Jamita Minggu 15 November 2026 Minggu 24 Dung Trinitatis tarsurat di Lukas 19 ayat 11 - 27. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Naposo na Denggan Roha jala na Satia." Rap ma hita mangihuthon hatoranganna.
Pendahuluan
Umpama, somal do i diula angka rabbi manang guru laho mangajari angka siseanna. Termasuk ma i angka filsuf dohot angka natuatua tu angka dakdanak manang na umposo na girgir marsiajar. Boasa ingkon marumpama? Ala marhite umpama boi do dijalo torop ni jolma sian sude horong, mulai sian dakdanak sahat tu na matua. Tung godang do jolma na manghalomohon turiturian manang ilustrasi, ndang bosan jolma i tu angka istilah-istilah manang teori-teori na maol astusan. Umpaman dang holan mangalehon alus, alai huhut terbuka tu angka ragam penafsiran, jadi boi dikembangkon sandiri.
Ojahan ni evangelium di Minggu on sarupa to epistel, ima “Naposo na denggan roha jala na satia”. Molo di Daniel 6:1-6, diondolhon taringot tu pandonganion ni Debata tu si Daniel mangadopi angka hamaolon dohot abatabat na ro, alai molo di turpuk on ima taringot tu hasatiaon dohot haringgason ni na marbarita nauli huhut paimahon raja mulak sian luat na dao.
Pembahasan
Di turpuk on dibahen Jesus umpama taringot tu pangkal na pinalumehon. Turpuk on manguduti poda taringot tu harajaon ni Debata. Jadi, songon bagian panimpuli ma on, sian konteks na parjolo jala sai didatdati angka sisean i manungkun poda harajaon ni Debata. Songon dia do naposo na denggan roha jala na satia mangula? Dibahen Jesus ma umapama on laho mangurupi angka sisean i mangalapati harajaon ni Debata. Dietong angka sisean i do molo naeng mangkatai taringot tu harajaon ni Debata, ingkon marpardomuan do i tu “langit”. Hape ndada songon i prinsip ni Tuhan Jesus. Nang pe harajaon ni Debata dihatahon, tong do angka na marpadomuan to ngolu na di tanoon. Martigatiga, ima ulaon na adong di tanoon, ndang adong ulaon martigatiga di langit. Ndang sarupa pamingkirion ni sisean tu Jesus. Sai naeng do dihirim roha ni sisean asa tongoson ni Jesus surusuruan sian ginjang laho mangurupi nasida mangalo huaso ni Rom. Naeng ma nian dipatudu Jesus diriNa patuduhon harajaon na marmulia, gok huaso dohot angka soldadu surgo.
Baliksa do hape dibahen Jesus. Tigatiga do dihatai Ibana laho mangajari angka siseanNa taringot tu harajaon ni Debata. Sada raja na didok di ay 12 ima Jesus sandiri, ala Ibana do anak ni raja sian Juda, marga ni Israel. Naeng borhat tu “luat na dao”, manjalo harajaon. Luat na dao marlapatan ma i banua ginjang manang surgo, ai sian i do Jesus ro jala ingkon mulak tusi, hundul di siamun ni Debata Ama. Di umpama i, jou raja i ma naposona sampulu halak, on ma representasi ni halak Israel, adong ma on na manjua, alai adong do na satia. Disuru ma angka naposona on martigatiga. Adong paling saotik 4 siparadehon partigatiga asa boi singkop sigadisonna: modal, haringgason, roha na lambas dohot pangomoan.
Modal
Sude partigatiga ingkon adong modal na laho sigadisonna. Jadi, ndang adong na so marmodal angka siihuthon Kristus. Sude do manjalo modal laho marusaha (ay 13 dohot 15) nang pe marasing be hasil hombar tu kemampuanna (ay 16, 18, 20). Modal na didok dison boi do songon talenta na di Mateus 25, lapatanna, dilehon be do basabasa tu angka halak Kristen laho mangula manang marbarita nauli. Jadi, dipatudos Lukas on do marbarita nauli songon na martigatiga, alani i unang sai dipandang jolma negatif ulaon na martigatiga. Ulaon na positif do sude na masa di hasiangan on molo tigor dipadalan. Nian, ndang ulaon na neang dipasahat Tuhan I tu hita, ulaon na bolon do marbarita nauli, alai ndang dipasombu hita “tangan kosong”, dilehon be do modal tu hita, taparhaseang ma i.
Dipangido raja i do hasil ni ulaon. Lapatanna, saleleng ndang di huta i ibana, ingkon mangula ma naposona i hombar tu tona naung dipasahat (ay 15). Halak Kristen nunga manjalo pandidion na badia dohot parpadanan na badia. Nunga manjalo asi ni roha ni Debata, Alani i ingkon girigir do hita mulaulaon. Diontang Debata do hita tu holong dohot asi ni rohaNa ndada asa gabe si gurbak ulu, alai asa gabe ringgas. Didok Poda ni raja Salomo: “… ida hamu ma porhis i, parateatehon ma dalanna” (Poda 6:6). Taida ma partigatiga na ringgas, tibu do ibana dungo laho mamungka tigatigana, dung borngin baru pe tutup. Karejo pe hatop, nuaeng on didok “gercep” (gerak cepat). Ingkon songon i ma nian naposo ni Debata na mangula di huria, sai ringgas mulaulaon asa taruli sude ruas jala lam rarat na porsea tu Jesus Kristus.
Haringgason
Dipangido raja i do hasil ni ulaon. Lapatanna, saleleng ndang di huta i ibana, ingkon mangula ma naposona i hombar tu tona naung dipasahat (ay 15). Halak Kristen nunga manjalo pandidion na badia dohot parpadanan na badia. Nunga manjalo asi ni roha ni Debata, Alani i ingkon girigir do hita mulaulaon. Diontang Debata do hita tu holong dohot asi ni rohaNa ndada asa gabe si gurbak ulu, alai asa gabe ringgas. Didok Poda ni raja Salomo: “… ida hamu ma porhis i, parateatehon ma dalanna” (Poda 6:6). Taida ma partigatiga na ringgas, tibu do ibana dungo laho mamungka tigatigana, dung borngin baru pe tutup. Karejo pe hatop, nuaeng on didok “gercep” (gerak cepat). Ingkon songon i ma nian naposo ni Debata na mangula di huria, sai ringgas mulaulaon asa taruli sude ruas jala lam rarat na porsea tu Jesus Kristus.
Angka naposo na maniganigahon bagianna, tontu jolma na lambas roha nasida. Alana marparbue do angka na niulana (ay 16-18), kecuali na so olo mangulahon (ay 20). Jotjot do tabege poda ni partigatiga: “Pembeli adalah raja”. Lapatanna ingkon serep do hita melayani panuhor. Ingkon sabar mangadopi angka pangalaho konsumen. Jala songon i marbarita nauli. Naposo na denggan roha, ingkon sabar mangadopi jolma sihobasanna. Adong ma i na parmurukmuruk, adong ma i na gale, adong ma i siginjang roha. Ingkon boi lambas rohanta manogunogu i. Adong do partingkianna “ditohor” nasida barita naulia na “tagadis” i. Ingkon tabahen dalan asa boi ungkap rohanasida. Parbisnis na lambas, di sada tingki pasti sukses. Investor na lambas, di sada tingki pasti marparbue investasina. Naposo ni Tuhan na lambas, di sada tingki pasti lam godang siseanna, na porsea tu Jesus.
Roha na Lambas
Marragam do kemampuan ni jolma na martigatiga, alani i marragam be angka pangomoanna. Naposo na parjolo mangomo ma sampulu bagian. Las roha ni raja i jala dilehon ma tu naposo na denggan roha i sampulu huta laho gomgomanna (ay 17). Na paduahon, mangomo lima bagian, jala dilehon ma tusi lima huta gomgomanna (ay 19). Na asing na i, ndang dipadalan bagianna. Anggo naposo na parpudion ditungkus bagian na di ibana i tu saputanganna (ay 20). Ditambai muse arsak ni rohana di ay 21: “…biar do rohangku mida Ho, ala na horas ho; dibuat ho do na so pineakkonmu, jala digotil ho do na so sinuanmu”.
Naposo na parjolo dohot na paduahon dapotna do silehonlehon alani na satia padalanhon modalna. Alai na parpudi on gabe hona uhum. Boasa gabe hona uhum? Adong dua alasan, sada: ndang dipadalan ibana modalna, alai ditungkus tu saputanganna. Lapatanna, si gurbak ulu do on. Ndang tama jolma sisongonon gabe naposo na denggan roha jala satia. Sude do jolma manjalo basabasa sian Debata, alai adong do i na so olo mamparhaseangkon tu ulaon na denggan. Adong do deba halak Kristen na so olo parduli tu harajaon ni Debata. Na so olo loja, na so olo rugi, dohot na so olo mangadopi resiko. Ndang olo mamingkiri dohot mangantoi manang aha na masa di harajaon ni Debata dohot di huria ni Kristus: maju manang mundur, hehe manang lonong, dipasombu sude.
Pangomoan
Alasan na paduahon, ditambai muse arsak ni rohana. Sai adong do memang na songon on di tongatonga ni punguan ni halak Kristen. Nunga na soadong pambahenanna, godang muse hatahatana. Molo hata na sintong, tabo dope, hape na so sintong muse dihatahon. Didok mabiar, na horas, dibuat na so pineakhon, jala digotil na so sinuan. Hape, dilehon do modal, pangomoan i pe adong do upana gariada gumodang. Jadi ndang logis jala ndang tingkos siarsahononna.
Na dipangido raja i ndada pangomoan sambing, alai ingkon patuduhonon ni naposo i ma nian na marguna ibana. Autsugari pe i dilehon tu si anahi hepeng, boi hian do adong kompensasi. Alai nunga tung marlompitlompit hasalaanna, patut ma jaloonna uhum na borat sian raja i. Alani i, halak na manjalo asi n iroha jala olo manghalojahon i laho paherbangkon harajaon ni Debata, jaloonna ma muse kesempatan asa lam marguna ibana, alai na so olo manghalojahon ulaonna, buatonna ma sian i.
Kesimpulan dan Refleksi
Dilehon Debata do tu hita basabasa, na gabe modal di hita. Tahamauliatehon ma i jala taparhaseang di ngolunta siganup ari. Gabe halak Kristen na ringgas ma hita mulaulaon, taida angka na masa di punguanta dohot di hurianta. Talehon ma dirinta hombar tu siadongan dohot kemampuan di hita. Investasi na umbalga di jolma, ima hapistaran dohot hahipason. Dikembangkon ma i marhite poda ni Kristus asa lam gomos haporseaonta. Taboan ma dirinta laho mambangun harajaon ni Debata asa lam herbang jala lam marsangap ma Debata.
Dilehon do muse partingkian manang kesempatan di hita laho mamparhaseangkon basabasa ni Tuhan i. Tahamauliatehon ma i jala tapangke tingki dohot denggan huhut mangkirim di haroro ni Kristus na pasingkophon ngolu ni jolma di harajaonNa. Unang lemba, taharinggashon ma asa unang mago basabasa naung tajalo i. Unang holan mangapian di hahormaton na di portibion, gabe luangan ma hamuliaon na sian surgo i. Naposo na denggan roha ingkon jamot mamparateatehon angka na masa di humaliangna. Ingkon arga mangida na otik, na metmet. Benget mangadopi tantangan, arga mamangke tingki jala satia tu ulaon na dipasahat Debata. Amen.
Posting Komentar