik dohot hata ni Jahowa tu torop bangso diportibion. Dimana Israel adalah awal Dimana Tuhan memperkenalkan diriNya kepada banyak umat didunia ini. Bangso parbegu gabe bertobat jala ro mangguruhon hata ni Debata Jahowa jala taruli parbinotoan taringot tu dalan ni Jahowa laos mardalan diangka lapangna. Ongkuhonon nasida ma hapapatar ni harajaon na gok dame i jala marsitiopan nasida tu barita Nauli ni Kristus Raja Dame i.
Andigan ma tagamon masa ari nanidok ni turpuk on; ima diari na binuhul ni Jahowa, partingkian haroro ni AnakNa Jesus Kristus ro tu portibion laho humophop jolma pardosa. Ai dibagasan na managam dope bangso Israel diharoro ni Mesias naung pinarbagahon ni Debata tu nasida. Jesus ro tu portibion mamboan dame dohot haluaon; ai marhite hamamateNa diparsilang dipadame ma jolma pardosa dohot Debata. Tontu haroro ni Jesus on mamboan perubahan, ima perubahan moral ni jolma marhite hata, patik ni Debata na tangkas jala ondol diajarhon tu bangso i lumobi marhite ragam angka tanda pinatupaNa. Pangajaran dohot angka ulaon pinatupa ni Jesus on mangungkap roha ni torop jolma manghaporseai Ibana songon Mesias na pinarbaga ni Debata. Masa haroro ni Jesus tu portibion, ndada na mangadopi parporangan be Israel songon uju dimasa ni angka raja dihamamasani hapanurirangon ni si Mika on (bnd Jes 10:6; Jer 30:10). Alai masa hasonangan do ai nunga dibasabasahon Debata haluaon i tu bangsoNa dohot tu torop jolma na olo mardalan marhite goar ni Jahowa.
Bagabaga ni Debata na sinuriranghon ni panurirang Mika on tu bangso Israel, patubu las niroha dihadirion ni panurirang i, tarida do i sian paralusan (respon) ni panurirang i na membangun komitment na sekaligus janji tu Debata marhite na mandok :”Alai anggo hita mardalan marhitehite goar ni Jahowa Debatanta rodi saleleng ni lelengna” (ay 5). Tontu janji on panghorhon ni bagabaga ni Debata na patubu semangat dohot penghiburan dihadirion ni panurirangi nang pe sorat jala loja ibana patupa ulaon pinasahat ni Tuhan i tu dirina, jala ditingki na binuhul ni Tuhan i patar ma hasintonganNa dohot asi ni rohaNa.
Kesimpulan dan Refleksi
Nunga digohi Debata Jahowa bagabagaNa sinuriranghon ni panurirang Mika on marhite haroro ni Jesus Kristus tu portibi on. Ro do Ibana tu portibi on jala pola mate tarsilang laho humophop saluhut jolma pardosa, asa malua sian hamagoanna. Jala marhite haroroNa i do dipajongjong Ibana harajaon na gok dame naung binagabagahon ni Debata tu bangsoNa, i ma huriaNa di partingkianta nuaeng. Jesus do na gabe Raja dohot ulu na maniop hapamarentaon di bagasan huriaNa i. Jala hita halak Kristen do na gabe warga ni harajaon ni Kristus i. Di bagasan hasintongan dohot habonaron do Jesus mamarenta huriaNa i, diajari jala ditogutogu do hita halak Kristen mardalan di hasintongan marhite hataNa. Jala hata ni Tuhan i patubu haimbaruon di bagasan ngolunta angka na manghaporseai Ibana, songon nidok ni Apostel Paulus: Ai molo di bagasan Kristus halak, na tinompa na imbaru ma i. Nunga salpu pangalaho na robi i, gabe na imbaru (ida 2 Korint 5:17). Halak naung pinaimbaru ni Tuhan i, ndang be mulak tu haburukon alai ingkon boi mananggali jolma na buruk i, i ma pangalaho na jahat na sian hisaphisap ni daging. Taingot ma na nidok ni Apostel Paulus: "Alai paimbaru hamu ma dirimuna di bagasan tondi ni rohamuna. Jala solukhon hamu ma jolma na imbaru, na tinompa suman tu Debata, di bagasan hatigoran dohot hapolinon na marhasintongan" (Epesus 4:23-24). Marhite haimbaruon pinatupa ni Tuhan i ma hita tarbaen satia mangoloi hataNa jala manongtong mangihuthon dalanNa. Halak na tongtong marpangoloion tu Tuhan i patut ma dapotan dame na sian Tuhan i di ngoluna. Jala halak naung taruli hadameon na sian Tuhan i, rade jala olo ma mardame nang tu donganna jolma huhut pasiding angka parbadabadaan, parsalisian dohot parmusuon. Karena selain menjadi pemberita damai, orang Kristen juga harus menjadi pelaku damai sejahtera dalam hidupnya. Martua ma sibahen dame, ai goaron do nasida anak ni Debata (Mateus 5:9). Angka anak ni Debata ingkon manghamauliatehon basabasa ni Debata marhite na pasangaphon Debata di bagasan saluhutna. Saluhutna, i ma na meliputi pingkiran, parange na sintong, na daulat, na tigor, na bontor, na uli, na denggan begeon ro di sude na targoar haburjuon, na tau pujipujian (patudos Pilippi 4:8). Angka on ma na patut sihangoluhonon ni angka na porsea tu Kristus asa tau jala ndang martihas di haroro ni Kristus na paduahalihon tu portibi on manogu ganup na porsea tu joro ni Debata na huminsat sian saluhut harajaon na di portibi on.
Posting Komentar