Epistel Minggu 22 November 2026 Minggu Ujung Taon Huria tarsurat di buku Pangungkapon 14 ayat 12 - 13. Tapabagas ma pangantusionta taringot tu turpuk ni Epistel on. Hombar tu Almanak ni Hurianta dibahen ma ojahan ni Epistel "Hamonangan ni Halak na Bonar." Rap ma hita mangihuthon hatoranganna.
Pendahuluan
Songon sahalak pribadi na terpenjara punjun sasadasa di sada pulo, tung boi do dipanghilalahon Apostel Johannes songon na nihilala ni angka na porsea na porjolo i. Halak na porsea i na parjolo i i ma huria ni Tuhan na porjolo; halak Kristen. Parir jala tung hansit do parniahapan ni nasida hatiha i. Mansai godang do angka tantangan niadopan nasida. Antar songon diskriminasi, intimidasi, pangaleleon, bahkan dohot pembantaian. Saluhutna i, hinorhonni haporseaon ni nasida maradophon Tuhan Jesus Kristus. Dibahen i, unang magopo nian haporsea ni nasida i, alani parungkion i. Alai, lam margogo ma nian nang pe ingkon boluson ni nasida nasa rumang ni kekejaman ni angka kesar namarhuasa atiha i. Uju marhuaso ma Kesar Domitianus di taon 81-96 M. Tung mansai dihasogohon kesar i do halak Kristen. Lumobima, tung dihalomohon rohana do asa haru mate Apostel Johannes di Pulo Patmos i. Jala, halak Kristen naung marserak i pe, tongtong do mengalami hasusaan sian kesar on. Bahkan, sebelum pamarentaan ni kesar i pe, nungga tung godang dialami angka halak Kristen naparjolo i, angka bentuk tantangan ni ngolu. Sian abad naparjoloi pe, ima tingki masa ni Kesar Nero sahat tu Kesar Diokletianus, nungga mansai godang jala marragam angka uhum dipandabuhon tu halak Kristen. Jala saluhutna i bertujuan asa haru ditadinghon angka halak Kristen naparjolo i nian haporsean ni nasida i. Tontu, di situasi si songon i, olo do manghorhon pandelean dohot arsak ni roha di rohani angka naporsea i. Tohoma tutu, tu ise ma nasida angka ruas naparjolo i mangalualuhon angka parungkilonna i, haru angka apostel i pe, ditangkupi jala dipasiaksiak do. Dibahen i, ndang habis angkal si Johanes laho manogarnogari jala pahibulhon haporsean ni angka naporsea i tu Jesus marhite surat natinongosna. Asa molo tung pe ndang boi bohi padompakdompak jala tangan laho marsihaolan, alai marhite surat natinongosna on, boima pasingkophon panghirimon di saluhutna huria. Anggiat ma tutu boi lam tu hibulna jala toguna haporsean ni nasida marhite angka surat na tinongosni angka apostel i, secara khusus ma surat ni apostel Johannes on, natinongosna tu saluhut angka ruas ni huria.
Pembahasan
Ia pustaha Pangungkapon ima rimpunan ni saluhut surat nanigurithon jala tinongos ni Apstel Johannes uju di penjara ma ibana punjun di Pulo Patmos. Angka surat natinongosni Apostel Johannes ditujuhon ma i tu pitu huria na di Asia (Pgk. 1:4). Pangungkapon nanialamanni Apostel Johannes tontu sangat mangalehon dampak positif do on tu saluhut huria. Nang pe godang angka hata nabersifat simbolik, alai laos i do nagabe ondolan ni surat on patuduhon tu angka nanaeng masa sogot (Apokaliptik). Ia namasa sogot ima panghirimon ni halak naporsea. Asa mangolu di bagasan panghirimon natutu angka naporseai tu Tuhan Debata nang pe dibolus nasida nasa ragam ni hasusaan. Dibahen i, tung ampit do peritiwa pangungkapon on nanilehon ni Debata marhite Jesus Kristus tu Apostel Johannes asa dihatindangon. Panindangion on ma nagabe hatontuan ni panghirimon ni halak Kristen asa marimbanghon angka kesar namarhuaso i. Adong dope nausangap jala namarhuaso gumonggom portibi on, ima Tuhan Jesus. Artina disi, Tuhan Jesus nabinaritahon angka Apostel i, marhamonangan do Ibana dohot marhabangsa di banua ginjang. Jala manggomgom saluhut pangisini portibi on. Termasuk dohot angka kesar i. Jadi maksud ni Pangungkapon on ima laho patuduhon habalgaon ni Tuhan Jesus, anak ni Debata nasinomba ni angka naporsea naung manghamonangkon portibi on sian ihot ni dosa. Asa nasa parungkilon dohot angka gogo ni portibi ndang tuk mangagohon huaso ni Tuhan Jesus Kristus naung terpatri di rohani angka naporsea. Ima nagabe togartogar di angka naporsea. Unang gabe ura maheu haporseaon ni nasida maradophon Tuhan Jesus nabinartahon ni angka Apostel i.
Angka hatahata na bersifat simbolik nangking bertujuan do i laho mengelabui angka prajurit Rom nabage parhitean ni surat natinongos ni Apostel Johannes on tu angka huria i. Ai dijaga ketat do angka adminitrasi surat menyurat atiha i. Jadi, asa bebas sian penyeleksian jala asa boi sahat surat i, ingkon ma mamangke angka hata hiasan Apostel Johannes patoranghon pangungkapon i tu saluhut huria. Secara khusus ma di turpuk on. Ima taringot tu panguhuman ni Debata maradophon angka jolma. Hatahata hiasan taringot ari paruhuman i, tontu ndang hira masuk akkal ni prajurit i on i. Umbahen i boi lolos surat ni Apostel on mandapothon angka huria napitu i. Alai, ndang holan napitu i, dohot do nang angka huria di inganan na asing. Ai nang pe dipangke bilangan pitu di si, tong do adong maksud ni apostel i disi, ima angka pitu merupakan angka nabadia secara simbolik di kalangan halak semit. Namarlapatan, suatu hal yang sempurna; singkop. Singkop do tutu denggan basa ni Jahowa marhite Tuhan Jesus manghokkop saluhut huriaNa i. Jala saluhutna do angka huria i mangantusionsa. Tolu surusuruan songon nanidokna di ayat 6-9 i. Angka surusuruan namamboan tolu tona di panguhuman ni Debata. Asa susuruan naparjolo manonahon sososo taringot tu barita nauli naung dibaritahon angka Apostel namandok asa marhabiaran tu Debata sambingma saluhut jolma ai nabadia jala nasongkal do Ibana gumonggom portibi on. Surusuruan napaduahon manonahon taringot tu kehancuran Babel. Artina, salpu do nasa sangap dohot gogo ni portibi on dohot nasa hagiotna. Jala, surusuruan napatoluhon manonahon taringot tu rimasni Debata tu halak namangoloi jala namanomba binatang i dohot gombaranna.
Songon pandohan na di ginjang. Godang do angka hata di pustaha on mamangke angka istilah. Tona ni surusuruan napatoluhon on adongma hubunganna dohot kesar Nero. Hombar tu sistem penulisan huruf di halak Rom. Setiap huruf adong do kaitanna dohot nilai numerik (angka), ima sistem gematria. Jala hombar tu sistem gematri, binatang dohot gombaranna naminaksudna di son ima Kesar Nero. Binatang i ima goarna 666, namarlapatan Nero (bnd. Pgk.13:18) . Jala muse, Kesar Nero ima kesar napaonomhon mamarenta di Rom atiha i. Anggo di bahasa sonari 666 i didok ma i “anti Kristus”. Toho ma tutu, ai Kesar Nero on tung mansai anti hian do tu Kristus dohot angka siihuthon Kristus. Dibahen i tutu, tarjalo roha do pandohan ni surusuruan napatoluhon on ia binatang dohot gombaranna naminaksudna disi ima Kesar Nero. Ai dirohani Kesar Nero, asa haru siaphonon nian angka siihuthon Kristus, asa dungi naeng ibana ma sisombaon. Dibahen i, marhite pangungkapon on, naeng nian saluhut angka naporsea i manongtong marhasatiaon tu Debata. Sotung alani kekejaman ni Kesar Nero i, gabe umbiar an nasida marimbanghon Debata. Ai tolu surusuruan on ima simbol hasitolusadaon ni Debata do i namanggomgom jala mangharingkothon ngoluni angka naporsea. Idama, Ibana do namanongtong sian na robi sahat tu nuaeng on, nabinaritahon ni angka panurirang, apostel, misionaris, dohot angka parjamita si nuaeng on marhite angka barita nauli. Salpu do angka parjahat bolon jala angka sipangasahon gogo di portibi on mulai sian najolo sahat tu sinuaeng on. Alai Anggo Tuhan Debata manongtong do sahat ro di saleleng ni lelengna. Ndang tarpatudos Ibana dohot angka raja, kesar, dohot angka uluan di Portibion. Laos boha bahenon ni nasida laho mangambati dohot paintophon angka sisomba Debata, ndang tuk gogo nasida disi. Nang pe adong siihuth angka raja, kesar, dohot angka uluan i, alai gumogo dope Tuhan Debata laho mansiaphon nasida marhite panguhumanNa.
Di masa panguhumanni Debata on, disi do tandi rumang ni hasatiaon ni angka na porsea. Ai na marsiak bagi pe nasida alani haporseaonnasida tu Debata, dalan do i laho patanghon haporseaonnasida laho mangalusi angka tona ni surusuruan na tolu i. Dibahen i, di ayat 12 didok, “Disi ma jumpang habengeton ni angka na badia…”. Jala songon pandok ni, Rom 5: 4, “Jala dihorhon habengeton ni roha i do hatauon, jala hatauon i do mangkorhon pangkirimon.” Ditongatonga ni haporsuhon ni angka halak Kristen naparjolo i, manongtong do nasida marsihohot di na mangaradoti patikni Debata. Asa unang gabe tarsulandit nasida hinorhonni parulaon dohot pambahenan kesar i laho palindaklindak nasida. Alai, sai marhaporseaon tu Jesus ma nasida jala marpanghirimon di tongatonga ni panghuman i. Ima posni rohani angka halak Kristen naparjolo i, bahwasana pangungkapon on ndada holan sebatas togartogar on, alai lebih kepada kedahsyatan ni holong ni roha ni Debata namangungkap harajaonNa tu angka nasatia tu Ibana. Alai, nalnal do muse rumangni ngolu ni angka natangakang marroha; angka naso mangoli Debata najustru gabe bagian ni kesar Nero i. Ima, ingkon hona rimasni Debata nasida di panguhumani di bagasan api dohot barerang. Jala sebagai pustaha Apokaliptik, nanaeng sipatuduhonna muse tu angka halak Kristen i ima hangoluan dung hamatean sian portibi on adalah suatu hal yang pasti. Artina di si, asa boi pe masa panguhuman ni Debata tu angka jolma, ima di tingki ro ajal ni jolma. Ai nasa jolma ingkon mate do. Dibahen i, tagan di hasiangan on dope nasida jala tung marungkil pe nasida di portibi on. Ingkon boi ma nasida mangalapati huhut manghangoluhon tona ni surusuruan ni na tolu i. Ai surathononon do i napabotohon sebagai halak namartua do angka naporseai i uju ro ajalni nasida i.
Kesimpulan dan Refleksi
Di Minggu Ujung Taon Huria dohot Parningotan ni Angka Naung Monding on. Manigor ma tahe ingot hita dipandohan “memento mori” artina, sai ingotma ari hamateanmu. Salpu do portibi on nang hita pe. Jala nasa gogo nang arta pe, tong mangihut salpu do i. Dibahen i, porlu manat situtu hita marateatehon angka parulaonta be. Ai didok tondi i do ayat 13 i, “mansohot ma nasida sian parungkilonnasida, ai na mangihut ma tu nasida niulanasida i!” Aha ma naung ta ula tutu di tongatonga ni parungkilonta? Ai di agenda ni HKI bagian namananom namonding, dijahahon do turpuk on. Namandok ma i, asa molo marungkil pe hita di portibi on, lumobi ma i alani haporseaonnta tu Tuhan Jesus, sotung gabe tarsulandit hita laho mangulahon dosa. Asa unang gabe mangihut dosa i bahen panguhum di hita di tingki ro ajalta. Mangingot ajalta, ndang nagabe pabiarbiarhon hita i. Alai, laos gabe tona do i dihita asa taboto membenahi diri tagan di hasiangon on dope hita. Unang lemba jala tarlalap diparulaon naso tama jala pangalaho na so marpangolion tu Debata. Asa molo tabolus pe nasa ragam ni haporsuhon ni ngoluon, unang gabe tapartamenghon i laho pasingtonghon pangalaho na so suman. Manigor ma taingot rumangni ngolu angka naporseai naparjolo i. Tandi do nasida, manghilalahon nasa ragam ni haporsuhon, alai benget, tua, jala marpanghirimon do nasida di situasi i. Ai, tangkas do pangungkapon i dibaritahon, naro ma Debata gabe panguhum tu saluhut jolma alai gabe pandaoni bolon tu saluhut angka naung “loja” jala naeng “maradian” tu bagasan panghaolan ni Debata. Tona ni surusuruan natolu i, ingkon ingot di rohanta. Asa di tingki ro ajalta, tatanda Tuhan Debata nasongkal jala nabolon i. Ibana ma tasomba, tapasangap, jala gok hamuliaon ma GoarNa marhite parange, pangaloho, dohot parulaonta molo tung marragam angka tontangan laho mangulahonsa. Ai songon pandohan ni Tuhan Jesus di Markus 8: 34-36 do ngoluni halak Kristen, namandok, “…Nasa na giot mangihuthon Ahu, disoadahon ma dirina, dituhuk ma silang na tu ibana i, diihuthon ma Ahu. Ai na naeng paluahon hosana, mangagohonsa do; alai na agoan hosa ala ni Ahu dohot ala ni barita na uli i, i do paluahonsa. Ai aha ma antong gunana di jolma, nang liat portibi on diomo, anggo mago do hosana?”. On ma muse hamonangan ni halak na bonar. Amen.
Posting Komentar