Jamita Partangiangan Epistel Minggu 8 November 2026 Minggu 23 Dung Trinitatis tarsurat di buku 2 Timoteus 2 ayat 22 - 26. Tapabagas ma pangantusionta taringot tu turpuk ni Jamita Partangiangan (Epistel) on. Hombar tu Almanak ni Hurianta dibahen ma ojahan ni Jamita Partangiangan (Epistel) "Mangulahon Hatigoran dohot Hasintongan." Rap ma hita mangihuthon hatoranganna.
Pendahuluan
Ia turpuk jamita on ima manaringoti angka poda ni apostel Paulus tu si Timoteus asa dipasiding angka hasonangan dohot hisaphisap ni haposoon jala dieahi ma hatigoran, haporseaon, holong ni roha, dohot hadameon tu angka na porsea. Laos diondolhon si Paulus do ringkot ni naposo ni Debata marpangalaho na so parbada, alai halak na burju, na malo mangajari, na sabar, jala na lambok manogunogu angka na mangalo hata ni Tuhan i asa muba jala mulak tu hasintongan.
Pembahasan
Di ayat 22 didok do angka poda taringot tu ‘kepribadian’ (hadirion ni jolma marpangalaho hombar tu usia pardagingon). Sebagai halak na bajar (poso) si Timoteus dipodai do asa Maporus sian hisaphisap ni haposoon: Dipangido si Paulus do tu si Timoteus asa pasidinghon pangunjunan dohot hasonangan portibi na somal di tingki haposoon. Molo halak na so mabiar mida Debata di tingki haposoonna olo do hijang pikkiranna, maol mangorom diri tu hisaphisap ni daging. Lumobi songon na masa saonari on (masa kini) mansai godang godaan, mura-mura dapot informasi, situasi na manogu jolma i tu godaan hisaphisap ni daging baik marhite internet manang laho tu inganan na didok ‘dugem’ (dunia gemerlap; isarana laho tu klub malam dohot diskotek marhappy-happy). Mura-mura dope tartogu angka halak naposo tu sisongoni. Jala molo ndang diotapi dirina, lumobi ala adong misikna, adong kesempatanna, jala ndang adong muse na paresohon ala sahalakna do tinggal di indekost manang apartemenna, gabe olo ma tarjollung naposo i tu angka sisongon i.
Sian dia do ro Hisap-hisap ni daging? Di hadirion ni ganup do jolma adong dorongan dohot hisap-hisap. I ma ala hajolmaon i nunga madabu tu dosa mulai sian si Adam. Ditompa Debata do jolma i marpamatang na ias, alai ala ni hadadabu i, gabe daging na sega do angka pamatang i, na gok hagiot ni dosa. Ndang adong na porlu diajari manang dilatih asa adong hisap-hisap; hehe do i sian daging na madabu ni ganup jolma. Mura do taida angka pangalaho na rorang na masa di sude tingkatan ni masyarakat sinuaeng on. On ma hasil ni jolma na pasonanghon hisap-hisapna marhite ragam pangalaho.
Hadirion ni si Timoteus ima sada gambaran, nang pe poso di pardagingon, alai boi do mangorom diri tu hisaphisap ni daging, lumobi ma ala adong na mamodai. Suang songon i ma nian nang nuaeng, ingkon olo do angka parhalado ni huria, angka natoras mamodai ianakkonna asa diorom dirina sian hisap-hisap ni daging haposoon. Mangeahi hatigoran, haporseaon, holong dohot hadameon: Ingkon diulahon ibana do angka sikap na denggan on jala diulahon ibana parsaoran dohot angka dongan na manjou Tuhan i sian roha na tulus.
Didok do muse, asa tongtong mangaramoti parsaoran dohot Tuhan Jesus marhite na manjou Ibana sian ias ni roha. Ringkot do luluanta parsaoran dohot dongan di partondion na boi rap martangiang, manjaha Bibel, dohot marsaor di huria. Angka na manjou Tuhan i sian ias ni roha ima secara kelompok dohot pribadi ima dalan asa margogo hita laho malua sian hisap-hisap ni daging. Ianggo holan mangasahon dirinta sendiri, olo do mura hita talu manang tergoda. Holan marhitehite Kristus do hita boi monang di paraloan i. Tuhan Jesus pe diboto do hagaleon ni pardagingon ni manisia i, umbahen ido didok: “Ndang tarula hamu agia aha, anggo so mardongan Ahu.” (Joh 15:1)
Ulaon ni Naposo ni Debata (Ayat 23-26): Pasiding ma parbadaan na so marlapatan: Ndang jadi naposo ni Debata marsoal na so marguna, na holan parohon parbadaan. Alani i angka naposo ni Tuhan i ikkon do burju, mura diajari, jala sabar. Dipatuduhon manang digombarhon ma pangalaho na denggan i marhitehe jamita manang poda. Lambok manogunogu huhut mangalehon kesempatan tu angka na so mangolu dope di hatigoran dohot hasintongan asa marhamubaon jala mananda hasintongan ni Debata. Tujuan utama disi ima hamubaon ni roha dohot haluaon. Asa adong kesadaran ia nasida ndang mangolu dope di poda ni Debata. Pangajarion ni si Timoteus ima asa dapot nian kesadaran ni jolma i na mamboan nasida malua sian angka jorat ni sibolis na mangihot ibana. Didok di turpuk on: “Pasiding ma angka sungkunsungkun haotoon na ngongar” (ayat 23) ima angka panghataion na patubu parbadaan. Dibahen ima, ndang jadi parbadabada naposo ni Debata, ingkon burju do ibana maradophon saluhut halak”. Ia turpuk jamita on mansai hombar do tu situasinta nuaeng, tarlumobi molo diskusi na berkelanjutan (diskusi panjang dan mendalam) na mamboan tu persoalan haporseaon. Porlu do hita manghatai dibagasan hata na lambok laho manogunogu angka jolma na mangalo, ai atik tung lehonon ni Debata kesempatan tu nasida asa marhamubaon ni roha, jala gabe dalan manogunogu nasida asa ditanda hasintongan i” songon na didok di ayat 25.
Manghatai na lambok tu dongan ndang holan tanggung jawab ni naposo ni Debata. Sai anggiat ma saluhut angka na manghaholongi Debata jala na marsangkap manghatindanghon taringot tu Kristus tu angka dongan jolma, margogo mamaritahon hasintonganNa marhite parange na gok holong na tarida di pangkataion na lambok. Sai anggiat ma ganup hata na tadok dohot na tarsurat pe (isarana marhite hita surat, chat, sms) sai tongtong mamangke hata na lambok. Didok ma on nuaeng, pemakaian literasi yang baik dan benar.
Kesimpulan dan Refleksi
Ia turpuk jamita on, tung ampit situtu do taringot tu parngoluon ni halak Kristen lumobi angka parhalado ni huria. Sude do hajolmaon ingkon mamolus haposoon i, ndang adong na pintor matua manang matobang di pardagingon. Laos tudosan ma on, ndang na ingkon matobang daging asa boi matobang nang pikiran dohot pangalaho pe. Sude do boi manguluhon hatigoran dohot hasintongan na sian Tuhan i, molo taradoti patik dohot uhum ni Debata sian unduk dohot serep ni roha. Na boi monang do hita di paraloan i molo sangkambona hita dohot Kristus i songon ranting ni hau anggur na sada dohot bonana. Molo nunga sirang ranting i sian bonana, holan mangolu sangombas nama i. Songon ima manisia i, ndang boi sirang sian Tuhan i, asa boi monang sahat ro di ujung ni ngoluna. Ramoto dirim jala pangke ma Hata ni Tuhan gabe modal/ hagogoon di ngolum. Amen.
Posting Komentar