Jamita Minggu 22 November 2026 Minggu Ujung Taon Huria tarsurat di buku Maleaki 3 ayat 13 - 18. Tapabagas ma pangantusionta taringot tu turpuk ni Jamita on. Hombar tu Almanak ni Hurianta dibahen ma ojahan ni Jamita "Hamonangan ni Halak na Bonar." Rap ma hita mangihuthon hatoranganna.
Pendahuluan
Di masa ni panurirang Maleaki (abad ke-5 sM), tung mansai lumlam do anggo peribadahan ni Bangso Israel. Issarana, ndang marhasatiaon be bangso i maradophon Debata marhite namangharingkothon ngolu nabadia songon parsitutuan napasahathon pelean parsampuluan. Gabe terkesan ndang ringkotbe namarTuhan ala nga sumurut be rasa “tanggung jawab” ni nasida maradophon Bagas Joro i. Terjadi kesenjangan sosial dohot angka haramunon ni parngoluon; songon pangalangkupon, pargabuson, dohot penindasan di tongatonga ni bangso i. Asa dungi, hombar tu lapatanni goarni panurirang i, ima Maleaki (bhsa Heber; mal’akhi), namarlaptan utusanku manang suruanku. Disuru, Debatama si Maleaki pasahathon hataNa namarondolan tu rimasni Debata maradophon angka natangkang marroha dohot pasupasuNa tu nabonar roha. Dalan ma on, laho patotahon tu rohani bangso Israel bahwasana namarsitutu do Debata di angka haputusanNa. Jala, hinorhonni i, ingkon tangima rohani bangso i laho umbagesa. Secara khusus, di turpuk on, ima perbedaan ni angka na tangkang marroha dohot tu angka namanghabiari Jahowa. Ia angka natangkang marroha i, marhatuaon tu angka najungkat marroha do nasida. Alai, angka namanghabiari Jahowa, sai tu Jahowa do nasida maporus. Asa dungi, tung tandi do ianggo hasurungan ni ngolu ni halak partigor ima halak sioloi Debata marimbanghon halak parjahat ima halak naso sioloi Debata. Antong antar songon dia ma rumang ni hasurungan i hombar tu pandohan “hamonangan ni halak na bonar” i?
Pembahasan
Hirahira taon 450 (abad ke-5 sM), panurirang Maleaki tampil laho manurirangi bangso Israel. Jala, hombar tu taon nai, hira adong ma kesenjangan partingkian (masa) di tonga-tonga bangso Israel dung ruar nasida sian habuangan. Nungga mulak be bangso i tu Jerusalem jala nungga mansai leleng nasida manguduti angka ulaonna songon nasomal. Bahkan, Bagas Joro ni Tuhan i pe nungga sidung dipauli dung kehancuran hebat di masa habungan Babel. Hasomalan peribadatan pe nungga mardalan songon nasomal. Bai dohonon berada dalam zona aman jala sonangma dihilala bangso i atiha i. Alai, laos di son ma adong kesenjangan partingkian sinangking, marhite naso adong be parbaritaan taringot tu haroroni ni Mesias songon naung binaritahon ni angka panurirang sebelumna. Dung hira “sonang” bangso i, jala ndang adong be sosososo taringot tu haroroni Mesias si nangking, gabe lemba ma nasida mangulahon hapatuton peribadatan. Gabe songon nalilu manang mahiang ma anggo parrohahon ni nasida. Tarida ma i sian parulaon ni nasida na so mangharingkothon peribadatan, pasahat pelean nang parsampuluan. Jala laos taridama pangalahoni parulaon i, marhite angka pambahenan na so ture, ima roha naso marpangoloion tu Debata. Songon naung pinatorang di patujolo di ginjang.
Ia rumang ni ngolu na so marpangoloion tu Debata, marhite turpuk on ima halak namarhatuaon tu halak siula najahat. Artinya, gabe adong hasomalon di tongatonga bangso i mangolu berpatokan tu jolma si ula najahat. Jala parulaon nasongoni sai hira wajar laho siihuthonon. Hape, naso tinagam ni roha jala ndang disadari nasida, nga tung mambahen jut ni roha ni Debata nasida di si. Ai panghorhonna nda holan tu pribadi ni sahalak jolma i masa, nagabe songon virus do roha na so marpangoloion tu Debata i tu humaliang. Na justru banyak mempengaruhi jolma di tongatonga ni bangso i na sai mangihutihut, tanpa mamingkiri efek sampingna secara sosial dohot maradophon Debata. Nda lam lumlam ma tutu, anggo gabe sai adong ma pandohan ni nadeba, songon pandohan si nuaeng on namandok, “Eme namasak digagat ursa, i namasa, ima taula” manang “Bah, molo nasida boi, boasa hami ndang boi mangulahonsa”. Asa molo nidok pe nangking, songon virus, ala hombar tu pandohan ni Par-Pslamen i do, ima di Psalmen 73: 2-3, “Alai anggo ahu, tarsulandit ne ma tothu, tinggang ne do ahu. Ai mangiburu do rohangku mida angka na jungkat roha, dung huida hasonangan ni angka parjahat.” Nagabe boi do olo ura-ura terpengaruh angka jolma holan marnida pangalaho ni siula hajahaton. Ala hombar songon namasa di tongatonga ni bangso Israel. Nagabe kewajaran ma antong di nasida naso pola be mangharingkothon parsampuluan tu Bagas Joro ni Debata. Ai holan marhatuaon tu halak naso mangulahonsa i be antong nasida. Hape, gabe sai hira “tarpasupasu do ngoluna”. Tontu, gabe dilematis do on dirohani angka nadeba. Antong di rohani nasida, ndang ringkot marpangoloion tu Debata, ai tongdo “tarpasupasu” ngoluni nasida.
Nangpe, bonsir ni turpuk on, taringot tu parsampuluan na so pinasahat ni bangso i tu Debata marhite bagas joroNa. Alai, napaling mirisna nueang di bagasan turpuk on ima naung mago rasa biar mida Jahowa sian tongatonga ni bangso i. Ala ternyata, situasi kondisi kesenjangan partingkian sinangking sangat membekas mambahen muba parulaon ni angka jolma tu naso denggan. Mansai ginjang do rohani bangso i maradophon Debata. Umbahen sai marpangusandean tu gogo ni jolma sambing nasida. Ai dipabalga nasida do hatahatana dompak Debata, mandok ndang marlaba be jolma i marroha nabiar maradophon Debata. Ala soadong be roha biar mida Debata, tontu boha muse ma nasida maradophon angka dongan jolma. Sian i ma hataridaan ni angka pangalaho najorbut umbahen tercipta kesenjangan sosial dohot angka haramunon di tongatonga ni bangso i. Tontu, nagabe “korban” di son ima halak natigor marroha. Ima halak namarpangoloion tu Debata. Umbahen i sai ditangihon Tuhan Debata do nasida. Diparulaon ni nasida ditongatongani halumlamon namasa, tongtong do nasida biar mida Jahowa. Asa i ma nagabe bukti atas hasatianni nasida beribadah tu Debata. Ia hasatiaonni halak namarDebata marhite naberibadah, sai tandi do hilalaonni songon pandohan di ayat 17 namandok, “Jadi Ahu ma nampuna nasida…”. Toho ma tahe, ndang saluhutna hape boi hona virusni hajahaton bangso i. Sai na adong do nakebal, ala roha nabiar mida Jahowa marhite ibadah. Ibadah ima sarana laho patotahon hadirion ni bangso i maradophon Jahowa, di bagasan roha nabiar jala marpangoloi. Asa nangpe dipalindaklindak ni pangalaho dohot parulaon najahat nasida manigor do Debata manatap jala marateatehon nasida marhite buku parningotan.
Ia buku parningotan on ima buku namandok, aktif do tongtong Tuhan Debata manurati huhut marparrohahon angka parulaon ni halak natigor marroha. Dibahen i, molo pe masa adong kesenjangan partingkian dohot ndang adong sosososo taringot tu barita kemesiasan i. Ndang namandok bahwa Tuhan Debata pasif dohot ndang maulaulaon. Alai, jusru di situasi sedemikian Tuhan Debata manurati angka bukti hasatiaonni bangsoNa di buku parningotan i. Jala ditingki manang ari sijadionNa i, ima sada ari naingkon patuduhon ni Debata diriNa songon Ama napangkaehe anakna. Hinorhonni i ndang marisuang parulaonni nasida nasailaon maradophon Debata nangpe dipalindaklindak angka natangkang marroha nasida. Ndang na holan sada togartogar on tu angka nabiar mida Jahowa, alai sada hatontuan do on tagan dihasiangan on dope nasida. Ai na sai tarida do hasurungan ni halak partigor hinorhonni peribadaton ni nasida tu Debata. Asa margogo jala toguma panghirimon ni bangso i tu Debata. Lumobi ma i gogo laho mangalo elaelani angka hajahaton na songon virus sinangking. Songon pandohan ni parPsalmen, di Psalmen 1: 3 “Songon hau do ibana, na sinuan di topi ni batang aek, na marparbuehon parbuena di hajujumpang ni tingkina bulungna pe ndang olo malos, jala sude na niulana manjadi do.” Dibahen i, ingkon dihajamothon bangso i do naberibadah tu Debata jala marhasatiaon laho mangulahonsa. Ndang namandok manigor luput nasida sian angka hasusaan, alai setidakna nungga adong gogo di nasida mangadopi panghorhonni kesenjangan ni partingkian sinangking. Jala muse diparrohahon Tuhan Debatama nasida marhite buku parningotan i.
Kesimpulan dan Refleksi
Sipata hinorhonni angka situasi namasa di bagasan ngolunta on. Jotjot ma olo hita terlena. Godang sibonsirina, salah satuna ima angka zona aman na hita alami di bagasan ngolunta. Hamoraon, hagabeon, dohot hasonangan olo do gabe mamboan hita tu halembaon namarTuhan. Tangkang muse ma pangalahonta jala parulaonta pe ndang suman, manigor ma gabe contoh buruk hita dinahumaliang. Jala laos diihuthon angka nahumaling i muse ma hita. Nda lam lumlam ma tutu ngolu on? Ima naso tasadari gabe virus hita tu angka dongan. Ndang sadar hita, naung lam keruh ngolu on tabahen. Hape, sai marpanatap do Jahowa sian ginjang. Situasion na songon on, sarupa ma dohot teori katak rebus. Katak manigor do mangalumpat molo langsung dipamasuk tu aek namarsigogor. Alai, merasa aman do katak molo dipamasuk tu aek nangali na lagi digorgori. Hinorhonni i gabe mate palanpalanma katak i. Artina, disi olo do sipata zona amanta gabe ancaman dihita. Dibahen i, ringkot do hita naberibadah tu Debata. Asa unang sai tadok, marisuang naberibadah tu Tuhan Debata. Unang lemba hita mangihuthon angka naringkot dinamarTuhan. Issarana napasahathon angka pelean. Unang lea hita laho mangulahonsa. Ai sian i, diparrohahon Tuhan Debata do parsitutuan ni rohanta naberibadah tu Ibana. Jala unang uraura hita paihutihut angka pangalaho dohot parulaon natangkang. Ala tabereng ngolu ni nasida sahira “natarpasupasu”, ai songon pandohan di Psalmen 73, “Sai unang ma mohop ateatem mida angka parjahat i, jala unang mangiburu Ho mida angka siulahon hajungkingon. Ai doras do nasida sabion songon duhutduhut, jala marmalosan nasida songon tumbur ni duhutduhut.Sai marhaposan tu Jahowa ma ho jala ulahon na denggan; inganhon ma tano i jala radoti haburjuon…”
Di Minggu Ujung Taon Huria dohot Parningotan ni Angka Naung Monding on. Boha ma tutu pangalaho dohot parulaonta dinamamolus nasa rumang ni ngolu namarragam i. Marhite turpukni jamita on, disosohon tu hita, asa manongtong hita marhasatiaon tu Debata di bagasan roha nabiar jala namarpangoloion. Ai magira salpu do portibi on, hape sai lemba dope hita. Idama, angka dongan naung parjolo lao i maninggalhon hita. Laos so adong nanggo sada sian nasida boi mulak muse lao mandapothon hita. Artina, manongtong do parlao ni nasida. Boha ma rohanta di si? Sai lalap dope hita sai hira namanongtong ngolunta di hasiangan on ndang adong hamubaon ni diri? Dibahen i, andorang so ro dope tingkina. Beta tapastihon, bahwasana dicatat Tuhan Debata do ulaning goarta di buku parningotan i? Tanda ni napinarohahon Tuhan Debata hita? Antong lam taharinggashon ma naberibadah tu Tuhan Debata. Molo tung pe ndang manigor mandapot laba hita sian i, bahkan sahira namarisuang sipata tahilala, alai setidakna nungga tapatuduhon dirinta sebagai anak nasai masihol dipanghaolanni Debata nasebagai Ama di hita. Ima hamonangan ni halak na bonar. Amen.
Posting Komentar